Agtultuloy a Sipipinget nga Agturong iti Kalat!
Dagiti Tampok Manipud kadagiti Taga Filipos
KAYAT ni apostol Pablo a dagiti Kristiano idiay Filipos agtultuloyda a sipipinget nga agturong iti kalat a maipaay iti gunggona ti biag nga awan inggana. Gapuna, sinuratanna ida idi agarup 60 wenno 61 K.P., bayat ti umuna a pannakaibaludna idiay Roma. Naipatulod ti suratna iti maysa a kongregasion nga impasdekna iti agarup sangapulo a tawen a nasapsapa idiay Filipos, maysa a siudad nga imbangon ni Felipe ti Macedon (ama ni Alejandro a Dakkel). Idi umuna a siglo K.P., daytat’ nagbalinen a “kangrunaan a siudad ti distrito ti Macedonia,” nga itan ket paset ti umamianan a Grecia ken umabagatan a Yugoslavia.—Aramid 16:11, 12.
Dagiti manamati a taga Filipos napapanglawda ngem managparaburda. Nasursurok ngem naminsan, nagipatulodda kadagiti kinasapulan ni Pablo. (Filipos 4:14-17) Ngem ti suratna ket ad-adda pay ngem basta panagyaman laeng. Daytat’ nangted met ti pammaregta, nangiyebkas ti ayat, ken nangted pammalakad.
Nabatad dagiti Nakristianuan a Kualidad
Nanglukat ti surat ni Pablo a nabatad ti ayatna kadagiti manamati idiay Filipos. (1:1-30) Nagyaman ken Jehova gaput’ tulongda iti panangiyadelantar ti naimbag a damag ken indawatna a dumakkel koma ti ayatda. Maragsakan ni Pablo a ti pannakaibaludna ti nangtignay kadakuada a mangipakita ti ‘ad-adda pay a tured nga agsao ti sao ti Dios nga awan butbutengna.’ Tinarigagayannat’ makipagnaed ken Kristo ngem patienna nga isut’ makapagserbi pay kadakuada. Tinarigagayan met ni Pablo nga agtultuloyda iti “pannakidangadang a maipaay ti pammati iti naimbag a damag.”
Sumaganad immay ti balakad maipapan iti kababalin ken ug-ugali. (2:1-30) Naparegta dagiti taga Filipos a mangipakita ti personal nga interes kadagiti sabsabali ken mangipamatmat iti kinapakumbaba kas ken Kristo. Isuda komat’ “aglawag a kasla silsilaw iti lubong” ket naigunamgunam a “petpetanda a siirut ti sao ti biag.” Ninamnama ni Pablo nga ibaon ni Timoteo kadakuada ket nagtalek nga uray isu ket umayto met iti saan a mabayag. Tapno ipasigurona kadakuada ti maipapan ken Epafrodito, a nagsakit ti nadagsen, ni Pablo ibaonna kadakuada daytoy nasungdo nga adipen.
Agtultuloy a Sipipinget nga Agturong iti Kalat
Sumaganad impakita ti apostol kadagiti taga Filipos no sadinot’ pangisaadanda ti panagtalekda bayat nga agtultuloyda nga agturong iti kalat. (3:1-21) Rebbeng a daytat’ maisaad ken Jesu-Kristo, saan nga iti lasag wenno iti panagkugit kas ar-aramiden dagiti dadduma. Imbilang ni Pablo dagiti linalasag a kredensialna kas rugit “gapu iti napateg unay a pannakaammo ken Kristo.” Ti apostol ‘agtultuloy a sipipinget nga agturong iti kalat maipaay ti gunggona ti natan-ok a panangawis ti Dios gapu ken Kristo Jesus” ken pinaregtana dagiti taga Filipos a maaddaan ti isu met laeng a kapanunotan.
Ti panangiyaplikar ti pangserra a balakad ni Pablo matulonganna dagiti taga Filipos nga agtultuloy a mangmatmat iti kalat ken gunggona. (4:1-23) Inggunamgunamna kadakuada nga itaklindat’ dandanagda iti Dios babaen iti kararag ken punnuen ti is-isipda kadagiti makaay-ayo a pampanunot. Kinomendaran manen ni Pablo ida iti kinamanagparaburda ket nagpatingga babaen kadagiti kablaaw ken tarigagay a sapay koma ta maadda ti di kaikarian a kinamanangaasi ni Apo Jesu-Kristo iti espiritu nga iparparangarangda.
Ti surat ni Pablo kadagiti taga Filipos itandudonat’ kinamanagparabur, ayat, ken kinapakumbaba. Daytat’ mamaregta iti panagtalek ken Kristo ken naimpusuan a karkararag iti Dios. Ken sigurado a dagiti sasao ni Pablo matulonganda dagiti Saksi ni Jehova nga agtultuloy a sipipinget nga agturong iti kalat maipaay iti gunggona a biag nga awan inggana.
[Kahon/Ladawan iti panid 25]
Agturong iti Kalat: “Idinto a lipatek dagiti malikudan ken kamakamek dagiti masanguanan,” insurat ni Pablo, “agtarayak a sipipinget nga agturong iti kalat maipuon ti gunggona ti natan-ok a panangawis ti Dios gapu ken Kristo Jesus.” (Filipos 3:13, 14) Ti apostol ket nakapingpinget kas maysa a makilumlumba. Saanna a sinayang ti panawen ken pigsana babaen iti itataliawna no di ket sipipinget a nagturong iti kalatna—kas ti lumulumba nga iyibusnat’ pigsana tapno magtengnat’ pagpatinggaan. Para ken Pablo ken dadduma a napulotan a Kristiano, ti gunggona isut’ nailangitan a biag babaen ti panagungar kalpasan a mairingpasdat’ naindagaan a kurso iti kinamatalek iti Dios. Nailangitan man wenno naindagaan ti namnamatayo, salimetmetantayo ti kinatarnawtayo ken Jehova ken agtultuloy a sipipinget nga agturong iti kalat kas dagiti Saksina.—2 Timoteo 4:7.