Report dagiti Manangiwaragawag ti Pagarian
Ti Pangulo Nagsao
MAKAPAREGTA a maammuan nga adda pay laeng tattao a nangato ti saadda iti daytoy a lubong a mangipateg iti kinamanagpiaran ken kinalinteg ken agsaoda tapno itandudo dagitoy a kualidad. Maysa a pangarigan isu ti pangulo iti maysa a pagilian iti Africa a sadiay maiparit ti trabaho dagiti Saksi ni Jehova. Palubosantay ti report a mangibaga kadatayo:
“Iti nabiit pay nadumaduma a narelihiusuan a grupo ti nangangay iti interdenominasional a kumbension iti ilimi, ket daytoy inramanna dagiti Katoliko, Presbiteriano, Pentecostal, ken dadduma pay. Naimbitaran ti Kangatuan a Pangulo tapno agpalawag bayat dagiti pangserra a paset ti kumbension. Iti panagsiddaaw ti intero a taripnong, imbagana kadakuada, mainayon kadagiti sumagmamano a bambanag, ti panangtulad ti kinamapagpiaran ken dagiti nangato a pangrukodan ti moral dagiti Saksi ni Jehova, ket innayonna a no amin ket kas kadagiti Saksi ni Jehova, addanto kinatalna iti pagilian.
“Iti sumuno nga aldaw dagiti mangidadaulo a miembro dagiti iglesia a nairepresentar iti kumbension dimtengda iti palasio ti Pangulo ket nagprotestada a sibabara a maibusor iti paset ti palawagna a nangidaydayaw kadagiti Saksi ni Jehova ket sinaludsodanda no saanna aya nga ammo a dagiti Saksi ni Jehova ket naiparitda iti dayta a pagilian. Ti Pangulo immanamong ngem imbagana kadakuada nga awan ti nasarakanna a basol dagiti Saksi ni Jehova. Intultuloyna a kinuna: ‘Kadagiti amin a tawtawenko kas Kangatuan a Pangulo, awan uray naminsan a maysa kadagiti Saksi ni Jehova ti naiyeg iti kortek gapu iti nakaro a panagbasol. Iti sabali a bangir, no natakaw ti balinghoy manipud iti talon, kanayon a masukalan a Katoliko ti nagtakaw. No tugi ti natakaw, Presbyteriano ti nangaramid. Dagiti miembro ti iglesiayo ti nangrugit iti dissok iti aborsion, ket kaskasdi nga awan uray maysa a Saksi ni Jehova ti naiyeg iti pangukomak gapu kadagita a panagbasol. Saan kadi nga iparit ti Dios dagita a kinadakes, wenno dagiti iglesia saanda kadin a nasakupan iti linteg ti Dios?’ Awan maisungbat dagiti klero.
“Kamaudiananna, inawagan ti Kangatuan a Pangulo dagiti pannakabagi dagiti Saksi ni Jehova ket imbalakadna kadakuada nga asikasuenda a nalaing ti bagbagida tapno awan pakaibabainan a maiyeg iti nagan ti Diosda ken iti bukodna a nagan kas ti Kangatuan a Pangulo a nagsao para kadagiti Saksi ni Jehova.”
Ti report ibagana nga adu dagiti kabbaro a mangal-ala iti takderda iti kinapudno itatta. Maysa kadagiti Saksi ti nangibaga nga iti nabiit pay isut’ nakairugi iti panagadal ti Biblia kadagiti tallo a papangulo iti dayta a lugar, maysa kadakuada isu ti Kangatuan a Pangulo, ket aminda a tallo ti umat-atender kadagiti gimong dagiti Saksi ni Jehova!
Ni Jehova sipsiputanna dagidiay mangipateg iti kinapudno ken kinalinteg ken agsao maipaay kadagiti adipenna—Mateo 10:42.