Kapitulo 1
Panagkaykaysa iti Panagdayaw—Aniat’ Rebbeng a Kaipapananna Kadakayo?
1, 2. (a) Maibatay iti ania a ti pudno a panagkaykaysa ti panagdayaw ti napaadda iti kaaldawantayo? (b) Kasanot’ panangiladawan ti Biblia ti adda a mapaspasamak?
ITI intero a globo adda nakaay-ayat a tignay nga agturong iti panagkaykaysa ti panagdayaw. Daytat’ mangtiptipon ti tattao iti amin a nasion ken tribo ken pagsasao. Ti panagkaykaysada ti saan a bunga ti aniaman a kompromiso ti pampammati. Daytat’ di naragpat babaen ti saandan a panangbabbabalaw kadagiti istilo ti panagbiag a maisuppiat iti Sao ti Dios. Ania ngarud ti makagapu iti dayta? Isu ti kinapudno a dagiti tattao iti amin a kasasaad naammuandan ni Jehova kas ti kakaisuna a pudpudno a Dios ken situtulokda met a mangitunos ti panagbiagda kadagiti nalinteg a daldalanna.—Idiligyo iti Apocalipsis 15:3, 4.
2 Kaitungpalan daytoy ti padto a nailanad agarup 2,700 a tawen ti napalabasen babaen ken mammadto Mikias. Maipapan iti “maudi a paset dagiti al-aldaw,” isut’ nagsurat: “Ket adu a nasion mapandanto a kunaenda: ‘Umaykayo, ket umulitayo iti bantay ni Jehova, ken iti balay ti Dios ni Jacob; ket isuronatayto kadagiti dalanna, ket magnatayto kadagiti danána.’” (Mik. 4:1, 2)a Makitkitayo aya a matungtungpal daytan?
3, 4. (a) Kasanot’ kinapudnona a dagiti “nasion” agturturongdan ken Jehova? (b) Ania a salsaludsod ti iyimtuodtay ti bagbagitayo?
3 Awan intero a “nasion” ti mangidatdatag ti bagida idiay naespirituan a balay ni Jehova a maipaay iti panagdayaw. Ngem addada dagiti indibidual manipud kadagita a nasnasion a mangar-aramid dayta. Bayat a maad-adalda ti naayat a panggep ken ti makaay-ayo a personalidad ni Jehova a Dios, ti puspusoda ti matignay unay. Sipapakumbaba pagreggetanda a sapulen no aniat’ kalikaguman ti Dios kadakuada. Ti kararagda ket kas ken David, tao a manamati a nagkuna: “Isuronak a mangtungpal ita nakemmo, ta sika ti Diosko.”—Sal. 143:10.
4 Makitkitayo aya ti bagiyo a kadua dayta umariwekwek a managdaydayaw ken Jehova? Ti kadi panagtignayyo iti bilbilin nga inawatyo mangted pammaneknek a pudno nga apresiarenyo a ni Jehova ti gubuayanna? Kasano kadakkelen ti ‘pampannagnayo kadagiti danánan’?
No Kasano a Magun-Odan Dayta
5. (a) Agingga iti ania a magun-odanto ti panagkaykaysa ti panagdayaw? (b) Apay a naganat ti panagbalin a managdaydayaw ken Jehova itan, ken kasano a matulongantay dagiti dadduma a mangaramid iti daytoy?
5 Ti panggep ni Jehova ket amin koma nga intelihente a sangaparsuaan agkaykaysada iti panagdayaw—nga awan ti iyaw-awan ti kinaulbod, nga awan agar-arikap gaput’ saanda a pannakasapul ti pudpudno a kaipapanan ti biag. Anian ti panangiliwtayo ti aldaw inton amin nga agbibiag bendituendanton ti maymaysa a pudno a Dios! (Sal. 103:19-22) Ngem sakbay a maaramid dayta, masapul a dalusan ni Jehova ti sangaparsuaanna manipud kadagidiay manglalais ti naayat a kinaarina ken ipapilitda a dadaelen ti biag nga agpaay kadagiti dadduma. Siaasi mangmangted ti pakdaar no aniat’ aramidenna. Dagiti tattao iti amin a lugar addaandat’ gundaway a mangbaliw ti kursoda. Gapuna iti daytoy nga aldawtayo maar-aramid daytoy naganat a panagdawat iti intero a lubong: “Agbutengkay iti Dios ket isu dayawenyo, ta dimteng ti oras ti panangukomna, ket agdaydayawkayo iti nangaramid iti langit ken iti daga ken iti baybay ken kadagiti ubbog dagiti dandanum.” (Apoc. 14:6, 7) Inakseptaryo kadin dayta nga imbitasion? No kasta, pribilehioyo ngarud itan ti makipagtrabaho a kadua ti organisasion ni Jehova a mangtulong met kadagiti dadduma a mangaramid ti kasta.
6. Kalpasan ti panangadal kadagiti pamunganayan a sursuro ti Biblia, ania pay nga irarang-ay ti sipapasnek a pagreggetantay nga aramiden?
6 Saan a panggep ti Dios nga iyeg iti organisasionna dagiti tattao a basta agkuna laeng mamatida ken Jehova ken kayatda ti agbiag idiay Paraiso ngem maigiddato iti dayta sursurotenda met ti kabukbukodanda nga inaagum nga intereses. Kayatna a makagteng dagiti tattao iti “umiso a pannakaammo iti pagayatanna,” ket rebbeng a maisarming daytoy iti biagda. (Col. 1:9, 10) Kalpasan ti pannakaammo dagiti manangipateg a tattao kadagiti pagdamdamuan a sursuro ti Biblia, tarigagayanda met koma ti agtultuloy iti Nakristianuan a kinanataengan. Ti tarigagayda ket isu komat’ pannakaammoda a sisisinged ken Jehova, tapno mapalawa ken mapauneg ti pannakaawatda iti Saona, ken panangiyaplikar nga ad-adda pay iti dayta iti biagda. Birbirokenda ti panagbalinda kas ti nailangitan nga Amada, nga iparangarang met dagiti kualidadna ken matmatan dagiti bambanag kas ti panangmatmatna. Daytoy ti mangtignay kadakuada a mangsukimat kadagiti pamay-an a makiraman a naan-anay nga inggat’ kabaelanda iti trabaho a paar-aramidna itatta ditoy daga iti kaaldawantayo. Isu aya dayta ti ar-aramidenyo?—Efe. 5:1; Heb. 5:12–6:3; 1 Tim. 4:15.
7. Kadagiti ania a pamay-an a ti pudno a panagkaykaysa posible itan, ken kasano a maragpat dayta?
7 Ipakita ti Biblia a dagidiay agserserbi ken Jehova ti masapul nagkaykaysada a tattao. (Efe. 4:1-3) Daytoy a panagkaykaysa ti adda itattan, uray pay agbibiagtayo iti nasinasina a lubong ken makidangdangadangtayo pay met laeng kadagiti kina-imperpektotayo. Inkararag a sipapasnek ni Jesus nga agkaykaysa koma amin dagiti adalanna, a tagiragsaken ti pudno a panagkaykaysa. Aniat’ kaipapanan daytoy? Nga umuna iti isuamin aminda maaddaanda koma ti nasayaat a pannakirelasion ken Jehova ken ti Anakna. Kasta met nga agkaykaysada koma iti maysa ken maysa. (Juan 17:20, 21) Daytoy itan ti maragragpatda bayat nga iyap-aplikarda ti bilbilin nga inawatda iti “balay” ni Jehova.
Ania a Bambanag ti Nangted Panagkaykaysa?
8. (a) Aniat’ mapatanortayo no personal nga usarentayo ti Biblia a mangpanunot kadagiti sungbat ti salsaludsod a mangapektar kadatayo? (b) Babaen ti panangsungbat ti salsaludsod a nailista iti ngato, usigenyo dagiti bambanag a mangmangted ti Nakristianuan a panagkaykaysa.
8 Dadduma kadagiti kangrunaan a banag a nakatulong iti daytoy a panagkaykaysa ti nanumeroan iti baba. Bayat a sungsungbatanyo dagiti saludsod a sumarsaruno kadagitoy, panunotenyo koma no kasano a tunggal maysa apektaranna ti bukod a pannakirelasionyo ken Jehova ken kadagiti padayo a Kristiano. Ti panagrason kadagitoy a punto iti lawag dagiti naisitar a kasuratan ti makatulong ti panangparang-ay ti nasursuruan iti Dios nga abilidad ti panagpampanunot ken pannakaawat, a dagitat’ kualidad a kasapulantay amin. (Prov. 5:1, 2; Fil. 1:9-11) Gapuna usigenyo a saggaysa dagitoy a bambanag:
(1) Agdaydayawtay amin ken Jehova ken bigbigbigentayo ti kalinteganna a mangikeddeng ti pagalagadan no ania ti naimbag ken dakes.
Kasanot’ panangmatmat ni Jehova no gaggagaraentayo a laklaksiden ti balakadna iti maysa a banag a kasla bassit kadatayo? (Luc. 16:10; idiligyo iti Malakias 1:6-8.)
Apektado aya dagiti dadduma no ditay kanayon a pagtulnogan dagiti bilbilin ni Jehova? (Idiligyo iti Roma 5:12; Josue 7:20-26; 1 Ar-ari 14:16.)
(2) Sadinoman ti ayantayo ditoy lubong, addaantayo iti Sao ti Dios a mangiwanwan kadatayo.
No agdesisiontayo, aniat’ adda a peggad no basta ar-aramidentay laeng ti “pagaruptayo” a nalinteg? (Jer. 17:9; Prov. 14:12)
No ditay ammo no aniat’ balakad nga itden ti Biblia iti maysa a banag, aniat’ masapul nga aramidentayo? (Prov. 2:3-5)
(3) Magunggonaantay amin manipud iti isu met laeng a programa ti naespirituan a panangpakan.
Ania ti adda a kasasaad kadagidiay di mangapresiar kadagiti urnos ni Jehova a maipaay iti naespirituan a panagpakan? (Idiligyo iti Isaias 1:3; 9:16; 65:14.)
(4) Ni Jesu-Kristo, ket saan a tao, ti Pangulotayo ken daydiay umadaniantayo amin ken Jehova iti panagdaydayaw.
Adda aya asinoman kadatayo ti addaan natibker a rason a pammatian a kas tattao natantan-oktayo ngem kadagiti dadduma? (Roma 3:23, 24; 12:3; Mat. 23:8-10)
(5) Sadinoman ti paggigianantayo, kumitkitatayo iti Pagarian ti Dios kas ti kakaisuna a namnama ti sangatauan.
Kasano a daytoy saluadannatayo a maibusor kadagiti mamagsinasina nga impluensia? (Mat. 6:9, 10; Mik. 4:3)
(6) Ti nasantuan nga espiritu ti mamataud kadagiti managdaydayaw ken Jehova dagiti kualidad a nasken iti Nakristianuan a panagkaykaysa.
Kasanotay a lukatan ti dalan tapno ti espiritu ti Dios ti makapataud ti bungbungana kadatayo? (Sal. 1:2; Prov. 22:4; Apoc. 3:6; Ara. 5:32)
Kasano a ti kaadda kadatayo ti bungbunga ti espiritu impluensiaanna ti pannakirelasiontayo ken Jehova? Kadagiti kakabsattayo? (Gal. 5:22, 23)
(7) Amintayo addaantay ti responsabilidad a mangikasaba ti naimbag a damag ti Pagarian ti Dios.
Kasano a ti panagbalintayo a kupado iti pannakiraman iti trabaho a panangasaba a kadua dagiti padatayo a Kristiano impluensiaanna no kasanot’ panagriknatayo maipapan kadakuada? (Idiligyo iti Colosas 4:7, 11.)
9. Ania ti epektona no pudno nga iyaplikartayo dagitoy a kinapudno iti biagtayo?
9 Ti panangbigbig kadagitoy a kinapudno ti maysa a banag. Ti panagbiag a maitunos kadakuada ti ad-adu pay ti sapulenna. Ngem no kasta ti aramidentayo, ad-adda a nadekdekkettayo ken ni Jehova. Ti pannakitimtimpuyogtay kadagiti kapammatian ti agbalin met a gubuayan ti pakapabang-arantayo. Kas kunaen ti Salmo 133:1: “Kitaenyo! Nagimbagen ken anian a nakaay-ayo ti panagtitimpuyog dagiti agkakabsat iti kinamaymaysa!” Dikay kadi personal a napadasanen no anian a makapabang-ar ti ipapanaw manipud lubong, agraman amin a kinaagumna, ken addanto iti panaggigimong a kadua dagiti dadduma a pudno nga agayat ken Jehova?
Lisian Dagiti Mamagsisina nga Impluensia
10. Apay a masapul ti panagannadtayo tapno malisian ti espiritu ti panagwaywayas?
10 Tapno saan a madadael dayta nagpateg a panagkaykaysa, masapul a lisiantayo dagiti mamagsisina nga impluensia. Maysa kadagiti kangrunaan iti daytoy isu ti espiritu ti panagwaywayas. Tulongannatay ni Jehova a makalisi iti dayta babaen ti panangibutaktakna no asino ti nagtaudan dayta, isu ni Satanas a Diablo. Isut’ nangallilaw ken Eva a nangipagarup nga agpaay a pagimbaganna no laksidenna ti sasao ti Dios ken isut’ agaramid ti bukodna a desision. Timmipon ni Adan kenkuana iti dayta rebelioso a kurso. Ti resultana ket didigra kadakuada ken kadatayo. (Gen. 2:16, 17; 3:1-6, 17-19) Agbibiagtayon iti lubong a napunno iti dayta espiritu ti panagwaywayas, gapuna ditay koma pagsiddaawan no kasapulan met ti panangparmek iti dayta nga espiritu iti bagitayo a mismo. Tultulongannatay a siaayat ni Jehova a mangaramid iti dayta babaen ti balakad manipud ti organisasionna.
11. Aniat’ mangipakita no sipapasnek met laeng nga agsagsaganatayo nga agbiag idiay nalinteg a Baro Urnos ti Dios?
11 Babaen iti dayta nga organisasion naadaltayo ti maipapan ti engrande a kari ni Jehova a mangsukat iti agdama nga aglawlawtayo iti baro a langlangit ken maysa a baro a daga nga idiay ti “pagtaengan ti kinalinteg.” (2 Ped. 3:13) Pagragsakantayo ti pananginanama a ti saan nga agbayagen maawanton daytoy dakes a lubong ket ti daga mapagbalinton a Paraiso. Ngem ti kadi mismo a padron ti panagbiagtayo ipakpakitana a sipapasnek nga agsagsaganatayo a maipaay iti biag ti maysa a lubong a sadiay ti kinalinteg isunto ti kadawyan nga aramid? Nalawag ti panangikuna ti Biblia kadatayo: “Dikay ayaten ti lubong wenno dagiti bambanag nga adda ditoy lubong. No ti siasinoman a tao agayat iti lubong, ti ayat ti Ama awan kenkuana.” (1 Juan 2:15) Pudno nga adda adu a bambanag maipapan ti lubong nga awan kadatayo ti agayat. Ngem kaguratay aya a nangruna dagidiay paset ti lubong a mangsinga iti mismo a panangtagiragsaktayo iti biag? Wenno lislisiantayo ti espirituna—ti agwaywayas a kababalinna, ti aglablabes a pannakaseknanna iti bagina met laeng? Iyug-ugalitay met laeng aya a pudpudno ti panagimdeng ken Jehova ken agtulnog kenkuana manipud pusotayo, agpapan pay dagiti maisuppiat a pagannayasan ti lasag? Ti intero a kurso ti panagbiagtayo—uray sadinoman ti ayantayo, uray aniaman ti ar-aramidentayo—ti rebbeng a mangted pammaneknek a ti panagpampanunot ken dagiti motibotayo ket nasursuruan ti Dios.—Prov. 3:5, 6.
12. (a) Apay a nasken ti pananggundawaytayo itan a maadal ti daldalan ni Jehova ken suroten ida iti biagtayo? (b) Ania ti kaipapananna kadatayo a personal dagiti kasuratan a naisitar iti parapo?
12 Inton umayen ti naituding a panawen ni Jehova a pangdadael itoy dakes a sistema dagiti bambanag ken amin nga agayat ti ar-aramidna, isunto ti di agtaktak. Saannanto nga itantan dayta a panawen wenno baliwan ti pagalagadanna tapno pagustuan dagidiay padpadasenda pay ti kumpet iti lubong, dagidiay kagkaguduat’ pusoda laeng a mangad-adal ti pagayatan ti Dios ken mangar-aramid iti dayta. Itan ti panawen a panagtignay! (Luc. 13:23, 24; 17:32; 21:34-36) Anian a makaparagsak, ngarud, a makita ti “dakkel a bunggoy” dagiti tattao a mangal-ala iti daytoy nagpateg a gundaway, a sigagagar a mangsapsapul ti pannursuro nga ipapaay ni Jehova babaen ti naayat nga organisasionna ken kalpasanna sangsangkamaysa a magna iti danána!
[Dagiti Footnote]
a Dagiti kasuratan a naadaw iti daytoy a libro ti manipud New World Translation of the Holy Scriptures, edision ti 1981.
Repaso a Pagsasaritaan
● Aniat’ panggep ni Jehova maipapan ti panagdayaw?
● Kalpasan ti pannakaadal kadagiti pamunganayan a sursuro ti Biblia, ania pay a panagrang-ay ti sipapasnektay koma nga aramiden?
● Aniat’ maaramidantay nga indibidual, tapno dagiti mamagkaykaysa a bambanag a napagsasaritaantayo ti mangimpluensia iti biagtayo kas rebbengda?
[Ladawan iti panid 4]