TANAP
1. Panglantagen a daga, maisupadi iti katurturodan wenno kabambantayan. Ti Hebreo a Kasuratan silalawag unay a nagaramat iti nadumaduma a sao a mangilasin wenno mangdeskribir iti nagduduma a kita ti daga.
Ti Hebreo a termino nga ʽara·vahʹ maar-aramat nga agpadpada kas nagan maipaay iti masinunuo a disso ken kas sao a mangiladawan iti maysa a kita ti daga. (Kitaenyo ti ARABA.) No naaramat nga awan ti piho nga artikulo, ipatuldo ti ʽara·vahʹ ti maysa a desierto a tanap wenno kapanagan, kas kadagidiay adda iti Moab ken Jerico. (Nu 22:1; 35:1; Jos 5:10; 13:32; Jer 52:8) Nupay mabalin nga adda karkarayan a mangipaay iti danum iti dayta a disso, ti ʽara·vahʹ kadawyan nga ipaganetgetna a ti tanap ket natikag. Gapuna dakkel a panagbalbaliw no ti nadam-eg, mapadpadanuman a Tanap ti Saron agbalin a kas iti desierto a tanap (Isa 33:9), wenno dagiti naapres nga ayus ti danum dumanonda iti desierto a tanap.—Isa 35:1, 6; 51:3.
Ti sao a biq·ʽahʹ impatuldona ti nalawa a tanap a ti beddengna ket bambantay. Agtaud dayta iti berbo a kaipapananna ti “guduaen” ken mabalin a siuumiso a maipatarus a “ginget a tanap.” Uray ita ti nalawa a ginget a tanap iti nagbaetan ti Kabambantayan ti Anti-Libano ken ti Bambantay ti Libano ket pagaammo kas Beqaʽ. (Jos 11:17) Masansan nga iti Kasuratan ti biq·ʽahʹ, wenno “ginget a tanap,” naipasdek a kasupadi ti bambantay wenno turturod (De 8:7; 11:11; Sal 104:8; Isa 41:18) wenno ti likkalikkaong wenno natibbakol a daga. (Isa 40:4) Ti nainaig nga Aramaiko a sao nga agparang iti Daniel 3:1 masansan a maipatarus a “tanap” laeng, a tumukoy iti lugar a nangipatakderan ni Nabucodonosor iti balitok a ladawan.
Ti maysa nga atiddog a nababa a tanap, wenno ginget, ti natukoy iti Hebreo nga ʽeʹmeq. Ti sao ipamatmatna ti “maysa nga atiddog nga akaba a paundoy a daga iti nagbaetan dagiti agkaabay a turturod a basbassit ti sakupna ngem iti immun-una a termino [biq·ʽahʹ], . . . a [ti ʽeʹmeq] addaan iti kapanunotan a kinababa ken kaakaba imbes a kinapasdok wenno pannakakubong.” (Cyclopædia da M’Clintock ken Strong, 1881, Tomo X, p. 703) Ti Hebreo a sao nayaplikar iti adu a nagduduma a lugar, kas iti “nababa a tanap ti Acor,” “ti nababa a tanap ti Ajalon,” ken ti “nababa a tanap ti Refaim.”—Jos 7:24; 10:12; 1Cr 11:15.
2. [Heb., mi·shohrʹ] Daytoy a Hebreo a termino a naipatarus met a “tanap” ket naadaw iti sao a kaipapananna ti “aglinteg, nalinteg.” Daytoy a Hebreo a sao mabalin a tumukoy iti “patad a daga; nalantag a daga” a maigidiat iti kabambantayan wenno katurturodan (1Ar 20:23, 25; Isa 40:4; 42:16; Zac 4:7) ken mabalin a kaipapananna ti “kinapalungdo” (Sal 27:11; 45:6; 67:4; 143:10; Isa 11:4) wenno pangawag iti kasasaad a siwayawaya kadagiti tubeng. (Sal 26:12) No dadduma agaplikar ti mi·shohrʹ iti tanap a nagsaad iti daya ti Natay a Baybay iti nagbaetan ti Hesbon iti amianan ken ti naapres a ginget ti Arnon iti abagatan.—De 3:10; Jos 13:9, 15-17; 20:8.