Dagiti Pannursuro a Mangted iti Namnama

Dadaelento ti Dios Dagiti Dakes a Tattao

“Uray no agtubo a kas iti ruot dagiti managdakdakes ken umadu ti amin nga agar-aramid iti dakes, madadaeldanto met laeng iti agnanayon.”​—SALMO 92:7.

Kas naammuantayo iti napalabas nga artikulo, agtultuloy a kumarkaro ti kinadakes. Saantayo a pakasdaawan dayta ta naipakpakauna iti Biblia iti 2 Timoteo 3:1-5 a bayat ti “maudi nga al-aldaw,” nagpaiduma ti kinadakes dagiti tattao. Maudi nga al-aldaw ti ania? Ti lubong dagiti tattao a saan nga agtultulnog iti Dios. Asidegen a dadaelen ti Dios dagidiay saan a mangbalbaliw kadagiti dakes nga aramidda. Ket dagiti laeng nasayaat a tattao​—dagidiay agtultulnog iti Dios​—ti mabati. “Dagiti nalinteg kukuadanto ti daga, ket agyandanto iti dayta iti agnanayon.”​—Salmo 37:29.

Dadaelento ti Dios ni Satanas

“Ti Dios a mangted iti talna, . . . rumekenna ni Satanas.”​—ROMA 16:20.

Inton awanen ti amin a kinadakes, a pakairamanan ni Satanas ken dagiti demonio, agarinton ti talna iti intero a daga. Ikarkari ti Namarsua nga ‘awanton ti pagbutngantayo.’​—Mikias 4:4.

Pukawento ti Dios ti Sakit ken Ipapatay

“Adda iti sangatauan ti tolda ti Dios . . . Ket punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.”​—APOCALIPSIS 21:3, 4.

Awanton ti panagsagaba ken sakit ta ikkatenton ti Dios ti amin nga epekto ti inaramid da Satanas, Adan, Eva, ken ti kinaimperpektotayo. Kas resultana, uray ni patay ket awanton. Dagiti tattao a mangay-ayat ken agtultulnog iti Namarsua ket agbiagto iti agnanayon. Ngem pagyananda?

Pagbalinento ti Namarsua a Paraiso ti Daga

“Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”​—ISAIAS 35:1.

Inton pagpatinggaen ti Dios ti kinadakes, agbalinto a Paraiso ti daga! Mapnonto iti nagpipintas a parke ken hardin, ken nakaad-adunto ti makan. (Salmo 72:16) Nakadaldalusto ken napno iti sibibiag a parsua dagiti baybay, danaw, ken karayan. Uray ti sao a “polusion” ket mabalin a maawanton iti bokabulariotayo! Agibangonto dagiti tattao iti bukodda a balay a pagyananda. Ken awanton ti asinoman a maawanan iti balay, agbisin, wenno napanglaw.​—Isaias 65:21, 22.

Pagungarento ti Dios Dagiti Natay

“Agungarto [dagiti natay].”​—ARAMID 24:15.

Kayatmo kadi a makitamto manen dagiti natayen nga ipatpategmo? Ti mannakabalin-amin a Dios isublinanto ti biagda, wenno pagungarenna ida, iti Paraiso a daga. Malasinmonto ida ken malasindakanto met. Panunotem no kasanonto ti karagsakyo! Apay a masiguradotayo a mapasamak dayta? Gapu ta iti Biblia, adda dagiti pagarigan dagiti adulto ken ubbing a napagungar ken nakadua manen dagiti pamiliada. Maysa pay, masansan a nangpagungar ni Jesus kadagiti natay iti sango ti adu a tattao.​—Lucas 8:49-56; Juan 11:11-14, 38-44.