Kapitulo 24—Pannakailasat Agturong ti Baro a Daga
Ti “Countdown” Umadanin iti Oras a Zero!
1. Sigun iti kadagiti nalatak a sientista, kasano kaasidegen ti “doomsday” wenno aldaw ti pannakadadael?
Idi 1947, dagiti sientista nangaramidda iti “doomsday clock.” Dayta ti agpang iti akkub iti The Bulletin of the Atomic Scientists ket dayta ti mausar a mangidrama no kasano kapeggaden ti kaasideg ti lubong iti nuklear a pannakapukaw. Maulit-ulit dagiti im-ima dayta a “relo” ti naiyakar—no dadduma umabante, no dadduma agatras, agpannuray iti no kasano kapeggad ti panangmatmatda iti internasional a kasasaad. Nasapa pay idi 1984 dagidiay nga im-ima ti naiyabante iti tallo a minutos sakbay ti tengnga ti rabii. No makagtengdan iti tengnga ti rabii, dayta kaipapananna a ti pagbutbutngan a nuklear a gubat nangrugin.
2. Kaano ti panangrugi ni Jehova iti “countdown[na],” ken ania ti kaipapananto ti oras a zero?
2 Ngem agarup 6,000 a tawenen ti napalabas ni Jehova a Dios rinugianna ti countdown (panagbilang nga agpababa agingga iti zero) nga immabante a di magawidan, a di pulos nagatras. Iti dayta a countdown ti oras a zero isu ti tiempo nga inkeddeng ti Dios a mangitan-ok iti kinasoberanona, nga iti dayta agpannuray ti talna ken ti pagimbagan iti amin nga uniberso. Sibabatad nga imbagana ti panggepna ken nangipaay kadagiti tanda iti tiempo tapno maawatantayo ti iyaadanina. Dagdagus simmaruno iti iyaalsa idiay Eden, inkari ni Jehova a mangipaay iti “bin-i” manipud iti “babai” a kukuana, ti organisasion dagiti nasungdo nga espiritu a parparsua, maysa a “bin-i” a mangsugatto ken Satanas, “ti kadaanan nga uleg,” iti ulona ken kamaudiananna pukawennanto nga agnanayonen. (Genesis 3:15; Apocalipsis 12:9; Roma 16:20) Anian a panagtarigagay dagiti managayat iti kinalinteg iti dayta!
3. (a) Ania ti mangipakita a ti iyaay ti Mesias naannad ti pannakaitiempona? (b) Maipaay iti ania a naisaad ti pakaibatayan?
3 Iti inkeddeng ti Dios a tiempo, a naipadto a nasaksakbay, ti naikari a “bin-i” ti Mesias, ti Anak ti Dios a mismo nagparang ditoy daga. Kas ti agkallungogan a sungbat iti makalais a karit ni Satanas, tinaginayon ni Jesus ti nadiosan a debosionna agingga iti ipapatay. Ket babaen iti ipapatayna kas ti awanan basol a tao isut’ nangipaay met iti pamay-an iti pannakasubbot kadagiti annak ni Adan manipud basol ken ipapatay. Gapuna naipaay ti pakaibatayan iti ‘panangdadael kadagiti ar-aramid ti Diablo’ kamaudiananna.—1 Juan 3:8; Daniel 9:25; Galacia 4:4, 5.
4. (a) Ania a grupo ti rinugian nga inurnong ni Jesus bayat ti kaaddana ditoy daga? (b) Maitunos iti nadiosan nga eskediol, kaano ti panangrugi ni Kristo a nagturay kas Ari? (c) Ania ti maysa kadagiti immuna a tignay nga innalana?
4 Idi adda pay laeng ni Jesus ditoy daga, rinugianna ti nangurnong kadagiti lallaki ken babbai nga agbalin a kaduana a makipagtawid kenkuana iti nailangitan a Pagarian. Ti laeng 144,000 a napili, nasubok ken nasungdo ti nairaman. Idi dimtengen ti tiempo a panangurnong ti maudi a miembro daytoy a grupo, “ti panangituray ken dayaw ken ti pagarian” naiteden ken Jesus a mismo idiay langit. (Daniel 7:13, 14) Iti apag-isu iti eskediol, idi 1914, isut’ nagtignay kas ti agturay nga Ari. Ni Satanas ken dagiti demoniona ti dagus a naitappuak manipud langit, ket daytoy a tignay ti nangdalus ti sentro ti gobiernona. (Apocalipsis 12:7-12) Ti agdama a sistema ti lubong simreken kadagiti maudi nga al-aldawna.
5. Sinonto ti sibibiag a mangsaksi iti pannakaitan-ok ti kinasoberano ni Jehova?
5 Ti countdown a nagtultuloy iti agarup innemen a milenio umadanin iti oras a zero. Asideg unayen ta dagiti tattao a nagbiagen idi 1914, ken lallakayen, saandan a matay sakbay a lumabas ti nakaragragsak a pasamak a mangtanda iti pannakaitan-ok ti kinasoberano ni Jehova.—Marcos 13:30.
6, 7. (a) Ania a kinapudno maipapan iti “dakkel a bunggoy” ti mangipamatmat a ti dakkel a rigat asideg unayen? (b) Apay a kumitkitada iti masanguanan a buyogen ti pananginanama?
6 Dadduma a nasungdo nga ad-adipen ti Dios, met, addadanto a mangsaksi iti paspasamak iti dayta dakkel nga aldaw. Nangnangruna mangrugi idi 1935, idi a nailasin ti “dakkel nga umariwekwek,” wenno “dakkel a bunggoy,” a nalawag a naawatan, a ti dakkel a bilang dagitoy ti nangrugin a nangiparangarang iti bagbagida. Idi damo addada ginasgasut, kalpasanna rinibribo, kamaudiananna ginasgasut a ribo, ket itan addan minilmilion a nangsaknap iti isuamin a globo. Ti di agbiddut a Sao ti Dios iladawanna daytoy a grupo a kas ‘rimmuar manipud iti dakkel a rigat,’ a nakalasat iti dayta, ket agbiagda a sumrek iti baro a sistema a saandan a pulos a matay. (Apocalipsis 7:9, 10, 14; Juan 11:26) Ti immuna a miembro daytoy a grupo addadan kadagiti edad a 60’s wenno 70’s wenno laklakay pay. Saan nga impalubos ni Jehova ti nasapa unay a panangrugi ti pannakaurnong daytoy a grupo. Ti “dakkel a bunggoy” agraman dagiti immuna a miembro daytoy, makalasatdanto a sumrek iti “baro a daga.”
7 Ti namnama ti “dakkel a bunggoy” saanto a paayen ti aniaman a nuklear a holocaust a mabalin a mangdadael iti isuamin a sangatauan. Adda ngarud ti naimbag a rason a dagitoy manginanamada ken naturedda. Bayat ti pannakaibanag dagiti paspasamak iti “maudi nga al-aldaw,” sinipsiputanda dagitoy a buyogen ti pananginanama, nga inyaplikarda iti bagbagida ti balakad ni Jesus: “Kumitakayo ket itangadyo dagiti ul-uloyo, ta ti pannakasubbotyo umasidegen.” (Lucas 21:28) Ngem bayat ti natda pay a tiempo sakbay ti pannakaispal, adu pay a paspasamak a mangkintayeg iti lubong ti mapasamak.
Paspasamak nga Adda Pay iti Masanguanan
8. (a) Ania a nakapatpateg a pasamak a naipadto idiay 1 Tesalonica 5:3 ti umayto pay? (b) Adu a tawtawenen a napalabas, kasano a naipasdek ti entablado a maipaay iti daytoy? (c) Kadagiti nabiit pay a tawtawen, ania a dakkel a pannakapilit ti adda a mangipanamnama iti sangalubongan a talna?
8 Iti panangitudona iti maysa kadagitoy, nagsurat ni apostol Pablo: “Intono sasawenda: ‘Talna ken talged!’ isunto metten ti iyaayna kadakuada ti kellaat a pannakadadael kas ti panagpasikal a mapasamak ti masikog; ket didanto makalisi.” (1 Tesalonica 5:3) No anianto ti porma dayta a panangiwaragawag makitanto pay laeng. Ngem nakapatpateg a di nagbayag ti entablado naisaaden kalpasan a ti lubong simreken iti “maudi nga al-aldaw.” Idi 1919 ti panggep ti Liga de Naciones naiwaragawag a mangibanag iti “talna ken talged.” Kalpasan ti Gubat Sangalubongan II, ti Charter iti Naciones Unidas ti nangipakaammo manen iti “talna ken talged” kas ti kangrunaan a kalat dayta nga internasional a bagi. Saanna pay a naibanag dayta a panggep. Nupay kasta, kadagiti nabiit pay a tawtawen dagiti tattao iti amin a kita iti panagbiag nakiramanda iti nagdakkelan a demonstrasion ti publiko kadagiti adu a dagdaga, a mangparparegta kadagiti papangulo iti lubong a mangisardengen kadagiti amin a panangpataud, panangsubok ken panangipuesto kadagiti nuklear nga armas. Tarigagayanda ti panangipanamnama iti sangalubongan a talna ket maamakda iti patienda a sabali a pamuspusan.
9. Apay a ti kellaat a pannakadadael dumtengto kadagidiay a mangitantandudo iti dayta naipadto a panangiwaragawag iti “Talna ken talged”?
9 Aniaman ti pagbanaganto daytoy wenno dadduma pay a pangpanggep, din agbayag dagiti tattao a papangulo aramidendanto daytoy nakapatpateg a panangiwaragawag iti “Talna ken Talged!” Dayta ket pammarangto laeng. Ngem dagidiay a mangitandudo iti dayta iwarwaragawagdanto a naibanagdan ti kalatda babaen iti bukodda a pamay-an, a saan a kasapulan ti Pagarian ti Dios. Iti daytoy a di panangawat iti kinasoberano ni Jehova, “isunto metten ti iyaay kadakuada ti kellaat a pannakadadael.”
10. Kasano a mabukbukelen ti kasasaad a maipaay iti pannakadadael ti Babilonia a Dakkel?
10 Napartak ti pannakaibanag dagiti paspasamak. Ti Babilonia a Dakkel, ti sangalubongan nga imperio ti ulbod a relihion, pagbalinento dagiti dati a napolitikaan a kaayan-ayatna a langalang. Ket, dagiti agtuturay pagaammoda a ti relihion ti puersa a manggargari iti gura, panangibukbok ti dara ken gubat iti isuamin a globo. Dagiti politiko naumadan iti panangpilpilit ti klero. Iti kaaduan iti lubong, ti itatabuno kadagiti luglugar a pagdaydayawan bimmasiten. Ti di panamati iti Dios, dayta man ti di panangikankano wenno naabungotan, idiktar ti kapanunotan ti publiko. Kasta met, adu a pagpagilian a miembro iti Naciones Unidas ti addaan kadagiti pangpanggep a maibusor iti relihion. Inton dumteng ti oras a tinudingan ni Jehova a maipaay iti panangukom, palubosannanto dagiti napolitikaan nga agtuturay, iti nasaknap nga internasional a panagtignay, a manggura iti Babilonia a Dakkel ken naan-anay a mangdadael kenkuana.—Apocalipsis 17:15, 16; 19:1, 2.
11. (a) Maibusor iti siasino nga agbaw-ingto dagiti nasnasion? (b) Kadagiti ania pay a paspasamak ti pagturonganto dayta?
11 Gaput’ pannakabartekda iti kasta a panagballigi ken babaen iti panangiduron ti di makita nga agturayda, ni Satanas a Diablo, dagiti nasnasion rautendanto dagiti matalek a saksi ni Jehova a mismo ditoy daga. (Ezequiel 38:14-16) Ti kinapudno a dagitoy ket mannakikappiada, managtungpal-linteg a tattao a di makibibiang iti politika wenno makinamin iti gubat saandanto a panunoten. Dagiti nasnasion kalikagumanda ti naan-anay a panangsuportar, panangidayaw iti napolitikaan a sistema. Ngem inton agtignayda a mangdadael iti makitkita nga organisasion ni Jehova, agtignayto ti Dios a maigapu kadagiti nasungdo nga ad-adipenna, nga isalakanna ida. Dagiti buybuyot ti langit pukawendanto a naan-anay ti amin a pakakitaan iti makitkita nga organisasion ni Satanas, a dadaelenda amin dagiti agtalinaed iti dayta. Kalpasanna, ti kangrunaan a kabusor, ni Satanas a Diblo a mismo, tiliwendanto ket parautanda iti sangaribo a tawen, nga iti dayta a tiempo amin nga epekto ti dakes nga impluensiana maikkatton a naan-anay ket ti daga mapagbalinto a maysa a Paraiso. Kalpasan dayta, maluk-atanto ni Satanas iti apagkanito, a mangsuot iti naisubli a sangatauan. Amin a tattao a mangpili a sumurot kenkuana mapukawdanto a kadua ni Satanas ken dagiti demoniona.—Apocalipsis 19:19-21; 20:1-3, 7-10.
Maiserrek iti Nadayag a “Baro a Daga”
12. (a) Iti siasino ti bigbigento ti “dakkel a bunggoy” a nagtaudan ti pannakaisalakanda? (b) Sinonto ti makikadua kadakuada iti panangidayaw iti Dios?
12 Babaen kadagiti nakaam-amak a paspasamak iti panagpatingga ti agdama a lubong iti likudanda ken ti Milenio a Panagturay ni Kristo iti sanguananda, dagiti naparaburan a nakalasat ditoy daga napnuandanto iti kasta unay a panagyaman bayat ti panangidir-ida kadagiti timtimekda iti panagyaman iti Dios. Buyogen iti naimpusuan a rag-o ti “dakkel a bunggoy” agpukkawdanto iti dakkel a timek: “Ti pannakaisalakan nagtaud iti Diostayo [ni Jehova], nga agtutugaw iti trono, ken iti Kordero ni Jesu-Kristo].” Ket dagiti amin a nasungdo a nailangitan nga organisasion ti Dios, gapu iti pannakatignayda iti panangapresiar iti naindaklan a kinapateg dagitoy a paspasamak, makikaduadanto kadakuada iti panagdayaw, a kunkunada: “Amen! Bendision ken dayag ken sirib ken panagyaman ken dayaw ken bileg ken pannakabalin ti maadda koma iti Diostayo iti agnanayon. Amen.”—Apocalipsis 7:10-12.
13. Kasano ti panangiladawan ti Biblia iti probision a naaramid a mambiag ken mangagas iti sangatauan?
13 Aminton a sangatauan buklendanton kamaudiananna ti nagkaykaysa a kagimongan a mangidayaw iti pudno a Dios, “maysa a baro a daga” iti sidong ti “maysa a baro a langit” a mangiyebkas iti naayat a kinasoberano ni Jehova. Babaen iti panangusar iti nakaay-ayat a simbolo, ti maudi a libro ti Biblia iladawanna ti nakaskasdaaw a gunggona nga agayusto iti sangatauan a kas ti “maysa a karayan iti danum ti biag, a sumilsilap a kas iti sarming, a rummuar iti trono ti Dios ken iti Kordero” ket agayus iti tengnga ti kalsada iti nailangitan a Baro a Jerusalem. Iti igid daytoy a karayan adda “kaykayo iti biag” nga agbunga kadagiti bungbunga a mambiag kadagidiay mangan iti dayta ken bulbulong a maipaay a pannakaagas dagiti nasnasion. Nairepresentar ditoy isu ti intero a probision nga impaay ti Dios a maipaay a pannakaagas ken mangtaginayon kadagiti mamati, natulnog a sangatauan ken mamagbalin kadakuada a mangtagiragsak iti agnanayon a biag babaen ken Jesu-Kristo.—Apocalipsis 21:1, 2; 22:1, 2.
14. Kadagiti ania a pamay-an a ti kasasaad ti “baro a daga” naidumanto kadagidiay adda iti lubong ita?
14 Dagiti kasasaadto ditoy daga makabang-arto ti pannakaidumana manipud iti aniaman a pinataud ti daan a lubong. Babaen ti panangiyaplikarda kadagiti gunggona iti daton ni Kristo ken ti pamay-an ti pannakasursuro ti pagayatan ti Dios, dagiti natulnog, agraman dagidiay mapagungar manipud kadagiti natay, maluk-atandanto manipud iti aniaman a pakakitaan iti basol ket matulongandanto a rumang-ay iti pisikal, mental, emosional ken espiritual agingga a magun-odandan ti kinaperpekto. Imbes a pataudenda ti mangbingaybingay nga “ar-aramid iti lasag,” tunggal maysa masursuronanto ti mangpataud a siwawadwad kadagita a nadiosan a bungbunga iti ayat, rag-o, talna, mabayag a panagitured, kinamanangaasi, kinaimbag, pammati, kinaemma, ken panagteppel. (Galacia 5:19-23) Babaen iti kasta nga espirituda, ti apit ti daga a mausarto a sipaparabur a maipaay iti pakasapulan ti amin a sangatauan. Ad-addanto nga addaan panggep ti panagbiag ngem idi bayat a ti sangatauan agkaykaysada nga agtrabaho a mangtungpal iti orihinal a panggep ti Namarsua a maipaay itoy daga ken dagiti agnaed iti dayta.
15. (a) Ania a nakaay-ayat nga awis ti maipapaayen iti sangatauan? (b) Gapuna, ania koma ti ar-aramidentayo a sinaggaysa?
15 Iti naragsak a pananginanama kadagitoy amin, ti espiritu ti Dios ken ti nobia ni Kristo sipapasnekton nga ipaayna ti awis kadagiti tattao iti sadinoman: “‘Umayka!’ Ket ti dumngeg kunaenna: ‘Umayka!’ Ket ti mawaw umay koma; ket ti mayat awatenna ti danum ti biag nga awan baybayadna.” (Apocalipsis 22:17) Ngarud, itan, saanen a tiempo ti panaguray agingga a ti countdown iti dakkel nga aldaw ni Jehova makagtengen iti oras a zero iti dakkel a rigat. Gaput’ inawattayo ti naparaburan nga awis nga “uminum iti danum ti biag nga awan baybayadna,” datayo addaantayon iti pribilehio a mangawis kadagiti sabsabali. Panawenen iti naregta a panagtrabaho iti biang dagidiay amin a sigagagar nga agtarigagay a makalasat a sumrek iti nadayag a “baro a daga.”