“Dikay Maupay nga Agaramid ti Naimbag”
Dagiti Tampok Manipud Maikadua a Tesalonica
TI PANNAKASEKNAN ni apostol Pablo kadagiti Kristiano idiay Macedonia a siudad ti Tesalonica ti nangtignay kenkuana nga isurat ti maikadua a suratna kadakuada, idi agarup tawen 51 K.P. Dadduma iti kongregasion di umiso nga ibagbagada a ti kaadda ni Jesu-Kristo asidegen. Nalabit uray ti maysa a surat a di umiso a naipabiang ken Pablo ket naipatarus a mangipampamatmat a “ti aldaw ni Jehova” dimtengen.—2 Tesalonica 2:1, 2.
Ti panagpampanunot ngarud ti sumagmamano a taga Tesalonica masapul a mabaliwan. Iti maikadua a suratna, kinomendaran ni Pablo ida gapu iti dumakdakkel a pammatida, ti rumangrang-ay nga ayatda, ken ti matalek a panagibturda. Ngem impakitana met nga umay ti apostasia sakbay ti kaadda ni Jesus. Gapuna mapasungadan dagiti panawen a narigat, ket ti surat ti apostol tulonganna ida a mangipangag iti pammagbagana: “Dikay maupay nga agaramid ti naimbag.” (2 Tesalonica 3:13) Ti sasao ni Pablo tulongannatay met iti isu met laeng a pamay-an.
Ti Pannakaiparangarang ken Kaadda ni Kristo
Nagsao nga umuna ni Pablo maipapan ti bang-ar manipud pannakaparparigat. (1Te 1:1-12) Daytoy ti umay “inton maiparangarang ni Apo Jesus nga aggapu sadi langit agraman kadagiti napipigsa nga anghelna.” Kalpasanna umayton ti agnanayon a pannakapukaw kadagidiay di agtulnog iti naimbag a damag. Makaliwliwa a laglagipen daytoy no agsagsagabatayo ti rigat manipud kadagiti ima dagiti manangidadanes.
Sumaganad, intudo ni Pablo a “ti tao ti kinakillo” maipanayagto sakbay ti kaadda ni Kristo. (2:1-17) Dagiti taga Tesalonica saanda koma a pariribuk iti aniaman a mensahe a mangisingsingasing a “ti aldaw ni Jehova” addan kadakuada. Umuna, dumteng ti apostasia ket ti tao ti kinakillo maiparangarangton. Kalpasan dayta, ni Jesus ti mangikisapton kenkuana, nga aramidenna dayta iti pannakaiparangarang ti kaaddana. Kabayatanna, inkararag ni Pablo a ti Dios ken ni Kristo liwliwaenda ti puso dagiti taga Tesalonica ken “patibkerenna koma ida iti isuamin nga aramid ken sao a naimbag.”
Pannakilangen kadagiti Nagulo
Kadagiti dadduma pay a sasao ni Pablo nairaman dagiti bilin maipapan iti pannakilangen kadagiti nagulo a tattao. (3:1-18) Inyebkasna ti panagtalekna a papigsaen ti Apo dagiti taga Tesalonica ken ispalenna ida manipud iti managdakdakes, a ni Satanas a Diablo. Ngem masapul a mangalada kadagiti addang nga agpaay iti bukodda a naespirituan a pakagunggonaan. Masapul a pagtalawanda dagidiay nagulo wenno saan a naurnos a tattao, dagidiay makibibiang kadagiti bambanag a saanda a pakaseknan ken madi nga agtrabaho. “No adda madi nga agtrabaho,” kuna ni Pablo, “di met koma mangan.” Dagita a tattao matandaanda, ket awan koma ti pannakikadkadua kadakuada, nupay mabagbagaanda kas kakabsat. Dagiti matalek a Kristiano a taga Tesalonica saanda koma a maupay nga agaramid ti naimbag, ket tinarigagayan ni Pablo a ti di kaikarian a kinamanangaasi ni Apo Jesu-Kristo agtaeng koma kadakuada amin.
Ti maikadua a surat ni Pablo kadagiti taga Tesalonica mangted pammasiguro kadagiti Saksi ni Jehova a dumteng ti pakabang-aran manipud rigrigatda inton ni Kristo ken dagiti anghelna iyegda ti ibabales kadagidiay di agtulnog iti naimbag a damag. Makapapigsa met ti pammati a maammuan a “ti tao ti kinakillo” (ti klase klero ti Kakristianuan) ken amin nga ulbod a relihion dandanidan mamingga. Kabayatanna, ipangagtay koma ti pammagbaga ni Pablo a di maupay nga agaramid ti naimbag.
[Kahon/Ladawan iti panid 23]
Sipapardas nga Aggunay ti Sao ni Jehova: “Ikarkararagandakami,” insurat ni Pablo, “tapno ti sao ni Jehova aggunay a sipapardas [wenno, “agtaray”] ken madaydayaw a kas met maaramid kadakayo.” (2 Tesalonica 3:1; Kingdom Interlinear) Insingasing dagiti dadduma nga eskolar a ti apostol tuktukoyenna dagiti tumataray a sipepegges nga agtartaray iti lumba. Idinto nga awan paniguruan dayta, kiniddaw ni Pablo ti karkararag dagiti Kristiano a taga Tesalonica tapno isu ken dagiti katrabahuanna maisaknapda koma ti sao ti kinapudno a sigaganat ken awan pakalaplapdan. Gapu ta sungsungbatan ti Dios ti kakasta a kararag, ti saona “agtaray a sipepegges” bayat a ti naimbag a damag maikaskasaba a sigaganat kadagitoy maudi nga al-aldaw. Ti sao ni Jehova “maidayaw,” nga ipatpateg unay dagiti manamati kas “pannakabalin ti Dios a maipaay ti pannakaisalakan,” kas met kadagiti taga Tesalonica a nangawat iti dayta. (Roma 1:16; 1 Tesalonica 2:13) Anian a ragsaktayo ta ti Dios binendisionanna dagiti manangiwaragawag ti Pagarian ken sipapardas a parparang-ayennat’ ranggo dagiti managdaydayawna!—Isaias 60:22.