Sungbatan Kadi ti Dios Dagiti Kararagyo?
“DIAK pay pulos narikna ti ragsak ti pannakasungbat dagiti kararagko,” kuna ti maysa a babai nga agnanaed idiay Hokkaido, Japan. Iti daytoy a banag isut’ di agmaymaysa. Adu a taot’ mangpanunot a di pulos nasungbatan dagiti kararagda. Kinapudnona, amangan no agpampanunotkayo no sungbatan met la ti Dios dagiti kararagyo.
Minilion dagiti mangiturong iti di mabilang a kararag kadagiti nakaad-adu unay a didiosen. Apay a kasla adu a kararag ti di masungbatan? Tapno maammuantayo, usigentayo pay nga umuna dagiti kita ti kararag a maidatdatag.
Aniat’ Ikararag dagiti Dadduma?
Bayat ti Baro a Tawen, dua a kakatlo ti populasion ti Japan, wenno agarup 80 milion a tattao, ti agkararag kadagiti altar a Shinto wenno templo a Budhista. Mangtedda kadagiti sinsilio kas datdaton ken agkararagda maipaay iti naimbag a gasat ken talged ti pamilia.
Iti Enero ken Pebrero—kasakbayan la unay ti makabannog nga eksamen iti iseserrek kadagiti nalatak a kolehio—agdudupudop dagiti estudiante kadagiti templo kas iti maysa idiay Tokyo nga agdindinamag gapu iti diosna iti panagadal. Isuratda dagiti tarigagayda kadagiti kayo a kuadro a pagkararagan ket ibitinda ida kadagiti bislak iti aglikmut dagiti templo. Saan a kumurang ngem 100,000 kadagitoy a kayo a kuadro ti nangarkos kadagiti paraangan ti nalatak a templo idiay Tokyo bayat ti panawen ti panageksamen iti 1990.
Adu a kararag ti mangiraman iti salun-at. Iti maysa a templo idiay Kawasaki, Japan, agkararag dagiti tattao maipaay iti salaknib maibusor iti AIDS. “Ti kinapateg ti panagkararag maibusor iti AIDS,” inlawlawag ti padi ti templo, “a ta daytat’ mangpaannad kadagiti tattao iti kababalinda.” Ngem kasta laeng kadin ti kararag?
Iti sabali pay a templo, maysa a baket ti nagkararag maipaay iti “kellaat nga ipapatay.” Apay? Gapu ta kayatna a liklikan ti panagsagaba iti napaut a sakit ket dina tinarigagayan ti agbalin a dadagsen ti pamiliana.
Iti maysa a maaw-awagan Kristiano a pagilian, ti lider ti maysa a bunggoy ti football ti nagkararag maipaay ti panangabak ti grupoda ken salaknib manipud pannakadangran. Dagiti Katoliko idiay Poland agkararagda maipaay iti personal a pagimbaganda ken arkosanda ni Madonna iti alahas no pagarupenda a nasungbatan dagiti kararagda. Adu a tattao ti agrarana kadagiti simbaan kas iti nalatak a Guadalupe idiay Siudad ti Mexico, ken Lourdes, Francia, tapno agkiddawda maipaay kadagiti namilagruan a pannakaagas.
Iti Daya man wenno Laud, mangidatag dagiti tattao kadagiti kararag maipaay kadagiti adu ken nagduduma a personal a rason. Nabatad, kayatda a masungbatan ken maimdengan dagiti kararagda. Nupay kasta, nakapapati kadi ti panangnamnama nga amin a kararag ti siaanamong a masungbatan? Kumusta ngay dagiti bukodyo a kararag? Masungsungbatanda kadi? Kinapudnona, talaga kadi a sungbatan ti Dios dagiti kararag?