Epafras—“Matalek a Ministro ni Kristo”
ASINO ti nangibangon kadagiti kongregasion Kristiano idiay Corinto, Efeso, ken Filipos? Nalabit dikay agtaktak a sumungbat: ‘Ni Pablo, ti “apostol kadagiti nasion.”’ (Roma 11:13) Umisokayo.
Ngem, asino ti nangibangon kadagiti kongregasion idiay Colosas, Hierapolis, ken Laodicea? Nupay ditay makasiguro, mabalin a ti lalaki nga agnagan Epafras. Uray kaskasano, nalabit kayatyo a maammuan ti ad-adu pay maipapan iti daytoy nga ebanghelisador, tangay isu ket naawagan “maysa a matalek a ministro ni Kristo.”—Colosas 1:7.
Ebanghelisador iti Ginget ti Licus
Ti nagan nga Epafras ket pangababaan ti Epafrodito. Ngem ni Epafras di koma mapagkamalian a ni Epafrodito a taga Filipos. Ni Epafras ket taga-Colosas, maysa kadagiti tallo a sentro dagiti kongregasion Kristiano idiay ginget ti Karayan Licus, iti Asia Menor. Masarakan ti Colosas 18 kilometro manipud iti Laodicea ken 19 kilometro manipud iti Hierapolis, iti nagkauna a rehion ti Frigia.
Saan a nalawag nga ibaga ti Biblia no kasano a nakagteng ti naimbag a damag ti Pagarian ti Dios idiay Frigia. Nupay kasta, adda idiay Jerusalem dagiti taga-Frigia idi aldaw ti Pentecostes iti 33 K.P., nalabit sumagmamano kadakuada ti naggapu idiay Colosas. (Aramid 2:1, 5, 10) Kabayatan ti panagministerio ni Pablo idiay Efeso (agarup 52-55 K.P.), nabileg ken epektibo unay ti panangasaba iti dayta a lugar ta saan laeng a dagiti taga-Efeso no di pay met “isuamin dagidiay agnanaed iti distrito ti Asia nangngegda ti sao ti Apo, agpadpada dagiti Judio ken dagiti Griego.” (Aramid 19:10) Agparang a saan a naikaskasaba ni Pablo ti naimbag a damag iti intero a Ginget ti Licus, tangay adu dagiti nagbalin a Kristiano iti dayta a rehion ti saan a pulos a nakakita kenkuana.—Colosas 2:1
Sigun ken Pablo, ni Epafras ti nangisuro kadagiti taga-Colosas maipapan iti “di kaikarian a kinamanangngaasi ti Dios iti kinapudno.” Tangay inawagan ni Pablo daytoy a katrabahuanna kas “maysa a matalek a ministro ni Kristo maigapu kadakami” ipakpakitana a ni Epafras ket aktibo nga ebanghelisador iti dayta a lugar.—Colosas 1:6, 7.
Agpadpada da apostol Pablo ken ni ebanghelisador nga Epafras a maseknan unay iti naespirituan a pagimbagan dagiti kapammatianda idiay Ginget ti Licus. Kas “apostol dagiti nasion,” naragsakan la ketdi ni Pablo a nakaawat iti damag maipapan iti panagrang-ayda. Awan sabali no di ni Epafras ti nakadamagan ni Pablo maipapan iti naespirituan a kasasaad dagiti taga-Colosas.—Colosas 1:4, 8.
Ti Padamag ni Epafras
Pudno a nadagsen ti parikut dagiti taga-Colosas ta natignay ni Epafras a nagbiahe iti nawatiwat nga agturong idiay Roma maipaay iti masinunuo a panggep a mangisalaysay kadagitoy a banag ken Pablo. Ti detalyado a padamag ni Epafras ti nabatad a nangtignay ken Pablo a mangaramid iti dua a surat kadagidiay kakabsat a dina koma naam-ammo. Ti maysa ket daydiay surat kadagiti taga-Colosas. Ti maysa pay a surat, a nalawag a saan a naitalimeng, ket naipatulod kadagiti taga-Laodicea. (Colosas 4:16) Nainkalintegan a panunoten a dagiti linaon dagidiay a surat nairanta nga agserbi iti pakasapulan dagidiay a Kristiano kas nakita ni Epafras. Ania dagiti nakitana a pakasapulan? Ken ania ti ibagbaga daytoy kadatayo maipapan iti personalidadna?
Agparang nga ipakpakita ti surat kadagiti taga-Colosas a ni Epafras madanagan idi ta dagiti Kristiano idiay Colosas agpegpeggadda kadagiti pinapagano a pilosopia mainaig iti asetisismo, espiritismo, ken idolatroso nga an-anito. Maysa pay, ti sursuro dagiti Judio maipapan iti panangliklik kadagiti taraon ken panangngilin iti sumagmamano nga aldaw mabalin nga inimpluensiaanna ti dadduma a miembro ti kongregasion.—Colosas 2:4, 8, 16, 20-23.
Tangay nagsurat ni Pablo maipapan kadagitoy a tema ipakpakitana kadatayo nga anian a kinaalisto ken kinasensitibo ni Epafras kadagiti kasapulan dagiti padana a Kristiano. Nangipakita iti naayat a pannakaseknan iti naespirituan a pagimbaganda, a sipapanunot kadagiti peggad iti lugar a pagnanaedanda. Dinawat ni Epafras ti pammalakad ni Pablo, ket ipaspasimudaag daytoy nga isu ket napakumbaba. Mabalin a nariknana ti pakasapulan nga umawat iti balakad manipud iti maysa nga ad-aduan kapadasan. Iti aniaman a kasasaad, nagtignay a nainsiriban ni Epafras.—Proverbio 15:22.
Maysa a Tao a Nangipateg iti Kararag
Iti pammakada ti suratna kadagiti Kristiano idiay Colosas, kuna ni Pablo: “Ni Epafras, a naggapu kadakayo, maysa nga adipen ni Kristo Jesus, ipaw-itna dagiti kablaawna kadakayo, kankanayon nga umag-agawa iti karkararagna maigapu kadakayo, tapno iti kamaudiananna makapagtakderkayo a naan-anay ken addaan natibker a panagtalek iti amin a pagayatan ti Dios. Kinapudnona saksiak nga ikabilna ti bagina iti dakkel a panagregget maigapu kadakayo ken kadagidiay adda idiay Laodicea ken kadagidiay adda idiay Hierapolis.”—Colosas 4:12, 13.
Wen, uray kabayatan a ‘pada a kayaw’ idi ni Pablo idiay Roma, pampanunoten ni Epafras dagiti ing-ingungotenna a kakabsat idiay Colosas, Laodicea, ken Hierapolis ken ikarkararaganna ida. (Filemon 23) Iti literal a pamay-an, ‘nakidangadang’ maipaay kadakuada iti kararag. Sigun ken ni eskolar a D. Edmond Hiebert, ti Griego a termino a naaramat ditoy ipaspasimudaagna ti “napuersa ken dakkel a trabaho,” banag nga umasping iti ‘nakaro a tuok’ ti isip a napasaran idi ni Jesu-Kristo bayat nga agkarkararag idiay minuyongan ti Getsemani. (Lucas 22:44) Sipapasnek a tinarigagayan ni Epafras a magun-od dagiti naespirituan a kakabsatna ti kinatibker ken naan-anay a Nakristianuan a kinamataengan. Anian a bendision agpaay kadagiti kongregasion ti kasta a kabsat a naespirituan ti panagpampanunotna!
Yantangay ni Epafras ket naawagan kas ‘dungdunguen a pada nga adipen,’ di pagduaduaan nga impateg dagiti padana a Kristiano. (Colosas 1:7) No ipalubos dagiti kasasaad, amin a miembro ti kongregasion rumbeng a naruay a mangipakita iti kinabara ken ayat. Kas pagarigan, mabalin nga ipaayan iti atension ti itutulong kadagiti masakit, nataenganen, wenno dadduma pay nga addaan naisangsangayan a pakasapulan. Mabalin nga adda nadumaduma a pagrebbengan a rumbeng nga asikasuen iti kongregasion, wenno mabalin a posible ti agabuloy maipaay kadagiti teokratiko a proyekto iti panagipatakder.
Ti panangikararag kadagiti sabsabali, kas inaramid ni Epafras, ket maysa a kita ti sagrado a panagserbi a maaramidantayo amin. Mabalin nga iraman iti kakasta a kararag dagiti ebkas ti pannakaseknan kadagiti agdaydayaw ken Jehova a maipaspasango iti nadumaduma a peggad wenno parikut iti naespirituan wenno pisikal. Babaen ti panagagawatayo iti kastoy a pamay-an, mabalin a mayaspingtayo ken Epafras. Tunggal maysa kadatayo maaddaan iti pribilehio ken rag-o a mapaneknekan kas ‘dungdunguen a pada nga adipen’ iti pamilia dagiti matalek nga adipen ni Jehova.