Dagiti Pamay-an ti Panangasaba

KAS naregta a manangiwaragawag iti naimbag a damag, nangipakita ni Jesus iti ulidan kadagiti pasurotna. Isu ti napan nakisarita ken nangisuro kadagiti tattao iti pagtaenganda ken kadagiti publiko a lugar. (Mat. 9:35; 13:36; Luc. 8:1) Nakisarita ni Jesus kadagiti indibidual, insurona dagiti adalanna nga is-isuda, ken nagpalawag iti rinibu a tattao. (Mar. 4:10-13; 6:35-44; Juan 3:2-21) Inaprobetsarna ti amin a gundaway tapno mangparegta ken mangipaay iti namnama. (Luc. 4:16-19) Kanayon a nangasaba tunggal adda gundaway, uray no kasapulan idin nga aginana ken mangan. (Mar. 6:30-34; Juan 4:4-34) No basaentayo dagiti naipaltiing a salaysay maipapan iti ministerio ni Jesus, saantayo kadi a matignay a mangtulad iti ulidanna? Kas kadagiti apostol, sigurado a matignaytayo.​—Mat. 4:19, 20; Luc. 5:27, 28; Juan 1:43-45.

² Panunotentayo dagiti gundaway a silulukat ita kadatayo a makiraman iti trabaho nga inrugi ni Jesu-Kristo dandani 2,000 a tawenen ti napalabas.

PANANGASABA ITI BINALAYBALAY

³ Kas Saksi ni Jehova, bigbigentayo a napateg ti organisado a panangikasaba iti naimbag a damag iti binalaybalay. Nasaknap ti panangusartayo iti daytoy a pamay-an nga isu payen ti nagbalin a pakabigbigantayo. Ipakita ti nasayaat a resulta a talaga nga epektibo daytoy a pamay-an tapno makasabaan dagiti minilion a tattao iti ababa a tiempo. (Mat. 11:19; 24:14) Ti panagbalaybalay ket praktikal a pamay-an tapno maipakita ti ayattayo ken Jehova ken iti padatayo a tao.​—Mat. 22:34-40.

⁴ Saan laeng a dagiti Saksi ni Jehova ita ti nangasaba iti binalaybalay. Imbaga ni apostol Pablo nga insurona dagiti tattao iti pagtaenganda. Idi dinakamatna kadagiti manangaywan idiay Efeso ti ministeriona, kinunana: “Manipud pay iti umuna nga aldaw a kaaddak iti probinsia ti Asia, . . . saanak a nagkedked a nangibaga kadakayo iti aniaman a makagunggona, ken insurokayo . . . iti binalaybalay.” Iti nagduduma a pamay-an, ‘naan-anay nga inlawlawag ni Pablo kadagiti Judio ken Griego a masapul nga agbabawida, agdayawda iti Dios, ken mamatida ken Apotayo a Jesus.’ (Ara. 20:18, 20, 21) Iparparegta idi dagiti emperador iti Roma ti idolatria isu nga adu a tattao ti ‘managbuteng kadagiti dios.’ Masapul ngarud a birokenda ti “Dios a nangaramid iti lubong ken iti amin a banag nga adda iti dayta,” Daydiay mangibagbaga a “masapul nga agbabawi ti amin a tao iti sadinoman.”​—Ara. 17:22-31.

⁵ Ad-adda a naganat ita a maidanon ti naimbag a damag kadagiti tattao. Nakaas-asidegen ti panungpalan daytoy dakes a sistema ti bambanag. Yantangay mabigbigtayo daytoy a panagkasapulan, ad-adda koma ngarud nga aramidentayo ti amin a kabaelantayo iti trabaho a panagbalaybalay. Ammotayo nga awanen ti kasayaatan a wagas no di ti panagbalaybalay, ti nasuboken a pamay-an a panangbirok kadagiti tattao a mabisbisin iti kinapudno. Epektibo met ita daytoy a kas idi kaaldawan ni Jesus ken dagiti apostol.​—Mar. 13:10.

⁶ Makiramramanka kadi a naan-anay iti panagbalaybalay? No wen, sigurado a maragragsakan kenka ni Jehova. (Ezek. 9:11; Ara. 20:35) Ngem mabalin a saan a nalaka kenka ti agbalaybalay. Nalabit limitadon ti maar-aramidam gapu iti sakit, kinalakay wenno kinabaket, wenno saan a dumngeg ti kaaduan a tattao iti teritoriam. Mabalin nga iparit pay ketdi ti gobierno ti panangasaba. Nalabit managbabainka isu a marigatanka a mangirugi iti saritaan kadagiti saanmo nga am-ammo. Gapuna, mabalin nga agnerbioska tunggal mangasabaka iti binalaybalay ngem dika koma maupay. (Ex. 4:10-12) Kasta met laeng ti mapaspasaran dagiti kakabsatmo iti adu a lugar.

⁷ Inkari ni Jesus kadagiti adalanna: “Adtoy! addaak kadakayo iti amin nga al-aldaw agingga iti panungpalan daytoy a sistema ti bambanag.” (Mat. 28:20) Dayta a kari ti mangpabileg kadatayo iti trabaho a panangbirok kadagiti agbalin nga adalan. Agtalektayo met a kas ken apostol Pablo a nangibaga: “Ta adda pigsak a mangsango iti amin a banag gapu iti daydiay mangpabpabileg kaniak.” (Fil. 4:13) Naan-anay a gundawayam dagiti urnos ti kongregasion para iti panangasaba iti binalaybalay. Maparegta ken matulongandaka no makikaduaka iti sabsabali. Agkararagka tapno mapagballigiam ti aniaman a karit ken aramidem ti amin a kabaelam kas manangaskasaba iti naimbag a damag.​—1 Juan 5:14.

⁸ Bayat nga isarsaritam iti sabsabali ti naimbag a damag, adda pribilehiom a mangilawlawag ‘iti namnamam.’ (1 Ped. 3:15) Ad-adda a makitam ti dakkel a nagdumaan dagidiay addaan iti namnama iti Pagarian ken dagidiay awanan iti namnama. (Isa. 65:13, 14) Maragsakanka a makaammo a nagtulnogka iti bilin ni Jesus nga ‘iraniagmo ti lawagmo.’ Adda pay pribilehiom a tumulong iti sabsabali a mangammo iti maipapan ken Jehova ken iti kinapudno a mangyeg iti agnanayon a biag.​—Mat. 5:16; Juan 17:3; 1 Tim. 4:16.

⁹ Adda dagiti urnos a panagbalaybalay iti intero a makalawas. Kadagiti lugar nga awan dagiti tattao iti pagtaenganda no aldaw, inyurnos ti dadduma a kongregasion ti mangasaba iti rabii. Ngamin kaykayat dagiti tattao ti umawat iti bisita no mumalemen wenno sumipngeten imbes nga iti agsapa.

PANANGBIROK KADAGITI MAIKARI

¹⁰ Binilin ni Jesus dagiti adalanna a ‘birokenda’ dagiti maikari. (Mat. 10:11) Ngem saan laeng a nagbirok ni Jesus kadagiti dumngeg iti mensahe iti binalaybalay. Kinapudnona, nangasaba iti amin a gundaway, iti pormal ken di pormal a pamay-an. (Luc. 8:1; Juan 4:7-15) Nangasaba met dagiti apostol kadagiti tattao iti nadumaduma a lugar.​—Ara. 17:17; 28:16, 23, 30, 31.

¹¹ Kasta met ita, ti panggeptayo ket maidanon ti mensahe maipapan iti Pagarian iti amin a tattao agingga a posible. Kaipapanan daytoy a tuladentayo ti pamay-an ni Jesus ken dagiti apostolna no maipapan iti panangbirok kadagiti agbalin nga adalan ken makibagay iti agbaliwbaliw a tiempo ken iti nagduduma a kasasaad dagiti tattao iti teritoriatayo. (1 Cor. 7:31) Kas pagarigan, nagballigi dagiti agibumbunannag iti panangasaba kadagiti tattao iti lugar ti negosio. Iti adu a pagilian, napaneknekan nga epektibo ti panangasaba kadagiti lansangan, parke, paradaan, wenno iti sadinoman a pakasarakan kadagiti tattao. Iti dadduma a kongregasion, nagusarda iti lamisaan wenno mayakar-akar a pagidispleyan iti teritoriada. Kasta met, nangorganisar ti sanga nga opisina iti espesial a panangasaba iti publiko kadagiti siudad nga adu dagiti tattao nga aglabas. Dagiti agibumbunannag a makiraman iti daytoy ket naggapu iti nagduduma a kongregasion. Kas resultana, no saan a makasarita dagiti agibumbunannag dagiti tattao iti pagtaenganda, mabalin a maammuanda ti naimbag a damag iti espesial a panangasaba iti publiko.

¹² No adda makasabaantayo kadagiti publiko a lugar nga interesado iti mensahe ti Biblia, mabalintayo ti mangitukon iti maitutop a publikasion. Tapno ad-adda nga aginteres, mabalinmo nga ited ti nagan ken numero ti teleponom iti interesado sa pagtulaganyo ti isasarungkarmo, ipakitam kenkuana ti jw.org, wenno ibagam ti adres ti kaasitgan a Kingdom Hall a pakaang-angayan dagiti gimong. Mabigbigmo a ti panangasaba kadagiti publiko a lugar ket makaparagsak a pamay-an tapno mapalawam ti ministeriom.

¹³ Ti trabaho a naited kadagiti Kristiano ita ket saan laeng a panangipakaammo iti naimbag a damag. Tapno agballigika a tumulong iti sabsabali nga umawat iti kinapudno a mangiturong iti biag, masapul a mamin-adu a sarungkaram dagiti interesado tapno rumang-ayda ken agbalinda a nataengan a Kristiano.

PANAGSARUNGKAR

¹⁴ Kinuna ni Jesus kadagiti pasurotna: “Dakayonto dagiti saksik . . . agingga iti kaadaywan a paset ti daga.” (Ara. 1:8) Ngem kinunana pay kadakuada: “Inkayo ngarud kadagiti tattao iti amin a nasion ket . . . isuroyo a tungpalenda ti amin nga imbilinko kadakayo.” (Mat. 28:19, 20) Ti panagsarungkar ket mangnayon iti rag-o iti panagserbitayo ken Jehova. Mabalin a maragsakanto manen a makisarita kenka dagiti interesado iti naimbag a damag a nakasaritam idi damo. No iranudmo ti kanayonan nga impormasion manipud iti Biblia, mapabilegmo ti pammatida iti Dios ken maipabigbigmo ti naespirituan a kasapulanda. (Mat. 5:3) No agsaganaka a naimbag ken sumarungkarka iti oras a kombiniente kadakuada, mabalin a makairugika iti panangyadal iti Biblia. Daytoy koma ti panggepmo no sumarungkarka. Saantayo laeng nga agmula iti bin-i ti kinapudno no di ket sibugantayo met dayta.​—1 Cor. 3:6.

¹⁵ Mabalin a marigatan nga agsarungkar ti dadduma. Nalabit nalaingka a mangiparang iti ababa a presentasion maipapan iti naimbag a damag, ken magusgustuam dayta a paset ti ministerio. Ngem no panunotemon ti sumarungkar iti bumalay tapno pagsaritaanyo ti Biblia, mabalin a marigatankan. Naturturedka no nakasaganaka a naimbag. Usarem dagiti praktikal a singasing kadagiti gimong iti tengnga ti lawas. Mabalinmo met ti mangikuyog iti agibumbunannag nga ad-adu ti kapadasanna.

PANANGYADAL ITI BIBLIA

¹⁶ Idi nakisarita ti ebanghelisador a ni Felipe iti Judio a proselita a mangbasbasa iti Sao ti Dios, insaludsod ni Felipe: “Ammom kadi ti basbasaem?” Simmungbat ti lalaki: “Kasanok a maammuan no awan ti mangisuro kaniak?” Ibaga ti salaysay ti Biblia iti Aramid kapitulo 8 nga inrugi ni Felipe ti saritaan iti Kasuratan a basbasaen ti lalaki nga “imbagana ti naimbag a damag maipapan ken Jesus.” (Ara. 8:26-36) Ditay ammo no kasano kapaut a kinasarita ni Felipe ti lalaki, ngem inlawlawag ni Felipe ti naimbag a damag agingga a nagbalin a manamati ti lalaki ken nagkiddaw a mabautisaran ket nagbalin nga adalan ni Jesu-Kristo.

¹⁷ Adu ita ti saan a pamiliar iti linaon ti Biblia. Gapuna, adu a lawas, bulan, tawen, wenno napapaut pay ketdi a sarungkaran ken detalyado nga iyadalantayo ida iti Biblia sakbay a maaddaanda iti pammati ken kualipikadodan a mabautisaran. Ngem adda pagimbaganna no naanus ken naayatka a tumulong kadagiti interesado nga agbalin nga adalan, ta kinuna ni Jesus: “Naragragsak ti mangted ngem ti umawat.”​—Ara. 20:35.

¹⁸ Kayatmo la ketdi nga usaren ti maysa kadagiti publikasion a katulongan iti panangyadal iti Biblia. No iyaplikarmo dagiti instruksion a maipapaay kadagiti gimong iti tengnga ti lawas ken makikaduaka kadagiti aduan kapadasan a kakabsat iti kongregasion, mabalin a rumang-ay ti abilidadmo a mangikondukta kadagiti epektibo a panagadal, a makatulong iti dadduma nga agbalin nga adalan ni Jesu-Kristo.

¹⁹ Tapno makairugi ken makaikonduktaka iti panangyadal iti Biblia, agpatulongka iti maysa kadagiti manangaywan wenno iti maysa a kabsat nga epektibo a mangyadal iti Biblia. Makatulong met kenka dagiti singasing iti Workbook iti Gimong a Panagbiag ken Ministerio a maidemostra iti gimong. Agtalekka ken Jehova ken ikararagmo a maaddaanka iti iyad-adalan. (1 Juan 3:22) Agingga a mabalin, ikagumaam ti maaddaan iti iyad-adalan iti Biblia malaksid iti panagadal nga ikonkonduktam iti pamiliam. Naragragsakka iti ministerio no adu ti iyad-adalam iti Biblia.

PANANGISERREK KADAGITI INTERESADO ITI ORGANISASION NI JEHOVA

²⁰ No tulongantayo dagiti tattao a mangam-ammo ken Jehova a Dios, agbalinda nga adalan ni Jesu-Kristo ken agbalinda a paset ti kongregasion. Rumang-ay ken agmataengan iti naespirituan dagiti iyad-adalan iti Biblia no bigbigenda ken makitinnulongda iti organisasion ni Jehova. Napateg nga isurotayo ida a mangaramid iti dayta. Dagiti video ken ti broshur a Siasino Ita Dagiti Mangar-aramid iti Pagayatan ni Jehova? ket naisagana para iti daytoy a panggep. Makatulong met dagiti impormasion iti Kapitulo 4 daytoy a libro.

²¹ Iti damo pay laeng a pannakisaritam maipapan iti Biblia, ipaawatmon iti iyad-adalam nga adda organisasion nga us-usaren ni Jehova tapno maitungpal ita ti trabaho a panangasaba. Ilawlawagmo ti kinapateg dagiti katulongan iti panagadal iti Biblia, ken ilawlawagmo no kasano a maar-aramid ken maiwarwaras dagitoy iti intero a lubong babaen kadagiti boluntario a trabahador a dedikado iti Dios. Awisem ti iyad-adalam nga umay makigimong iti Kingdom Hall. Ilawlawagmo no kasano a maar-aramid dagiti gimong, ken iyam-ammom kadagiti kakabsat. Iyam-ammom met kadagiti dadduma a kakabsat kadagiti asamblea ken kombension. Kadagitoy a panagtataripnong ken iti dadduma pay a gundaway, bay-am a mapaliiwna no kasano nga ipakpakita dagiti adipen ni Jehova ti ayat a pakabigbigan dagiti pudno a Kristiano. (Juan 13:35) Ad-adda a suminged ken Jehova ti maysa nga interesado bayat nga umun-uneg ti apresasionna iti organisasion ni Jehova.

PANANGUSAR ITI LITERATURA A NAIBATAY ITI BIBLIA

²² Dagiti nagkauna a Kristiano ket naregta nga agibumbunannag iti Sao ti Dios. Nagaramidda iti kopia ti Kasuratan a personal nga usarenda ken para iti panagadal iti kongregasion. Ipakpakaammoda iti sabsabali ti Sao ti Dios a naglaon iti kinapudno. Manmano laeng idi dagiti naisurat a kopia isu a talaga a maipatpateg dagitoy. (Col. 4:16; 2 Tim. 2:15; 3:14-17; 4:13; 1 Ped. 1:1) Ita, agus-usar dagiti Saksi ni Jehova iti moderno a pamay-an ti panagimprenta tapno makaipablaakda iti ginasut a milion a Biblia ken katulongan iti panagadal iti Biblia. Karaman kadagitoy dagiti tract, broshur, libro, ken magasin iti adu a lengguahe.

²³ No iranranudmo ti naimbag a damag iti sabsabali, usarem dagiti katulongan iti panagadal iti Biblia nga ipapaay ti organisasion ni Jehova. Gapu ta ammom a nagunggonaanka iti panangbasa ken panangadalmo kadagiti publikasion dagiti Saksi ni Jehova, kayatmo la ketdi nga iranud dagiti bambanag a naadalmo.​—Heb. 13:15, 16.

²⁴ Umad-adu itan ti agus-usar iti Internet kas kangrunaan a pangalaanda iti impormasion. Gapuna, malaksid kadagiti literatura iti Biblia, ti opisial a website-tayo a jw.org ket epektibo a pamay-an a panangipakaammo iti naimbag a damag. Mabalin nga usaren dagiti tattao iti intero a lubong ti kompiuter tapno mabasa wenno mangngeganda dagiti audio recording ti Biblia ken dagiti literatura a naibatay iti Biblia iti adu a lengguahe. Dagidiay madi a makisarita kadatayo wenno aggigian kadagiti lugar a manmano ti makasaritada a Saksi ni Jehova, maammuanda ti patpatientayo no luktanda ti jw.org iti mismo a pagtaenganda.

²⁵ Ipakaammotayo ngarud ti jw.org iti amin a gundaway. No agsaludsod ti bumalay maipapan iti patpatientayo, mabalintayo nga usaren ti mobile device wenno kompiuter tapno maipakitatayo a dagus kenkuana ti sungbat. No adda makasaritatayo a sabali ti lengguahena, agraman ti sign language, ibagatayo a luktanna ti website-tayo tapno mabasana ti Biblia ken dagiti literatura a naibatay iti Biblia iti lengguahena. Adun nga agibumbunannag ti nangusar iti maysa kadagiti video-tayo iti website tapno mairugi ti saritaan maipapan iti Biblia.

DI PORMAL A PANANGASABA

²⁶ Kinuna ni Jesus kadagidiay umim-imdeng iti saona: “Dakayo ti silaw ti lubong. . . . Agraniag koma ti lawagyo babaen kadagiti nasayaat nga aramidyo tapno makita dagita ti tattao, ket idaydayawda ti Amayo nga adda idiay langit.” (Mat. 5:14-16) Nagna dagitoy nga adalan iti dana ti Dios gapu ta tinuladda ni Jesus a nangikuna: “Siak ti silaw ti lubong.” Nangipakita ni Jesus iti ulidan kadagiti Kristiano iti panangisilnag iti “lawag a mangted iti biag” tapno magunggonaan ti amin a dumngeg.​—Juan 8:12.

²⁷ Nangipakita met ni apostol Pablo iti ulidan a tuladentayo. (1 Cor. 4:16; 11:1) Idi adda idiay Atenas, inaldaw a nangasaba kadagiti adda iti plasa. (Ara. 17:17) Tinulad dagiti Kristiano idiay Filipos ti ulidanna. Gapu iti dayta, insurat ni Pablo maipapan kadakuada nga agbibiagda iti “tengnga ti nakillo ken nakadakdakes a henerasion,” a ‘pagsilsilnaganda kas silsilaw iti lubong.’ (Fil. 2:15) Maisilnagtayo met ita ti kinapudno maipapan iti Pagarian babaen iti sao ken aramid tunggal adda gundawaytayo a mangipakaammo iti naimbag a damag. Talaga a mailasin dagiti tattao iti lubong a naidumatayo gapu ta mapagpiaran ken nasayaat ti kababalintayo. Ngem no ibagatayo kadakuada ti naimbag a damag, maammuanda no apay a naidumatayo.

²⁸ Adu kadagiti Saksi ni Jehova ti mangibagbaga iti naimbag a damag kadagiti tattao nga adda iti pagtrabahuan, eskuelaan, no agbibiaheda, wenno bayat nga ar-aramidenda dagiti inaldaw a trabahoda. No agbibiahetayo, mabalin nga adda gundawaytayo a makisarita iti padatayo a pasahero. Alerto koma ti tunggal maysa kadatayo a mangiturong iti panangasaba ti ordinario a saritaan. Nakasaganatayo koma a makisarita iti sabsabali iti maitutop a gundaway.

²⁹ Matignaytayo a mangasaba no sipapanunottayo a dayta nga aramidentayo ket pakaidayawan ti Namarsua kadatayo ken pakaitan-okan ti naganna. Kasta met, matulongantayo dagiti interesado a tattao a mangammo ken Jehova tapno agserbida met kenkuana ken maaddaanda iti namnama a biag nga agnanayon no mamatida ken Jesu-Kristo. Maragsakan ni Jehova kadagiti panangikagumaantayo ken ibilangna dagita a sagrado a panagserbi.​—Heb. 12:28; Apoc. 7:9, 10.

TERITORIA

³⁰ Pagayatan ni Jehova a maikasaba ti mensahe maipapan iti Pagarian iti intero a lubong, kadagiti siudad ken away. Gapu iti dayta, makaawat iti teritoria manipud sanga nga opisina dagiti kongregasion ken indibidual nga agserbi kadagiti adayo a lugar. (1 Cor. 14:40) Maitunos daytoy iti urnos nga inted ti Dios idi umuna a siglo. (2 Cor. 10:13; Gal. 2:9) Gapu iti napartak a panagsaknap ti trabaho a panangikasaba iti Pagarian iti maudi nga al-aldaw, adu ti maitungpal no nasayaat ti pannakaorganisar ti panangwanas iti naituding a teritoria ti kongregasion.

³¹ Iwanwanwan ti manangaywan iti serbisio ti pannakawanas ti teritoria ti kongregasion. Mabalin a ministerial nga adipen ti aktual a mangituding iti teritoria. Adda dua a klase ti teritoria, ti teritoria ti grupo ken personal a teritoria. No bassit laeng ti teritoria, masansan a dagiti manangaywan iti grupo ti mangiggem iti teritoria a mabalin a trabahuen dagiti agibumbunannag iti grupoda. Ngem no nalawa ti teritoria, mabalin a mangala dagiti agibumbunannag iti personal a teritoriada.

³² No adda personal a teritoria ti maysa nga agibumbunannag, mabalinna ti mangasaba sadiay no awan ti nayurnos a taripnong sakbay ti panangasaba wenno saan a praktikal ti agkakadua kas grupo. Kas pagarigan, nagkiddaw iti teritoria ti dadduma nga agibumbunannag iti lugar nga asideg ti pagtrabahuanda ket mangasabada sadiay no pangngaldaw wenno kalpasan ti trabaho. Nagkiddaw iti personal a teritoria ti dadduma a pamilia iti lugar a pagnanaedanda, sada mangasaba iti rabii. No ti personal a teritoria ti maysa nga agibumbunannag ket asideg laeng iti pagnanaedanna wenno trabahona, ad-adu ti tiempo a mausarna iti ministerio. Siempre, mabalin met a trabahuen ti grupo dagiti personal a teritoria. No kayatmo nga adda personal a teritoriam, agkiddawka iti adipen ti teritoria (territory servant).

³³ Teritoria man dayta ti grupo nga ay-aywanan ti manangaywan iti grupo wenno personal a teritoria ti maysa nga agibumbunannag, ikagumaan daydiay nakaitedan ti teritoria nga adda makasaritana iti tunggal balay. Dagiti urnos iti panangwanas iti teritoria ket masapul a maitunos kadagiti agaplikar a linteg maipapan iti pannakaprotektar dagiti impormasion. Ikagumaan ti amin a manangaywan iti grupo wenno agibumbunannag a mangig-iggem iti teritoria a mawanasda dayta iti uneg ti uppat a bulan. No nalpasen, ipakaammona iti adipen ti teritoria a nawanasen ti teritoria. Depende iti kasasaad, ti teritoria ket mabalin a wanasen manen ti manangaywan iti grupo wenno ti agibumbunannag wenno isublina dayta iti adipen ti teritoria.

³⁴ No agtitinnulong ti amin a miembro ti kongregasion, makasabaan amin ti adda iti teritoria. Maliklikan met ti aggigiddan a panangasaba ti dua wenno ad-adu pay nga agibumbunannag iti maymaysa a lugar, banag a pakasuronan dagiti bumalay. Iti kasta, maipakitatayo ti konsiderasion kadagiti kakabsat ken kadagiti tattao iti teritoriatayo.

TUMULONG A MANGASABA KADAGITI TATTAO ITI AMIN A LENGGUAHE

³⁵ Masapul a maammuan ti amin ti maipapan ken Jehova a Dios, ti Anakna, ken ti Pagarian. (Apoc. 14:6, 7) Kayattayo a tulongan ti amin a tattao a sabali ti lengguaheda nga umawag iti nagan ni Jehova tapno maisalakanda ken maikawesda ti baro a personalidad. (Roma 10:12, 13; Col. 3:10, 11) Ania dagiti tumaud a karit no ikasabatayo ti naimbag a damag iti lugar a nagduduma ti lengguahe a maus-usar? Ania ti aramidentayo tapno maikkanda iti gundaway a makangngeg iti mensahe ti Pagarian iti lengguahe a matarusanda?​—Roma 10:14.

³⁶ Ti teritoria ti kongregasion ket depende iti lengguahe a maus-usar iti kongregasion. Gapuna, mabalin a mangasaba ti nagduduma a kongregasion iti maymaysa a lugar a nagduduma ti lengguahe dagiti agnanaed. Kadagita a kasasaad, nasayaat no dagiti agibumbunannag iti tunggal kongregasion ipamaysada ti mangasaba kadagiti tattao nga agus-usar iti lengguahe nga us-usaren ti kongregasion. Agaplikar met daytoy iti kampania a tinawen a panagiwaras iti imbitasion. Ngem no mangaskasaba dagiti agibumbunannag iti di pormal ken iti publiko, mabalinda a kasarita ken paimaan iti literatura ti asinoman, uray ania ti lengguahena.

³⁷ Adda dagiti kongregasion a sabali ti lengguahena a saan a regular a makapan iti ad-adayo a teritoriada. Kadagiti kasta a kasasaad, nasayaat nga adda komunikasion dagiti manangaywan iti serbisio kadagiti kongregasion nga adda teritoriada a nagduduma ti lengguahe dagiti tattao. Pagsasaritaanda no ania ti kasayaatan a pamay-an a panangwanas iti teritoriada. Iti kasta, adda gundaway ti amin a makangngeg iti mensahe ti Pagarian ken saan a maulit-ulit a makasabaan dagiti bumalay.​—Prov. 15:22.

³⁸ Ania ti aramidentayo no ti nakasaritatayo ket sabali ti lengguahena? Ditay koma ipapan a kasabaanto dagiti agibumbunannag nga agsasao iti lengguahena. Nagsursuro ti dadduma nga agibumbunannag iti simple a presentasion iti lengguahe dagiti tattao a masansan a masarakanda iti teritoriada. Ibagatayo iti tao a makasaritatayo a mabalinna a basaen ken i-download dagiti literatura iti lengguahena iti opisial a website-tayo a jw.org, wenno mabalintayo nga itulodan iti literatura iti lengguahena.

³⁹ No interesado ti nakasaritatayo, ikagumaantayo ti mangbirok iti kabsat a makatulong kenkuana iti lengguahe a maawatanna. Mabalintayo met nga ibaga dagiti asideg a lugar a pakaang-angayan ti gimong iti lengguahena. No kayatna nga adda sumarungkar kenkuana nga agsasao iti lengguahena, mabalintayo nga isuro no kasanona a maikabil iti jw.org dagiti impormasion no kasano a makontak tapno masarungkaran. Kalpasanna, ikagumaan ti sanga nga opisina a biroken ti kaasitgan nga agibumbunannag, grupo, wenno kongregasion a mabalin a tumulong kenkuana.

⁴⁰ Agingga a di pay ibaga ti interesado nga addan sumarsarungkar kenkuana nga agsasao iti lengguahena, itultuloytayo latta a sarungkaran. No dadduma, ipakaammo ti sanga nga opisina kadagiti panglakayen nga awan ti masarakanda a makasao iti lengguahe ti interesado. No mapasamak daytoy, ikagumaantayo latta a tulongan ti interesado. No posible, iyadalantayo iti Biblia nga usarentayo ti maysa a publikasion iti lengguahena. No usarentayo a naimbag dagiti ladawan ken ipabasatayo dagiti teksto, maawatanna dagiti kangrunaan nga isursuro ti Biblia. Mabalin a sidadaan nga agipatarus ti kapamiliana a makaammo iti lengguahena ken makaawat met iti lengguahe a maus-usar iti agdama a pagnanaedanda.

⁴¹ Tapno maiserrek iti organisasion ti Dios ti maysa nga interesado, awisentayo a makigimong uray no dina unay maawatan dagiti programa. Tulongantayo a mangbirok kadagiti teksto a maibasa ken usarentayo ti Biblia iti lengguahena no adda. Ngamin, no makalangenna dagiti kakabsat iti kongregasion, rumang-ay ken bumileg iti naespirituan.

⁴² Pregroup: Ti pregroup ket buklen dagiti agibumbunannag a mangaskasaba iti sabali a lengguahe malaksid iti lengguahe nga us-usaren ti kongregasion uray no awan ti kualipikado a panglakayen wenno ministerial nga adipen a mangidaulo iti linawas a gimong iti dayta a lengguahe. Mabalin nga awaten ti sanga nga opisina nga ag-host ti maysa a kongregasion iti pregroup no maragpat dagiti sumaganad a kualipikasion:

1. (1) Adu a tattao iti dayta a lugar ti agsasao iti lengguahe a naiduma iti lengguahe ti kongregasion.

2. (2) Adda sumagmamano nga agibumbunannag a makaammo iti dayta a lengguahe wenno sidadaan nga agsursuro iti dayta a lengguahe.

3. (3) Sidadaan ti bagi dagiti panglakayen a mangidaulo iti pannakaorganisar ti panangasaba iti dayta a lengguahe.

No kayat ti bagi dagiti panglakayen ti mang-host iti pregroup, masapul nga agkonsultada iti manangaywan iti sirkitoda. Mabalin nga adda dagiti kongregasion nga ammona a mangisaysayangkat iti panangasaba kadagiti tattao iti dayta a lengguahe ken mabalin a makaipaay iti napateg nga impormasion a makatulong a mangikeddeng no ania a kongregasion ti kasayaatan a mang-host iti pregroup. No naikeddengen no ania a kongregasion, masapul nga agsurat dagiti panglakayen iti sanga nga opisina ket kiddawenda a pormal a mabigbigda kas kongregasion a mang-host iti pregroup.

⁴³ Grupo: Mabalin nga awaten ti sanga nga opisina nga ag-host ti maysa a kongregasion iti maysa a grupo no maragpat dagiti sumaganad a kualipikasion:

1. (1) Adda umdas a bilang dagiti tattao a makasabaan iti dayta a lengguahe ken adda potensial ti panagrang-ay.

2. (2) Adda uray bassit la a bilang dagiti agibumbunannag a makaammo wenno agsursuro iti dayta a lengguahe.

3. (3) Adda kualipikado a panglakayen wenno ministerial nga adipen a mangidaulo ken mangikondukta iti uray maysa laeng a gimong kada lawas​—wenno maysa a paset ti linawas a gimong, kas iti palawag publiko wenno Panagadal iti Pagwanawanan​—iti dayta a lengguahe.

No naragpaten dagitoy iti nainkalintegan a pamay-an, agsurat ti bagi dagiti panglakayen iti sanga nga opisina nga iramanda dagiti kompleto a detalye ken kiddawenda a pormal a mabigbigda kas kongregasion a mang-host iti grupo. Ti panglakayen wenno ministerial nga adipen a mangidaulo iti grupo ket maawagan iti “manangaywan iti grupo” wenno “adipen ti grupo” ken responsabilidadna nga aywanan dayta a grupo.

⁴⁴ Apaman a maipasdek ti grupo, ti bagi dagiti panglakayen iti host a kongregasion ikeddengna no adda dagiti sabali pay a paset ti gimong a mainayon ken no mamin-ano a maangay dagita iti tunggal bulan. Mabalin met ti mangyurnos kadagiti taripnong sakbay ti panangasaba para iti dayta a grupo. Agtrabaho ti grupo babaen ti panangiwanwan ti bagi dagiti panglakayen ti host a kongregasion. Masapul a balanse ti panangiwanwan dagiti panglakayen ken maseknanda koma iti kasapulan ti grupo. No ti manangaywan iti sirkito ket makipagtrabaho a kadua ti grupo bayat ti lawas nga ibibisitana iti host a kongregasion, mangted iti ababa a report iti sanga nga opisina maipapan iti panagrang-ay ken aniaman nga espesipiko a kasapulan ti grupo. Inton agangay, nalabit agbalinton a kongregasion. Maragsakan ni Jehova no ti amin nga agtrabtrabaho iyaplikarda ti instruksion ti organisasionna.​—1 Cor. 1:10; 3:5, 6.

GRUPO A PANANGASABA

⁴⁵ Obligasion dagiti dedikado a Kristiano nga iranud ti naimbag a damag iti sabsabali. Adu ti pamay-an tapno maaramid daytoy, ngem maragsakan ti kaaduan kadatayo a mangasaba a kadua ti dadduma. (Luc. 10:1) Gapuna, iti intero a makalawas, ti tunggal kongregasion ket agtataripnong sakbay ti panangasaba. Nasayaat met a gundaway dagiti piesta opisial para iti grupo a panangasaba, yantangay adu a kakabsat ti awan trabahona. Mangyurnos ti Komite ti Serbisio ti Kongregasion kadagiti taripnong sakbay ti panangasaba iti kombiniente nga oras ken lugar iti aldaw ken rabii.

⁴⁶ Kadagiti grupo a panangasaba, makapagkakadua dagiti agibumbunannag ken ‘makapagpipinnaregtada.’ (Roma 1:12) Mabalin a makikadua dagiti kabbaro iti nalaing ken aduan kapadasan nga agibumbunannag tapno makasursuroda. Iti dadduma a lugar, nasaysayaat no dua wenno ad-adu pay nga agibumbunannag ti agkukuyog a mangasaba tapno natalgedda. Uray no planom ti agmaymaysa a mangasaba, ti ipapanmo iti taripnong sakbay ti panangasaba ket makaparegta iti amin. Naturturedka a mangasaba no ammom nga adda met rimmuar iti dayta a lugar. Saan a kasapulan a tabunuan dagiti payunir ken dadduma pay a kakabsat ti tunggal taripnong sakbay ti panangasaba nga inyurnos ti kongregasion, nangruna no inaldaw a maangay dayta. Ngem mabalin a suportaranda ti dadduma a taripnong sakbay ti panangasaba kada lawas.

⁴⁷ Tuladentayo koma ti ulidan ni Jesus ken dagiti apostol! Sigurado a bendisionan ni Jehova dagiti panagreggettayo no naan-anay a makiramantayo iti nagpateg a trabaho a panangikasaba iti naimbag a damag ti Pagarian.​—Luc. 9:57-62.