Ar-aramidenyo Aya ti Pagayatan ti Dios?

ITI binalaybalay a panagministerioda, nasarakan ti dua kadagiti Saksi ni Jehova ti maysa a padi iti Episcopal Church. Aglanglanga a mannakigayyem a lalaki, barbasan, ag-60 ti tawenna, naka-T-shirt ti addaan naisurat a nagan ti iglesiana. Awan panagkedked a kinunana: “Tarigagayak a dagiti miembro ti iglesiami ket kas koma iti kinaregtayo iti panangisaknap ti Sao, ngem dawatek kadakayo a dikayon sumarungkar iti pagtaengak uray kaano.”

Wen, nakaad-adu dagiti tao a mangraem iti trabaho dagiti Saksi ni Jehova ken mangkomendar kadakuada gapu iti kinaregta ken kinaanepda. Ngem, saanda nga interesado iti ar-aramiden dagiti Saksi, wenno makarikna a masapul nga aramidenda met ti kasta. Nupay kasta, daytoy nabatad a di panagtutunos dagiti bambanag ket saanen a baro. Nalatak daytan idi kaaldawan ni Jesus, ket sireregget nga impaganetgetna ti punto babaen ti mamagpanunot nga ilustrasion.

“Ania ti pagarupenyo? Maysa a tao addaan ti dua nga annak. Idi umasideg iti umuna, kinunana, ‘Anak, inka agtrabaho ita nga aldaw idiay kaubasan.’ Kas sungbat kinuna daytoy a maysa, ‘Mapanak, apo,’ ngem saan a napan. Idi umasideg iti maikadua, kinunana ti isu met laeng. Kas sungbat kinuna daytoy a maysa, ‘Diak mapan.’ Kalpasanna nakarikna iti panagbabawi ket napan. Siasino kadagiti dua ti nangaramid iti pagayatan ni amana?”​—Mateo 21:28-31.

Nalawag ti sungbat. Kas kadagiti umariwekwek a nagdengngeg ken Jesus, nalabit isungbattayo, “Ti naud-udi.” Ngem nupay nalawag, babaen dayta nga ilustrasion, kayat nga ipaganetget kadatayo ni Jesus a ti panangaramid iti pagayatan ti ama ti kapatgan. Nupay kinuna ti maikadua nga anak a lalaki a dina kayat ti mapan, nagtungpal met laeng ket nakomendaran gapu iti dayta. Napateg met ti panangaramid ti umiso a kita ti trabaho. Nagtignay ti maikadua nga anak a lalaki babaen ti panagtrabahona iti kaubasan ti ama; saan a napan ket nagtrabaho iti bukodna a kaubasan.

Ania ti ipakpakita daytoy kadatay amin? Ania ti kalikaguman ti Dios kadagiti agdaydayaw ita? Aniat’ maadaltayo iti biag ni Jesus a tumulong kadatayo a mangaramid iti pagayatan ni Amana? Nagpateg dagitoy a saludsod, ket ti pannakaammotayo kadagiti umiso a sungbat kaipapananna ti agnanayon a pagimbagantayo, yantangay “ti mangaramid iti pagayatan ti Dios agtalinaed iti agnanayon.”​—1 Juan 2:17; Efeso 5:17.

Ania ti “Pagayatan ti Dios”?

Ti nombre a “pagayatan” agparang iti nasurok a 80 a daras iti Comprehensive Concordance of the New World Translation of the Holy Scriptures. Iti agarup 60 kadagitoy a daras (wenno agarup 75 porsiento iti dagup a daras) tuktukoyenna ti pagayatan ti Dios. Dagiti sasao a “pagayatan ti Dios,” ken “pagayatan ni Amak,” agparang iti 20 a daras. Iti daytoy makitatayo a ti pagayatan ti Dios ti rumbeng nga ipangrunatayo. Ti panangaramid iti pagayatan ti Dios rumbeng nga isu komat’ kangrunaan a pakaseknantayo iti biagtayo.

Iti Ingles ti nombre a “will” kaipapanannat’ ‘tarigagay, kayat, determinasion, banag a tarigagayan, nangruna ti kalikagum wenno determinasion ti maysa nga addaan turay wenno pannakabalin.’ No kasta ngarud, ni Jehova, ti Katan-okan nga Agturay, addaan pagayatan, kalikagum wenno determinasion. Ania dayta? Ibaga ti Kasuratan kadatayo nga iti pasetna “ti pagayatan [ti Dios] ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Amin-kararua a nagtrabaho ni Jesu-Kristo ken dagiti immuna a Kristiano tapno maidanon daytoy umiso a pannakaammo kadagiti sabsabali.​—Mateo 9:35; Aramid 5:42; Filipos 2:19, 22.

Siasino ti mangar-aramid iti pagayatan ti Dios ita? Kadagiti agarup dua bilion a tao nga agak-aklon a pasurot ni Jesu-Kristo, mano ti kas iti inaudi nga anak a lalaki iti ilustrasion ni Jesus, a napan ket inaramidna ti pagayatan ni amana? Saan a narigat a sungbatan. Dagiti pudno a sumursurot iti addang ni Jesu-Kristo aramidenda ti trabaho nga imbagana nga aramidenda: “Iti isuamin a nasnasion masapul a maikaskasaba nga umuna ti naimbag a damag.” (Marcos 13:10) Dagiti Saksi ni Jehova, a nasurok nga uppat ket kagudua a milion ti bilangdan iti intero a lubong, ket aktibo a mangikaskasaba ti naimbag a damag ti Pagarian ti Dios ken mangisursuro kadagiti sabsabali, a mangitudtudo iti Pagarian kas kakaisuna a pangnamnamaan ti sangatauan iti talna ken talged. Makiramramankay kadi a naan-anay iti panangaramid iti pagayatan ti Dios? Ikaskasabayo kadi ti naimbag a damag ti Pagarian kas iti inaramid ni Jesus?​—Aramid 10:42; Hebreo 10:7.

Panangbiruk ti Rag-o iti Panangaramid iti Pagayatan ti Dios

Nupay adda rag-o iti pannakaammo iti pagayatan ti Ama, dakdakkel ti rag-o iti panangisuro kadagiti sabsabali iti pagayatan ti Dios. Naaddaan ni Jesus ti rag-o iti panangisuro kadagiti tattao maipapan ken Amana. Kasla taraon dayta kenkuana. (Juan 4:34) Maaddaantay met iti pudpudno a kinaragsak no aramidentayo ti kas iti inaramid ni Jesus, nga isu ti, panangikasaba ken panangisuro kadagiti bambanag nga insurona, dagiti bambanag nga inawatna ken ni Amana. (Mateo 28:19, 20) Kas inkari ni Jesus, “no ammoyo dagitoy a bambanag, naragsakkayo no aramidenyo ida.”​—Juan 13:17.

Kas panangiyilustrar: Kinuna ti maysa nga ina a nabiit pay a simrek manen iti amin-tiempo a panagministerio kas payunir: “Anian a makapagagar ti pannakakita iti rupa ti yad-adalan ti Biblia a maragsakan bayat a dagiti nadumaduma a kinapudno iti Biblia dumanon iti pusona! Makaparagsak unay kaniak no makitak a ti yad-adalak isuratna dagiti amin a kasuratan sakbay ti panagadal ken aginotnotar bayat ti panagadal tapno masungbatanna dagiti aniaman a saludsod a pangrepaso kalpasanna.” Maysa pay kadagiti yad-adalanna ti Biblia ti nakaammo iti kinapudno idi tin-edyer pay laeng. Ita ta kasadon ken maseknan maipapan kadagiti personal a parikut, kalikagumanna a makasarak koma kadagiti Saksi. Anian a ragsakna idi nasarakan ti payunir a sister! Maragsakan unay daytoy agkabanuag a babai a mangitultuloy ti panagadalna iti Biblia.

Panangtaginayon ti Rag-o iti Panagaramid ti Pagayatan ti Dios

Ni Ari David iti kadaanan nga Israel ti maysa a nangikagumaan a mangaramid iti pagayatan ti Dios iti intero a panagbiagna. Iti laksid dagiti adu a rigat ken suot a naipasango kenkuana, isut’ naparegta a mangikuna: “Pagragsakak nga aramiden ti pagayatam, O Diosko, ket ti lintegmo adda kadagiti lalaemko.” (Salmo 40:8) Ti panangaramid iti pagayatan ti Dios ket adda iti mismo a kararua ni David, iti mismo a kinataona. Daytat’ palimed ti di agkupas a rag-ona iti panagserbi ken Jehova. Saan a pakarigatan ken David ti panangaramid iti pagayatan ti Dios. Imbes ketdi, makaparagsak dayta, maysa a banag a nagtaud iti pusona. Iti intero a panagbiagna, inaramidna ti amin a kabaelanna nga agserbi iti Diosna, ni Jehova, nupay adda dagiti tiempo a nagbasol ken nagkurang.

No dadduma, mabalin a kumapuy ti rag-otayo. Mabalin a kumapsut wenno maupaytayo. Nalabit a dagiti bambanag a naaramidantay iti napalabas ti agtultuloy a mangburburibor kadatayo, duddudogennatayo ti konsiensiatayo gapu iti basol a nabayagen a naaramidantayo. Masansan, maparmektayo dagitoy a rikna babaen ti napaspasnek a panagadal iti Sao ti Dios. Pagreggetantayo nga ikabil ti linteg ti Dios “kadagiti lalaemtayo,” kas iti inaramid ni David. No ikagumaantay nga aramiden ti pagayatan ti Dios iti amin a kararua, nga aramidentayo ti amin a kabaelantayo, gunggonaannatayo kas mayanatup agsipud ta isu ket matalek.​—Efeso 6:6; Hebreo 6:10-12; 1 Pedro 4:19.

Makapainteres, idiay Hebreo 10:5-7, inadaw ni apostol Pablo dagiti sasao ni David idiay Salmo 40:6-8 ket inyaplikarna ida ken ni Jesu-Kristo. Iti panangaramidna iti kasta, impakita ni Pablo no kasanot’ kinasinged ni Jesus ken ni Amana. Ti Hebreo a sao para iti “pagayatan” ipasimudaagna ti ‘pagragsakan, tarigagayan, anamongan, wenno pakaay-ayuan.’ Ngarud, mabalin a kastoy ti pannakabasa ti Salmo 40:8 maipapan ken Kristo: “Pagragsakak nga aramiden ti pakaay-ayuam, O Diosko.”a Tinarigagayan ni Jesus nga aramiden ti pakaay-ayuan ni Amana. Saan laeng a ti nakalikaguman nga aramiden ni Jesus ti inaramidna. Inaramidna ti maikanunong iti puso ni Amana, ket naay-ayo a nangaramid iti dayta.

Ti pakabuklan ti biag ni Jesus ket naipamaysa iti panangisuro kadagiti sabsabali no ania ti pagayatan ti Dios ken no ania ti masapul nga aramidenda tapno magun-odda ti parabur ti Dios. Isu ket maysa nga amin-tiempo a manangaskasaba ken mannursuro ket naaddaan iti dakkel a rag-o iti panangaramid iti dayta a trabaho. Gapuna maiparbeng laeng a no ad-adda nga aramidentayo ti trabaho ni Jehova, dakdakkel met ti rag-o a magun-odtayo. Makapagserbikay kadi met nga amin-tiempo iti trabaho a panangasaba tapno dumakkel met ti rag-oyo?

Ti kanayonan pay a tulong iti panangtaginayon ti rag-o iti panangaramid iti pagayatan ti Dios isut’ kankanayon a panangipamaysa ti panunottayo iti masanguanan. Kasta ti inaramid ni Jesus. “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain.” Para kenkuana, ti rag-ona isut’ panagbalin a matalek iti Dios agingga iti panungpalan ket kalpasanna ti pananggun-odna iti gunggona a panagbalin kas ari iti makanawan ni Amana.​—Hebreo 12:2.

Darepdepenyo ti rag-o iti masanguanan nga agur-uray kadagidiay agtultuloy a mangaramid iti pagayatan ti Dios. Makitadanto ti pannakatalipupos dagidiay mangirupir a mangaramid iti bukodda a pagayatan uray no daytoy ti makagapu ti panagsagaba dagidiay mangikagumaan a mangaramid iti pagayatan ti Dios. (2 Tesalonica 1:7, 8) Panunotenyo ti rag-o dagiti mapagungar nga ay-ayaten a maipaayan iti gundaway a mangammo ken mangaramid iti pagayatan ti Dios. Wenno usigenyo ti panggep ti Dios a mangisubli iti daga a Paraiso. Ken kamaudiananna, darepdepenyo ti wayawaya nga iyegto ti naan-anay a pannakadadael ni Satanas, ti bumusbusor iti pagayatan ni Jehova.

Wen, ti panangaramid iti pagayatan ti Dios ita mangyeg iti dakkel a rag-o itan ken agnanayon a kinaragsak iti masanguanan. Aniaman ti reaksion dagiti tao iti trabahotayo a panangasaba, tuladentayo ti ulidan ni Jesus a naragsakan a nangaramid iti pagayatan ni Amana.

[Footnote]