Oktubre

Marigatanka kadi nga agtulnog no dadduma? Kasta idi ni Ari David isu nga inkararagna iti Dios: “Tignayennak a situtulok nga agtulnog kenka.” (Sal. 51:12) Ay-ayaten ni David ni Jehova. Ngem adda dagiti tiempo a narigatan ni David nga agtulnog, ket kastatayo met. Apay? Umuna, natawidtayo ti tendensia nga agsukir. Maikadua, kanayon a padpadasen ni Satanas nga impluensiaannatayo nga agrebelde ken Jehova, kas iti inaramidna idi. (2 Cor. 11:3) Maikatlo, nagadu a tattao iti daytoy a lubong ti addaan iti rebelioso a kababalin, “ti espiritu nga agtigtignay ita kadagiti annak ti kinasukir.” (Efe. 2:2) Masapul nga ikagumaantayo a labanan ti kinaimperpektotayo, ti Diablo, ken daytoy a lubong, tapno makapagtulnogtayo ken Jehova ken kadagidiay inikkanna iti autoridad. w23.10 6 ¶1

Ania ti masursurotayo iti milagro ni Jesus a pinagbalinna ti danum nga arak? Kinapakumbaba. Saan nga impannakkel ni Jesus ti inaramidna a milagro; kinapudnona, dina pulos impannakkel dagiti naaramidanna. Sipapakumbaba ketdi ken kanayon nga intedna ken Amana ti amin a dayag ken dayaw. (Juan 5:​19, 30; 8:28) Matuladtayo ni Jesus no kanayontayo a napakumbaba. Ditay ipannakkel dagiti nagapuanantayo. Saan a ti bagitayo ti ipannakkeltayo no di ket ti nagsayaat a Dios a pribilehiotayo a pagserbian. (Jer. 9:​23, 24) Itedtayo kenkuana ti amin a dayaw. Ngamin, adda kadi nasayaat a maaramidantayo no awan ti tulong ni Jehova? (1 Cor. 1:​26-31) No napakumbabatayo, masapul a saantayo nga iturong ti dayaw iti bagitayo gapu kadagiti nasayaat nga ar-aramidentayo para iti dadduma. Mapnektayon iti pannakaammo a makitkita ken ipatpateg ni Jehova dagiti ar-aramidentayo. (Idilig ti Mateo 6:​2-4; Heb. 13:16) Sigurado a maparparagsaktayo ni Jehova no tultuladentayo ti kinapakumbaba ni Jesus.—1 Ped. 5:6. w23.04 4 ¶9; 5 ¶11-12

Impaisurat ti Dios ken apostol Pablo nga iparegtana kadagiti Kristiano a sapulenda dagiti pagimbagan ti dadduma. Kasanotayo a mayaplikar dayta a balakad bayat dagiti gimong? Laglagipentayo a kayat met ti dadduma ti agkomento a kas kadatayo. Panunotem daytoy. No makiin-innestoriaka kadagiti gagayyemmo, sika kadi ti makaadu nga agsao ket bassiten ti gundawayda nga agsao? Siempre saan! Kayatmo met a pagestoriaen ida. Kasta met kadagiti gimong. Kayattayo nga adu ti agkomento agingga a posible. Kinapudnona, ti maysa kadagiti kasayaatan a pamay-an a maparegtatayo dagiti kakabsat ket ikkantayo ida iti tsansa a mangyebkas iti pammatida. (1 Cor. 10:24) Usigentayo no kasanotayo a maaramid dayta. Kanayon nga agkomentotayo iti ababa, tapno ad-adu ti makapagkomento. Uray no ababa ti komentom, saanka a mangdakamat iti adu unay a punto. No kimarem wenno komentuam ti intero a parapo, awanen ti maisungbat ti dadduma. w23.04 22-23 ¶11-13

Masapul a laglagipentayo a nakapatpateg nga itultuloytayo a tulongan ti dadduma nangruna babaen ti panangasaba. Masapul nga agbalintayo a mannakibagay iti ministerio. Agduduma ngamin ti patpatien dagiti kasabaantayo ken agduduma met ti kultura ken naggapuanda. Mannakibagay ni apostol Pablo, ket makasursurotayo iti ulidanna. Dinutokan ni Jesus ni Pablo kas “apostol kadagiti nasion.” (Roma 11:13) Isu a kinasabaan ni Pablo dagiti Judio, Griego, edukado, ordinario a tattao, opisial ti gobierno, ken ar-ari. Tapno madanonna ti puso dagita a kita ti tattao, ‘inaramidna ti amin tapno matulonganna’ ida. (1 Cor. 9:​19-22) Inkabilanganna ti kultura, patpatien, ken lugar a naggapuan dagiti kinasabaanna ken imbagayna ti presentasion ken pamay-an ti panangisurona. Agbalintayo met a mas epektibo iti ministerio no ibagaytayo ti presentasion ken ti pamay-an ti panangisurotayo depende iti kasapulan dagiti kasabaantayo. w23.07 23 ¶11-12

No naalumamaytayo, nabilegtayo, imbes a nakapuytayo. Masapul a nabilegtayo tapno agtalinaedtayo a kalmado no narigat ti situasion. Ti kinaalumamay ket maysa nga aspeto “ti bunga ti espiritu.” (Gal. 5:​22, 23) Ti Griego a sao a naipatarus a “kinaalumamay” ket maus-usar no dadduma a mangdeskribir iti atap a kabalio a napaamo. Panunotem ti atap a kabalio a napaamo. Uray napaamon, nabileg latta. Kas tattao, kasanotayo a masursuro ti agbalin a naal-alumamay ken nabileg? Saantayo a kabaelan dayta a bukbukodtayo. Masapul nga ikararagtayo nga ipaay kadatayo ti Dios ti espirituna tapno kanayon a maipakitatayo dayta a napintas a kualidad. Nasursuron ti adu ti agbalin a naalumamay. Adu a kakabsat ti siaalumamay a simmungbat idi kinompronta ida dagiti bumusbusor ket nakaibatida iti nasayaat nga impresion kadagiti agob-obserbar.—2 Tim. 2:​24, 25. w23.09 15 ¶3

Iti nakaskasdaaw a sirmata, nakita ni apostol Juan ti 24 a panglakayen idiay langit nga agdaydayaw ken Jehova. Idaydayawda ti Dios ken bigbigenda a maikari isuna nga umawat iti “dayag ken dayaw ken pannakabalin.” (Apoc. 4:​10, 11) Adu met ti rason dagiti matalek nga anghel a mangidaydayaw ken Jehova. Addada idiay langit a kaduana ken am-ammoda unay isuna. Makitkitada kadagiti ar-aramidenna dagiti kualidadna. Bayat a makitkitada no kasano nga agtigtignay ni Jehova, matignayda a mangidaydayaw kenkuana. (Job 38:​4-7) Kadagiti kararagtayo, kayattayo met nga iraman ti panangidaydayaw ken Jehova. Ibagatayo kenkuana dagiti ipatpateg ken ap-apresiarentayo maipapan kenkuana. Bayat a basbasaem ken ad-adalem ti Biblia, ikagumaam a kitaen dagiti magustuam unay a kualidad nga ipakpakita ni Jehova. (Job 37:23; Roma 11:33) Kalpasanna, ibagam ken Jehova no kasano ti panagriknam kadagita a kualidadna. Mabalintayo met nga idaydayaw ni Jehova gapu ta tultulongannatayo ken ti intero a naespirituan a pamiliatayo.—1 Sam. 2:​1, 2. w23.05 3-4 ¶6-7

Idi 1919, nakalapsuten ti ili ti Dios iti Babilonia a Dakkel. Iti dayta a tawen, nangrugin nga agtrabaho ti “matalek ken masirib nga adipen.” Naintiempuan dayta ta mabalinen a magna dagiti napudno a tattao iti kaluklukat a “Dalan ti Kinasanto.” (Mat. 24:​45-47; Isa. 35:8) Gapu kadagiti matalek a “nangisimpa iti dalan” iti napalabas, dagiti tattao a nangrugin a magna iti dayta a kalsada ket mabalindan a maammuan ti ad-adu maipapan kadagiti panggep ni Jehova. (Prov. 4:18) Mabalinda metten ti agbiag maitunos kadagiti pagalagadan ni Jehova. Saan nga ekspektaren ni Jehova a mamimpinsan nga agbalbaliw ti ilina. Imbes ketdi, in-inut a paspasudienna ti ilina. Kasta unay ti rag-otayo inton maparagsaktayo ti Diostayo iti amin nga aramidentayo! Kasapulan ti amin a kalsada ti regular a panangmantener. Manipud 1919, agtultuloy a masimsimpa ti “Dalan ti Kinasanto” tapno ad-adu pay a tattao ti makapanaw iti Babilonia a Dakkel. w23.05 17 ¶15; 19 ¶16

Personal a sansanayen ti Bagi a Manarawidwid dagiti agserbi a katulongan ti nadumaduma a komite ti Bagi a Manarawidwid. Simamatalek nga ibakbaklay dagitoy a katulongan ti nadagsen a responsabilidadda. Nakasaganada a naimbag a mangitultuloy iti trabaho a panangaywan kadagiti karnero ni Kristo. Inton addan idiay langit ti amin a dinutokan ti espiritu inton dandanin agngudo ti dakkel a rigat, agtultuloyto latta ti nadalus a panagdaydayaw ditoy daga. Gapu iti panangidaulo ni Jesu-Kristo, saanto nga agsardeng dagiti adipen ti Dios nga agdaydayaw kenkuana uray iti apagbiit. Agpayso met ketdi a rautennatayto ni Gog iti Magog, ti bumusbusor nga aliansa dagiti nasion. (Ezek. 38:​18-20) Ngem mapaayto dayta nga apagbiit a panangraut; saannanto a mapasardeng ti ili ti Dios iti panagdaydayawda ken Jehova. Sigurado nga isalakannanto ida! Iti maysa a sirmata, nakita ni apostol Juan ti “dakkel a bunggoy” ti sabsabali a karnero ni Kristo. Naibaga kenkuana a daytoy a “dakkel a bunggoy” ket “nakalasat iti dakkel a rigat.” (Apoc. 7:​9, 14) Wen, sigurado nga isalakanto ida ni Jehova! w24.02 5-6 ¶13-14

Ania ti aramidentayo tapno maawattayo ti nasantuan nga espiritu? Ikararagtayo dayta, adalentayo ti impaisurat ti Dios a Saona, ken agbalintayo a paset ti organisasion nga iturturong ti espirituna. Iti kasta, kanayon a maipakitatayo dagiti aspeto “ti bunga ti espiritu.” (Gal. 5:​22, 23) Ipaay laeng ti Dios ti espirituna kadagidiay kanayon a nadalus ti panagpampanunot ken ar-aramidenda. Isardengna nga ipaay kadatayo ti espirituna no sangkapanunottayo dagiti narugit nga aramid ken no aramidentayo dagita. (1 Tes. 4:​7, 8) Tapno agtultuloy a maawattayo ti nasantuan nga espiritu, masapul met a ‘ditay laisen dagiti padto.’ (1 Tes. 5:20) “Dagiti padto” a matuktukoy ditoy ket dagiti mensahe nga ipapaay ti Dios babaen ti espirituna a pakairamanan dagiti padto maipapan iti aldaw ni Jehova ken iti kinaababa ti tiempo a pagbibiagantayo. Ditay liplipatan dayta nga aldaw. Ditay ipapan a saan a dumteng ti Armagedon bayat a sibibiagtayo. Imbes ketdi, masapul a sangkapanunottayo dayta. Kasano? Kanayon nga aramidentayo ti umiso ken kanayon nga adu ti aramidentayo a ‘mangipakita iti debosiontayo iti Dios.’—2 Ped. 3:​11, 12. w23.06 12 ¶13-14

Kas Kristiano, ania ti masapul nga aramidentayo no adda bigla nga agpakita a pornograpiko a ladawan iti gadyettayo? Masapul a dagus a mangaramidtayo iti pamay-an tapno saantayon a makita ti ladawan. Makatulong no kanayon a pampanunotentayo a ti kapatgan kadatayo ket ti relasiontayo ken Jehova. Kinapudnona, makagargari uray dagiti ladawan a saan nga ibilang ti kaaduan a pornograpiko. Ngem apay a masapul a liklikantayo dagita? Ngamin, ditay kayat ti mangaramid iti aniaman nga agturong iti panagbasoltayo iti pannakikamalala uray iti pusotayo laeng. (Mat. 5:​28, 29) Imbaga ti panglakayen a ni David a taga-Thailand: “Isalsaludsodko no kua iti bagik: ‘Uray no mabalin a saan a pornograpiko dagiti ladawan, maragsakan ngata ni Jehova no itultuloyko a kitaen dagita?’ Dayta a panagrasrason ti tumultulong kaniak nga agtignay a nainsiriban.” Makapagtignaytayo a nainsiriban no patanorentayo ti umiso a panagbuteng ken Jehova gapu ta ditay kayat a mapagladingit isuna. Ti panagbuteng iti Dios “ti pangrugian,” wenno pundasion, “ti sirib.” w23.06 23 ¶12-13

Dagiti ‘makin-uneg a kuarto’ ket mabalin a tumukoy kadagiti kongregasiontayo. Bayat ti dakkel a rigat, mariknatayto ti proteksion nga inkari ni Jehova no agtalinaedtayo a naikaykaysa kadagiti kapammatiantayo. Masapul ngarud nga ita pay laeng, ikagumaantayon nga an-anusan ken ayaten dagiti kakabsat. Mabalin a nakadepende iti dayta ti pannakaisalakantayo! “Ti dakkel nga aldaw ni Jehova” ket mangyegto iti rigat iti sangatauan. (Sof. 1:​14, 15) Ti ili ni Jehova ket maipasangonto met iti rigat. Ngem no agsaganatayo itan, makapagtalinaedtayto a kalmado ken matulongantayto ti dadduma. Maibturantayto ti aniaman a problema a dumteng. No agsagaba dagiti kapammatiantayo, aramidentayto ti amin a kabaelantayo a tumulong babaen ti pannakipagrikna ken panangipaaytayo kadagiti kasapulanda. Agtalinaedtayto met a nasinged kadagiti kakabsat a nasursurotayon nga ayaten. Gunggonaannatayonto ni Jehova iti biag nga agnanayon iti lubong a sadiay, nalipatantayton ti amin a didigra ken rigat.—Isa. 65:17. w23.07 7 ¶16-17

Iti Sao ti Dios, dagiti matalek a tattao ket masansan a nadeskribir kas nabileg. Ngem narikna uray dagiti kapigsaan kadakuada a saanda a kanayon a napigsa. Kas pagarigan, iti dadduma a gundaway, narikna ni Ari David a “napigsa a kas iti bantay.” Ngem adda met dagiti tiempo a ‘nagbuteng.’ (Sal. 30:7) Uray pay no naidumduma idi ti bileg ni Samson gapu iti tulong ti espiritu ti Dios, ammona a no awan ti bileg nga aggapu iti Dios, isu ket ‘kumapuy ken agbalin a kas iti ordinario a tao.’ (Uk. 14:​5, 6; 16:17) Nagbalin laeng a napigsa dagitoy a matalek a lallaki gapu iti bileg nga impaay ni Jehova. Binigbig met ni apostol Pablo a kasapulanna ti bileg nga ipaay ni Jehova. (2 Cor. 12:​9, 10) Naipasango ni Pablo kadagiti problema iti salun-at. (Gal. 4:​13, 14) Adda dagiti gundaway a narigatan met a mangaramid iti umiso. (Roma 7:​18, 19) Ken no dadduma, nadanagan ken nagbuteng kadagiti mabalin a mapasamak kenkuana. (2 Cor. 1:​8, 9) Ngem idi nakapuy ni Pablo, isu ket nagbalin a nabileg. Kasano? Ni Jehova inikkanna ni Pablo iti bileg a kasapulanna isu a pimmigsa. w23.10 12 ¶1-2

No adda dagiti tiempo a mariknatayo nga awan serserbitayo, laglagipentayo a ni Jehova a mismo ti nangyasideg kadatayo kenkuana. (Juan 6:44) Makitkitana dagiti nasayaat a kualidadtayo a mabalin a ditay makitkita, ken ammona ti linaon ti pusotayo. (2 Cron. 6:30) Isu a makapagtalektayo no ibagbagana a napategtayo kenkuana. (1 Juan 3:​19, 20) Sakbay a naammuantayo ti kinapudno, nakaaramid ti dadduma kadatayo iti basol ket makonkonsiensiatayo pay laeng agingga ita. (1 Ped. 4:3) Uray dagiti matalek a Kristiano ket mabalin nga addaan pay laeng kadagiti pagkapuyan a lablabananda. Sika ngay? Mariknam kadi a no dadduma, kasla saannaka a mapakawan ni Jehova? No wen, saanka nga agmaymaysa ta narikna met dayta dagiti matalek nga adipen ni Jehova. Kas pagarigan, narikna idi ni Pablo nga isu ket kakaasi no malagipna dagiti nagkamalianna. (Roma 7:24) Siempre, pinagbabawyanen ni Pablo dagiti basolna ken nagpabautisar. Ngem minatmatanna latta ti bagina kas “ti kanunumuan kadagiti apostol” ken ti “kangrunaan” a managbasol.—1 Cor. 15:9; 1 Tim. 1:15. w24.03 27 ¶5-6

Ti maysa a masursurotayo iti di umiso a desision ni Ari Jehoas ket masapul a ti pilientayo a gagayyem ket dagidiay nasayaat ti impluensiada kadatayo—dagiti gagayyem a mangay-ayat ken Jehova ken kayatda a paragsaken isuna. Saan a kasapulan a dagiti laeng kaedadtayo ti gagayyemtayo. Laglagipem, adayo nga ub-ubing ni Jehoas ngem iti gayyemna a ni Jehoiada. No agpilika iti gagayyem, isaludsodmo iti bagim: ‘Tultulongandak kadi a mangpabileg iti pammatik ken Jehova? Parparegtaendak kadi a mangsurot kadagiti pagalagadan ti Dios? Dagiti kadi ibagbagada ket maipapan ken Jehova ken kadagiti isursurona a napateg a kinapudno? Ipakpakitada kadi a raraemenda dagiti pagalagadan ti Dios? Ti kadi ibagbagada ket dagiti laeng kayatko a mangngeg? Wenno naturedda a mangtubngar kaniak no kasapulak dayta?’ (Prov. 27:​5, 6, 17) Kinaagpaysuanna, no dagiti gagayyemmo ket saanda nga ay-ayaten ni Jehova, saanmo a kasapulan ida. Ngem no adda gagayyemmo a mangay-ayat ken Jehova, makikaduaka kadakuada—ta matulongandaka nga agbalin a nasayaat!—Prov. 13:20. w23.09 9 ¶6-7

Ti alfa ti umuna a letra iti Griego nga alpabeto ket ti omega ti maudi a letra. Idi inusar ni Jehova ti deskripsion a “ti Alfa ken ti Omega,” ipapaawatna a no adda irugina, sibaballigi nga ileppasna dayta. Kalpasan a pinarsua ni Jehova da Adan ken Eva, imbagana kadakuada: “Agpaadukayo ken punnuenyo ti daga ken kultibarenyo.” (Gen. 1:28) Iti daydi a kanito, arigna imbaga ni Jehova, “Alfa.” Nalawag nga imbagana ti panggepna: Dumtengto ti tiempo a dagiti perpekto ken natulnog a kaputotan da Adan ken Eva ti mangpunno iti daga ken pagbalinenda dayta a Paraiso. Iti dayta a tiempo, arigna ibaganto ni Jehova, “Omega.” Kalpasan a pinarsua ni Jehova “ti langit ken ti daga ken ti amin nga adda kadagita,” nangted iti garantia. Inlasin ken pinilina ti maikapito nga aldaw tapno itungpalna ti panggepna para kadagiti tattao ken para iti daga. Isu nga idi pinagbalinna a sagrado ti maikapito nga aldaw, kaipapananna a naan-anay a matungpalto ti panggepna iti ngudo dayta nga aldaw.—Gen. 2:​1-3. w23.11 5 ¶13-14

Agarup uppat a bulan ti narigat a literal a panagdaliasat manipud Babilonia agingga iti Israel. Ngem inkari ni Jehova a maikkat ti aniaman a bangen a mabalin a manglapped iti panagsublida. Para kadagiti matalek a Judio, ad-adu ti bendision ti panagsubli idiay Israel ngem iti aniaman nga isakripisioda. Ti kangrunaan a bendision ket maipapan iti panagdaydayawda. Awan ti templo ni Jehova iti Babilonia. Awan met ti altar a mabalin a pagdatonan dagiti Israelita kas ipapaannurot ti Mosaiko a Linteg, ken awan ti padi a mangidaton kadagita. Kasta met a no ikompara kadagiti agdaydayaw ken Jehova, ad-adu dagiti pagano nga awan panagraemda ken Jehova wenno kadagiti pagalagadanna. Isu a para iti rinibu a Judio a managbuteng iti Dios, magagaranda nga agawid iti dagada tapno maisublida ti nadalus a panagdaydayaw. w23.05 14-15 ¶3-4

Kasapulantayo ti tulong ti nasantuan nga espiritu ti Dios tapno maitultuloytayo ti agtignay “kas annak ti lawag.” Apay? Saan ngamin a nalaka ti agtalinaed a nadalus iti daytoy immoral a lubong. (1 Tes. 4:​3-5, 7, 8) Matulongannatayo ti nasantuan nga espiritu tapno malabanantayo ti panagpampanunot ti lubong, agraman dagiti pilosopia ken panangmatmat a maikontra iti panagpampanunot ti Dios. Matulongannatayo met ti nasantuan nga espiritu tapno maipakitatayo ti “amin a kita ti kinasayaat ken kinalinteg ken kinapudno.” (Efe. 5:9) Ti maysa a pamay-an tapno maawattayo ti nasantuan nga espiritu ket ti panangikararagtayo iti dayta. Imbaga ni Jesus a ni Jehova ket ‘mangtedto iti nasantuan nga espiritu kadagidiay agdawdawat kenkuana.’ (Luc. 11:13) Maawattayo met ti nasantuan nga espiritu no agkakaduatayo a mangidaydayaw ken Jehova kadagiti Nakristianuan a gimongtayo. (Efe. 5:​19, 20) Gapu iti nasayaat nga impluensia ti nasantuan nga espiritu ti Dios, makapagbiagtayo iti pamay-an a mangparagsak kenkuana. w24.03 23-24 ¶13-15

Kasapulam kadi ti agbalin a naan-anus? No wen, ikararagmo dayta. Ti kinaanus ket maysa nga aspeto ti bunga ti espiritu. (Gal. 5:​22, 23) Masapul ngarud a kiddawentayo ken Jehova nga ikkannatayo iti nasantuan nga espiritu ken tulongannatayo a mangkultibar iti bunga dayta. No maipasangotayo iti situasion a mangsubok iti aanusantayo, “itultuloy[tayo] ti agdawat” iti nasantuan nga espiritu tapno tulongannatayo nga aganus. (Luc. 11:13) Mabalintayo met a kiddawen ken Jehova a tulongannatayo a mangtarus kadagiti bambanag sigun iti panangmatmatna. Kalpasan ti panagkararagtayo, masapul nga aramidentayo ti amin a kabaelantayo nga aganus iti kada aldaw. No kanayon nga ikararagtayo ken ikagumaantayo ti agbalin a naan-anus, tulongannatayo ni Jehova nga agbalin a kasta uray no saantayo a dati a naanus. Makatulong met no utobentayo dagiti ulidan iti Biblia. Naglaon ti Biblia iti adu nga ulidan iti kinaanus. No utobentayo dagiti salaysay maipapan kadakuada, makasursurotayo kadagiti pamay-an a maipakitatayo ti kinaanus. w23.08 22-23 ¶10-11

Impasigurado ni Jesus ken apostol Pedro nga ipaay ni Jehova dagiti kasapulanna. Idi napagungar ni Jesus, nangaramid iti milagro tapno tulonganna ni Pedro ken ti dadduma pay nga apostol a makakalap manen iti adu nga ikan. (Juan 21:​4-6) Awan duadua a dayta a milagro ti nangipasigurado ken Pedro a kabaelan ni Jehova nga ipaay dagiti material a kasapulanna. Posible a nalagip ti apostol ti imbaga ni Jesus nga ipaay ni Jehova dagiti kasapulan dagidiay itultuloyda a “sapulen nga umuna ti Pagarian.” (Mat. 6:33) Nakatulong ken Pedro amin dagita tapno iyun-unana ti panangasaba, imbes a ti negosiona a panagkalap. Situtured a nangasaba idi aldaw ti Pentecostes 33 C.E., ket natulonganna ti rinibu a mangakseptar iti naimbag a damag. (Ara. 2:​14, 37-41) Kalpasanna, tinulonganna dagiti Samaritano ken Gentil a makasursuro maipapan ken Kristo ken agbalin a pasurotna. (Ara. 8:​14-17; 10:​44-48) Talaga a naisangsangayan ti panangusar ni Jehova ken Pedro tapno mayapon iti kongregasion ti amin a klase ti tattao. w23.09 20 ¶1; 23 ¶11

Agarup dua a tawen kalpasan a dinadael dagiti Babilonio ti Jerusalem, ni Ari Nabucodonosor ti Babilonia ket nagtagtagainep iti nakabutbuteng maipapan iti nagdakkel nga imahen. Impangtana a mapapatay ti amin a masirib a lallaki, a pakairamanan ni Daniel, no dida maibaga kenkuana ti natagtagainepna ken uray ti kaipapananna. (Dan. 2:​3-5) Masapul nga agtignay a dagus ni Daniel, ta no saan, adu ti matay. “Napan ni Daniel iti ari ket kiniddawna a maikkan iti gundaway a mangibaga iti kaipapanan ti tagtagainep ti ari.” (Dan. 2:16) Agkasapulan dayta iti tured ken pammati. Awan ti mabasa iti Biblia nga adda idin dagiti tagtagainep nga inlawlawag ni Daniel ti kaipapananda. Kiniddawna kadagiti kakaduana “nga ikararagda ti asi ti Dios ti langit maipapan iti daytoy a palimed.” (Dan. 2:18) Sinungbatan ni Jehova dagidiay a kararag. Iti tulong ti Dios, nailawlawag ni Daniel ti kaipapanan ti tagtagainep ni Nabucodonosor. Naisalakan ti biag ni Daniel ken dagiti kakaduana. w23.08 2 ¶4

Panunotentayo a naimbag dagiti pagsayaatan ti kinaanus. No naanustayo, naragragsak ken mas kalmadotayo. No naanustayo, nasayaat ngarud ti epektona iti isip ken salun-attayo. No an-anusantayo ti dadduma, nasaysayaat ti relasiontayo kadakuada. Ad-adda met nga agkaykaysa ti kongregasiontayo. No adda mangkarit kadatayo, saantayo a dagus a makapungtot isu a maliklikan a kumaro ti situasion. (Sal. 37:​8, ftn.; Prov. 14:29) Ngem kangrunaan iti amin, no naanustayo, tultuladentayo ti nailangitan nga Amatayo ken sumingedtayo pay ketdi kenkuana. Makaay-ayo ken nagsayaat a kualidad ti kinaanus! Mabalin a saan a kanayon a nalaka ti aganus. Ngem iti tulong ni Jehova, maitultuloytayo a maparang-ay dayta a kualidad. Bayat a siaanus nga ur-urayentayo ti baro a lubong, makapagtalektayo a “ti mata ni Jehova ti mangbambantay kadagidiay agbuteng kenkuana, kadagidiay mangin-inanama iti napudno nga ayatna.” (Sal. 33:18) Determinadotayo koma amin nga itultuloy nga ikawes ti kinaanus. w23.08 22 ¶7; 25 ¶16-17

Sigun ken Santiago, mabalin nga ibaga ti maysa a tao nga adda pammatina. Ngem saan met a makita dayta kadagiti aramidna. (Sant. 2:​1-5, 9) Dinakamat met ni Santiago ti maysa a Kristiano a nakitana nga ‘awan bado ti maysa a kabsat a lalaki wenno babai ken kurang ti taraonna.’ Ngem saan met a timmulong. Uray no ibaga dayta a tao nga adda pammatina, awan serserbina ta awan met ti aramidna. (Sant. 2:​14-17) Tinukoy ni Santiago ni Rahab kas nagsayaat nga ulidan iti pammati nga adda aramidna. (Sant. 2:​25, 26) Nangngegna ti maipapan ken Jehova ken nabigbigna a ti Dios ti tumultulong kadagiti Israelita. (Jos. 2:​9-11) Pinaneknekanna babaen kadagiti inaramidna nga adda pammatina—prinotektaranna ti dua nga espia nga Israelita idi nagpeggad ti biagda. Kas resultana, daytoy nga imperpekto ken saan nga Israelita a babai ket naideklara a nalinteg kas ken Abraham. Ipaganetget ti ulidanna ti kinapateg ti pammati a napakuyogan iti ar-aramid. w23.12 5 ¶12-13

Kas Kristiano, saantayo koma a kontento laeng kadagiti narabaw wenno pagdamdamuan a kinapudno iti Biblia. Iti tulong ti nasantuan nga espiritu ti Dios, magagarantayo a mangadal ‘uray iti nauneg a bambanag ti Dios.’ (1 Cor. 2:​9, 10) Baka kayatmo ti mangaramid iti proyekto iti personal a panagadalmo tapno agbalinka a nadekdekket ken Jehova. Kas pagarigan, mabalinmo nga adalen no kasano nga impakitana ti ayatna kadagiti nagkauna nga adipenna ken no kasano a paneknekan dayta nga ay-ayatennaka met. Baka kayatmo nga adalen ti inyurnos ni Jehova a panagdaydayaw dagiti Israelita ken ikomparam dayta iti urnosna para kadagiti Kristiano ita. Wenno baka kayatmo nga adalen iti detalyado dagiti padto a tinungpal ni Jesus bayat ti panagbiag ken panagministeriona ditoy daga. Ma-enjoy-monto met nga adalen dagita a topiko iti tulong ti Watch Tower Publications Index wenno ti Giya iti Panagsukimat Para Kadagiti Saksi ni Jehova. Ti nauneg a panagadalmo iti Biblia ti mangpatibker iti pammatim ken mangtulong kenka tapno “masarakamto ti pannakaammo maipapan iti Dios.”—Prov. 2:​4, 5. w23.10 18-19 ¶3-5

Ti sao nga inusar ni apostol Pedro para iti “nauneg” literal a kaipapananna ti “nabennat.” Ti maikadua a paset ti bersikulo deskribirenna ti epekto ti nauneg nga ayattayo. Abbonganna dagiti basol ti kakabsat. Kayarigan dayta ti maysa a lamisaan nga adu ti mansana. Ania ti mabalinmo nga aramiden? Mangalaka iti tela a bennatem agingga a maabbongan saan la a maysa, wenno dua, no di ket ti adu a mansa. Kasta met laeng no nauneg ti ayattayo. Bennatentayo a bennaten ti ayattayo agingga a makalubanna ti saan la a maysa, wenno dua, no di ket ti “adu a basol.” Kas iti tela a mangabbong iti mansa, ti ayat maabbonganna dagiti pagkapuyan ken kinaimperpekto ti sabsabali. Masapul a nabileg ti ayattayo iti sabsabali tapno mapakawantayo dagiti kinaimperpekto dagiti kapammatiantayo—uray nakarigrigat dayta no dadduma. (Col. 3:13) No mapakawantayo ti sabsabali, maipakitatayo a nabileg ti ayattayo ken maparagsaktayo ni Jehova. w23.11 10-12 ¶13-15

Idi 26 ti tawenen ni Ari Josias, impatarimaanna ti templo. Kabayatan dayta, nasarakanda “ti libro ti Linteg ni Jehova a naited babaen ken Moises.” Idi naibasa dayta iti ari, dagus a nagtignay tapno maipatungpal ti naisurat iti dayta. (2 Cron. 34:​14, 19-21) Kayatmo kadi a regular a basaen ti Biblia? No ikagkagumaam, agen-enjoyka kadi? Tantandaanam kadi dagiti teksto a mabalin a makatulong kenka? Idi agarup 39 ti tawenen ni Josias, nakaaramid iti kamali a nakaigapuan ti ipapatayna. Nagtalek iti bagina imbes nga agpaiwanwan ken Jehova. (2 Cron. 35:​20-25) Ania ti masursurotayo? Aniaman ti edadtayo wenno kasanoman kabayagtayon nga agad-adal iti Biblia, masapul nga itultuloytayo a sapulen ni Jehova. Kaipapanan dayta a regular nga ikararagtayo nga iwanwannatayo, adalentayo ti Saona, ken agpabalakadtayo kadagiti Kristiano a nataengan iti naespirituan. Kas resultana, posible a maliklikantayo ti makaaramid kadagiti nakaro a kamali ken agbalintayo a naragragsak.—Sant. 1:25. w23.09 12 ¶15-16

Adu ti nadakamat iti Biblia a mapagwadan a babbai a nangayat ken nagserbi ken Jehova. “Natimbeng ti ugalida,” ken “matalekda iti amin a banag.” (1 Tim. 3:11) Malaksid iti dayta, makasarak met dagiti agtutubo a sister kadagiti nataengan iti naespirituan a nasayaat ti ulidanda iti mismo a kongregasionda a maikari a tuladen. Agtutubo a babbai, adda kadi am-ammoyo a sister a nataengan iti naespirituan a kayatyo a tuladen? Kitaenyo dagiti nagsayaat a kualidadda; sa panunotenyo no kasanoyo a matulad dagita. Nagpateg ti kinapakumbaba tapno agbalintayo a nataengan iti naespirituan. No napakumbaba ti maysa a babai, nasayaat ti relasionna ken Jehova ken iti dadduma. Kas pagarigan, ti maysa a babai a mangay-ayat ken Jehova sipapakumbaba a suportaranna ti prinsipio ti kinaulo nga inyurnos ti nailangitan nga Amana. (1 Cor. 11:3) Dayta a prinsipio ket masapul a masurot iti kongregasion ken iti pamilia. w23.12 19 ¶3-5

Ekspektaren ni Jehova nga ayaten ti asawa a lalaki ni baketna ken ipaayna dagiti pisikal, emosional, ken naespirituan a kasapulanna. Ti panangparang-ay iti abilidad nga agpanunot, panangrespeto kadagiti babbai, ken panagbalin a mapangnamnamaan, ket makatulong kenka nga agbalin a nasayaat nga asawa. No addan asawam, mabalin a maaddaankayo iti anak. Ania dagiti masursurom ken Jehova maipapan iti panagbalin a nasayaat nga ama? (Efe. 6:4) Sipapanayag nga imbaga ni Jehova iti Anakna a ni Jesus a dungdungnguen ken maragragsakan kenkuana. (Mat. 3:17) No agbalinka nga ama, kanayon koma nga ipasiguradom kadagiti annakmo nga ay-ayatem ida. Kanayon a komendaram ida kadagiti nasayaat a maar-aramidanda. Dagiti amma a mangtultulad iti ulidan ni Jehova tultulonganda dagiti annakda nga agmataengan iti naespirituan. Makapagsaganaka itan iti daytoy nga akem no siaayat nga aywanam dagiti kapamiliam ken dagiti kakongregasionmo. Sursuruem met nga iyebkas ti ayat ken apresasionmo kadakuada.—Juan 15:9. w23.12 28-29 ¶17-18

Uray no matalektayo nga adipen ni Jehova, agsakit ken agrigattayo met latta a gagangay iti amin a tattao. Baka masapul nga ibturantayo ti ibubusor wenno panangidadanes dagidiay gumurgura iti ili ti Dios. Nupay saannatayo nga ilisi ni Jehova kadagita a pakarigatan, ikarkarina a tulongannatayo. (Isa. 41:10) Iti tulongna, makapagtalinaedtayo a naragsak, makaaramidtayo kadagiti nasayaat a desision, ken makapagtalinaedtayo a napudno kenkuana uray iti karirigatan a situasion. Ikarkari ni Jehova nga ikkannatayo iti aw-awagan ti Biblia a “talna ti Dios.” (Fil. 4:​6, 7) Dayta a talna ket tumukoy iti kinakalmado ken kinatalinaay ti isip ken puso gapu iti nasinged a relasiontayo kenkuana. Dayta a talna ti “mangartap iti amin a pannakaawat”; adayo a nakaskasdaaw dayta ngem iti aniaman a mapanunottayo. Kas pagarigan, napadasam kadin ti sipapasnek a nagkararag ken Jehova ket kalpasanna, nasdaawka ta kimmalma ti riknam? Dayta a rikna ket “ti talna ti Dios.” w24.01 20 ¶2; 21 ¶4

Dagiti matalek a tattao a mangay-ayat ken Jehova kayatda a naimpusuan nga idaydayaw ti naganna. Naawatan ni David a ti panangidaydayaw iti nagan ni Jehova ket ti panangidaydayaw ken Jehova a mismo. Karaman iti nagan ni Jehova ti reputasionna, ti amin a nagsasayaat a kualidadna, ken dagiti nakaskasdaaw nga aramidna. Kayat ni David a masantipikar ken maidaydayaw ti nagan ti Amana. Kayatna nga aramiden dayta ‘iti intero a kinataona’—kayatna a sawen, iti amin a pusona. Umasping iti dayta, indauluan dagiti Levita ti panangidaydayaw ken Jehova. Sipapakumbaba nga inaminda a kurang ti sasao tapno naan-anay a mayebkasda ti pammadayaw a pakaikarian ti sagrado a nagan ni Jehova. (Neh. 9:5) Sigurado a naragsakan ni Jehova iti kasta a napakumbaba ken naimpusuan a panangidaydayaw kenkuana. w24.02 9 ¶6

Saannaka nga ibilang ni Jehova a palpak no saanmo a naragpat ti kalat a saan a posible a maragpatmo. (2 Cor. 8:12) No adda lapped, panunotem ti masursurom iti dayta. Laglagipem dagiti nagapuanamon. Ibaga ti Biblia a ‘saan a nakillo ti Dios tapno lipatenna ti aramidmo.’ (Heb. 6:10) Kastaka met koma. Panunotem dagiti nagapuanamon—kas iti panagbalinmon a nasinged a gayyem ni Jehova, panangibagamon iti dadduma maipapan kenkuana, wenno panagpabautisarmo. No kasano a rimmang-ayka idi ken naragpatmo dagiti naespirituan a kalatmo, maitultuloymo met ti rumang-ay agingga a maragpatmonto ti agdama a kalatmo. Iti tulong ni Jehova, kayam a ragpaten ti kalatmo. Kanayon nga ikagumaam a kitaen no kasano a tultulongannaka ni Jehova. Dayta ti makatulong tapno naragsakka bayat a ragragpatem dagiti kalatmo. (2 Cor. 4:7) No saanka a sumuko, ad-adunto pay a bendision ti maawatmo.—Gal. 6:9. w23.05 31 ¶16-18

Magusgustuan ni Jehova nga ipakita kadagiti adipenna nga ay-ayatenna ida ken maragragsakan kadakuada. Iti Biblia, namindua nga imbaga ni Jehova ken Jesus nga isu ti dungdungnguenna nga Anak ken pakaragsakanna. (Mat. 3:17; 17:5) Kayatmo kadi met a mangngeg nga ibagbaga dayta kenka ni Jehova? Saan a direkta a makisarita kadatayo ni Jehova manipud langit. Ngem makisarsarita kadatayo babaen ti Saona, ti Biblia. No basaentayo ti nadungngo a pannakisarita ni Jesus kadagiti adalanna kas mabasa kadagiti Ebanghelio, kas man la mangmangngegtayo nga ibagbaga met ni Jehova dagita kadatayo. Perpekto a tinulad ni Jesus ti personalidad ni Amana. Isu a no mabasatayo ti imbaga ni Jesus a maragsakan kadagiti imperpekto ngem matalek a pasurotna, maimadyintayo nga ibagbaga met dagita ni Jehova kadatayo. (Juan 15:​9, 15) No makapasartayo kadagiti suot, dina kayat a sawen a saanen a maragsakan ti Dios kadatayo. Imbes ketdi, gundawaytayo dayta a mangpaneknek iti kauneg ti ayattayo iti Dios ken iti panagtalektayo kenkuana.—Sant. 1:12. w24.03 28 ¶10-11