Ipategyo Dagiti Kakabsatyo a Tuleng!

TI ILI ti Dios ita ket buklen ti dakkel a pamilia dagiti agkakabsat iti pammati a nangrugi pay idi nagkauna a panawen. Karaman iti dayta dagiti lallaki ken babbai a kas kada Samuel, David, Samson, Rahab, Moises, Abraham, Sara, Noe, ken Abel. Adu kadagiti matalek nga adipen ni Jehova ket tuleng. Kas pagarigan, ti umuna a nagbalin a Saksi ni Jehova idiay Mongolia ket agassawa a tuleng. Ken gapu iti kinatarnaw dagiti tuleng a kapammatiantayo idiay Russia, adda nangabakantayo a kaso iti European Court of Human Rights.

Iti kaaldawantayo, nangipaay “ti matalek ken masirib nga adipen” kadagiti publikasion iti sign language ken nangorganisarda kadagiti kongregasion agraman kadagiti asamblea ken kombension iti dayta met la a lenguahe. (Mat. 24:45) Pudno a nagunggonaan iti dayta dagiti tuleng.a Ngem napanunotyo kadin no kasano karigat a maammuan dagiti tuleng ti maipapan iti pudno a Dios ken no kasanoda a rumang-ay iti kinapudno no awan dagita a probision? Ania ngata ti mabalinyo nga aramiden tapno matulonganyo dagiti tuleng iti lugaryo?

Dagiti Probision Sakbay ti Kaaldawantayo

Ania ngata ti isungbat dagiti natataengan a tuleng no damagenyo no kasanoda a naam-ammo ti Dios? Mabalin nga ibagada kadakayo no ania ti riknada idi damo a naammuanda nga adda nagan ti Dios​—no kasano a binalbaliwan dayta a kinapudno ti biagda ken nakatulong dayta tapno makapagtalinaedda a matalek iti adu a tawen sakbay a naipablaak dagiti video wenno DVD iti sign language a mangpauneg iti pannakaammoda kadagiti Nainkasuratan a kinapudno. Mabalin nga ibagada no kasano ti pannakaangay ti gimong idi saan pay a maikonkondukta wenno maipatpatarus iti sign language. Masapul idi nga adda umabay kadakuada nga aginotar tapno makitada dayta ket matarusanda ti maipalpalawag. Iti kasta a pamay-an a ti maysa a kabsat a tuleng nasursurona dagiti kinapudno iti Biblia iti uneg ti pito a tawen sakbay nga adda dimteng a paraipatarus (interpreter).

Malagip pay dagiti natataengan a Saksi a tuleng no kasano ti mangasaba kadagiti makangngeg a tattao. Bayat nga ipakpakitada ti index card a nakaisuratan ti mensaheda, ipakitada met ti kabaruan a Pagwanawanan ken Agriingkayo! Marigatanda met a mangyadal kadagiti padada a tuleng nga usarda dagiti nayimprenta a publikasion nga agpada a saanda unay a maawatan. Malagipda met ti pannakaupayda no saan ida a matarusan dagiti kaskasabaanda isu a malimitaran dagiti mairanudda a kinapudno. Ammoda ti rikna ti nasged nga ayat para ken Jehova ngem saanda met a sikokompiansa a makapagtignay maitunos iti dayta. Apay? Dida ngamin masigurado no umiso ti pannakaawatda iti maysa a banag.

Iti laksid dagita a lapped, dagiti kakabsat a tuleng salsalimetmetanda ti kinatarnawda. (Job 2:3) Sigagagar nga agur-urayda ken Jehova. (Sal. 37:7) Adu kadakuada ita ti bembendisionanna iti nalablabes ngem iti ninamnamada.

Usigentayo ti panagregget ti maysa a kabsat a tuleng a maysa met nga asawa ken ama. Sakbay a napataud dagiti video iti sign language, regular nga idadauluanna ti panagadal ti pamiliada. Malagip pay ti anakna: “Kanayon a marigatan idi ni Tatang no agadalkami kas pamilia yantangay dagiti laeng nayimprenta a publikasion ti mabalinna nga usaren a mangisuro kadakami. Masansan a saanna a naan-anay a maawatan dagita. Ket gapu ta napartakkami a mangdillaw kadagiti di umiso a panangilawlawagna, ad-addan a narigatan. Ngem iti laksid amin dagita, kanayon latta nga ikonduktana ti panagadal ti pamiliami. Para kenkuana, napatpateg nga adda maadalmi maipapan ken Jehova ngem iti sagpaminsan a pannakapabainna gapu iti limitado a pannakaawatna iti Ingles.”

Ti sabali pay a pagarigan ket ni Richard, a nasurok a 70 ti tawenna ken maysa a tuleng ken bulsek nga agnanaed idiay Brooklyn, New York, E.U.A. Isu ket pagaammo a regular kadagiti gimong. Tapno makatabuno, aglugan iti tren sa bilangenna dagiti pagsardengan tapno ammona no kaano a dumsaag. Naminsan a panawen ti lam-ek, nagbagyo iti niebe isu a nakanselar ti gimong. Napakaammuan ti amin a kakabsat malaksid ken Richard nupay di inggagara dayta. Idi naammuan dayta dagiti kakabsat, binirokda ni Richard ket nasarakanda a nakatakder iti ruar ti Kingdom Hall a siaanus nga agur-uray nga adda manglukat iti ridaw. Idi dinamagda no apay a sinarakusokna ti bagyo, insungbatna, “Ay-ayatek ngamin ni Jehova.”

Ania ti Maaramidanyo?

Adda kadi tuleng iti teritoriayo? Mabalinyo kadi ti agadal iti sign language tapno makasaritayo ida? Kadawyan a nadayaw ken naanus dagiti tuleng no isuroda ti lenguaheda kadagiti sabsabali. Nalabit nga adda maam-ammoyo a tuleng no mangaskasabakayo wenno iti sabali a gundaway. Ania ti mabalinyo nga aramiden? Padasenyo ti makikomunikar kadakuada. Usarenyo ti senias, surat, drowing, ladawan, wenno kombinasion dagitoy. Uray ipakitana a saan nga interesado iti kinapudno, ipakaammoyo dayta iti maysa a Saksi a tuleng wenno iti maysa a makaammo iti sign language. Mabalin nga ipangagna ti mensahe no maipakaammo dayta kenkuana babaen ti sign language.

Nalabit nga agad-adalkayo iti sign language ken tumabtabunokayon iti kongregasion a sign language. Kasanoyo a maparang-ay ti abilidadyo nga agsenias ken mangtarus iti dayta a lenguahe? Apay a diyo padasen ti agsenias no makikomunikarkayo uray kadagiti saan a tuleng a kakongregasionyo? Makatulong dayta kadakayo nga agpanunot iti pamay-an dagiti tuleng. No dadduma, mabalin nga agannayaskayo nga agsao tapno panglakaan. Ngem iti panagsursuro iti aniaman a lenguahe, masapul nga an-anusanyo ti adu a rigat sakbay nga agbalinkayo a nasayud iti dayta.

Ti panagregget nga agusar iti sign language ket panangipakita iti ayat ken panagraem kadagiti kakabsattayo a tuleng. Panunotenyo ti marikriknada a pannakaupay iti inaldaw gapu ta saanda a matarusan dagiti tattao iti pagtrabahuan wenno eskuelaan. “Iti inaldaw, agsasao ti amin a tattao iti aglawlawko,” kinuna ti maysa a kabsat a tuleng. “Masansan a makariknaak iti ladingit ken pannakaipuera isu a masuron wenno makapungtotak pay ketdi. Adda dagiti gundaway a diak mailadawan ti riknak.” Dagiti koma gimongtayo ket naragsak a gundaway a pakagun-odan dagiti tuleng a kakabsattayo kadagiti naespirituan a taraon ken pangtagiragsakanda iti nainggayyeman a komunikasion ken panaglalangen.​—Juan 13:34, 35.

Ditay met liplipatan ti adu a babbabassit a grupo dagiti tuleng a makitartaripnong kadagiti kongregasion dagiti saan a tuleng. Maipatarus kadakuada dagiti gimong babaen ti senias. Tapno naan-anay a maawatanda ti maipalpalawag, agtugawda iti makinsango a paset ti Kingdom Hall. Iti kasta, makitada nga agpadpada ti parasenias ken ti ispiker nga awan ti makasinga kadakuada. Ipakita dagiti kapadasan a dagus a mairuam dagiti kongregasion iti kastoy nga urnos, ken saanda nga ibilang dayta a pakasingaan. Agaplikar met dagita nga urnos kadagiti asamblea ken kombension a maipatpatarus iti sign language. Maikari iti komendasion dagiti kameng ti kongregasion a mangikagkagumaan a mangyallatiw kadagiti mensahe iti nalawag ken natural a pamay-an a maawatan dagiti tuleng.

Mabalin nga adda grupo ti sign language iti kongregasionyo wenno adda laeng sumagmamano a tuleng ket masapul a maipatarus dagiti gimong para kadakuada. Ania ti mabalinmo nga aramiden tapno maipakitam ti personal a pannakaseknanmo kadakuada? Awisem ida iti pagtaenganyo. No posible, agadalka iti sumagmamano a senias. Dimo koma ipalubos nga agbalin a lapped ti saanmo a pannakaammo iti sign language. Adda latta pamay-an a makapagkomunikarkayo. Ti kasta a panangipakita iti ayat ket agresulta kadagiti naragsak a kapadasan. (1 Juan 4:8) Adu ti paglaingan dagiti dungdungnguentayo a kapammatian a tuleng. Nalaingda a makiinnestoria, nauneg ti pannakaawatda, ken naangawda. Kuna ti maysa a kabsat nga agpada a tuleng dagiti nagannakna: “Iti unos ti panagbiagko, adun ti nakalangenko a tuleng ket ad-adu nga amang ti naipaayda kaniak ngem iti mabalinko nga ipaay kadakuada. Adu ti masursurotayo kadagiti kakabsattayo a tuleng.”

Ay-ayaten ni Jehova dagiti matalek nga agdaydayaw kenkuana, a pakairamanan dagiti tuleng. Dagiti ulidan ti pammati ken panagibturda ti mamagbalin iti organisasion ni Jehova nga ad-adda a makaay-ayo. Sapay koma ta ipategtayo dagiti kakabsattayo a tuleng!

[Footnote]

[Ladawan iti panid 31]

Mabalin nga ad-adda a makapainteres kadagiti tuleng ti mensahe ti Pagarian no maipakaammo dayta kadakuada babaen ti sign language

[Dagiti Ladawan iti panid 32]

Dagiti koma gimongtayo ket naragsak a gundaway a pakagun-odan dagiti kakabsattayo a tuleng kadagiti naespirituan a pammaregta