Pannakaammo a Mangyasideg Kadatayo iti Dios
Ti Namarsua kadatayo ket saan la a maysa a puersa no di ket addaan kadagiti nagsasayaat a kualidad. Kayatna a maam-ammo ken sumingedtayo kenkuana. (Juan 17:3; Santiago 4:8) Dayta ti makagapu nga adu ti imbagana maipapan kenkuana.
Adda Personal a Nagan ti Namarsua
“Maammuan koma dagiti tattao a sika, nga agnagan Jehova, sika laeng ti Kangatuan iti intero a daga.”—SALMO 83:18.
Isursuro ti Biblia a ni Jehova ti maymaysa a pudno a Dios. Isu ti Namarsua iti uniberso ken iti amin a biag. Isu laeng ti rumbeng a pagdayawantayo.—Apocalipsis 4:11.
Naayat a Dios ni Jehova
“Ti Dios ket ayat.”—1 JUAN 4:8.
Impakaammo ni Jehova ti adu kadagiti kualidadna babaen ti Biblia ken ti sangaparsuaan. Ti ayat ti kangrunaan a kualidadna. Amin nga aramidenna ket gapu iti ayat. No ad-adda a maam-ammotayo ni Jehova, ad-adda met nga ayatentayo.
Manangpakawan a Dios ni Jehova
“Maysaka a Dios a sisasagana a mangpakawan.”—NEHEMIAS 9:17.
Ammo ni Jehova nga imperpektotayo isu a “sisasagana a mangpakawan” kadatayo. No dumawattayo iti pammakawan ken ikagumaantayo nga isardeng dagiti dakes nga aramidtayo, pakawanennatayo ken saannan nga isingir dagiti basoltayo iti napalabas.—Salmo 103:12, 13.
Kayat ni Jehova nga Agkararagtayo Kenkuana
“Asideg ni Jehova iti amin nga umaw-awag kenkuana . . . Dengdenggenna ti panagpatulongda.”—SALMO 145:18, 19.
Saan a kidkiddawen ni Jehova nga agaramidtayo kadagiti ritual wenno agusartayo kadagiti imahen iti panagdaydayawtayo. Denggenna dagiti kararagtayo kas iti panangdengngeg dagiti naayat a nagannak kadagiti ipatpategda nga annak.