Kababalin a Mangarkos ti Sursuro ti Dios

Iti nabiit pay, ti mangipappapagna iti kompania idiay Caracas, Venezuela, inturongna ti maysa a surat kadagiti panglakayen ken ministerial nga ad-adipen iti kabangibang a kongregasion dagiti Saksi ni Jehova. Iti dayta insuratda: “Nakaawatkami ti nagsayaat a reperensia maipapan kadagiti tattao iti relihionyo maipapan ti panangawatda ti responsabilidad ken ti kinamapagpiaranda. Gapu itoy a rason nga umas-asidegkami kadakayo itatta. Gapu iti agdama a kinakurangmi kadagiti personel, addaankam iti naganat a pannakasapul ti dua a tattao a mangpunno kadagiti sumaganad a posision: maysa agbalin a tsuper ken daydiay maysa agbalin a manedyer iti bodega. Apresiarenmi unay ti aniaman nga impormasion a maitedyo maipapan iti siasinoman nga adda iti kongregasionyo wenno iti asideg kadakayo. Talaga nga awan tarigagaymi a mangala kadagiti di Saksi a trabahador. Pangngaasiyo, ta pakaammuandakami uray no awan ti mabalin, ta urayenmi ti sungbatyo sakbay nga agaramidkami iti aniaman a desision.”

Kalpasan ti pannakakita iti surat iti sirok ti ruangan ti Kingdom Hall, maysa kadagiti panglakayen ti kongregasion ti simmarungkar iti makinkua ti kompania a mapagsasaritaan. Ti makinkukua naaddaanen pannakilangen kadagiti Saksi ni Jehova kadagiti napalabas a 15 a tawen ket malaglagipna nga awan dagiti serioso a problemana kadagiti empleadona a Saksi. Tinukoyna ida kas serioso, responsable, nasingpet, ken nagagaget a managtrabaho. Sana innayon: “Ammok a dikay ipalubos dagiti managdakdakes, ken ilaklaksidyo ida. Ipakita dayta a ti kongregasionyo dida kayat ti agbalin a kakumplot dagiti kakasta.”

Ti kasta a kababalin arkosanna ti sursuro ti Dios. (Tito 2:10) Daytat’ resulta ti pudpudno a tarigagay a mangsalimetmet a siinget kadagiti moral a prinsipio a naibalabala idiay Biblia.