Report dagiti Manangiwaragawag ti Pagarian
Napinget iti Nadiosan a Komisionda
SERIOSO unay dagiti Saksi ni Jehova iti nadiosan a komisionda a panangikasaba ti naimbag a damag ti Pagarian ti Dios. (1 Corinto 9:16; Aramid 20:26, 27) Maysa a pagassawaan idiay Francia nariknada ti puersa daytoy a bilin a mangdanon ti tunggal maysa iti naimbag a damag. Idiay teritoriada adda ti maysa nga otel a mangpadpadagos kadagiti napolitikaan a repuhiado ken kadagiti agtutubo a ganggannaet a trabahador. Inlawlawag ti agassawa: “Pinampanunotmi no kasanot’ pannakastrekmi malaksid no maawiskami iti maysa nga agtataeng sadiay. Gapuna naikeddengmi ti makiam-ammo kadagiti tattao iti ruar ket mabalin a maawiskaminto a mangsarungkar kadakuada iti uneg. Maysa nga agtutubo a lalaki ti sigagagar a nangakseptar kadagiti magasin ket indawatna ti pannakasarungkarna.
“Sinarungkaranmi daytoy agtutubo a lalaki, ket maysa a panagadal ti dagdagus a nairugi. Tunggal sumarungkarkami maysa a gayyemna ti simmango, ngem saan a pulos a nagtagtagari ti gayyemna. Idi, iti panagpatingga ti maikadua a panagadalmi, insaludsodmi no kayatna met ti makaammo ti ad-adu pay maipapan iti Sao ti Dios, insungbatna: ‘Apay a saan?’ Gapuna narugian ti maikadua a panagadal. Inawismi ida kadagiti panaggigimong manipud iti damo, ket saanda pay a limmanglangan iti maysa nanipud idin. Ti irarang-ayda ti nakadkadlaw, nangnangruna idiay hostel, ta idiay insigida a rinugianda metten nga isarsarita dagiti bambanag a maad-adalda, a nangibunga ti pannakairugi ti maikatlo a panagadal iti maysa a pagassawaan. Maysa nga aldaw ti intero a grupo ti addada idiay ruangan, a sisasaganadan a pumanaw a mapan iti paggigimongan, idi sabali manen a gayyem ti naikeddengna ti sumurot met. Daytoy a babai ti entusiastiko unay ket kayatna a ti nobiona maammuanna met amin dayta. Isuda a dua ti nangrugi met a makipagad-adalen.
“Agingga iti lima a panagadal ti agdama a maikonkondukta. Tunggal maysa ti kasla maysa a panaggigimong! Tunggal maysa ti tumabuno iti panagadal ti maysa, ket dagiti kabbaro met iti makitimtimpuyogen. Pagsasaritaanda amin maipapan ti kinapudno, ket kas resultana, narugian ti maikanem a panagadal iti sabali a lalaki, a rinugianna metten ti makigimgimong ken mangaskasaban iti nobiana.
“Siempre, amin daytoy ket maysa a nakaskasdaaw a pammaneknek idiay hostel. Saan a nalaka para kadagitoy nga agtutubo ti panangikawesda ti baro a personalidad. Masapul a parmekenda ti panagsigarilio, alkoholismo, kinaranggas, nalulok a moral, ken ti dakes a pannakikadkadua. Siniguro ni Satanas a dagiti dati a gagayyemda lappedanna ti irarang-ayda, nga allukoyenda ida nga agsigarilio manen wenno maaddaan kadagiti naariwawa a panagragragsak. Maysa kadagiti interesado a lalaki ti naitulag iti maysa a babai a naitimpuyog iti maysa a kulto. Pinadpadas ti babai nga iyadayo ti nobiona manipud iti kinapudno. Nupay kasta, iti agangay ti babai ti nangrugi metten a makipagad-adal ket nanipud idin nakaaramiden ti nasayaat a panagrang-ay.
“Sigun iti kaudian a damag,” kuna ti pagassawaan, “maysa kadagiti agtutubo a lalaki ti naibalud gaput’ takderna iti neutralidad. Iti kurang pay ngem maysa a tawen, innem dagiti nabautisaran, lima kadakuada ti insigida a simrek iti serbisio a panag-auxiliary payunir. Iti intero a grupo, innem itan ti regular payunir, a ti kalatda isut’ panagbalinda kas espesial payunir.”
Anian a nagbaknang ti pannakagunggona daytoy a pagassawaan gaput’ pingetda a panangitungpal ti nadiosan a komisionda a mangsapul kadagiti kimmarnero! Pudno unay a binendisionan ni Jehova ti matalek a panagreggetda. Numan pay awanantayo ti kasta a naisalsalumina a kapadasan, kanayontay koma a tarigagayan nga aramiden ti nadiosan a komision a panangikasaba ti naimbag a damag ti Pagarian.—Mateo 24:14.
[Ladawan iti panid 21]
Ti agasawa idiay Francia a kadua dagiti innem a regular payunir