HIERAPOLIS

[Nasantuan a Siudad].

Maysa a siudad iti probinsia ti Asia. Masarakan dayta iti makin-amianan nga igid ti Ginget Lycus ti Asia Menor, agarup 10 km (6 mi) iti amianan ti Laodicea iti moderno a Pamukkale, Turkey.

Nupay nalawag a saan a pulos simmarungkar ni apostol Pablo idiay Hierapolis, dagiti imbunga ti napaut a panagministeriona idiay Efeso (manipud kalam-ekna iti 52/53 K.P. agingga iti kalpasan ti Pentecostes idi 55 K.P. [1Co 16:8]) ket nagwaras iti ‘amin a distrito ti Asia.’ (Ara 19:1, 10) Agparang nga aktual a dimmanon ti Nakristianuan a pammati idiay Hierapolis babaen kadagiti “panagregget” ni Epafras.​—Col 4:12, 13.

Nupay saan a napateg daytoy a siudad no mainaig iti politika, nagbalin a narang-ay bayat ti natalna a panawen dagiti Romano kas sentro ti panagdaydayaw ken Cybele. Ti panagdaydayaw kenkuana sadiay ket rimmayray gapu iti dua a natural a banag, dagiti mineral nga ubbog ken ti Plutonium, wenno Charonion (nauneg ken akikid a yuyeng nga addaan kadagiti makapapatay nga alingasaw).