Panangisuro ken Kristi nga Agayat iti Dios

IDI 1977, naipasngay ti anakmi a ni Kristi. Di nagbayag, adda makapadanag nga imbaga ti doktor: Naipasngay ni Kristi nga addaan iti nakaro a kinatuleng ken nakaro a cerebral palsy (pannakadadael ti utek sakbay wenno bayat ti pannakaipasngay a mangapektar iti panagtutunos dagiti masel ken iti panagsao). Dimi ammo idi no ania ti epekto daytoy iti panagbiagmi.

Sumagmamano a bulan kalpasanna, rinugianmin ken ni Gary ti nagatender kadagiti naisangsangayan a klase idiay siudad ti Melbourne, Australia, a nakasursuruanmi no kasano ti makilangen iti anakmi. Sinarungkaranmi met ti National Acoustic Laboratory idiay Melbourne. Adda sadiay dagiti babassit a hearing aid a naikabit iti sangapulo-bulan a ni Kristi. Dina kayat dayta, ken yantangay addaan daytoy kadagiti barut, nalaklakana a rabsuten dagitoy ngem iti panangisublimi manen iti babassit a lapayagna! Masapul met nga adda dagiti maikabit kenkuana a pagtengngel kadagiti bateria, a medio nadagsen.

Gapu iti cerebral palsy, marigatan ni Kristi nga agsursuro a magna. Isu a masapul a linawas a mapan iti physical therapist. Idi agtawenen ti tallo, makapagnan ni Kristi, nupay agkaratumba. Nagtultuloy ti physical therapy-na agingga idi lima ti tawenna. Kabayatanna, immakarkami iti asideg nga ili ti Benalla, a sadiay ti nagnegosiuan ni Gary.

Panagadal ni Kristi

Imbaga kadakami ti maysa a maestro dagiti tuleng a naisangsangayan a panagadal ti kasapulan ni Kristi. Masapul nga umakarkami manen idiay Bendigo a maysa a siudad nga addaan iti eskuelaan dagiti tuleng. Tangay masikogak idi iti maikadua nga anakmi, intantanmi ti immakar agingga nga uppat ti tawenen ni Kristi ken lima a bulanen ti anakmi a ni Scott. Nangrugi ti linawas nga speech-therapy iti maysa nga ospital idiay Bendigo​—panangagas a nagtultuloy iti simmaganad a sangapulo a tawen. Nagadalkami met ken Gary iti sign language.

Ti naespirituan a panagadal ni Kristi ti kangrunaan a pakaseknanmi. Agpadakami ngamin ken Gary a Saksi ni Jehova. Kayatmi a padakkelen ni Kristi “iti disiplina ken panangiturong-panunot ni Jehova.” (Efeso 6:4) Ngem kasanomi nga aramiden dayta? Kinuna ti prinsipal iti pagad-adalan ni Kristi: “Ti panangisuro ken Kristi maipapan iti Dios ti karirigatan nga isuro. Di makita ti Dios, isu a kasano nga ilawlawagmo ti Dios kenkuana?” Anian a karit ti naipasango kadakami! Idi agangay, naammuanmi a masapul ti adu a tiempo, panagadal, ken anus.

Idi damo, nagusarkami kadagiti retrato ken diagrama, ken inkagumaanmi a pagbalinen a simple ti sasaomi. Intugotmi ni Kristi kadagiti Nakristianuan a gimong ken iti panangasaba, uray no dina unay maawatan ti mapaspasamak. Idi nalaingen ni Kristi iti sign language, maawatan ken masagrapnan a naan-anay ti bambanag a dina pay napadpadasan idi! Nupay kasta, adu a sao, grupo ti sasao, ken kapanunotan iti Biblia ti narigat nga ilawlawag. Maysa kadagiti paboritona a libro ket Ti Librok Dagiti Estoria ti Biblia,a a nairanta a naisurat nga agpaay kadagiti ubbing. Talaga a nakapatpateg dagiti namaris a ladawan​—agraman ti dadduma a diagrama nga inaramidmi. Idi agangay, napatanor ni Kristi ti panagayatna iti Dios.

Siaasi nga inyam-ammonakami ti prinsipal iti pagad-adalan ni Kristi iti dadduma pay a Saksi a mangpadpadakkel met kadagiti tuleng nga annak. Adda napasamak a dakkel nga irarang-ay idi inlawlawagda no kasano a makakasaba dagiti tuleng kadagiti makangngeg a tattao. Maysa kadagiti pamay-an isut’ panangtedmi kadakuada iti kard a nasuratan iti Nainkasuratan a mensahe. Isu nga idi nakasaganan ni Kristi a mangiranud iti kinapudno ti Biblia iti sabsabali, nalakan nga aramidenna dayta! Nagbalin a di bautisado nga agibumbunannag ti naimbag a damag idi agtawen iti 14. Nabautisaran idi 1994, idi agtawen iti 17.

Ngem kasapulan ni Kristi ti nasayaat a pannakilangen, ket marigatan a makigayyem kadagiti makangngeg a Saksi. Isu a dakami ken Gary nagisurokami iti klase ti sign language kadagiti kakongregasionmi nga interesado a tumulong kadagiti tuleng. Dadduma a nagadal kadagiti klasemi ti nakastrek idi agangay kadagiti panggedan a nainaig iti panangipatarus para kadagiti tuleng. Ngem napatpateg pay, adu a nakasursuro nga agsenias ti maragsakan unayen a makisarita ken Kristi. Magunggonaan itan ni Kristi kadagiti Nakristianuan a gimong ken asamblea. Aktibon a makipaspaset kadagitoy. Agyaman unay ni Kristi iti naayat nga interes dagiti kakabsat kenkuana.

Naminsan, imbaga ni Kristi a kayatna ti agbalin a regular pioneer, wenno ebanghelisador iti amin a tiempo. Tinulongan ni Gary a makaala iti lisensia nga agmaneho, ket kalpasan a naipagna dagiti papeles, nadutokan ni Kristi a regular pioneer idi 1995. Idi 2000, nakastrek met iti part-time a trabaho iti maysa nga elementaria. Tumultulong sadiay a mangisuro kadagiti tuleng nga ubbing.

Ita, agserserbikami amin kada Kristi, Gary ken Scott kas regular pioneer. Maragsakankami a mangbusbos iti tiempo a mangisuro kadagiti tattao maipapan iti Diostayo a ni Jehova!

‘Dagiti Kiddaw ti Pusomi’

Ti kinatuleng ni Kristi ket maysa pay laeng a karit kadakami amin. No dadduma, no makipaspaset ni Kristi iti Nakristianuan a ministerio, awan ti mangipatarus para kenkuana, awan ti pangiranudanna kadagiti kapanunotan ken riknana. Kunana: “Mariknak a kasla agnanaedak iti pagilian a naiduma ti pagsasaoda.” Nupay kasta, nasursuromi amin a daeran ti kasasaadna.

Maliwliwakami iti nadakamat iti Salmo 37:4: “Agragsakka iti napalalo ken Jehova, ket itdennanto kenka dagiti kiddaw ta pusom.” Ti namnama a tartarigagayan unay ni Kristi ket makangngeg iti musika ken ti uni ti nakaparsuaan ken mangngegna ti pannakisarita dagiti ay-ayatenna. Segseggaak ti aldaw inton mangngegen ni Kristi ti timekko. Mamatikami a daytoy a kiddaw ti pusomi ket asidegen a maited kadakami, kas inkari ti Biblia.​—Isaias 35:5.​—Naipatulod.

[Footnote]

[Ladawan iti panid 14]

Ni Kristi, idi 14 a bulanna, agraman “Ti Librok Dagiti Estoria ti Biblia”

[Ladawan iti panid 15]

Ni Kristi a mangikaskasaba iti naimbag a damag babaen ti panangusarna iti nayimprenta a kard

[Ladawan iti panid 15]

Da Scott, Kristi, Gary, ken Heather Forbes itatta