BERACA

[Bendision].

1. Maysa kadagiti nabileg a lallaki a nasigo nga agaramat iti bai, manipud iti tribu ni Benjamin, a nakikappon ken David idiay Siclag. Daytoy ket idi tiempo a mapengpengdan pay laeng ni David gapu ken Saul.​—1Cr 12:1-3.

2. Nababa a tanap idiay Juda nga adda iti nagbaetan ti Betlehem ken Hebron. Iti agdama, maikunkuna nga isu dayta ti Wadi el-ʽArrub, ket agparang a ti kabangibangna a Khirbet Bereikut (Berakhot) ti nagtalinaed a pammaneknek maipapan iti sigud a naganna. Daytoy a ginget ket manipud iti daya nga agpalaud, a mamagsilpo iti katurturodan ti Juda ken ti let-ang iti laud ti Asin a Baybay.

Kalpasan ti namilagruan a panagballigi maibusor kadagiti nagtitipon a puersa ti Ammon, Moab, ken Edom, inummong ni Jehosafat dagiti umili itoy a nababa a tanap tapno bendituenda ni Jehova, isu a napanaganan dayta iti Nababa a Tanap ti Beraca (kaipapananna ti “Bendision”).​—2Cr 20:26.