Panangipasakop iti Bagbagitayo ken Jehova Babaen iti Dedikasion
“AMMOTAYO a namunganaytayo iti Dios, ngem isuamin a lubong ti adda iti babaen ti managdakdakes.” Babaen kadagita a sasao impasdek ni apostol Juan ti di maawat a kinapudno ti kaaduan a tattao, awan sabali, a ti intero a lubong adda iti babaen ti pannakabalin “ti managdakdakes,” ni Satanas. Nupay kasta, ni Satanas “dina petpetpetan” dagidiay namunganay iti pudno a Dios, ni Jehova. Gapuna ti intero a natauan a pamilia ti mabalin a makitada dagiti bagbagida iti sidong ti panagturay ni Satanas wenno iti sidong ti panagturay ni Jehova. Daytat’ maysa a banag a maipaay iti personal a panagpili. Iti siasino ti pangipasakopanyo ti bagbagiyo? Ken Satanas wenno ken Jehova?—1 Juan 5:18-20; New International Version; Today’s English Version.
Ita a nangnangruna ngem idi isu ti tiempo nga agpaay iti tunggal maysa tapno agpili. (Lucas 21:31, 32) Impakita ni Jesus a saan a mabalin ti agtengtengnga, wenno agpangpangadua. Kunana, “Ti saan a makikadua kaniak, isu ti bumusor kaniak, ket ti saan a makipagurnong kaniak agiwara.” (Mateo 12:30) Kasano a masigurotayo a makipagur-urnongtayo ken Kristo? Nakaad-adu ken nagduduma dagiti relrelihion nga agkunkuna a Kristiano, a “naisalakanda” ken “nabaliwanda a naiyanak manen,” ta dagitoy a termino nagbalinda a nakalaklakan. (Mateo 19:16-26; Juan 3:3; 10:9) Ti pagannurotan isu daytoy: Patpatientay ken iwarwaragawagtay met laeng aya ti pinati ken inwaragawag ni Jesus? Kas maysa a Judio dina pinadpadas nga intan-ok ti bagina babaen ti panangisurona ti misterioso a doktrina ti Trinidad. (Juan 14:28; 17:1-5) Ngem inwaragawagna ti maysa a nalawag a mensahe, a ti Pagarian ti Dios. Silalagip iti daytoy a nakaibaonanna kuna ni Jesus: “Kadagiti sabsabali a siudad masapul met nga ipakaammok ti naimbag a damag ti pagarian ti Dios, ta daytoy ti panggep a nakaibaonak.”—Lucas 4:43.
“Anamongam Ita”
Sakbay ti panangirugi ni Jesus ti ministeriona a publiko a panangiwaragawag ti Pagarian ti Dios, isut’ nangala iti nasken nga addang nga agserbi kas pagulidanan kadagidiay amin a, kas kenkuana, ipasakopda ti bagida ken Amana. Ti salaysay ni Mateo ibagana kadatayo: “Idi ni Jesus nanipud Galilea agingga iti Jordan napan ken Juan, tapno pabautisaran kenkuana.” Idi nagkitakit ni Juan nga isu koma ti rebbeng a pabautisaran kenkuana, ti sungbat ni Jesus ket: “Anamongam ita, ta kasta ti maipaay kadatayo a panangtungpal iti amin a kinalinteg.”—Mateo 3:13-15.
Gaput’ panangtedna iti ulidan iti “amin a kinalinteg” babaen iti pannakaitanebna idiay Jordan, iti kamaudiananna mabalin nga ited ni Jesus ti bilin kadagiti adalanna: “Inkayo ngarud ket pagbalinenyo nga ad-adalan dagiti amin a tattao iti nasnasion, a bautisaranyo ida iti nagan iti Ama ken iti Anak ken iti nasantuan nga espiritu, nga isursuroyo kadakuada nga aywananda dagiti isuamin a bambanag nga imbilinko kadakayo.” (Mateo 28:19, 20) Mainayon kadagiti dadduma a bambanag, daytoy nga addang ti bautismo ti agserbi a mangipabigbig kadagidiay pinilida ti agpasakop iti pudno a Dios, ni Jehova, imbes nga agpasakop ken Satanas. Bayat dagiti napalabas a tawen serbisio (Setiembre 1983–Agosto 1984) ngangngani 180,000 a tattao iti intero a lubong impamatmatda ti panagpilida babaen iti bautismo iti danum. Impakitada a kaykayatda ti kinasoberano ni Jehova ngem ni Satanas.—Proverbio 27:11.
Pangngeddeng a Naibatay iti Pannakaammo
Kasta met iti daytoy a tawen adu a ribo ti agngayngayangay iti addang ti bautismo bayat iti “Manangsalimetmet iti Kinatarnaw” a Kumbension a maangay kadagiti adu a luglugar iti intero a lubong. Sakbay a magtenganda daytoy a punto ti bautismo, amin dagiti kandidato ti siaannad a renipasoda a kadua dagiti panglakayen ti kongregasion dagiti kangrunaan a doktrina ti Biblia ken dagiti pagannurotan a maipaay iti Nakristianuan a kababalin tapno masigurado a talaga a makakualipikarda a maipaay iti bautismo. Iti kasta ti pangngeddeng a maubautisaran ket saan a maysa a giddato nga emosional a panagrikrikna laeng. Imbes ketdi, tunggal maysa ‘pinaneknekanna ti bagina no ania ti nasayaat ken makaay-ayo ken naan-anay a pagayatan ti Dios’ ket tinarigagayanna ti agpasakop iti dayta a pagayatan.—Roma 12:2.
Ti panagserra iti palawag ti bautismo iti kumbension, dagiti kandidato ti bautismo addadanto iti kasasaad a sumungbat a buyogen ti nauneg a pannakaawat ken naimpusuan a panangapresiar kadagiti dua a simple a salsaludsod nga agserbi a mangpatalged a binigbigda ti kaipapanan ti panangsurot iti ulidan ni Kristo. Ti umuna a saludsod ket:
Maibatay iti daton ni Jesu-Kristo, nagbabawyanyon aya dagiti basbasolyo ken indedikaryon ti bagiyo ken Jehova nga aramiden ti pagayatanna?
Ti maikadua isu daytoy:
Bigbigenyo aya a ti dedikasion ken bautismoyo ipabigbignakayo a maysa kadagiti Saksi ni Jehova a naitimpuyog iti organisasion ti Dios nga iturturong ti espirituna?
Apaman a nasungbatanda ti wen dagitoy a salsaludsod, dagiti kandidato addada iti umiso a kasasaad ti puso a lumasat iti Nakristianuan a bautismo.
Ti Umiso a Panagug-ugali
No maminsan mapatpataud dagiti saludsod maipapan iti umiso a panagkawes para kadagidiay mabautisaran. Pudno unay ti kinaemma ti masalimetmetan koma iti kita dagiti mausar a pagbabasa. Nasken unay daytoy ita ta dagiti diseniador ti moda a kasla kayatda a pagpasikat ti seksualidad ken kayatda a maragpat ti ngangngani naan-anay a panaglamolamo. Ti maysa pay a banag a rebbeng nga ikuenta a ta sumagmamano kadagiti pagbabasa nga agparang a kasla naemma no namaga ti saanen a mangipakita ti kinaemma no nabasan. Awan asinnoman kadagidiay mabautisaran ti kayatda nga agbalin a pakaigappuan ti pakariribukan wenno pakaitibkolan iti maysa a pasamak a kas kainget ti bautismo.—Filipos 1:10.
Kadagiti napalabas, dadduma ti napanda pay iti kinamanaglablabes a mangted kadagiti nangingina a regalo ken mangaramid kadagiti dadakkel a ponsia a maipaay kadagiti kababautisar a tattao. Ti bautismo ket maysa nga okasion a maipaay iti dakkel a ragsak a pakiranudan, ngem nalabit ti maysa a sao a panagannad ti maiyanatop ditoy. Kuna ti Biblia: “Naim-imbag ti pannakalpas ti maysa a banag ngem iti rugina.” (Eclesiastes 7:8) Ti bautismo ket isu laeng ti pangrugian—ti pangrugian iti Nakristianuan a lumba a maipaay iti pannakaisalakan nga agturong iti biag. Nalawag nga awan pay ti atiddog a rekord iti matalek a panagserbi a naipasdek ditoyen. Gapuna apay a mangted ti pakaigappuan kadagiti kakumkumberte pay laeng nga agrikna iti di maiyanatop a kinaimportanteda?—Idiligyo iti 1 Timoteo 3:6.
Aniat’ kuna ti rekord ti Biblia a napasamak kalpasan a nabautisaran dagiti tallo a ribo idi Pentecostes 33 K.P.? “Ket nagtalinaedda iti sursuro dagidi apostol ken iti panagkakadua ken iti panagpipinnisi ti tinapay ken kadagiti kararag.” Impamaysada dagiti naespirituan a bambanag ket nagririnnanudda ti kinamanagpadagos iti maysa ken maysa. (Aramid 2:41, 42) Ti bautismo ket isut’ panawen a maipaay iti panagmennamenna ken nauneg a panagpampanunot. Maragsakantayo a makakita kadagiti estudiantetayo iti Biblia a nangala iti daytoy a nasken nga addang. Ket ti ug-ugalitayo idiay lugar a pagbautisaran rebbeng nga ipamatmatna kadagidiay agbuybuya a maysa a nasken a pangngeddeng ti naaramidan—ti panagpasakop iti Dios kas ti Soberano nga Apo ken, kas maysa a saksi ni Jehova, nga agbalin a saan a paset ti lubong nga adda “iti sidong ti pannakabalin ti managdakdakes.”—1 Juan 5:19; Mateo 4:10.
[Blurb iti panid 30]
Nanipud Hunio 1984, ti dagup a 808 a “Panagrang-ay iti Pagarian” a Kumbension dagiti Saksi ni Jehova ti naangay iti intero a daga. Ti napagtitipon a bilang dagiti timmabuno ti 5,002,684. Kadagitoy 63,556 ti nabautisaran.