3 Mangaramidka Kadagiti Umiso a Prioridad
“Kanayonak a mabambannog—iti kapapanunot no kasano a bingayek ti tiempok agpaay iti trabaho, panangpadakkel iti annak, panagdaydayaw iti Dios, trabaho iti balay, ken panaginana.”—YOKO, JAPAN.
Ti karit.
Kuna ti nadakamat iti panid 5 a ni Miranda, nga addaan iti dua nga annak a lallaki: “Ti kadakkelan a karit kaniak ket ti panagbalinko nga ina a kasapulan nga agtrabaho ken mangipaay iti amin a kasapulan—pisikal, mental, emosional, ken espiritual—nga awan tulong ti maysa nga asawa.”
Singasing.
Ikeddengmo no aniada a talaga ti napateg kenka ken iti annakmo, ken aramidem dagita a prioridadmo.
Ipamaysam ti panunotmo kadagiti prioridadmo, ken sursuruem nga ibadyet ti tiempom ken kuartam para kadagita. Kas pagarigan, napateg ti salun-at dagiti annakmo isu nga usarem ti nagrigrigatam a sapulmo a paggatang iti nasustansia a taraon. Nasaysayaat dayta imbes a gastuem iti panagpaagas. Sakbay a gumatangka, ilistam nga umuna dagiti gatangem tapno saanto a komporme lattan ti gatangem. “Kaykayatko ti agluto,” kuna ni Roberto nga agnanaed iti United States a kadua ti uppat nga annakna. Innayonna: “Nasursurok nga ipamaysa dagiti kasapulan—saan a dagiti kayatmi laeng—ken saan la a basta dagiti gagangay a kasapulan no di ket dagiti talaga a kasapulanmi iti inaldaw.”
Usarem ti nagrigrigatam a sapulmo a paggatang iti nasustansia a taraon. Nasaysayaat dayta imbes a gastuem iti panagpaagas
Idespatsaryo dagiti diyon maus-usar—dagiti libro, kawes, gadyet. Kas iti insurat ti maysa nga agsolsolo nga ina: “No ad-adu ti gargaret, ad-adda a makapa-stress. Ad-adu ngamin ti masapulmo a dalusan, tarimnen, ken manteneren. No kayatmo a pasimplien ti biagyo, kissayam dagiti gargaretyo.”
Sanayem dagiti annakmo nga agidalimanek kada rabii. Dimo ipalubos a nakawarwara ti balayyo. Ti kasta a panangdisiplina iti annak ti makatulong kadakuada nga agbalin a naurnos iti bukodda a kuarto ken uray iti balayyo. Siempre, tapno ipangagdaka, masapul a mangipakitaka iti nasayaat nga ulidan.
Uray nakaok-okupadoka, masapul a mangilatangka iti panawen para iti annakmo. Kaipapanan dayta nga ipaaymo kadakuada ti amin a tiempo a kabaelam imbes a sumagmamano la nga oras kas iti aw-awaganda a de-kalidad a panawen. Kasapulan dagiti annakmo ti panawen ken atensionmo.—Deuteronomio 6:7.
Aggigiddankayo a mangan uray maminsan laeng iti kada aldaw, ken pagbalinenyo dayta a makaparagsak. Kinuna ti taga-France a ni Colette, nga addaan iti tallo nga annak: “Napagnunumuanmi nga aggigiddankami a mangmalem agsipud ta dayta a tiempo ti kaaddami amin iti balay. Dayta ti tiempo nga aglalangen ken agpipinnabilegkami iti naespirituan. Agingga ita, ti pangmalem ket maysa nga espesial nga okasion para iti pamiliami.”