PARTIA, DAGITI TAGA

[Iti (Kukua ti) Partia]. Dagiti Judio ken proselita manipud Partia ti nailista nga umuna kadagiti sangaili a timmabuno iti Piesta ti Pentecostes, 33 K.P., idiay Jerusalem. Gapu iti nasantuan nga espiritu ti Dios a naiparukpok iti bunggoy ti agarup 120 a Kristiano nga adalan, nabaelanda nga inwaragawag ti naimbag a damag iti pagsasao wenno dialekto dagidiay a taga Partia. Awan duadua a ti sumagmamano kadagitoy ket nangipangag ken nagbalin a Kristiano, ken nalabit insaknapda ti mensahe kadagiti mismo a kailianda apaman a nakasublida idiay Partia. (Ara 1:15; 2:1, 4-12, 37-47) Dagiti Judio manipud Partia ket karaman kadagiti adda iti Pannakawarawara; dagiti “proselita” (Ara 2:10) ket di Judio a nakomberte iti Judaismo.

Ti Imperio ti Partia ket namunganay iti abagatan a daya ti Baybay Caspiano ngem idi agangay nasaknapanna ti Eufrates agingga iti India. Dagiti Partiano ket sakup dagiti Persiano manipud idi tiempo ni Ari Ciro. Ngem idi inturayan idan ti Grecia, nagrebeldeda kadagiti suno ni Alejandro a Dakkel ken nataginayonda ti panagwaywayasda iti sumagmamano a siglo, uray pay maibusor iti Roma. Sinakupda ti Judea iti sumagmamano a tawen sakbay nga innala dayta dagiti Romano. Idi umuna a siglo, dagiti Partiano ket maysa pay laeng nga agwaywayas a nasion, ket nupay inannurotda ti kangrunaan a Persiano a relihion, kaskasdi a pinanuynoyanda ti relihion dagiti Judio ken ti dadduma pay a relihion.