“Ti Naayat a Kinamanangaasina ket Nabileg”

KAS INSALAYSAY NI JOSÉ VERGARA OROZCO

Ipagarupyo kadi a ti biagyo ket mapno iti baro a pakagutugotan iti tawen a 70? Kasta ti biagko. Ket daytat’ nasurok a 35 a tawen ti napalabasen.

Babaen naayat a kinamanangaasi ni Jehova, nanipud 1962, nagserbiakon kas maysa a regular payunir, ket manipud 1972, maysaakon a manangaywan idiay El Carrizal a Kongregasion dagiti Saksi ni Jehova iti estado ti Jalisco, Mexico. Bay-andak a mangisalaysay bassit iti naglabasko.

NAIYANAKAK idiay estado ti Michoacán, idiay Mexico, idi Agosto 18, 1886. Ni tatangko met maysa a Mason, gapuna a ti pamiliami ket saan a makimismisa iti Iglesia Katolika, ket saankami met a nakipaset kadagiti aniaman a Katoliko a relihiuso a rambak wenno naaddaan aniaman a relihiuso a ladawan idiay balaymi.

Idi 16 ti tawenko, pimmanaw ni tatangko tapno agtrabaho idiay Estados Unidos, ngem isut’ nangiyurnos iti maysa a tao a mangisuro kaniak iti maysa a trabaho. Dua a tawen kalpasanna, nupay kasta, intugotnak dayta a tao idiay Siudad ti Mexico para iti panagsanay iti maysa a pagadalan ti soldado. Kalpasanna inrugik ti maysa a karera iti armada ti Mexico.

Iti Armada ken Kalpasanna

Nakirupakak iti Mexicano a Rebolusion a nangrugi idi 1910. Aminkami nga agtutubo a lallaki idiay pagadalan sinuportaranmi ni Francisco I. Madero, maysa a rebolusionario a bumusbusor iti kinadiktador ni Porfirio Díaz. Tinulonganmi ni Madero agingga iti ipapatayna idi 1913, ket kalpasan dayta, sinuportaranmi ni Venustiano Carranza, a nagserbi kas presidente ti Republika manipud 1915 aginggat’ 1920. Naawagankami ti Carranzistas.

Iti uppat a nagduduma a gundaway, pinadasko, buyogen di panagballigi, ti pumanaw manipud iti armada. Kamaudiananna pimmanawak ket nagbalinak a pugante. Kas nagbanaganna, ni tatangko, a nagsublin idiay Mexico, ket naibalud. Maysa nga aldaw, nagpammarangak a kaanakanna, isut’ binisitak idiay pagbaludan. Nagsaritakami babaen ti panagsinnuratmi kadagiti babassit a rigis ti papel tapno saandakami a mangngeg dagiti guardia. Tapno di matakkuatan ti asinoman no siasinoak, kinnanko ti papel.

Kalpasan a naparuar ni tatangko idiay pagbaludan, sinarungkarannak ket kiniddawna a sumukoak kadagiti agtuturay. Simmukoak, ket iti pannakaklaatko dinak tiniliw ti agturturay a heneral. Imbes ketdi, insingasingna nga umakarak idiay Estados Unidos. Sinurotko ti singasingna ket naggianak idiay manipud 1916 aginggat’ 1926.

Idi 1923, nangasawaak iti maysa a Mexicana nga aggigian met idiay Estados Unidos. Nasursurok ti maysa a trabaho iti panangibangon iti patakder, ket nangtarakenkami iti maysa nga ubing a babai. Idi isu ket 17 a bulanna, nagsublikami idiay Mexico ket nagtaengkami idiay Jalpa, Tabasco. Kalpasanna nangrugi ti ‘Cristero nga iyaalsa,’ ket nagpaut dayta manipud 1926 aginggat’ 1929.

Kayat dagiti Cristeros a danggayak ida. Nupay kasta, siak ken ti pamiliak, kinaykayatmi ti napan idiay Estado ti Aguascalientes. Kalpasan panagnaed kadagiti nagduduma a lugar iti Mexicano a republika, nagtalinaedkamin idiay Matamoros, Tamaulipas idi 1956, a sadiay inrugik ti nangtarawidwid kadagiti trabaho a panangibangon kadagiti patakder.

Agbaliw ti Biagko

Isu idi daytoy a nangrugi nga agbaliw ti biagko. Ti balasangko, a naasawaanen ken aggigian iti ballasiw ti pagbeddengan idiay Brownsville, Texas, E.U.A., masansan a sumarungkar kadakami. Maysa nga aldaw kunana: “Dad, adu a pamilia ti agtitipon idiay pagtataripnongan ti komunidad ita. Mapantayo ket kitaentayo no ania dayta.” Daytat’ maysa nga asamblea dagiti Saksi ni Jehova. Ti balasangko, ti manugangko, ti apok, ken ni baketko, ken siak tinabunuanmi amin nga uppat nga aldaw ti asamblea.

Manipud iti daytan a tawen, tinabunuanmi dagiti Nakristianuan a panagtitipon dagiti Saksi ni Jehova. Rimmang-ayak iti naespirituan idiay Mexico, bayat a naaramid met dayta iti balasangko idiay Estados Unidos. Di nagbayag ibagbagakon kadagiti katrabahoak dagiti kinapudno ti Biblia a maad-adalko. Immawatak iti sangapulo a magasin iti tunggal ruar Ti Pagwanawanan ken Agriingkayo!, nga inwarasko kadagiti katrabahoak. Lima kadagidiay adda iti opisina ken tallo kadagiti inhiniero kasta met a sumagmamano kadagiti sabsabali pay a trabahador ti nagbalin a Saksi.

Ay, nakalamlam-ek dayta a Disiembre 19, 1959, idi a nabautisaranak iti karayan! Amin a nabautisaran iti dayta nga aldaw ket nagsakit gapu iti nalabes kalamiisna a danum. Immuna ngem siak a nabautisaran ti balasangko, ket ni baketko, nupay isut’ saan a pulos a nabautisaran, dimteng iti pannakaammo iti kinapudno ti Biblia, ket isut’ mannakitunos unay.

Ti Amin-Tiempo a Ministerio

Nariknak a nakautangak iti Dios gapu kadagiti isuamin a naayat a kinamanangaasina, gapuna nga idi Pebrero 1962, idi 75 ti tawenko, nangrugiak a simrek iti amin-tiempo a ministerio kas maysa a payunir. Sumagmamano a tawen kalpasanna, idi 1968, natay ni baketko. Tinarigagayak idin ti agserbi iti sabali a pagilian, ngem gapu iti tawenko, impagarup dagiti kakabsat a saan a maisingasing dayta. Nupay kasta, idi 1970, natudinganak kas maysa a payunir idiay Colotlán idiay estado ti Jalisco, a sadiay adda idi ti maysa a bassit a kongregasion.

Idi Setiembre 1972, insingasing ti manangaywan sirkito nga umakarak idiay bassit nga ili ti El Carrizal, nga asideg idiay Colotlán. Idi Nobiembre iti dayta a tawen, naipasdek ti maysa a kongregasion sadiay, ket nadutokanak a maysa a panglakayen. Uray pay no daytat’ naiputputong nga ili, agingga iti 31 ti tumabtabuno kadagiti gimong.

Agpapan pay iti tawenko, aktiboak pay laeng iti ministerio, nga ikagkagumaak a tulongan dagiti tattao nga agrason kadagiti patpatienda. Kas pangarigan, iti Rosario dagiti Katoliko ulit-ulitenda ti Ave Maria: ‘Ave, Maria, napnoka ti grasia; ti Apo adda kenka.’ Inayon ti kararag: ‘Santa Maria, nga Ina ti Dios.’ Damagek kadakuada: ‘Kasano nga agbalin a kasta? No ti Dios ti mangisalakan ken Maria, kasano nga Isu ket maigiddato nga agbalin nga anakna?’

Agtawenak itan ti 105 ket nakapagserbiakon kas maysa a panglakayen ken maysa a regular a payunir idiay El Carrizal, Jalisco, iti ngangngani 20 a tawen. Mariknak a pagayatan ni Jehova nga agbiagak kadagitoy adu a tawtawen, yantangay isu daytoy ti pamay-an a maikarok ti napukawko a tiempo idi diak pay agserserbi Kenkuana.

Maysa a banag a naadalko ket rebbeng a kankanayon nga addaantayo ti panagtalek a ti Kangatuan nga Ukom ket sipsiputannatayo manipud iti nalinteg a tronona ken ipaayannatayo kadagiti kasapulantayo. Kas kunaen ti Salmo 117:2: “Kadatayo ti naayat a kinamanangaasina ket nabileg.”