Malagipyo Pay Aya?
Natakkuatanyo kadin nga addaan dagiti kallabes a ruar Ti Pagwanawanan iti praktikal a pateg kadakayo? Apay ngarud a dikay suboken ti lagipyo babaen kadagiti sumaganad:
▫ Aniat’ maysa a kangrunaan a panggep dagiti panangagas ni Jesus? Inladawanda, maipaay iti pannakaparegta dagiti dakkel a bunggoy dagiti marakarnero a tattao ita, a dagiti makalasat iti Armagedon ket maagasandanto di agbayag kalpasan Armagedon. (Isaias 33:24; 35:5, 6)—12/15, panid 12.
▫ Apay a kasapulantayo ti kankanayon a pammalagip nga: “Agtalinaed iti panagkararag”? (Roma 12:12)
Dagiti pakarigatan ken responsabilidad iti biag mabalin a nadagsenda unay kadatayo no dadduma a mabalin a malipatantayo ti agkararag. Wenno mabalin a lapunosendatayo dagiti parikut, a mangpasardeng kadatayo nga agrag-o iti namnama ti Pagarian, agingga nga agsardengtayo nga agkararagen. Ngarud, kasapulantayo dagiti pammalagip a mangparegta kadatayo nga agkararag ket iti daytoy a pamay-an makaasidegtayo nga ad-adda ken Jehova.—12/15, panid 14.
▫ Aniat’ mangpaneknek a ti Layus idi kaaldawan ni Noe ket nangibati iti di mapunas a rikna iti sangatauan?
Napattapatta a nasurok a 500 a pakasaritaan ti Layus ti iyis-estoria ti nasurok a 250 a tribo ken il-ili. Dadduma a kangrunaan a panagaasping ti masarakan kadagitoy amin a pakasaritaan.—1/15, panid 5.
▫ Kasano a dagiti ulbod a mammadto ita umaspingda kadagidiay adda idi panawen ni Jeremias?
Ita dagiti ulbod a mammadto kunada nga ibagbagida ti Dios, ngem takawenda dagiti sasao ti Dios babaen panangikasabada kadagiti bambanag a mangsinga kadagiti tattao manipud pudno nga ibagbaga ti Biblia. Nangnangruna a pudno daytoy no maipanggep iti panangisuro maipapan iti Pagarian. (Jeremias 23:30)—2/1, panid 4.
▫ Aniat’ maipasimudaag no ti maysa ket mabautisaran iti nagan ti nasantuan nga espiritu?
Ipasimudaag daytoy a daydiay mababautisaran ket determinado a makitunos iti espiritu, a di mangar-aramid iti aniaman a manglapped iti panagandarna dayta iti ili ni Jehova. Ngarud, dayta a tao masapul a makitunos iti matalek ken naannad nga adipen ken iti urnos dagiti panglakayen idiay kongregasion. (Hebreo 13:7, 17; 1 Pedro 5:1-4)—2/1, panid 18.
▫ Apay a ti panagdayaw iti ladawan makadadael unay iti managdayaw?
Ipakita ti Biblia a dagiti ladawan ket makarimonda ken Jehova a Dios ken awan serbida iti panangtulong kadagiti napeklan a managdayawda nga umasideg nga ad-adda iti Dios. (Deuteronomio 7:25; Salmo 115:4-8) Ni Satanas a Diablo “binulsekna ti pampanunot” dagiti tattao tapno ti kinapudno ket “di agsilnag.” (2 Corinto 4:4) Gapuna a no daydayawenna ti maysa a ladawan, ti maysa a tao ket kinaagpaysuanna agserserbi kadagiti interes dagiti demonio. (1 Corinto 10:19, 20)—2/15, pinanid 6-7.
▫ Apay a dagiti karnero naibilangda a napateg a kinabaknang kadagiti tiempo ti Biblia?
Ti de lana ket maysa a mapabaro a kinabaknang ken mabalin a mausar iti panagaramid iti pagan-anay maipaay iti pamilia wenno mabalin a mailako. Dagiti sara dagiti lallaki a karnero ket naaramatda a mangmarka iti Jubileo wenno maaramatda a panangipangngeg iti aweng wenno panangidalan kadagiti sikap iti gubat. Yantangay dagiti karnero ket maysa kadagiti animal a nadalus a mabalin a kanen dagiti Israelitas, ti maysa a pangen dagiti karnero ipasiguradoda ti abasto ti taraon, ken daytat’ nangipaay iti regular nga abasto ti gatas nga inumen ken maipaay iti panagaramid iti keso.—3/1, pinanid 24-5.
▫ Aniat’ kidkiddawen dagiti managayat iti Dios no ikararagda nga umay koma ti Pagarian ti Dios? (Mateo 6:10)
Kidkiddawenda a ti nailangitan a Pagarian ti Dios agtignay koma babaen panangdadaelna kadagiti inaramid-tao a sistema ti gobierno, a napaay a mangtungpal kadagiti karida a mangiyeg talna ken talged. (Daniel 2:44)—3/15, panid 6.
▫ Siasino dagiti Manangidepensa, ken insuroda kadi ti Trinidad?
Dagiti Manangidepensa ket papangulo ti relihion a nagbiag iti maud-udi a paset ti maikadua a siglo. Nagsuratda tapno idepensada ti ammoda a Kinakristiano maibusor kadagiti nauyong a pilosopia nga agraraira idiay lubong ti Roma. Awan kadakuada ti nangisuro iti Trinidad.—4/1, pinanid 24-9.
▫ Ni kadi Zacarias, ti ama ni Juan a Mammautisar, nagbalin a tuleng ken umel, a kasla ipabigbig ti Lucas 1:62?
Kuna ni Gabriel a ti panagsao ni Zacarias ket maapektaranto, ngem saan ti panagdengngegna. (Lucas 1:18-20) Ibaga ti Lucas 1:64: “Giddato a nanglukat manen ti ngiwat [ni Zacarias] ket naluk-atan ti dilana ket nangrugi a nagsao.” Paliiwenyo, awan naaramid a panangdakamat ditoy maipapan iti pannakaapektar ti panagdengngegna iti aniaman a pamay-an. Ti pannakadakamat dagiti “sinial” idiay Lucas 1:62 mabalin a kaipapananna a sumagmamano a panagkumpas ti naaramid tapno maadaw ti pangngeddeng ni Zacarias.—4/1, panid 31.