Sadino ti Yan Dagiti Natay?

“TI DAGA ket maysa a tiendaan; ti langit isu ti pagtaengantayo,” kuna ti pagsasao dagiti Yoruba idiay Makinlaud nga Africa. Nayanninaw daytoy a kapanunotan iti adu a relihion. Mayarig kano ti daga iti maysa a tiendaan a sarungkarantayo iti apagbiit satay panawan. Sigun iti daytoy a pammati, no mataytayo, mapantayo idiay langit, ti pudpudno a pagtaengantayo.

Isursuro ti Biblia nga adda dagidiay mapan idiay langit. Kinuna ni Jesu-Kristo kadagiti matalek nga apostolna: “Idiay balay ni Amak adu dagiti paggianan. . . . Mapanak tapno isaganak ti maysa a lugar a maipaay kadakayo. Kasta met, no mapanak ket isaganak ti maysa a lugar a maipaay kadakayo, umayakto manen ket awatenkayto kaniak a mismo iti pagtaengan, tapno no sadino ti yanko addakayo met koma.”​—Juan 14:2, 3.

Ti sasao ni Jesus dina kaipapanan a mapan amin a naimbag a tattao idiay langit wenno ti langit ket isu ti pagtaengan ti sangatauan. Adda dagidiay maala idiay langit mainaig iti panangituray iti daga. Ammo ni Jehova a Dios a pulos a di kabaelan dagiti gobierno ti tao a tamingen a sibaballigi dagiti bambanag ditoy daga. Gapuna, nangyurnos iti maysa a nailangitan a gobierno, wenno Pagarian, nga iti kamaudiananna mangiturayto iti daga ken mamagbalin iti dayta a Paraiso a kas iti pinanggepna nga aramiden idi damo. (Mateo 6:9, 10) Ni Jesus ti Ari iti Pagarian ti Dios. (Daniel 7:13, 14) Adda sumagmamano a napili manipud iti sangatauan a makipagturay kenkuana. Impadto ti Biblia a dagidiay maala idiay langit buklenda ti maysa a “pagarian ken [agbalinda a] papadi iti Diostayo” ket “agturaydanto a kas ar-ari iti daga.”​—Apocalipsis 5:10.

Siasino ti Mapan Idiay Langit?

No usigentayo ti dakkel nga akem dagitoy nailangitan nga agtuturay, di pakasdaawan a rumbeng a masabetda dagiti nainget a pagalagadan. Masapul nga addaan dagidiay mapan idiay langit iti umiso a pannakaammo ken Jehova ken masapul nga agtulnogda kenkuana. (Juan 17:3; Roma 6:17, 18) Makalikagumanda a mangalagad iti pammati iti daton a subbot ni Jesu-Kristo. (Juan 3:16) Nupay kasta, adu pay ti nairaman. Masapul nga inayaban ken pinili ida ti Dios babaen ti Anakna. (2 Timoteo 1:9, 10; 1 Pedro 2:9) Mainayon pay, masapul a bautisadoda a Kristiano a ‘nayanak manen,’ napulotan iti nasantuan nga espiritu ti Dios. (Juan 1:12, 13; 3:3-6) Rumbeng a salimetmetanda met ti kinatarnawda iti Dios agingga ken patay.​—2 Timoteo 2:11-13; Apocalipsis 2:10.

Riniwriw a tattao a nagbiag ken natay ti di nakasabet kadagitoy a pagalagadan. Adu ti bassit laeng ti gundawayda a nakasursuro maipapan iti pudno a Dios. Dagiti dadduma pulos a saanda a nabasbasa ti Biblia ken bassit laeng wenno awan a pulos ti ammoda maipapan ken Jesu-Kristo. Uray kadagiti pudno a Kristiano ditoy daga ita, manmano ti pinili ti Dios maipaay iti nailangitan a biag.

Gapuna, bassit laeng ti bilang dagidiay mapan idiay langit. Tinukoy ida ni Jesus kas “bassit nga ipastoran.” (Lucas 12:32) Iti kamaudiananna, naipalgak ken ni apostol Juan a 144,000 laeng ti bilang dagidiay “nagatang manipud iti daga” a makipagturay ken Kristo idiay langit. (Apocalipsis 14:1, 3; 20:6) No maidilig iti binilbilion a tattao a nagbiag ditoy daga, pudno a nagbassit a bilang dayta.

Dagidiay Saan a Mapan Idiay Langit

Aniat’ mapasamak kadagidiay saan a mapan idiay langit? Agsagsagabada aya iti maysa a lugar a pagtutuokan iti agnanayon, kas isursuro dagiti dadduma a relihion? Ay ket, saan, ta ni Jehova ket Dios ti ayat. Dagiti naayat a nagannak saanda nga ipurruak ti annakda iti apuy, ket saan a tutuoken ni Jehova dagiti tattao iti kasta a pamay-an.​—1 Juan 4:8.

Ti namnama ti kaaduan kadagidiay a natay isu ti panagungar iti maysa a naindagaan a paraiso. Kunaen ti Biblia a pinarsua ni Jehova ti daga ‘tapno pagnaedan.’ (Isaias 45:18) Kinuna ti salmista: “No maipapan iti langlangit, isuda ti langlangit ni Jehova, ngem ti daga intedna kadagiti annak dagiti tattao.” (Salmo 115:16) Ti daga, saan a ti langit, ti agnanayonto a pagtaengan ti sangatauan.

Impadto ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [kayatna a sawen, timek ni Jesus, ti “Anak ti tao”] ket rummuardanto.” (Juan 5:27-29) Pinasingkedan ni Kristiano nga apostol Pablo: “Adda inanamak iti Dios . . . nga addanto panagungar agpadpada dagiti nalinteg ken dagiti nakillo.” (Aramid 24:15) Iti kayo a pagtutuokan, inkari ni Jesus iti managbabawi a managdakdakes ti biag babaen ti pannakapagungarnanto iti naindagaan a paraiso.​—Lucas 23:43.

Nupay kasta, aniat’ agdama a kasasaad dagiti natay a mapagungarto iti biag ditoy daga? Tumulong a mangsungbat iti daytoy a saludsod ti maysa a pasamak iti ministerio ni Jesus. Natay ni Lazaro a gayyemna. Sakbay a napan ni Jesus a mangpagungar kenkuana, kinunana kadagiti adalanna: “Ni Lazaro a gayyemtayo napan naginana, ngem agbaniagaak sadiay tapno riingek manipud iti pannaturogna.” (Juan 11:11) No kasta, inyarig ni Jesus ti ipapatay iti pannaturog, maysa a nargaan a turog nga awanan kadagiti tagtagainep.

Pannaturog ken Patay

Maitunos kadagiti dadduma pay a kasuratan daytoy a kapanunotan a pannaturog ken patay. Saanda nga isursuro nga addaan dagiti tao iti di matay a kararua nga umallatiw iti lubong dagiti espiritu no matayda. Imbes ketdi, kunaen ti Biblia: “Dagiti natay dida ammo ti aniaman . . . Ti ayatda ken ti gurada ken ti apalda napukawen iti nabayag . . . Awan ti aramid, wenno gakat, wenno pannakaammo, wenno sirib, idiay Sheol [ti tanem], ti disso a papanam.” (Eclesiastes 9:5, 6, 10) Mainayon pay, kinuna ti salmista a ti tao “agpulang iti dagana; iti dayta met la nga aldaw dagiti pampanunotna mapukawda.”​—Salmo 146:4.

Nalawag nga ipakita dagitoy a kasuratan a saandatay a makita wenno mangngeg dagidiay matmaturog ken patay. Saanda a kabaelan ti mangparabur man wenno mangdidigra. Awanda idiay langit, ket saanda met nga agnanaed iti kagimongan dagiti inapoda. Napukawen ti biagda, awandan.

Iti naituding a tiempo ti Dios, dagidiay matmaturog ita ken patay ken adda iti lagipna mariingdanto iti biag iti paraiso a daga. Maysanto dayta a daga a nadalusan manipud iti polusion, riribuk, ken parparikut a mapaspasaran ita ti sangatauan. Anian a nagragsakto a tiempo dayta! Iti dayta a Paraiso addanto gundawayda nga agbiag iti agnanayon, ta ipanamnama kadatayo ti Salmo 37:29: “Dagiti nalinteg tagikuaendanto ti daga, ket agtaengdanto kenkuana nga agnanayon.”

[Kahon iti panid 6, 7]

INSARDENGKO TI AGDAYDAYAW KADAGITI NATAY

“Idi ubingak pay laeng, tultulongak ni tatangko iti kanayon a panagdatonna iti pimmusayen nga amana. Iti naminsan, idi a naimbaganen ni tatangko manipud iti nakaro a sakit, imbaga ti orakulo kenkuana a rumbeng nga agidaton iti maysa a kalding, tugi, kola nut, ken arak iti pimmusayen nga amana kas panagyaman iti panagimbagna. Nabalakadan met ni tatangko nga agpakpakaasi kadagiti pimmusayen nga inapona tapno malapdan ti kanayonan a panagsakit ken didigra.

“Ginatang ni nanangko dagiti kasapulan iti panagdaton, a maaramid iti yan ti tanem ni apongko a lakay. Adda laeng ti tanem iti abay ti balaymi, kas mayannurot iti kannawidan iti lugarmi.

“Naawis dagiti gagayyem, kakabagian, ken kaarruba a mangbuya iti panagdaton. Nagtugaw ni tatangko, a sidadaeg a nagaruat a mayanatup iti pasken, iti maysa a palangka iti sango ti altar a nakaintaran ti bangabanga dagiti kalding a naaramat kadagiti napalabas a panagdaton. Siak ti paraibukbok iti arak iti maysa a bassit baso, nga inyawatko ken tatangko. Kalpasanna, imbukbokna dayta iti daga kas daton. Namitlo a daras nga inawagan ni tatang ti nagan ni amana ket nagkararag kenkuana maipaay ti pannakailiklik iti didigra iti masanguanan.

“Naidaton dagiti kola nut, ken naparti ti maysa a kalakian a kalding, nayanger, ket kinnan ti amin a dimmar-ay. Nakiramanak iti pannangan ken nagsala kadagiti panagkakanta ken banugbog dagiti tambor. Nalaing ken naparagsit nga agsala ni tatang, nupay maikuna a lakayen. No kasta a sumardeng iti apagbiit, ikararagna kadagiti inapona a bendisionanda dagiti amin a dimmar-ay, bayat a dagiti tao, a pakairamanak, ti sumungbat iti Ise, a kaipapananna ‘Sapay koma.’ Binuybuyak ni tatang a buyogen ti napasnek a panaginteres ken panagraem ket inar-arapaapko ti aldaw inton nataenganak metten tapno agdaton kadagiti pimmusayen nga inapo.

“Iti laksid dagiti adu a panagidaton, nariribuk latta ti pamiliami. Nupay adda tallo a sibibiag nga annak a lallaki ni nanang, awan uray maysa kadagiti tallo nga annakna a babbai ti nagbiag iti napaut; natayda amin idi ubbingda pay. Idi nagsikog manen ni nanang, nagaramid kadagiti nagarbo a panagdaton ni tatang tapno sitatalged a maipasngay ti ubing.

“Maysa manen a babai ti impasngay ni nanang. Kalpasan ti dua a tawen, nagsakit ti ubing ket natay. Nakiuman ni tatang iti orakulo, a nagkuna nga adda kabusor a makinggapuanan iti ipapatay. Kinuna ti orakulo a tapno makaibales ti ‘kararua’ ti ubing, kasapulan a maidaton ti maysa a pedaso a sumsumged a kayo, sangabotelia nga arak, ken maysa nga uken. Maiparabaw ti sumsumged a kayo iti tanem, maiwarsi ti arak iti tanem, ken maipumpon a sibibiag ti uken iti abay ti tanem. Daytoy ti naipagarup a mangriing iti kararua ti pimmusay nga ubing tapno maibalesna ti ipapatayna.

“Impanko ti sangabotelia nga arak ken ti sumsumged a kayo iti yan ti tanem, ket awit met ni tatang ti uken, nga intabonna sigun iti bilin ti orakulo. Mamatikam amin nga iti las-ud ti pito nga aldaw mapapatay ti kararua ti ubing ti tao a nakaigapuan ti di mapakpakadaan nga ipapatayna. Naglabas ti dua a bulan, ngem awan ti naipadamag a natay iti sangakaarrubaan. Naupayak.

“Sangapulo ket walo ti tawenko idi. Di nagbayag kalpasan dayta, naam-ammok dagiti Saksi ni Jehova, a nangipakita kaniak manipud iti Kasuratan nga awan maaramidan dagiti natay a naimbag man wenno dakes kadagiti sibibiag. Bayat a nagramut iti pusok ti pannakaammo iti Sao ti Dios, imbagak ken tatangko a diakon mabalin a kaduaen nga agdaton kadagiti natay. Idi damo, nakapungtot kaniak gapu ta binaybay-ak, sigun kenkuana. Ngem idi makitana a dinak mapagtallikud iti baro a pammatik, dinan binusor ti panagdaydayawko ken ni Jehova.

“Idi Abril 18, 1948, insimbolok ti dedikasionko babaen ti panagpabautisar iti danum. Manipud idin, nagtultuloyakon nga agserbi ken ni Jehova buyogen ti dakkel a rag-o ken pannakapnek, a tumultulong iti sabsabali a lumapsut iti panagdaydayaw kadagiti pimmusayen nga inapo, a pulos a di makatulong wenno mangdangran kadatayo.”​—Impatulod ni J. B. Omiegbe, Siudad ti Benin, Nigeria.

[Ladawan iti panid 7]

Addanto dakkel a rag-o no mapagungar dagiti natay iti maysa a paraiso a daga