Agbalinkayto Aya a Saksi iti Pudno a Dios?
“‘Dakayo dagiti saksik,’ kuna ni Jehova, ‘ket siak ti Dios.’”—ISAIAS 43:12.
1. Apay a rebbeng nga agdayawtayo iti pudno a Dios?
SAKBAY la unay ti ipapatay ni Jesus, ‘intangadna dagiti matmatana idiay langit’ tapno agkararag. Inawaganna Daydiay pagkarkararaganna kas “ti maymaysa a pudno a Dios.” (Juan 17:1, 3) Nainkalintegan laeng, nga adda laeng maymaysa a sibibiag ken pudno a Dios, ti Soberano ti uniberso, ti Namarsua. Gapu ta utangtayo ti kaaddatayo iti pudno a Dios, rebbengna nga ipaaytayo kenkuana ti pammadayaw a pakaikarianna. Kas panangiyebkas ti Apocalipsis 4:11 iti dayta: “Sika ti maiparbeng, Jehova, a Diosmi, nga umawat iti dayag ken ti dayaw ken ti pannakabalin, ta sika pinarsuam dagiti isuamin nga adda, ken gapu iti nakemmo naaddada ken naparsuada.”
2. (a) Aniat’ lohikal a patien maipapan iti pudno a Dios? (b) Kasanot’ pannakikomunikarna kadagidiay tarigagayanda ti agdayaw kenkuana?
2 Lohikal laeng a namnamaen a ti pudno a Dios dinanto pabus-ayan nga agnanayon dagiti dakes a kasasaad a nangdadael iti naindagaan a parparsuana. Ken lohikal met a patien nga agtultuloy a pakaammuanna dagiti managdaydayawna no aniat’ aramidenna ken no ania ti kayatna nga aramidenda sakbay nga ibanagna ti panangdusana. (Amos 3:7) Kasano ti pannakikomunikarna kadagiti agsapsapul ti kinapudno? Us-usarenna dagiti natulok a tattao kas dagiti pannakangiwatna. “‘Dakayo dagiti saksik,’ kuna ni Jehova . . . ‘Awan idi ti nabukel a Dios nga immun-una ngem siak, ket awanto met ti sumaruno kaniak. Siak—siak met laeng ni Jehova, no saan a siak awan ti mangisalakan.’” (Isaias 43:10, 11) Ngem kasano a mabigbig ti maysa a tao dagidiay us-usaren ti pudno a Dios kas dagiti saksina? Kasano nga isuda ken ti mensahena, ti maigiddiat kadagiti managdaydayaw iti dadduma a didiosen?
Maysa a Karit kadagiti Dadduma a Didiosen
3. Ania a karit ti imparuar ni Jehova kadagiti isuamin a dadduma a didiosen?
3 Ni Jehova pinaltiinganna ni Isaias nga ilanad daytoy a karit kadagiti isuamin a didiosen: “Asino kadakuada [dagiti didiosen dagiti nasnasion ken il-ili] ti makabalin a mangipalgak itoy [apagpag-isu a padto]? Wenno mangiparang kadagiti immun-una a bambanag [a mapasamak iti masanguanan] kadatayo? Iyegda [kas didiosen] koma dagiti saksida, tapno [kas didiosen] maibilangda a nalinteg, wenno denggenda [dagiti tattao kadagiti nasnasion] koma ken kunaenda, ‘Isu ti pudno!’” (Isaias 43:9) Gapuna karkariten ni Jehova dagiti amin a didios a pagdaydayawan dagiti tattao tapno paneknekenda a didiosenda. Dagiti saksida ti rebbeng a mamataud iti ebidensia a dagiti didiosenda ti mapagtalkan ken maikari a pagdaydayawan.
4. Kasanotay nga ammo a dagiti didiosen dagiti kadaanan a nasnasion ti awan pategda?
4 Ngem ania ti napataud dagidiay a didiosen ken dagiti managdaydayawda? Maiturongdatayo aya iti pudpudno a talna, kinarang-ay, salun-at, ken biag? Paneknekan ti historia nga adu kadagiti didiosen dagiti kadaanan a nasnasion ti napaneknekan nga awan patpateg ken awan pigsada. Saanda pay a makalasat kas dagiti banag a pagdaydayawan, agsipud ta awanda itatta. Dagiti nagadu a didiosen ti kadaanan nga Egipto, Asiria, Babilonia, Medo-Persia, Grecia, Roma ken dadduma pay a nasnasion napaneknekanda nga ulbod. Addada laeng kadagiti libro iti historia wenno kadagiti museo a sadiay dagiti estatuada ket bambanag laeng a pagusiusuan.
5. Aniat’ mabalin a maisaludsodtayo maipapan kadagiti didiosen iti moderno a tiempo?
5 Kaskasdi, dagiti kadi moderno a didiosen ken dagiti managdaydayawda nasaysayaatda ngem kadagiti kadaanan? Ti Hindu a relihion laengen ti addaan minilmilion a didiosen. Dagiti Buddhista, Katoliko, Confucianista, Judio, Protestante, Shintoista, Taoista, ken adu pay a dadduma ti addaan kadagiti kabukbukodanda a didiosen. Idiay Africa, Asia, ken dadduma pay a lugar, dagiti puersa ti nakaparsuaan, an-animal, ken dagiti bambanag ti mapagdaydayawanda kas didios. Ti nasionalismo ken materialismo, ken uray pay ti bagi ti maysa a tao pinagbalindan a didiosen, gapu ta adu kadagiti tattao ti mangipapaay kadakuada ti kangrunaan a debosionda. Ania a dalan ti panagdaydayaw ti aktualmente a mangirepresentar iti daydiay a nagkuna: “Siak ni Jehova, ket awanen ti sabali. Awan ti Dios no di la sisiak”?—Isaias 45:5.
“Mailasinyonto Ida Gapu kadagiti Bungbungada”
6. Kasanotay a mailasin ti pudno a panagdaydayaw manipud iti ulbod?
6 Impasdek ni Jesus ti mapagpannurayan a pagalagadan a pangilasinan no ania ti pudno wenno ulbod no maipapan iti relihion. Kunana: “Mailasinyonto ida gapu kadagiti bungbungada. . . . Tunggal kayo a nasayaat mangted bungbunga a nasayaat, ngem ti kayo a dakes mangted bungbunga a dakes . . . Tunggal kayo a saan a mangted ti bunga a nasayaat mapukan ket maisungrod iti apuy.” (Mateo 7:16-19) Gapuna, tapno madeterminar ti pudno a Dios manipud kadagiti ulbod, ken dagiti pudno a managdaydayaw manipud kadagiti ulbod, kasapulan a sukimatentayo no ania ti ibungbungada. Dagiti kadi bungbungada ti “nasayaat,” wenno daytat’ “dakes”?
7. Aniat’ kunaen kadatayo ti historia daytoy a siglo maipapan kadagiti relihion daytoy a lubong?
7 Kas pangarigan, asino kadagiti relrelihion ti lubong ti nakaipasdek ti pudpudno a talna iti nagbabaetan dagiti paspasurotda iti intero a daga? Pudno unay, dagiti kamkameng ti pudno a relihion, dagiti naespirituan nga agkakabsat, saanda a rebbeng nga agpipinnatay iti maysa ken maysa. Ngem dagiti sangagasut a milion a tattao ti napappapatayen kadagiti gubgubat iti daytoy maika-20 a siglo, ket amin dagidiay a gubgubat ti sinuportaran dagiti relrelihion daytoy a lubong. Kas resultana, dagiti relihiuso a tattao ti nangpapatay kadagiti dadduma a relihiuso a tattao. Kaaduanna, nangpapatayda kadagiti tattao iti kabukbukodanda a relihion. Dagiti Katoliko pinapatayda dagiti Katoliko, dagiti Protestante pinapatayda dagiti Protestante, dagiti Muslims pinapatayda dagiti Muslims, ken dagidiay adda iti dadduma a relihion sinurotda ti kasta met laeng a dalan.
8. Kasanot’ panagkomento dagiti managpaliiw maipapan iti pannakapaay dagiti relihion iti tiempotayo?
8 Iti maysa nga editorial a napauluan “Ti Kinaranggas a Naaramidan iti Nagan ti Dios,” ni Mike Royko, a kasla kasasaona ti Dios, kinunana maipapan kadagiti relihion daytoy a lubong: “Iyeb-ebkasda ti debosionda kenka babaen ti panagpipinnatayda iti maysa ken maysa iti ginasgasut. Ti kunak pampanunotenda a no ti maysa a dasig matalipuposna ti sabali a dasig, pampaneknekanda a ti wagas ti panagdaydayawda kenka isu ti umiso.” Kinunana a nupay iladladawan ti papa ti bagina a kas mannakikappia a tao, “dagiti paspasurotna ti pagaammoda a nagiparukpok ti sumagmamano milion a galon a dara no pumudot ti uloda.” Kasta met, idi ni pasado a Presidente Carter iti Estados Unidos kunana a “nagmauyongen ti lubong,” kinunana: “Ti napasnek a narelihiusuan a panagrikrikna, nga isut’ rebbeng a mamagkaykaysa kadagiti tattao iti ayat, ti masansan nga agparang a kas paset dayta a kinamauyong ken panagpipinnatay.”
9. Apay a ditay sursuroten dagiti “awan pategna a didiosen”?
9 Dagita awan serserbina a bunga ti kasungani ti masapul a patauden dagidiay agdaydayaw iti pudno a Dios. (Galacia 5:19-23) Gapuna, dagidiay mangsupsuportar kadagiti aggiginnubat a relihion ken dagiti pilosopia ket paset ti ulbod a panagdaydayaw kas ti kinaulbod dagiti kadaanan nga Egipcio, Asiriano, Babiloniano, ken dagiti dadduma pay a kumitkita kadagiti “awan patpategna a didiosen nga umel.” (Habacuc 2:18) Ket no kasano ti pannakatungpal dagiti naimpadtuan a sao ti pudno a Dios iti kadaanan nga ulbod a panagdaydayaw, kasta met iti panawentayo: “Ket dagiti awan pategna a didiosen maikkatdanto a maikisap.” (Isaias 2:18) Mapagtalkan ti pakdaarna: “Dikay subsublian dagiti awan pategna a didiosen.”—Levitico 19:4.
Asino dagiti Mangsaksaksi ken ni Jehova?
10. Dagiti kadi paspasurot dagiti relihion daytoy a lubong saksida a maipaay iti pudno a Dios?
10 Ti saksi a maipaay iti pudno a Dios ket rebbeng a daydiay maysa a mangpampaneknek maipapan Kenkuana. Dagiti kadi paspasurot dagiti relihion daytoy a lubong ti mangar-aramid iti kasta a pammaneknek? Kasano kasansan ti pannakisarsarita dagiti tattao kadagitoy a relihion kadakayo maipapan ti panagdaydayawda? Kaano ti isasarungkarda iti pagtaenganyo tapno paneknekanda ti maipapan ti diosda? Ti karit a pinaruar ti pudno a Dios kadagiti ulbod a didiosen a mangpataud kadagiti saksida ti di pulos naipangpangag. Dagiti tattao kadagiti relrelihion daytoy a lubong ket saanda nga ar-aramiden ti kasta a pammaneknek. Saanda a maibaga kadakayo no asino ti pudno a Dios wenno ania dagiti pangpanggepna. Napaay dagiti kleroda a mangisuro kadakuada ti kinapudno. “Bulsekda a mangidalan kadagiti bulsek. Ket no ti bulsek idalanna ti bulsek, agpadpadadanto a matnag iti abut.”—Mateo 15:14.
11. Asino laeng ti mangpampaneknek iti nagan ti pudno a Dios?
11 Asino dagiti situtulok a mangisakripisio ti panawen, material a kinabaknang, uray pay ti biagda, a mamaneknek a maipaay iti pudno a Dios? Asino ti mangibagbaga kadagiti tattao a kuna ti pudno a Dios: “Siak ni Jehova. Dayta ti naganko”? (Isaias 42:8) Asino ti mangisursuro a “siksika laeng nga agnagan Jehova, ti kangatuan a ringbawam ti amin a daga”? (Salmo 83:18) Idi panawenna, maikuna ni Jesus maipapan iti pudno a Dios: “Impalawagko ti naganmo kadagiti tattao.” (Juan 17:6) Kadagiti panawentayo, dagiti laeng Saksi ni Jehova ti makaibaga iti dayta. Anian a maiyanatup ti naganda—dagiti Saksi ni Jehova!
Pammaneknek Maipapan ti Pagarian
12. Ania a nasken a sursuro ti masapul nga ibaga dagiti pudno a saksi kadagiti dadduma?
12 Mainayon pay iti panangipakpakaammo ti nagan ti pudno a Dios, ania pay nangnangruna, ti ibagbaga dagiti saksina maipapan kadagiti pangpanggepna? Nangted ulidan ni Jesus babaen ti panangisurona kadagiti paspasurotna nga ikararag iti pudno a Dios: “Umay koma ti pagariam.” (Mateo 6:10) Ti nailangitan a Pagarian ti Dios isu ti gobierno nga iti kamaudiananna mangiturayto iti intero a daga. (Daniel 2:44) Dayta ti tema ti panangisursuro ni Jesus. (Mateo 4:23) Agsipud ta ti Pagarian ti kakaisuna a solusion dagiti pakarigrigatan ti sangatauan, ingunamgunamna: “Itultuloyyo, ngarud, a biruken nga umuna ti pagarian ken ti kinalintegna.”—Mateo 6:33.
13. (a) Ania ti ipakita dagiti kinapudno maipapan iti panangaskasaba dagiti Saksi ni Jehova maipapan iti Pagarian ti Dios? (b) Kasano a ti panangaskasaba ti Pagarian ebidensia a ni Jehova ti kakaisuna a Dios ti pudno a padto?
13 Asino itatta ti mangpampaneknek maipapan iti Pagarian ti Dios? Ni Propesor C. S. Braden, a natudio nga estudiante dagiti relrelihion ti lubong, kinunana: “Dagiti Saksi ni Jehova ti literal a sinaknapandan ti daga iti panangaskasabada. . . . Mabalin a maikuna a sipupudno nga awanen ti maymaysa a narelihiusuan a grupo iti lubong a mangiparparangarang ti ad-adda a regta ken pinget iti inda panangisaknap ti naimbag a damag ti Pagarian ngem kadagiti Saksi ni Jehova.” Ngem insuratna dayta ngangngani 40 a tawen ti napalabasen! Itatta ti adayo a dakdakkel a pammaneknek ti Pagarian ti maar-aramiden, ta addan nasursurok ngem sangapulo a daras a kaadu dagiti Saksi itatta! Agarup tallo ket kagudua a milion kadakuada, iti agarup 54,900 a kongregasion iti intero a daga, ti mangpampaneknek ti Pagarian, ket ti bilangda ti sipapardas nga umad-adu. Daytoy nagsayaat a bunga ti pammaneknek a ni Jehova isu ti Dios ti pudno a padto. Isu ti nangipaltiing a ti Anakna, ni Jesus, ti mangipadto maipapan iti tiempotayo: “Daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti isuamin a nasnasion; ket iti kasta umayton ti panungpalan.”—Mateo 24:14; Juan 8:28.
Panangtulad iti Ayat ti Dios
14. Ania a kualidad ti masapul a tuladen dagiti pudno a saksi ti Dios, ket aniat’ kaipapananna no saanda a tuladen dayta?
14 Dagiti pudno a Saksi ti Dios ti masapul a tuladenda ti kangrunaan a kualidadna—ti ayat. “Ti saan nga agayat, saanna nga ammo ti Dios, ta ti Dios isu ti ayat.” (1 Juan 4:8) Pudno unay, “iti daytoy maiparangarang dagiti annak ti Dios ken dagiti annak ti Diablo: Siasinoman a saan nga agaramid ti kinalinteg saan a tao ti Dios, uray ti di agayat ken kabsatna. . . . Agayan-ayattayo; saan a kas ken ni Cain nga iturayan ti dakes ket pinapatayna ni kabsatna.”—1 Juan 3:10-12.
15. Apay a maikunatayo a dagiti Saksi ni Jehova iparparangarangda ti pudpudno nga ayat?
15 Dagiti laeng Saksi ni Jehova ti addaan iti dayta a kita ti ayat. Saanda nga agpaspasakop kadagiti didiosen ti gubat, nasionalismo, ken racismo. Saanda a supsuportaran ti aniaman a panaggugubat daytoy a lubong ket ngarud pulos nga awanda iti kasasaad a mabalinda a suportaran ti panangpapatay kadagiti naespirituan a kakabsatda iti dadduma a paset ti lubong. Isuda ti, kas kinuna ni Jesus, “saan a paset ti lubong” ken ‘imbabadan ti kampilanda.’—Juan 17:14; Mateo 26:52.
16. Kasano a dagiti dadduma tumulongda a mangilasin kadagiti pudno a saksi ti Dios?
16 Maysa a panagsirarak a napauluan “Adu Pay Maipapan Panangikalintegan ti Kinaranggas” kunana: “Di agbalbaliw a tinaginayon dagiti Saksi ni Jehova ti takderda maipapan iti di naranggas a ‘Nakristianuan a neutralidad’ . . . Ti agtultuloy a takderda a maibusor iti serbisio nasional iti aniaman a langana, namilitaran wenno sibilian, ken ti panagkitakitda a mangdayaw kadagiti simbolo iti pagilian ti nangibunga kadagiti adu a tawtawen ti pannakaidardarumda, pannakaibalud, ken panagderraaw kadagiti adu a pagilian . . . Dagiti Saksi, nupay kasta, saanda a pulos a bimmales iti kinaranggas.” Ti pagiwarnakan ti Brazil nga O Tempo kunana: “Nupay nagadu dagiti dadakkel a relihion agraman dagiti propagandada iti amin a paset ti globo, awanen a pulos ti uray maysa nga adda ditoy rabaw ti daga itatta a mangipakpakita iti isu met laeng nga ayat.” Daytoy pudpudno nga ayat, kuna ni Jesus ti mangipabigbig kadagiti pudno a saksi ti Dios. “Gapu itoy mailasindanto a dakayo ti adalak, no adda ayatyo iti maysa ken maysa.”—Juan 13:35.
Ti Pannakaidadanes Parang-ayenna ti Panangasaba
17, 18. Aniat’ nabiit pay a pangarigan ti mangipakita no kasano a ti pannakaidadanes makainayon iti pannakaikaskasaba ti Pagarian?
17 Ti panangidadanes ti mabalin pay nga agbunga iti nalawlawa a panangikaskasaba ti Pagarian. Kas pangarigan, idiay India adda laeng agangay 8,000 a saksi ni Jehova. Kaskasdi, iti nabiit pay naikkan ti nalawa a pannakaipablaak ti nagan ni Jehova ken iti pangpanggepna iti dayta a lugar babaen ti inaramid dagiti 11 nga annak ti Saksi a panangtulad kadagiti Kristiano idi immuna a siglo a nagkuna iti maysa a korte: “Masapul nga agtulokkami a nangnangruna iti Dios ngem kadagiti tao.” (Aramid 5:29) Dagiti ubbing nga Indian ti naikkat manipud eskuelaan gapu iti saanda a panangkanta ti national anthem. Ngem impaulog ti Korte Suprema ti India, kas naimaldit iti Deccan Herald iti Bangalore, nga “awan obligasion iti daytoy a pagilian a kantaen ti National Anthem.” Kinuna ti Korte a dagiti ubbing “impakitada ti umiso a panagraem” ket ti saanda a panagkanta “dina pulos impakita ti aniaman a di panagpasakop.” Immandar ti Korte a dagiti ubbing ti masapul a mapastrek manen iti eskuelaan.
18 Ti isu met laeng a pagiwarnakan ti nagkuna: “Dagitoy nga ubbing dida kinanta ti National Anthem agsipud ta dagiti Saksi ni Jehova imbilangda ti bagbagida kas Kristiano ket debosionadoda nga interamente iti Pagarian ti Dios. . . . Ngarud saanda a makiramraman iti aniaman a napolitikaan nga aramid ti Estado.” Kasta met, impadamag ti The Telegraph ti Calcutta: “Ti tignay dagiti ages-eskuela nga ubbing ti nangiyeg met iti ruar . . . kadagiti Saksi ni Jehova, a daytat’ nagtalinaed a di unay pagaammo iti pagiliantayo agingganat’ nabiit pay.” Wen, ‘daytoy naimbag a damag ti pagarian maikaskasabanto kas maysa a pammaneknek iti isuamin a nasnasion’ sakbay nga umay ti panungpalan.—Mateo 24:14.
Panangurnong kadagiti Saksi Agpaay iti Pudno a Dios
19. Aniat’ masapul nga aramiden dagiti nasingpet-panagpuspusona a tattao no kayatda a daydayawen ti pudno a Dios?
19 Itatta, ti pudno a Dios, a ni Jehova, papampaneknekanna iti ilina ti kinasoberano ken pangpanggepna. Bayat nga iwarwaragawagda ti mensahe a buyogen ti dakdakkel pay a kinapinget, ur-urnongenna ti dumakdakkel a bilang dagiti nasingpet-panagpuspusona a tattao manipud amin a nasnasion a maitimpuyog kadagiti managdaydayawna. (Isaias 2:2-4) Pampanawanda dagiti ulbod a didiosenda ket nagturongda iti panagdaydayaw iti pudno a Dios, kas kadagidiay tarigagayanda a dayawen ni Jehova nawayawayaanda manipud pannakakayaw iti kadaanan a Babilonia, a sadiay aglaplapusanan ti panagdayaw kadagiti ulbod a didiosen.—Isaias 43:14.
20, 21. Apay a naganat unay ti panangpanaw kadagiti ulbod a didiosen itan ket saanda laeng nga agmirmiron?
20 Agbalinkayto aya a saksi maipaay iti pudno a Dios? Alaenyonto aya ti takderyo maipaay ti pudno a panagdayaw ken liklikan ti pannakiraman iti panagbasol iti dara ken moral ken pannakapabasol daytoy a lubong ken dagiti ulbod a didiosenna? Igunamgunam ti Sao ti Dios: “Rummuarkay kenkuana [ti Binababilonia nga ulbod a panagdayaw], O tattaok, tapno dikay mairaman kadagiti basbasolna, ken tapno saanyo nga awaten dagiti saplitna.” (Apocalipsis 18:4) Wen, “rummuarkayo,” agtignay sakbay a naladawen! Dikay tultuladen daydiay lalaki nga, idi napagsaludsodan maipapan iti pilina a relihion babaen iti maysa a magasin a Katoliko, kinunana: “Nalabit maysaak a Miron ni Jehova. Mamatiak unay kadagiti patpatien dagiti Saksi ni Jehova—ngem diak kayat ti mairaman.”
21 Nupay kasta, tunggal tao ditoy daga ti dandanin mairamanda inton dusaen ni Jehova dagiti ulbod a didiosen daytoy a lubong ken dagiti managdaydayawna: “Dagiti didios a dina inaramid ti langlangit ken ti daga, dagitoy mapukawdanto ditoy daga ken iti babaen ti langlangit.” (Jeremias 10:11) Iti dayta awanto dagiti miron. Addanto laengen dagidiay saksi a maipaay iti pudno a Dios ken dagidiay saan. (Mateo 24:37-39; 2 Pedro 2:5; Apocalipsis 7:9-15) Agbalinkayto aya a saksi maipaay iti pudno a Dios? Rebbengna, ta “ti pudno a Dios isu kadatayo ti Dios dagiti makaisalakan nga ar-aramid; ket biang ni Jehova a Soberano nga Apo ti pannakalusot ti patay.”—Salmo 68:20.
Salsaludsod a Pagrepaso
◻ Ania a karit ti imparuar ti pudno a Dios kadagiti ulbod a didiosen?
◻ Babaen iti ania a mapagpannurayan a pagalagadan a mailasintayo ti pudno a panagdaydayaw manipud iti ulbod?
◻ Ania a bunga ti mangipakita a dagiti didiosen daytoy a lubong agbalindanto nga awan patpategna kas kadagiti kadaanan?
◻ Ania a nagsayaat a bunga ti masapul a patauden dagiti saksi a maipaay iti pudno a Dios, ken asino dagiti mangiparparangarang iti dayta?
◻ Apay a naganaten iti panagtignay ita a mangpanaw iti ulbod a panagdayaw?
[Dagiti ladawan iti panid 16]
Ti awan pategna a didiosen dagiti kadaanan a nasnasion nagpukawdan kas bambanag a pagdaydayawan
[Ladawan iti panid 17]
Iti siglotayo agarup sangagasut a milion a tattao ti natnatayen kadagiti gubgubat a sinuportaran dagiti relrelihion daytoy a lubong
[Credit Line]
U.S. Army photo
[Ladawan iti panid 18]
Kuna ni Jesus a dagiti pudno a saksi mailasindanto babaen ti ayatda iti maysa ken maysa