Septiembre

Ti Dios inikkanna ni Jesus iti pannakabalin a mangsolbar iti amin a problema ti amin a tao. Nagaramid ni Jesus kadagiti milagro tapno ipakitana ti pannakabalinna a mangsolbar iti amin a problema a ditay pulos masolbar a datdatayo. Kas pagarigan, adda pannakabalinna a mangparut iti ramut dagiti problema ti amin a tao—ti natawid a basol ken dagiti epektona, agraman ti sakit ken ipapatay. (Mat. 9:​1-6; Roma 5:​12, 18, 19) Pinaneknekan dagiti milagrona a mapaimbagna “ti nadumaduma” a sakit ken mapagungarna pay ketdi dagiti natay. (Mat. 4:23; Juan 11:​43, 44) Adda met pannakabalinna a mangkontrol iti nakapigpigsa nga angin ken mangparuar kadagiti demonio a nanglugan kadagiti tattao. (Mar. 4:​37-39; Luc. 8:2) Makaparagsak a maammuan nga inikkan ni Jehova ti Anakna iti kasta a pannakabalin! Naan-anay a masiguradotayo a mapasamakto dagiti bendision iti masanguanan nga iyeg ti Pagarian ti Dios. Dagiti milagro nga inaramid ni Jesus idi nagbalin a tao ditoy daga isuroda kadatayo dagiti aramidennanto iti intero a daga kas ti nailangitan nga Ari ti Pagarian ti Dios. w23.04 3-4 ¶5-7

No addaka iti dakkel a kongregasion ken manmanoka a maawagan, mabalin a kaykayatmo lattan ti saan nga agitayag. Ngem dika agsardeng nga agkomento. Agisaganaka iti sumagmamano a komento iti kada gimong. Iti kasta, no saanka a naawagan iti damo a paset ti panagadal, adda pay ti gundawaymo nga agkomento bayat a madama ti gimong. No agsagsaganaka para iti Panagadal iti Pagwanawanan, panunotem no kasano a konektado dagiti parapo iti tema ti artikulo. No kasta ti aramidem, posible nga adda ti maikomentom iti intero a panagadal. Mangisaganaka met iti komento kadagiti parapo a mangilawlawag kadagiti naun-uneg a kinapudno a narigrigat nga ilawlawag. Apay? Gapu ta mabalin a manmano ti agitayag kadagita a parapo. Kasano ngay no saanka latta a naawagan nga agkomento kalpasan ti sumagmamano a gimong? Sakbay ti gimong, ibagam iti agikondukta ti saludsod a kayatmo a sungbatan. w23.04 21-22 ¶9-10

Kanayon a nakasagana ni Jose a mangsurot kadagiti instruksion ni Jehova. Gapu iti dayta, nagbalin a nasaysayaat nga asawa a lalaki. Di kumurang a namitlo a nakaawat kadagiti instruksion ti Dios maipapan iti pamiliana. Iti tunggal gundaway, dagus a nagtulnog uray no kaipapananna a mangaramid iti dadakkel a panagbalbaliw. (Mat. 1:20; 2:​13-15, 19-21) Sinurot ni Jose dagiti instruksion ti Dios isu a naprotektaran, nasuportaran, ken naipaayna dagiti kasapulan ni Maria. Dagita nga inaramid ni Jose ti nangpauneg la ketdi iti ayat ken panagraem ni Maria kenkuana! Assawa a lallaki, matuladyo ni Jose no ammuenyo dagiti balakad a naibatay iti Biblia maipapan iti panangaywan iti pamiliayo. No aramidenyo dayta, uray no kaipapananna a mangaramidkayo kadagiti panagbalbaliw, maipakitayo nga ay-ayatenyo ni baketyo ken patpatibkerenyo ti panagasawayo. Imbaga ti maysa a sister a taga-Vanuatu a nasurok a 20 a tawenen a naasawaan: “Kanayon nga ammuen ken sursuroten ni lakayko dagiti instruksion ni Jehova, isu nga umun-uneg ti panagraemko kenkuana. Natalged ti riknak, ken agtalekak kadagiti desisionna.” w23.05 21 ¶5

Dagiti agawid a Judio manipud Babilonia ket agbalin a ‘nasantuan’ iti Diosda. (Deut. 7:6) Ngem saan a kayat a sawen dayta nga awan ti panagbalbaliw nga aramidenda tapno maparagsakda ni Jehova. Kaaduan a Judio a nayanak idiay Babilonia ket agparang a nairuamen iti dadduma a panagpampanunot ken kaugalian dagiti Babilonio. Dinekdekada kalpasan a nakasubli idiay Israel ti umuna a grupo dagiti Judio, nakigtot ni Gobernador Nehemias ta naammuanna a dagiti ubbing a nayanak iti Israel ket saanda man la nga ammo ti agsao iti lengguahe dagiti Judio. (Deut. 6:​6, 7; Neh. 13:​23, 24) Kasano koma a maayat dagita nga ubbing ni Jehova ken makapagdaydayawda kenkuana no saanda a maawatan ti Hebreo—ti kangrunaan a lengguahe a nausar iti pannakaisurat ti Sao ti Dios? (Esd. 10:​3, 44) Dakkel ngarud a panagbalbaliw ti masapul nga aramiden dagidiay a Judio. Ngem nalaklaka nga amang nga aramidenda dagita bayat nga addadan iti Israel, ta in-inut a maisubsublin ti nadalus a panagdaydayaw sadiay.—Neh. 8:​8, 9. w23.05 15 ¶6-7

Nakalkaldaang ta uray no determinado wenno disiplinadotayo, mabalin nga adda latta dagiti makalapped. Kas pagarigan, mabalin nga agawen dagiti “di ninamnama a pasamak” ti tiempo a kasapulan tapno maragpattayo ti kalattayo. (Ecl. 9:11) Mabalin a maipasangotayo iti pakarigatan a mangupay ken mangpakapuy kadatayo. (Prov. 24:10) Gapu ta imperpektotayo, mabalin nga agkamalitayo isu a marigatantayo a mangragpat iti kalattayo. (Roma 7:23) Wenno baka nabambannogtayo laeng. (Mat. 26:43) Ania ti makatulong tapno mapagballigiantayo ti maysa a lapped wenno di nasayaat a kasasaad? Laglagipem a no adda lapped, dina kayat a sawen a saanmon a maragpat ti kalatmo. Ibaga ti Biblia a mabalin a maulit-ulit a mapasarantayo dagiti problema wenno pakarigatan. Ngem nalawag met nga ipakitana a mabalintay manen a ragpaten dagiti kalattayo. Wen, no itultuloymo a ragpaten ti kalatmo uray adda lapped, pampaneknekam ken Jehova a kayatmo a paragsaken isuna. Sigurado a maragragsakan ni Jehova no makitkitana nga itultuloymo nga ikagumaan a ragpaten ti kalatmo! w23.05 30 ¶14-15

Ti panagpayunir ket makatulong iti maysa nga agtutubo a brother tapno masursurona ti epektibo a pannakilangen iti nadumaduma a tattao. Masursurona met ti agbadyet ken mangsurot iti dayta. (Fil. 4:​11-13) Sakbay a sumrekka iti amin-tiempo a serbisio, nasayaat no ag-auxiliary pioneer-ka a mangisagana kenka nga ag-regular pioneer. No payunirkan, mabalin nga adu a pribilehio iti amin-tiempo a serbisio ti mailukat kenka, kas iti panagbalin a construction servant wenno Bethelite. Masapul a pagbalinen a kalat dagiti brother ti makualipikar nga agserbi kadagiti kakabsat kas panglakayen iti kongregasion. Ibaga ti Biblia a dagiti lallaki a mangragragpat iti dayta ket “kayat[da] ti makiraman iti nasayaat nga aramid.” (1 Tim. 3:1) Ti maysa a brother ket masapul a makualipikar nga umuna nga agserbi kas ministerial nga adipen. Tumultulong dagiti ministerial nga adipen kadagiti panglakayen iti adu a pamay-an. Sipapakumbaba dagiti panglakayen ken ministerial nga adipen nga agserbi kadagiti kakabsat ken sireregta a makiramramanda iti ministerio. w23.12 28 ¶14-16

Tin-edyer ni Ari Josias idi rinugianna a sapulen ni Jehova. Kayatna a maammuan ti maipapan ken Jehova ken aramiden ti pagayatanna. Ngem saan a nalaka dayta para iti daytoy ubing nga ari. Masapul a situtured nga idauluanna ti nadalus a panagdaydayaw ta nasaknap idi ti ulbod a panagdaydayaw. Ket kasta a talaga ti inaramidna! Awan pay ti 20 ni Josias idi rinugianna nga ikkaten ti ulbod a panagdaydayaw iti nasion. (2 Cron. 34:​1, 2) Uray no ubingka pay unay, mabalinmo a tuladen ni Josias. Kasano? Sapulem ni Jehova ken ammuem ti ad-adu pay maipapan kadagiti kualidadna. No aramidem dayta, kayatmonto la ketdi ti agdedikar kenkuana. Anianto ti epekto dayta iti inaldaw a panagbiagmo? Nabautisaran ni Luke idi 14 ti tawenna. Imbagana idi nagdedikar ken Jehova: “Manipud itan, iyun-unakon iti biagko ti agserbi ken Jehova ken ikagumaak a paragsaken isuna.” (Mar. 12:30) Sigurado a mabendisionanka no kasta met ti aramidem! w23.09 11 ¶12-13

Idi insurat daytoy ni apostol Pablo, awan pay makatawen ti kongregasion idiay Tesalonica. Posible a bassit pay ti kapadasan dagiti nadutokan a lallaki sadiay ken mabalin a nakaaramidda met kadagiti kamali. Ngem maikarida latta iti panagraem. Bayat nga umas-asideg ti dakkel a rigat, baka masapul nga ad-addanto nga agpannuraytayo iti panangiwanwan dagiti panglakayen iti kongregasiontayo ngem iti ar-aramidentayo ita. Mabalin a saanto a makadanon kadatayo dagiti instruksion manipud iti sangalubongan a hedkuarter ken iti sanga nga opisina. Isu nga ita pay laeng, napateg a sursuruentayon nga ayaten ken raemen dagiti panglakayentayo. Aniaman ti mapasamak, agtalinaedtayo koma a sipupuot. Saan a dagiti pagkapuyanda ti kitkitaentayo, no di ket panunotentayo a ni Jehova babaen ken Kristo ti mangidaldalan kadagitoy a matalek a kakabsat. No kasano a ti helmet protektaranna ti ulo ti maysa a soldado, ti namnama a maisalakantayto protektaranna ti panagpampanunottayo. Maawatantayo nga awan serserbi dagiti ituktukon daytoy a lubong. (Fil. 3:8) Matulongannatayo ti namnamatayo nga agtalinaed a kalmado ken nasimbeng ti panunottayo. w23.06 11 ¶11-12

Masapul nga agpili dagidiay makangngeg iti awis ti “babai a maag”: Awatenda kadi ti awisna wenno saan? Adda dagiti nasayaat a rason a masapul a liklikantayo ti seksual nga immoralidad. Ibagbaga ti “babai a maag”: “Nasam-it ti tinakaw a danum.” (Prov. 9:17) Ania ti kayat a sawen ti “tinakaw a danum”? Ti seksual a relasion a matagiragsak ti agassawa ket inyarig ti Biblia iti makarepresko a danum. (Prov. 5:​15-18) Mabalin a maragsakan ti maysa a lalaki ken babai kadagiti maitutop a seksual nga aramid no legal nga agassawada. Ngem saan a kasta ti “tinakaw a danum” a mabalin a tumukoy iti maiparit ken immoral a panagseks. Masansan a nailimed ti panangaramid iti dayta kas iti ar-aramiden ti mannanakaw no agtakaw. Kasla nasam-it ti “tinakaw a danum” no ipagarup dagiti agar-aramid iti seksual nga immoralidad a mailimedda ti basolda. Ngem loklokuenda laeng ti bagida! Ngamin, makitkita ni Jehova ti amin. Awanen ti napapait pay ngem iti pannakapukawtayo iti pabor ni Jehova. Saan ngarud a makuna a “nasam-it” ti seksual nga immoralidad.—1 Cor. 6:​9, 10. w23.06 22 ¶7-9

Ania ti aramidem no panagriknam ket saanen a naimpusuan dagiti kararagmo, wenno saanmon a maen-enjoy ti ministeriom? Gapu ta imperpektotayo, agbaliwbaliw ti riknatayo no dadduma. No bumabaawen ti regtam, panunotem ti ulidan ni apostol Pablo. Agpayso nga inkagumaanna a tuladen ni Jesus, ngem adda dagiti gundaway a nariknana a saan a porsegido a mangaramid iti dayta. Determinado latta ni Pablo a mangitungpal iti ministeriona uray no adda dagiti saan a nasayaat a marikriknana iti dayta a gundaway. Kasta met, dimo ipalubos a dagiti imperpekto a rikrikna ti mangapektar kadagiti desisionmo. Determinadoka koma a mangaramid iti umiso uray no saanmo a kayat nga aramiden dayta. No itultuloymo nga aramiden dayta, sumayaatto met laeng ti riknam iti panaglabas ti panawen.—1 Cor. 9:16. w24.03 11-12 ¶12-13

Maipakitatayo ti ayat kadagiti kakabsat no gayyementayo ida. (2 Cor. 6:​11-13) Adu kadatayo ti naitimpuyog kadagiti kongregasion a buklen ti kakabsat a nagduduma ti pannakapadakkel ken personalidadda. Mapaunegtayo ti ayattayo kadakuada amin no agpokustayo kadagiti nasayaat a kualidadda. No sursuruentayo a tuladen ti panangmatmat ni Jehova iti sabsabali, pampaneknekantayo nga ay-ayatentayo ida. Nagpategto ti ayat bayat ti dakkel a rigat. Inton mangrugi dayta, pakasarakantayto iti proteksion? Usigentayo ti imbilin ni Jehova iti ilina idi naraut ti nagkauna a Babilonia: “Mapanka, O ilik, sumrekka kadagiti makin-uneg a kuartom, ket irikepmo dagiti ruanganmo. Aglemmengka iti apagbiit agingga a lumabas ti pungtot.” (Isa. 26:20) Mabalin a masapul a surotentayto dagita met laeng nga instruksion bayat ti dakkel a rigat. w23.07 6-7 ¶14-16

Maaddaankayo iti pakasarsaritaan kas nainkalintegan. Isaludsodmo iti bagim: ‘Ibilangdak kadi dagiti tattao kas nainkalintegan, managpabus-oy, ken natulok? Wenno ibilangdak nga istrikto, saan a nakonsiderar, wenno natangken ti ulona? Dengdenggek kadi ti ibaga ti sabsabali ken pagustuak ti kayatda no posible?’ No ad-adda a nainkalintegantayo, ad-adda a tultuladentayo da Jehova ken Jesus. Masapul nga agbalintayo a nainkalintegan no agbaliw ti situasiontayo. Mabalin nga agproblematayo gapu kadagita a panagbalbaliw. Baka bigla nga agsakittayo. Wenno interamente nga agbalbaliw ti biagtayo gapu iti kellaat a panagsuek ti ekonomia wenno panagbaliw ti gobierno iti lugartayo. (Ecl. 9:11) Mabalin a marigatantayo met no agbaliw ti asaynmenttayo iti organisasion. Kabaelantayo ti makibagay iti baro a situasiontayo no surotentayo dagitoy nga uppat a banag: (1) akseptaren ti realidad, (2) agpokus iti masanguanan, (3) agpokus iti positibo, ken (4) tulongan ti dadduma. w23.07 21-22 ¶7-8

Agtutubo ni propeta Daniel idi nagbalin a balud iti gubat ken impanaw dagiti Babilonio iti Jerusalem. Ngem nalawag a bilib ken Daniel dagiti opisial ti Babilonia. Nakitada ti “makita ti mata”—a ni Daniel ket ‘awan a pulos ti depekto ti bagina, nataer’ ken naggapu iti natan-ok a pamilia. (1 Sam. 16:7) Gapu kadagita a rason, sinanay isuna dagiti Babilonio nga agserbi iti palasio. (Dan. 1:​3, 4, 6) Ay-ayaten ni Jehova ni Daniel gapu iti kinatao a pinili daytoy nga agtutubo a pagbalinanna. Kinapudnona, mabalin nga agarup 20 ti tawen ni Daniel idi imbaga ni Jehova nga isu ket kas kada Noe ken Job. Imbilang ngarud ni Jehova a nalinteg ti agtutubo a ni Daniel a kas kada Noe ken Job a simamatalek a nagserbi Kenkuana iti adu a tawen. (Gen. 5:32; 6:​9, 10; Job 42:​16, 17; Ezek. 14:14) Ken intultuloy ni Jehova nga inayat ni Daniel bayat ti atiddog ken naisangsangayan a biagna.—Dan. 10:​11, 19. w23.08 2 ¶1-2

No planom ti gumatang iti balay, sigurado a kayatmo nga inspeksionen ti amin a detalyena. Kasta met laeng ti kayattayo no agbasa ken agadaltayo iti Biblia. No basta paspasam a basaen, baka dagiti laeng kangrunaan a kinapudno ti maammuam—dagiti “pagdamdamuan a bambanag manipud kadagiti sagrado a mensahe ti Dios.” (Heb. 5:12) Imbes ketdi, kas iti balay, “umunegka” tapno masukimatmo a naimbag ti amin a detalye. Ti maysa a nagsayaat a pamay-an a maadalmo ti Biblia ket ti panangkitam no kasano nga agkokonektar ti mensahena iti nagduduma a pasetna. Ikagumaam a tarusan saan laeng a no ania dagiti kinapudno a patpatiem no di ket no apay a patpatiem dagita. Tapno maawatantayo a naan-anay ti Sao ti Dios, masapul nga ammuentayo dagiti nauuneg a kinapudno iti Biblia. Imparegta ni apostol Pablo kadagiti padana a Kristiano a siaanep nga adalenda ti Sao ti Dios tapno “maawatan[da] a naimbag ti kaakaba ken kaatiddog ken kangato ken kauneg” ti kinapudno. Iti kasta, ‘mairamut ken maipasdekda’ iti pammatida. (Efe. 3:​14-19) Masapul a kasta met ti aramidentayo. w23.10 18 ¶1-3

Naglaon ti Biblia iti adu nga ulidan dagiti naanus. Pagsayaatam no pagbalinem a proyekto iti panagadalmo ti maipapan kadagiti ulidanda. Kas pagarigan, uray ubing pay ni David idi napili nga agbalin a sumaruno nga ari ti Israel, masapul nga aguray iti adu a tawen sakbay a maitrono kas ari. Simamatalek a nagdaydayaw ken Jehova da Simeon ken Ana bayat nga ur-urayenda ti naikari a Mesias. (Luc. 2:​25, 36-38) Bayat nga ad-adalem dagita a salaysay, ammuem dagiti sungbat dagitoy a saludsod: Ania ngata ti nakatulong iti daytoy a tao tapno agbalin a naanus? Kasano a nagunggonaan iti kinaanusna? Kasanok a matulad isuna? Adda met dagiti masursurom kadagidiay saan a naanus. (1 Sam. 13:​8-14) Mabalin nga isaludsodmo: ‘Apay ngata a dida nakapaganus? Ania dagiti naganabda?’ w23.08 25 ¶15

Napudno ni apostol Pedro. Dina impalubos nga adda aniaman a mangpasardeng kenkuana a sumurot ken Jesus. Impakitana dayta idi adda imbaga ni Jesus a saan a naawatan dagiti adalanna. (Juan 6:68) Adu ti nagsardeng a simmurot ken Jesus idi dida nauray ti panangilawlawagna wenno dida inammo ti kaipapanan ti imbagana. Ngem saan a kasta ni Pedro. Imbagana a ni laeng Jesus ti addaan iti “sasao a makaited iti biag nga agnanayon.” Ammona a baybay-an isuna ni Pedro ken ti dadduma nga apostol. Ngem imbaga latta ni Jesus nga agtalek ken Pedro a makasubli ken agtalinaed a matalek. (Luc. 22:​31, 32) Naawatan ni Jesus a “magagaran ti espiritu, ngem nakapuy ti lasag.” (Mar. 14:38) Isu nga uray inlibak ni Pedro, saan a naawanan ni Jesus iti namnama iti dayta nga apostolna. Idi napagungaren ni Jesus, nagpakita ken Pedro—posible nga idi agmaymaysa ni Pedro. (Mar. 16:7; Luc. 24:34; 1 Cor. 15:5) Naparegta la ketdi ti maup-upay nga apostol! w23.09 22 ¶9-10

Pakawanen wenno abbongan ti Dios dagiti basol dagidiay mangipakpakita iti pammati kenkuana. Naan-anay a pakawanen ken lipatenna dagita. (Sal. 32:​1, 2) Para kenkuana, awan pagkuranganda ken nalintegda gapu iti pammatida. Uray no naideklara a nalinteg da Abraham, David, ken dadduma pay a matalek nga agdaydayaw iti Dios, imperpekto ken managbasolda latta. Ngem gapu iti pammatida, imbilang ida ti Dios kas awan pagkuranganna, lalo no ikomparana ida kadagiti saan nga agdaydayaw kenkuana. (Efe. 2:12) Iti surat ni apostol Pablo kadagiti taga-Roma, inlawlawagna a masapul nga adda pammatitayo tapno agbalintayo a gayyem ti Dios. Imbilang ti Dios da Abraham ken David a gagayyemna gapu iti pammatida kenkuana. Ibilangnatayo met a gagayyemna gapu iti pammatitayo. w23.12 3 ¶6-7

Adda pribilehio ti amin a Kristiano ita a mangipaay kadagiti daton ken Jehova. Kasano? Us-usarenda ti tiempo, pigsa, ken sanikuada para iti irarang-ay dagiti interes ti Pagarian ti Dios. No aramidentayo ti amin a kabaelantayo nga agserbi ken Jehova, ipakpakitatayo nga ipatpategtayo ti pribilehiotayo nga agdaydayaw kenkuana. Dinakamat ni apostol Pablo dagiti aspeto ti panagdaydayawtayo a masapul a saantayo a pulos liwliwayan. (Heb. 10:​22-25) Karaman iti dayta ti panagkararag ken Jehova, panangipakaammo iti namnamatayo, panaggigimong, ken panagpipinnaregta, nga ‘ad-adda pay nga aramidentayo amin dagita bayat a makitkitatayo nga umas-asidegen ti aldaw’ ni Jehova. Iti tartaraudi a paset ti libro nga Apocalipsis, namindua nga imbaga ti anghel ni Jehova kas panangipaganetgetna: “Agdaydayawka iti Dios!” (Apoc. 19:10; 22:9) Ditay koma pulos liplipatan daytoy a napateg a kinapudno maipapan iti naindaklan a naespirituan a templo ni Jehova ken ti nagpateg a pribilehiotayo nga agdaydayaw iti naindaklan a Diostayo! w23.10 29 ¶17-18

Kayattayo amin nga ‘itultuloy ti agiinnayat.’ Ngem napateg a laglagipentayo nga impakdaar ni Jesus a “lumamiisto ti ayat ti ad-adu.” (Mat. 24:12) Saan idi nga ibagbaga ni Jesus a mapasamak dayta iti kaaduan nga adalanna. Nupay kasta, masapul a kanayon nga alertotayo tapno dinatay maimpluensiaan ti lumamlamiis nga ayat dagiti tattao iti lubong. Bayat a pampanunotentayo dayta, usigentayo daytoy a napateg a saludsod: Adda kadi pamay-an tapno masuboktayo no nabileg ti ayattayo kadagiti kakabsat? Ti maysa a pamay-an tapno maammuantayo no nabileg ti ayattayo ket ti panangusig iti reaksiontayo iti nadumaduma a situasion. (2 Cor. 8:8) Ti maysa a kasta a situasion ket dinakamat ni apostol Pedro: “Kangrunaan iti amin, nauneg koma ti ayatyo iti maysa ken maysa, ta ti ayat abbonganna ti adu a basol.” (1 Ped. 4:8) No kasta, dagiti pagkapuyan ken kinaimperpekto ti sabsabali ti mabalin a mangsubok iti ayattayo. w23.11 10 ¶12-13

Ditay masurot ti bilin ni Jesus maipapan iti ayat no manmano laeng a kakongregasiontayo ti ayatentayo. Kas ken Jesus, natural laeng a mabalin a mariknatayo a nasingsingedtayo iti dadduma. (Juan 13:23; 20:2) Ngem impalagip ni apostol Pedro a masapul nga ikagumaantayo ti maaddaan iti “nainkabsatan nga ayat” iti amin a kakabsat a lallaki ken babbai—ta kapamiliatayo amin ida. (1 Ped. 2:17) Imparegta ni Pedro a ‘sipapasnek ken naimpusuan nga agiinnayattayo.’ (1 Ped. 1:22) Iti dayta a konteksto, ti “sipapasnek” a panagayat ramanenna ti panangayat iti maysa uray no narigat nga aramiden dayta. Kas pagarigan, nasair wenno nasaktannatayo ti maysa a kabsat. Mabalin a ti damo a reaksiontayo ket agibales, imbes nga ipakitatayo ti ayat. Ngem nasursuro ni Pedro ken Jesus a ti panagibales ket kagura ti Dios. (Juan 18:​10, 11) Insurat ni Pedro: “Diyo subadan ti panangdangran iti panangdangran wenno insulto iti insulto. Imbes ketdi, subadanyo iti bendision.” (1 Ped. 3:9) No addaanka iti napasnek nga ayat, naimbag ken nakonsiderarka uray kadagidiay mabalin a nangsair kenka. w23.09 28-29 ¶9-11

Masmasdaawtayo ta nagbiit a dumakkel dagiti ubbing. Inton agangay, adultodan. Kasla automatiko a mapasamak dayta a panagdakkel. Ngem ti panagmataengan iti naespirituan ket saan a pulos nga automatiko. (1 Cor. 13:11; Heb. 6:1) Tapno agmataengantayo iti naespirituan, masapul a nasinged ti relasiontayo ken Jehova. Kasapulantayo met ti nasantuan nga espirituna tapno maparang-aytayo dagiti kualidad a makaay-ayo iti Dios, masursurotayo dagiti praktikal a paglaingan, ken makapagsaganatayo para kadagiti responsabilidadtayo iti masanguanan. (Prov. 1:5) Pinarsua ni Jehova dagiti tattao kas lallaki ken babbai. (Gen. 1:27) Nalawag nga agduma ti lalaki ken babai, saan laeng nga iti pisikal no di ket iti dadduma pay nga aspeto. Kas pagarigan, agduma dagiti akem nga inted ni Jehova kadagiti lallaki ken babbai, isu a kasapulan nga addaanda kadagiti kualidad ken abilidad a makatulong kadakuada a mangitungpal kadagiti responsabilidadda.—Gen. 2:18. w23.12 18 ¶1-2

Kayat kadi ni Jesus nga usaren ti dadduma ti personal a nagan ti Amana? Wen. Para iti dadduma a lider ti relihion idi panawen ni Jesus, sagrado unay ti nagan ti Dios isu a saan a mabalin nga usaren dayta. Ngem saan nga impalubos ni Jesus a dagita a saan a nainkasuratan a tradision ti manglapped kenkuana a mangidaydayaw iti nagan ti Amana. Kitaem ti napasamak idi inagasanna ti maysa a lalaki a linuganan ti demonio iti rehion dagiti Geraseno. Nagbuteng dagiti tattao ken impakaasida ken Jesus a pumanaw, isu a saan a nagbayag iti dayta a rehion. (Mar. 5:​16, 17) Ngem kayat latta ni Jesus nga ipakaammo sadiay ti nagan ni Jehova. Isu a binilinna ti inagasanna a lalaki a mangipakaammo kadagiti tattao ti inaramid ni Jehova kenkuana, saan a ti inaramidna. (Mar. 5:19) Kasta met laeng ti kayat ni Jesus nga aramidentayo ita—ipakaammotayo ti nagan ti Amana iti intero a lubong! (Mat. 24:14; 28: 20) No aramidentayo dayta, maparagsaktayo ti Aritayo a ni Jesus. w24.02 10 ¶10

Talaga a bendision ti agbalin a paset ti organisasion ni Jehova bayat daytoy nagrigat a maudi nga al-aldaw. Dumakdakes a dumakdakes daytoy a lubong ngem ipapaayannatayo ni Jehova kadagiti kakabsat a tumulong kadatayo. (Sal. 133:1) Tultulongannatayo tapno agbalin a naragsak ti pamiliatayo. (Efe. 5:33–6:1) Ken ipapaayannatayo iti pannakatarus ken sirib tapno natalged ti riknatayo ken natalna ti isiptayo. Ngem masapul nga ikagumaantayo ti agserbi ken Jehova a simamatalek. Apay? Gapu ta mabalin a masaktantayo gapu iti kinaimperpekto dagiti kakabsattayo. Baka masurontayo pay ketdi iti bagitayo no makaaramidtayo iti kamali, lalo no maulit-ulit a maaramidtayo dagita. Masapul nga itultuloytayo latta ti agserbi ken Jehova uray (1) no nasaktannatayo ti maysa a kapammatiantayo, (2) no nadismayanatayo ti asawatayo, ken (3) no masurontayo iti bagitayo. w24.03 14 ¶1-2

Adda dagiti tiempo a makangngegka iti kapkapadasan dagiti kakabsattayo a nagdesision a mangpalawa iti panagserbida ken Jehova. Baka nageskuelada iti School for Kingdom Evangelizers wenno timmulongda kadagiti lugar a dakdakkel ti panagkasapulanna. Nagsayaat met no pagbalinem dagita a kalatmo, no ipalubos ti kasasaadmo. Dagiti adipen ni Jehova ket magagaran a mangpalawa iti ministerioda. (Ara. 16:9) Ngem kasano ngay no saanmo pay a kaya nga aramiden dayta ita? Dimo koma ikomkompara ti bagim kadagiti makabael a mangaramid iti dayta. Ti napateg ket itultuloymo ti agibtur. (Mat. 10:22) Saanmo a tagtagibassiten ti pateg ti panagserbim ken Jehova sigun iti abilidad ken kasasaadmo. Maysa dayta a napateg a pamay-an tapno maitultuloymo a suroten ni Jesus kalpasan ti bautismom.—Sal. 26:1. w24.03 10 ¶11

Ikarkari ti nailangitan nga Amatayo a pakawanennatayo no agbabbabawitayo. (Sal. 86:5) Isu a no talaga a pinagbabawyantayon dagiti basoltayo, makapagtalektayo a pudno ti imbaga ni Jehova—pinakawannatayon. Laglagipentayo a ni Jehova ket saan nga istrikto. Isu ket nainkalintegan. Dina pulos kiddawen ti nalablabes ngem iti kabaelantayo nga aramiden. Apresiarenna ti aniaman nga aramidentayo para kenkuana no la ket ta aramidentayo ti kasayaatantayo. Kasta met, panunotem dagiti ulidan a nadakamat iti Biblia maipapan kadagidiay nagserbi ken Jehova iti amin a puso. Ni apostol Pablo ti maysa kadakuada. Adu a tawen a sireregta a nagserbi. Rinibu a kilometro ti dinaliasatna ken nangipasdek iti adu a kongregasion. Ngem idi nagbalbaliw ti situasionna, ket saanen a makapangasaba a kas iti dati, maragsakan pay latta kadi ti Dios kenkuana? Wen. Binendisionan ni Jehova ta intultuloyna nga inaramid ti kabaelanna. (Ara. 28:​30, 31) Kastatayo met. No dadduma, adda dagiti tiempo a ditay maaramiden ti dati nga ar-aramidentayo para ken Jehova. Ngem ti napateg kenkuana ket no apay nga ar-aramidentayo dayta. w24.03 27 ¶7, 9

Dagiti mismo a kararag ni Jesus ken Jehova ket pagtuladan dagiti adalanna. Iti intero a ministerio ni Jesus, masansan a nagkararag. Masapul idi a mangiwaya iti tiempo nga agkararag ta masansan a nagadu ti ar-aramidenna ken adu a tattao ti umay kenkuana. (Mar. 6:​31, 45, 46) Nasapa idi a bumangon iti bigat tapno agkararag nga is-isuna. Naminsan, nagpatpatnag a nagkararag sakbay a nangaramid iti napateg a desision. (Luc. 6:​12, 13) Ken iti rabii sakbay a natay ni Jesus, namin-adu a nagkararag tapno maisentrona ti panunotna iti panangitungpalna iti karirigatan a paset ti nakaibaonanna ditoy daga. (Mat. 26:​39, 42, 44) Isuro kadatayo ti ulidan ni Jesus nga uray no kasano kaadu ti ar-aramidentayo, masapul a mangiwayatayo iti tiempo nga agkararag. Kas ken Jesus, baka kasapulan a mangyeskediultayo iti oras nga agkararag—nasapatayo a bumangon iti bigat wenno mangiwayatayo iti tiempo iti rabii sakbay a maturogtayo. No aramidentayo dayta, ipakpakitatayo ken Jehova nga ap-apresiarentayo daytoy a naisangsangayan a sagut. w23.05 3 ¶4-5

Kitaem ti sao nga “imbukbok” iti tekstotayo ita nga aldaw. Sigun iti maysa a reperensia, nadeskribir dayta kas ti “nagadu a danum a maibukbok kadatayo.” Talaga nga ipakita dayta nga ilustrasion nga aglaplapusanan ti ayat ni Jehova para kadagiti dinutokan ti espiritu! Ammoda “nga ay-ayaten [ida] ti Dios.” (Jud. 1) Inyebkas ni apostol Juan ti marikriknana idi insuratna: “Nagdakkel la ketdin ti ayat nga impakita kadatayo ti Ama! Inawagannatayo kas annakna ket agpayso nga annaknatayo ti Dios!” (1 Juan 3:1) Dagiti laeng kadi dinutokan ti espiritu ti ay-ayaten ni Jehova? Saan. Pampaneknekan ni Jehova nga ay-ayatennatayo amin. Ania ti kapigsaan nga ebidensia ti ayat ni Jehova? Ti subbot—ti kasayaatan nga ebkas ti ayat iti intero nga uniberso!—Juan 3:16; Roma 5:8. w24.01 28 ¶9-10

Ipakita ti bersikulo iti ngato ti sabali pay a nakatulong ken David tapno malabananna ti butengna. Uray no agpegpeggad idi ti biagna, inut-utobna dagiti aramidento pay ni Jehova para kenkuana. Ammo ni David nga isalakan isuna ni Jehova iti umiso a tiempo. Ngamin, indeklaran ni Jehova a ni David ti sumaruno nga agari iti Israel. (1 Sam. 16:​1, 13) Para kenkuana, aniaman nga inkari ni Jehova ket sigurado a matungpal. Ania ti inkari ni Jehova nga aramidenna para kenka? Saantayo a namnamaen nga isalakannatayo iti amin a problema. Ngem aniaman a pakasuotan ti pakaipasanguam iti daytoy a sistema ti bambanag, ikkatento dagita ni Jehova inton umay ti baro a lubong. (Isa. 25:​7-9) Sigurado a kabaelan ti Namarsua kadatayo a pagungaren dagiti natay, paimbagen ti amin a sakit ken saem a marikriknatayo, ken pukawen ti amin a bumusbusor.—1 Juan 4:4. w24.01 6 ¶12-13

Laglagipem ti panagdedikar ken panagpabautisarmo. Inaramidmo dagita gapu ta kayatmo ti dumasig ken Jehova. Panunotem dagiti nakatulong kenka isu a nakombinsirka a nasarakamon ti kinapudno. Naaddaanka iti umiso a pannakaammo maipapan ken Jehova isu nga immuneg ti panagraem ken panagayatmo kenkuana kas nailangitan nga Amam. Naaddaanka iti pammati isu a natignayka nga agbabawi. Tinignaynaka ti pusom a mangisardeng kadagiti di umiso nga ar-aramidem idi tapno agbiagkan a maitunos iti pagayatan ti Dios. Nabang-aranka idi nariknam a pinakawannakan ti Dios. (Sal. 32:2) Inatenderam dagiti gimong ken inkasabamon dagiti nagsayaat a naammuam. Kas dedikado ken bautisado a Kristiano, magmagnakan iti dalan nga agturong iti biag, ket determinadoka nga agtultuloy a magna iti dayta. (Mat. 7:​13, 14) Sapay koma ta agtalinaed a natibker ti debosionmo ken Jehova ken kanayonka nga agtulnog kadagiti bilinna. w23.07 17 ¶14; 19 ¶19

No panunotem ti kararagmo idi nagdedikarka ken Jehova, mapabilegka a manglaban iti aniaman a sulisog. Kas pagarigan, agalembong wenno ag-flirt-ka kadi iti maysa a naasawaanen a tao? Sigurado a saan! Nagsaankan iti dayta. No dimo ipalubos nga agtubo iti pusom dagiti saan nga umiso a rikna, awanto ti parutem kalpasanna. “Panawam[to]” la ketdi ti “dana ti managdakdakes.” (Prov. 4:​14, 15) Makatulong kadatayo ti ulidan ni Jesus. Determinado a mangparagsak iti Amana. Kas ken Jesus, determinadoka koma a dagus a mangliklik iti aniaman a kagura ti Dios a nagdedikaram. (Mat. 4:10; Juan 8:29) Kinaagpaysuanna, no adda suot ken sulisog, gundawaymo dayta a mangipakita a determinadoka nga ‘agtultuloy a mangsurot’ ken Jesus. Bayat nga ar-aramidem dayta, masiguradom a tulongannaka ni Jehova. w24.03 9-10 ¶8-10