UTOT

[Heb., choʹledh].

Maysa a managkibkib nga animal nga agrukod iti 15 agingga iti 30 cm (6 agingga iti 12 pul.). Daytoy nga utot (Spalax ehrenbergi) ket umarngi iti pukekek, pugod, ken awanan tengnged a nabungkong a nalamuyot ken napuskol a dutdot, a gagangay a dumuyaw a dapo-kayumanggi ti marisna. Nalaka a mailasin ti ulona babaen ti awan dutdotna a sungo ken dua a paris ti dadakkel a sungang a ngipen. Iti sidong ti Linteg, ti utot ket narugit a pagtaraon.​—Le 11:29.

Nupay ti adu a patarus ipatarusda ti choʹledh kas “comadreja” (AS, KJ, RS), adda nakaibatayan ti panangpili iti “utot.” Iti Arabiko, maysa a pagsasao a nainaig iti Hebreo ket addaan iti umasping unay a sao, khuld, a kaipapananna ti “utot.” Kasta met, mabalin a nainaig ti choʹledh iti Hebreo a termino a maar-aramat kalpasan ti panawen ti Biblia a mangipasimudaag iti “panagkali” wenno “panagkutkot.” Tumunos daytoy iti ugali ti utot nga agkutkot.

Agnanaed dagiti utot iti uneg ti daga ket agkalida kadagiti abut a pagturogan ken dadakkel a silsiled a pagidulinan iti taraon. Agtartaraon dagitoy a parsua iti natnateng, nangnangruna kadagiti bagas ti mula ken ungel. Ngarud naidumada kadagiti pudpudno a managkutkot nga animal, nga agtartaraon kadagiti insekto ken alinta ken saanda a maibilang kadagiti animal a masarakan iti Palestina.