Salimetmetan ti Pammati iti Dios ken ni Kristo
Dagiti Tampok Manipud Taga Colosas
TI PAMMATI ken Jehova a Dios ken ni Jesu-Kristo nasken iti pannakaisalakan. Ngem ti panangsalimetmet ti kasta a pammati ket maysa a karit. Pudno a kasta kadagiti Kristiano idiay Colosas, maysa a siudad iti daya ti Efeso idiay Asia Minor. Apay? Ngamin ta dagiti ulbod a mannursuro sadiay sibibiddut a kunkunada a ti pannakaisalakan ket agpannuray iti pannakakugit, no aniat’ kankanen ti maysa, ken ti panangsalimetmet kadagiti dadduma pay nga annongen.
Ngarud, kaawatan, no apay a maseknan ni apostol Pablo maipapan iti naespirituan a pagimbagan dagiti Kristiano idiay Colosas, ket pudno a kayatna a mataginayon ti pammatida iti Dios ken ni Kristo. Gapuna idi arinunos ti umuna a pannakaibalud ti apostol idiay Roma (agarup 60-61 K.P.), nagsurat kadagiti taga Colosas iti nairanta a mangkontra kadagiti di umiso a panangmatmat ken tapno pabilgen ti pammatida. Kitaentayo no kasano a magunggonaantay met manipud kadagiti naayat a sasaona.
Patgen ti Sasaaden ni Kristo
Iti pangrugian ti suratna, intampok ni Pablo ti panangipateg iti saad ni Jesus. (1:1–2:12) Kinomendaranna dagiti taga Colosas gaput’ pammatida ken Kristo ken ayatda kadagiti kapammatianda. Insitar ni Pablo ti kinatan-ok ni Kristo kas Daydiay babaen kenkuana naparsua dagiti isuamin a bambanag, ti Ulo ti kongregasion, ken ti inauna manipud kadagiti natay. Ti pannakikappia iti Dios maibanag baeten ken Kristo, nga isut’ nakailemmengan dagiti isuamin a gameng ti sirib ken pannakaammo. Gapu amin kadagitoy, rebbeng a dagiti Kristiano agtultuloyda a magna a makitunos ken Kristo ket awan koma ti mangkayaw kadakuada kadagiti natauan a pilosopia.
Baeten ken Kristo, inwalin ti Dios ti Linteg iti dalanda. (2:13-23) Daytat’ piguratibo a nailansa iti kayo a nakatayan ni Jesus. Dagiti al-alagaden ti Linteg isudat’ “anniniwan [laeng] dagiti bambanag nga umay, ngem ti bagi kukua ni Kristo.” Babaen ti ikakapet a sipipigsa ken Kristo, saanda a palubosan ti asinoman a tao a mangpukaw ti gunggonada nga imortal a biag sadi langit.
Ipateg ti Dios ken ni Kristo
Sumaganad inggunamgunam ni Pablo kadagiti taga Colosas nga ikawesdat’ baro a personalidad ken agpaiturayda iti pannakabalin ni Jesu-Kristo. (3:1-17) Babaen ti panamagtalinaeddat’ is-isipda kadagiti bambanag nga adda sadi ngato, ipangpangrunadanto dagiti naespirituan nga intereses iti biagda. Kinasapulan daytoy ti panangiwaksida kadagiti di umiso a kababalin ken sasao. Anian pannakabendisionda no ikawesda dagiti kualidad kas ti puso a naasi, kinapakumbaba, ken ti ayat! Ti talna ni Kristo agari iti puspusoda no aramidenda amin iti nagan ni Jesus, nga agyamanda iti Dios baeten kenkuana.
Ti panangipateg ken ni Jehova a Dios ken ni Jesu-Kristo rebbeng nga impluensiaanna met ti relasion dagiti Kristiano kadagiti dadduma. (3:18–4:18) Dagiti assawa a babbai ken lallaki, dagiti annak, dagiti ad-adipen, ken dagiti appo masapul a tungpalenda dagiti annongenda buyogen ti panagbuteng iti Dios ken panangbigbig ken Kristo. Ken anian a nesesita nga agtalinaed iti kararag ken magna iti kinasirib!
Ti surat ni Pablo kadagiti taga Colosas tulongannatayo a mangliklik kadagiti ulbod a sursuro a mangipaidam kadatayo ti gunggona ti biag. Ti panangipaganetget ti apostol iti panangbigbig ti kinaturay ni Jehova ken ti Anakna addaan nasayaat nga impluensia iti pannakilangentayo kadagiti dadduma. Ken maipasiguro kadatayo dagiti nabaknang a bendision no salimetmetantay ti pammati iti Dios ken ni Kristo.
[Kahon/Ladawan iti panid 26]
Surat iti Laodicea: “Inton daytoy a surat naibasan kadakayo,” insurat ni Pablo kadagiti taga Colosas, “ipabasayo met idiay kongregasion dagiti taga Laodicea ket basaenyo met ti surat nga aggapu idiay Laodicea.” (Colosas 4:16) Ti Laodicea ket maysa idi a nabaknang a siudad idiay lumaud nga Asia Menor, a naisilpo babaen kalkalsada kadagiti siudad kas ti Filadelfia ken Efeso. Mabalbalin, a ti trabaho ni Pablo idiay Efeso nakadanon agingga idiay Laodicea, nupay saan a nagserbi idiay. Isut’ nangipatulod ti surat kadagiti Kristiano a taga Laodicea, nupay patien dagiti dadduma nga eskolar a daytat’ kapareho daydiay insuratna kadagiti taga Efeso. Ti surat idiay Laodicea saan a masarakan iti Biblia, nalabit gapu ta saan a naglaon kadagiti impormasion a kasapulantayo itatta, wenno nalabit inulit laeng dayta dagiti punto a nawadwad pannakasaklawnan kadagiti dadduma a kanonikal a sursurat.
[Ladawan]
Dagiti Dadael idiay Laodicea