Ti Kaiyulogan Dagiti Damdamag
Ruangan iti Napalabas a Biag?
Sumagmamano a bulan ti napalabasen tallo nga elementaria- ken tersero-año ti haiskul a babbai ti nasarakan nga awan puotna iti maysa a kalsada idiay Tokushima, Japan, resulta ti inranta a panagsusaid. Aniat’ nakatignay ti aramidda? Kuna ti Asahi Shimbun: “Patienda nga isudat’ reinkarnasion dagiti prinsesa idi ugma ken inallukoydat’ bagbagida a mabalinda a masirip ti napalabas a biagda no madanonda ti maysa a punto iti dandani nga ipapatay.” Iti likudan daytoy a pasamak, kuna ti pagiwarnak, isu “ti tendensia kadagiti ubbing nga agturong iti lubong ti okulto, [nga] agsaksaknap iti kalalaingannan kadagiti napalabas a sumagmamano a tawen.” Dagiti babbai napasnekda a managbasa kadagiti komiks a mangitamtampok ti reinkarnasion.
Ti panangakseptar iti ideya ti reinkarnasion, nupay kasta, ket kas kinaawan-serserbina kas ti pannakaipasango iti ar-arapaap iti maysa a disierto. Kunaen ti Biblia nga iti ipapatay ‘ti tao agsubli iti dagana, ket iti dayta met la nga aldaw dagiti pampanunotna mapukawda.’ (Salmo 146:4) Daytoy a kinapudno maipapan iti ipapatay ket inabbungotan ti makaallilaw a sursuro a ti kararua agtultuloy a sibibiag kalpasan ti ipapatay ti tao. Imbes nga isursuroda a dagiti tattao addaanda ti imortal a kararua, kuna ti Biblia a ti kararua ket matay. (Ezequiel 18:4) Ngem kadagidiay nga adda iti lagip ti Dios, adda ti dakkel a namnama ti panagungar. (Juan 5:28, 29) Ibutaktak met ti Biblia ti kangrunaan a manangiyusuat kadagiti doktrina ti imortal a kararua ken reinkarnasion; isu ni Satanas a Diablo, “ti ama ti kinaulbod.”—Juan 8:44; idiligyo ti Genesis 3:4.
Dagiti Katoliko ken ti Aborsion
Ngangngani maysa a dekada ti napalabasen nanipud iti reperendum ti aborsion idiay Italia a nakaabakan ti Iglesia Katolika. Nupay kasta, iti dokumento a nabiit pay nga inruar dagiti obispo nga Italiano, ti herarkia Katolika itudtudona manen a “ti panagmadi a mangaramid ti aborsion wenno uray tumulong laeng iti dayta buklenna ti maysa a nadagsen a moral nga obligasion, a nairamut iti linteg a naisurat iti puso ti tunggal tao ken pinatalgedan ti simbaaan babaen kadagiti linlintegna, a mangdusa babaen ti ekskomunikasion dagiti Kristiano nga agparegreg wenno tumulong iti dayta.”
Aniat’ pampanunot dagiti Italiano maipapan ti aborsion? Ti nabiit pay a surbey a ramanenna ti 2,040 a tattao ipalgakna a kontra kadagiti dikta ti simbaan, an-anamongan dagiti Italiano ti aborsion kadagiti uppat a situasion. (1) No ti sikog pagpeggadenna ti biag ti ina, 83 porsiento ti pabor iti aborsion. (2) No adda risgo ti pannakadisporma ti sikog, 76.3 porsiento ti pabor a pagpatinggaenen ti panagsikog. (3) No ti salun-at ti babai nakarisgo, 71.1 porsiento ti pabor iti aborsion. (4) No ti panagsikog ket bunga ti pannakarames, 55.2 porsiento ti umanamong a rebbeng mapalubosan ti aborsion. Nasurok a 1 nga Italiano kada 4 ti pabor iti aborsion “kadagiti amin a situasion no daytat’ tarigagayan ti babai,” kuna ti La Repubblica. Ti napattapatta a 300,000 a legal ken di legal nga aborsion ti maar-aramid kada tawen idiay Italia.
Nalawag a kadagita a nasinged a bambanag, ti herarka Katolika saan a nakaited kadagiti paspasurotna ti nawadwad a Nainkasuratan a pannursuro a mangala ti panagtulnogda. Nupay kasta, dagiti pudno a Kristiano nasursuruanda no aniat’ kuna ti Kasuratan iti daytoy nasken unay a tema. Kas panagraem kadagiti nangato a pagannurotan ti moral ti Biblia, saanda nga agparparegreg iti uray aniaman kadagiti uppat a situasion a naisalaysay iti ngato.—Exodo 21:22-25; kitaenyo met ti Salmo 139:14-17; Jeremias 1:5.