Ti Kakaisuna a Solusion!
TI LALAKI nga agnagan Lazaro ken dagiti kakabsatna a babbai, a da Marta ken Maria, agnanaedda idiay Betania, maysa nga ili nga agarup tallo a kilometro ti kaadayona manipud Jerusalem. Maysa nga aldaw, bayat ti kaawan ti gayyemda a ni Jesus, nagsakit iti nakaro ni Lazaro. Madanagan unay dagiti kakabsatna. Nangipatulodda iti mensahe ken ni Jesus. Dua nga aldaw kalpasan a naammuanna dayta, nagdaliasat ni Jesus tapno mapanna kitaen ni Lazaro. Kabayatan ti panagdaliasatda, ni Jesus impakaammona kadagiti adalanna a mapanna riingen ni Lazaro. Idi damo, saan a natarusan dagiti adalan ti imbaga ni Jesus, ngem inlawlawagna: “Ni Lazaro natayen.”—Juan 11:1-14.
Idi nakagteng ni Jesus iti tanem ni Lazaro, imbilinna a maikkat ti bato a nangserra iti pagserkan ti tanem. Kalpasan ti panagkararagna, imbilinna: “Lazaro, rummuarka!” Ket rimmuar ni Lazaro. Napagungar ti tao nga uppat nga aldawen a natay.—Juan 11:38-44.
Ti salaysay maipapan ken ni Lazaro ipakitana a ti panagungar isu ti sigurado a solusion iti ipapatay. Ngem pudno kadi ti milagro a pannakapagungar ni Lazaro? Isalaysay dayta ti Biblia kas maysa a pudno a pasamak. Basaenyo ti salaysay iti Juan 11:1-44, ket makitayo no kasano a napaypayso dagiti detalye. Maibagayo kadi a saan a napasamak dayta? No kasta, pagduaduaanyo met ngarud ti kinapudno dagiti amin a milagro a nairekord iti Biblia, agraman ti pannakapagungar a mismo ni Jesu-Kristo. Ken “no ni Kristo saan a naibangon,” kuna ti Biblia, “awan serserbi ti pammatiyo.” (1 Corinto 15:17) Ti panagungar ket maysa a nakapatpateg a sursuro ti Kasuratan. (Hebreo 6:1, 2) Ngem ania ti kayat a sawen ti sao a “panagungar”?
Ania ti Kayat a Sawen ti “Panagungar”?
Iti Kristiano a Griego a Kasuratan, nasurok nga 40 a daras nga agparang ti sao a “panagungar.” Naipatarus dayta manipud iti Griego a sao a literal a kaipapananna “panagtakder manen.” Ti katupagna a Hebreo a sao kaipapananna “iyuungar ti natay.” No matay ti maysa a tao, anianto ti mapagungar kenkuana? Saan a mabalin a ti bagina, nga agrupsa ken agsubli iti tapok ti daga. Saan a ti isu met laeng a bagi ti mapagungar no di ket ti isu met laeng a persona a natay. Gapuna, ti panagungar iramanna ti pannakaisubli ti padron ti biag ti indibidual—ti personalidadna, ti pakasaritaan ti biagna, ken amin dagiti detalye a pakabigbiganna.
Yantangay perpekto ti memoria ni Jehova a Dios, malagipna ti amin a detalye ti biag dagiti pimmusay. (Isaias 40:26) Yantangay ni Jehova ti Namunganay iti biag, nalaka laeng a maisublina ti biag ti isu met laeng a persona iti maysa a baro a bagi. (Salmo 36:9) Kanayonanna, ibaga ti Biblia a ‘kailiw’ wenno magagaran unay ni Jehova a Dios a mangpagungar kadagiti natay. (Job 14:14, 15) Anian a makaparagsak kadatayo ta saan laeng a kabaelan ni Jehova nga isubli ti biag ti maysa a tao no di ket magagaran pay a mangaramid iti dayta!
Nakapatpateg met ti paset ni Jesu-Kristo iti panangpagungar kadagiti natay. Nasurok bassit a makatawen kalpasan a rinugianna ti ministeriona, kinuna ni Jesus: “No kasano a ti Ama ibangonna dagiti natay ken pagbiagenna ida, kasta met a ti Anak pagbiagenna dagidiay kayatna.” (Juan 5:21) Saan kadi a ti kapadasan ni Lazaro ipakitana nga addaan ni Jesu-Kristo iti pannakabalin ken tarigagay a mangpagungar iti natay?
Komusta met ti kapanunotan nga adda banag kadatayo nga agtultuloy nga agbiag no mataytayo? Saan nga agtunos ti sursuro a panagungar ken ti ideya nga imortal ti kararua wenno espiritu ti tao. No adda banag iti unegtayo a makalasat iti ipapatay, apay koma a kasapulan pay ti panangpagungar? Idi natay ni Lazaro, saan a patien ni Marta nga adda espiritu ti kabsatna nga agtultuloy nga agbiag. Mamati ni Marta iti panagungar. Idi impanamnama kenkuana ni Jesus: “Bumanganto ni kabsatmo,” kinuna ni Marta: “Ammok a bumangonto inton panagungar iti kamaudianan nga aldaw.” (Juan 11:23, 24) Ken idi napagungar ni Lazaro, awan ti insalaysayna nga isu ket napan iti lubong dagiti espiritu. Talaga a natay. “No maipapan kadagiti natay, saanda a pulos sipapanunot iti aniaman,” kuna ti Biblia. “Awan ti aramid wenno uray gakat wenno uray pannakaammo wenno uray sirib idiay Sheol [tanem], ti disso a papanam.”—Eclesiastes 9:5, 10.
Sigun ngarud iti Biblia, ti kakaisuna a solusion ti ipapatay isu ti panagungar. Ngem kadagiti nagadu a natay, siasino ti mapagungar, ken sadino?
Siasino ti Mapagungar?
Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek[ko].” (Juan 5:28, 29) Sigun iti daytoy a kari, mapagungarto dagidiay adda kadagiti pakalaglagipan a tanem—dagidiay adda iti lagip ni Jehova. Daytoy ngarud ti saludsod: Kadagiti amin a natay, siasino a talaga dagiti mapagungarto nga adda iti lagip ti Dios?
Ti kapitulo 11 ti Hebreo a libro ti Biblia, nailista ti nagan dagiti lallaki ken babbai a simamatalek a nagserbi iti Dios. Karamanda kadagiti mapagungarto, agraman dagiti nasungdo nga ad-adipen ti Dios a natay kadagiti naglabas a tawtawen. Komusta met dagiti tattao a napaay a mangannurot kadagiti pagalagadan ti Dios iti kinalinteg, nalabit gapu ta kurang ti pannakaammoda? Addada met kadi iti lagip ti Dios? Wen, aduda, agsipud ta ikarkari ti Biblia: “Addanto panagungar agpadpada dagiti nalinteg ken dagiti nakillo.”—Aramid 24:15.
Nupay kasta, adda dagiti natay a saan a mapagungar. “No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno,” kuna ti Biblia, “awanen ti nabati nga aniaman a sakripisio maipaay iti basbasol, no di ket adda nakabutbuteng a panangin-inanama iti pannakaukom.” (Hebreo 10:26, 27) Adda dagiti nakabasol a saan a mapakawan. Awanda iti Hades (tanem) no di ket iti Gehenna, maysa a simboliko a lugar ti agnanayon a pannakadadael. (Mateo 23:33) Ngem masapul nga agannadtayo a di mangukom no mapagungar wenno saan ti maysa a natay. Ni Jehova laeng ti addaan iti karbengan a mangukom. Ammona no siasino ti adda iti Hades ken no siasino ti adda iti Gehenna. Ti pakaseknantayo koma ket no kasanotayo a makapagbiag maitunos iti pagayatan ti Dios.
Panagungar Tapno Agbiag Idiay Langit—Agpaay iti Siasino?
Naisangsangayan unay ti pannakapagungar ni Jesus. Isu “napapatay iti lasag, ngem napagbiag iti espiritu.” (1 Pedro 3:18) Awan pay idi ti tao a nakapadas iti kasta a panagungar. Kinuna a mismo ni Jesus: “Awan ti tao nga immuli sadi langit no di daydiay bimmaba manipud langit, ti Anak ti tao.” (Juan 3:13) Kinapudnona, ti Anak ti tao ti kaunaan a napagungar kas espiritu a persona. (Aramid 26:23) Ngem adda dagiti simmaruno a napagungar kas espiritu a parsua. Kuna ti Kasuratan: “Tunggal maysa iti bukodna a saad: ni Kristo ti umuna a bungbunga, kalpasanna dagidiay kukua ti Kristo kabayatan ti kaaddana.”—1 Corinto 15:23.
Maysa a bassit a grupo dagiti tattao—“dagidiay kukua ti Kristo”—ti mapagungar iti biag idiay langit para iti maysa a naisangsangayan a panggep. (Roma 6:5) Agturayda a kadua ni Kristo kas “ar-ari iti daga.” (Apocalipsis 5:9, 10) Kanayonanna, agserbida kas papadi iti anag a makiramanda iti panangikkat kadagiti epekto ti basol a natawid ti sangatauan manipud ken Adan, ti umuna a tao. (Roma 5:12) Agdagup iti 144,000 dagidiay makipagturay ken Kristo kas ar-ari ken papadi. (Apocalipsis 14:1, 3) Ania a kita ti bagi ti maawatda inton mapagungarda? “Naespirituan a bagi,” kuna ti Biblia. Dayta ti mamagbalin a posible a makapagbiagda idiay langit.—1 Corinto 15:35, 38, 42-45.
Kaano a mapagungar dagiti mapan idiay langit? “Kabayatan ti kaadda [ni Kristo],” isungbat ti 1 Corinto 15:23. Dagiti pasamak iti lubong sipud idi 1914 silalawag nga ipakitada a nangrugi iti dayta a tawen ti kaadda ni Kristo ken “ti panungpalan ti sistema ti bambanag.” (Mateo 24:3-7) Gapuna, nainrasonan nga ibaga a nangrugin ti nailangitan a panagungar dagiti matalek a Kristiano, nupay siempre saan a makita dayta dagiti tattao. Kayatna a sawen a dagiti apostol ken dagiti nagkauna a Kristiano napagungardan iti nailangitan a biag. Komusta met dagiti agdama a Kristiano nga addaan iti sigurado, inted-Dios a namnama a makipagturay ken ni Kristo idiay langit? Mapagungarda “iti panagkirem ti mata,” wenno apaman a matayda. (1 Corinto 15:52) Yantangay ti panagungar daytoy a bassit a grupo dagiti 144,000 sarunuento ti panagungar ti dakkel a bilang dagidiay mapagungar iti biag ditoy daga, naawagan dayta iti “nasapsapa a panagungar” ken “umuna a panagungar.”—Filipos 3:11; Apocalipsis 20:6.
Siasino ti Mapagungar nga Agbiag Ditoy Daga?
Sigun iti Kasuratan, mapagungar ditoy daga ti kaaduan kadagiti natay. (Salmo 37:29; Mateo 6:10) Iti panangdeskribirna iti makapaamanga a nasirmatana maipapan kadagidiay napagungar, insurat ni apostol Juan: “Ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada, ket naukomda a tumunggal maysa sigun kadagiti aramidda. Ket ni patay ken ti Hades naitapuakda iti danaw nga apuy. Daytoy kaipapananna ti maikadua nga ipapatay, ti danaw nga apuy.” (Apocalipsis 20:11-14) Dagidiay adda idiay Hades, wenno Sheol—ti tanem—addada iti lagip ti Dios. Mapagungarto amin dagitoy. (Salmo 16:10; Aramid 2:31) Ken maukom ti tunggal maysa sigun iti ar-aramidna kalpasan a mapagungar. Kalpasanna, anianto ti mapasamak iti ipapatay ken iti Hades? Maitapuak dagitoy iti “danaw nga apuy.” Kaipapananna a dagiti tattao didanto mapasaranen ti ipapatay nga impatawid ni Adan.
Panunotenyo laengen ti naragsak a namnama a linuktan ti kari a panagungar kadagidiay natayan iti ing-ingungoten! Idi pinagungar ni Jesus ti bugbugtong nga anak a lalaki ti maysa a balo idiay Nain, nakaragragsak la ketdi ti balo! (Lucas 7:11-17) Ken no maipapan iti narikna dagiti dadakkel ti agtawen iti 12 a balasitang a pinagungar ni Jesus, kuna ti Biblia: “Dagus a saanda a natngelan ti riknada buyogen ti dakkel a panagsiddaaw.” (Marcos 5:21-24, 35-42; Lucas 8:40-42, 49-56) Iti baro a lubong nga inkari ti Dios, makaparagsakto ti mangabrasa manen kadagiti ing-ingungotentayo.
Ania ti mabalin nga epektona kadatayo ti panangammo iti kinapudno maipapan iti panagungar? Kuna ti The World Book Encyclopedia a “kaaduan a tattao kaamakda ti ipapatay ket dida kayat a panunoten ti maipapan iti dayta.” Apay? Ngamin matmatanda ti ipapatay kas maysa a misterio—maysa a banag a saan nga ammo ken nakabutbuteng. No ammotayo ti kinapudno maipapan iti kasasaad dagiti natay ken addaantayo iti namnama a panagungar, naturedtayo a mangsango iti “maudi a kabusor, ni patay.” (1 Corinto 15:26) Daytoy a pannakaammo ti tumulong met kadatayo a mangdaer iti saem a mariknatayo no matayantayo iti nasinged a gayyem wenno kabagian.
Kaano a mangrugi ti panagungar ditoy daga? Iti agdama, napno ti daga iti kinaranggas, riribuk, panangpapatay, ken polusion. No mapagungar dagiti natay a kasta ti kasasaad iti daga, sigurado a temporario laeng ti kinaragsakda. Ngem inkari ti Namarsua nga asidegen a pagpatinggaenna ti agdama a lubong nga adda iti sidong ti impluensia ni Satanas. (Proverbio 2:21, 22; Daniel 2:44; 1 Juan 5:19) Asidegen a matungpal ti panggep ti Dios iti daga. Kalpasanna, iti natalna a baro a lubong ti Dios, agbiagto manen ti binilion a natay a tattao.
[Ladawan iti panid 7]
Kaaduan a natay ti mapagungarto iti biag ditoy daga