Maysa a Baro a Biag Agpaay Kadagiti Inapotayo

ISURSURO kadi ti Sao ti Dios, ti Biblia, nga amin ket gagangay nga agtultuloy nga agbiag iti lubong dagiti espiritu kalpasan ti ipapatay? Saan, saanna nga isursuro dayta. Idatag ti Biblia ti nakaskasdaaw a namnama iti biag kalpasan ti ipapatay, ngem saan a kas iti pampanunoten dagiti adu.

Usigenyo no aniat’ kuna ti Biblia maipapan iti immuna nga inapotayo, ni Adan. Isut’ binukel ni Jehova “[manipud] iti tapok ti daga.” (Genesis 2:7) Adda gundaway idi ni Adan nga agbiag nga agnanayon iti kinaragsak ditoy daga. (Genesis 2:16, 17) Nupay kasta, immalsa a maibusor iti naayat a Namarsuana, ket nagbanag [daytoy] iti ipapatay.

Sadino ti napanan ni Adan idi natay? Kinuna ti Dios kenkuana: “Agsubli[kanto] iti daga, isu a nakabuklam. Ta tapokka ket iti tapok agsublikanto.”​—Genesis 3:19.

Sadino ti yan ni Adan sakbay a pinarsua ni Jehova manipud iti tapok? Awan. Isut’ awan idi. Isu nga idi kinuna ni Jehova nga “agsubli [ni Adan] iti daga,” kaipapananna laeng nga agbalinto manen ni Adan nga awan biagna, kas iti tapok. Saan a ‘bimmallasiw’ ni Adan tapno agbalin a pundador nga ama iti maysa a lubong dagiti espiritu nga inapo. Saan nga immallatiw iti maysa a naragsak a biag idiay langit wenno iti agnanayon a panagsagaba iti lugar a pagtutuokan. Ti laeng immallatiwanna ket manipud iti biag a nagturong iti kinaawan biagna, manipud iti kinaadda a nagturong iti kinaawan.

Komusta met ngay dagiti dadduma iti sangatauan? Maawan met aya dagiti kaputotan ni Adan no matayda? Sumungbat ti Biblia: “Isuda amin [agpadpada dagiti tao ken animal] mapanda iti maymaysa a disso. Isuda amin aggapuda iti tapok, ket isuda amin agsublida manen iti tapok.”​—Eclesiastes 3:19, 20.

Kasasaad Dagiti Natay

Wen, awan biag dagiti natay, saanda a makangngeg, makakita, makapagsao, wenno makapagpanunot. Kas pagarigan, kuna ti Biblia: “Dagiti sibibiag ammoda a mataydanto; ngem dagiti natay dida ammo ti aniaman . . . Ti ayatda, ti gurada ken ti apalda, napukawen iti nabayag.” Kunaen pay ti Biblia: “Awan ti aramid, wenno gakat, wenno pannakaammo, wenno sirib idiay Sheol [tanem] a papanam.”​—Eclesiastes 9:5, 6, 10.

Gapuna, sigun iti Sao ti Dios, bayat a sibibiag dagiti tattao, ammoda a matayda. Nupay kasta, inton matayda, awanton ti ammoda. Saanda nga agtakder iti abay ti bukodda a bangkay, a palpaliiwenda no aniat’ maaramid iti dayta. Iti kinaawan, agpadpada nga awan kinaragsak wenno ut-ot, awan rag-o wenno ladingit. Saanen a mapuotan dagidiay natay ti panaglabas ti panawen. Nakarkaro ti naan-anay a kinaawan-puotda ngem iti aniaman a turog.

Ammo ni Job, maysa nga adipen ti Dios idi ugma, a saan nga agtultuloy nga agbiag dagiti tattao kalpasan ti ipapatay. Naawatanna met a no saan a makibiang ti Dios, awan ti namnamada nga agbiag manen. Kinuna ni Job: “Ti tao matay, ket maipababa; wen, ti tao iyawatna ti kararuana, ket sadino ti yanna? [Isu] agpasag ket saanen a bumangon.” (Job 14:10, 12) Sigurado a saan a ninamnama ni Job nga inton matay makitiponto kadagiti inapona iti lubong dagiti espiritu.

Ti Namnama a Panagungar

Yantangay agawan ti sibibiag no matay, imbangon ni Job ti maysa a narikut a saludsod idi inimtuodna: “No matay ti tao, agbiagto aya manen?” Impaay a mismo ni Job daytoy a sungbat: “Amin nga aldaw ti pannakigubatko [panawen iti uneg ti tanem] agurayak koma, agingga a ti pannakawayawayak dumteng. [Jehova] umawagka koma, ket sungbatanka. Adda koma maysa a kalikagummo iti aramid dagita imam.”​—Job 14:14, 15.

Iti sabali a pannao, nupay lumasat ni Job iti kinaawan, isut’ saanto a malipatan ti Dios. Namati ni Job a dumtengto ti tiempo inton isut’ ‘awagan’ ni Jehova a Dios nga agbiag manen babaen ti panagungar.

Impakita ni Jesu-Kristo, ti Anak ti Dios, a ti namnama ni Job iti panagungar ket maysa a kinapudno. Pinaneknekan ni Jesus a bumangonto dagiti natay. Kasano? Babaen ti panangaramidna a mismo iti dayta! Awan idi sadiay tapno pagungarenna ni Job, ngem bayat ti kaaddana ditoy daga, pinagungar ni Jesus ti anak a lalaki ti maysa a balo manipud iti siudad ti Nain. Pinagbiag met ni Jesus ti 12-ti-tawenna a balasang ti maysa a lalaki nga agnagan Jairo. Ken pinagungarna ni gayyemna a Lazaro, nga uppat nga aldawen a natay.​—Lucas 7:11-15; 8:41, 42, 49-56; Juan 11:38-44.

Mainayon pay iti panangaramidna kadagitoy a milagro, dinakamat ni Jesus ti maysa a naindaklan a panagungar iti masanguanan. Kinunana: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna ket rummuardanto.” (Juan 5:28, 29) Idi agangay, ni apostol Pablo, nga inaramat ni Jehova a mangpagungar iti maysa a baro, inyebkasna met ti pammatina iti masanguanan a panagungar. Kinunana: “Adda inanamak iti Dios . . . nga addanto panagungar agpadpada dagiti nalinteg ken dagiti nakillo.”​—Aramid 20:7-12; 24:15.

Dagitoy a Nainkasuratan a panangtukoy iti masanguanan a panagungar saan a nainaig iti agtultuloy a biag iti lubong dagiti espiritu. Tuktukoyenda ti tiempo inton dagiti riniwriw a natay mapagungardanto iti pisikal a bagi ditoy daga a mismo. Dagitoy a mapagungar ket saanto a tattao a nakalipaten iti napalabas a panagbiagda ditoy daga. Saandanto a mayanak manen kas maladaga. Imbes ketdi, isudanto dagiti persona a kas met laeng idi natayda, nga addaan iti isu met laeng a lagip ken personalidad. Mabigbigdanto ti bagbagida ken dagiti sabsabali. Anian a rag-onto dayta inton makitipon manen dagitoy a tattao kadagiti gagayyem ken pamiliada! Ket anian a makaparagsakto ti mangsabat kadagiti inapotayo!

Panagungar iti Biag Idiay Langit

Saan kadi a kinuna ni Jesus a daddumat’ mapanto idiay langit? Wen, imbagana dayta. Iti daydi rabii sakbay ti pannakapapatayna, kinunana: “Idiay balay ni Amak adu dagiti paggianan. . . . Mapanak tapno isaganak ti maysa a lugar a maipaay kadakayo. Kasta met, no mapanak ket isaganak ti maysa a lugar a maipaay kadakayo, umayakto manen ket awatenkayto kaniak a mismo iti pagtaengan, tapno no sadino ti yanko addakayo met koma.” (Juan 14:2, 3) Kasarsarita idi ni Jesus dagiti matalek nga apostolna, ngem ti sasaona dida kayat a sawen a mapan amin a naimbag a tattao idiay langit.

Impakita ni Jesus a dagidiay mapagungar idiay langit masapul a ragpatenda dagiti pagannurotan imbes nga agbiag laeng a sisisingpet. Ti maysa a pagannurotan isut’ pananggun-od iti umiso a pannakaammo maipapan ken Jehova ken kadagiti panggepna. (Juan 17:3) Ti sabali pay a pagannurotan isut’ panangalagad iti pammati iti daton a subbot ni Jesu-Kristo ken ti panagtulnog iti Dios. (Juan 3:16; 1 Juan 5:3) Malaksid iti dayta, ti sabali pay a pagannurotan isut’ ‘pannakayanak manen’ kas maysa a nabautisaran a Kristiano a pinulotán babaen ti nasantuan nga espiritu ti Dios. (Juan 1:12, 13; 3:3-6) Ti kanayonan pay a pagannurotan maipaay iti nailangitan a biag isut’ panagibtur a kas iti inaramid ni Jesus, a pinaneknekanna a matalek iti Dios uray pay agingga ken patay.​—Lucas 22:29; Apocalipsis 2:10.

Adda makagapu maipaay kadagiti kasta a natan-ok a pagannurotan. Dagidiay mapagungar idiay langit addaanda iti napateg a trabaho nga aramiden. Ammo ni Jehova a saan a pulos nga agballigi dagiti natauan a gobierno a mangtaming kadagiti ganuat ditoy daga. Isu nga inyurnosna ti maysa a nailangitan a gobierno, wenno Pagarian, a mangiturayto iti sangatauan. (Mateo 6:9, 10) Ni Jesus isunto ti Ari iti dayta a Pagarian. (Daniel 7:13, 14) Makipagturayto kenkuana ti sumagmamano a napili ditoy daga ken mapagungar idiay langit. Impadto ti Biblia a dagitoy a napagungar agbalindanto a “pagarian ken papadi iti Diostayo, ket agturaydanto a kas ar-ari iti daga.”​—Apocalipsis 5:10.

Adu kadi unay a tattao ti makaragpat kadagiti pagannurotan maipaay iti nailangitan a pannakapagungar? Saan. Maigapu kadagiti rason a saanda a gapuanan, saan a maikari ti kaaduan a naturog ken patay. Bassit wenno awan gundaway dagiti adu a mangadal iti kinapudno maipapan ken Jehova ken kadagiti panggepna. Nagbiag ken natayda nga awanan aniaman a pannakaammo ken ni Jesu-Kristo wenno iti Pagarian ti Dios.

Inawagan ni Jesus dagidiay mapan idiay langit a “bassit nga ipastoran.” (Lucas 12:32) Idi agangay, naipalgak a 144,000 ti bilang dagidiay “nagatang manipud iti daga” a makipagari ken Kristo idiay langit. (Apocalipsis 14:1-3; 20:6) Nupay ti 144,000 ket dakkel metten a bilang nga apag-isu a mangpunno iti ‘adu a paggianan’ a tinukoy ni Jesus, bassit dayta no idilig iti binilion a tattao a nagtaud ken Adan.​—Juan 14:2.

Paspasamak Sakbay ti Naindagaan a Panagungar

Repasuentay ti napagsasaritaantayon. Sigun iti Biblia, dagidiay matay ket awan biagda iti ipapatay agingga a pagungaren ida ni Jehova a Dios. Daddumat’ mapagungar iti biag idiay langit, a sadiay ti pagturayandanto a kadua ni Jesu-Kristo iti gobierno ti Pagarian. Kaaduan a tattao mapagungardanto ditoy daga, tapno agbalin nga iturayan dayta a Pagarian.

Iti pasetna, babaen ti naindagaan a panagungar, tungpalento ni Jehova ti panggepna agpaay iti daga. Pinarsua daytoy ni Jehova ‘tapno pagianan.’ (Isaias 45:18) Isu daytoy ti agbalin a permanente a pagtaengan ti sangatauan. Gapuna, inkanta ti salmista: “Dagiti langlangit isuda dagiti langlangit ni Jehova, ngem ti daga intedna kadagiti annak dagiti tattao.”​—Salmo 115:16.

Sakbay a mangrugi ti panagungar ti biag ditoy daga, masapul a maaramid dagiti dakkel a panagbalbaliw. Mabalin nga umanamongkayo a saan a pinanggep ti Dios a mapunno ti daga iti gubat, polusion, krimen, ken kinaranggas. Dagitoy a parikut ket pinataud ti tattao nga awanan panagraem iti Dios ken kadagiti nalinteg a pagalagadanna. Gapuna, ‘iyegto ti Pagarian ti Dios iti pannakadadael dagidiay mangdaddadael iti daga’​—maysa a kapatgan nga addang tapno matungpal ti pagayatanna ditoy daga. (Apocalipsis 11:18) Ti Pagarian dadaelennanto amin dagiti nadangkes a tattao, a palubosanna dagiti nalinteg nga agbiag ditoy daga iti agnanayon.​—Salmo 37:9, 29.

Paraiso Ditoy Daga

Dagidiay mapagungar iti nadalusan a daga isudanto dagiti naalumamay ti kaririknada, maseknan a tattao nga agar-aramid iti umiso. (Idiligyo ti Mateo 5:5.) Iti sidong ti naayat a panangaywan ti Pagarian ti Dios, agbiagdanto a siraragsak iti kinatalged. Ipaay ti Biblia daytoy nakaskasdaaw a pangripiripan kadagiti kasasaad nga agrairanto: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:4.

Wen, ti daga mapagbalinto a paraiso. (Lucas 23:43) Panunotenyo no aniantot’ kaipapanan dayta! Saanton a maaramat dagiti ospital ken balay a pagtaraknan. Idiay paraiso, dagidiay parparigaten itatta dagiti epekto ti panaglakay agbalindanto manen a napigsa ken nasalun-at. (Job 33:25; Isaias 35:5, 6) Awanton dagiti puneraria, sementerio, ken panteon. Babaen ti Pagarianna, ni Jehova ‘alimonennanton nga agnanayon ni patay.’ (Isaias 25:8) Dagiti kasta a bendision sigurado a kaipapanannantot’ baro a biag kadatayo ken kadagiti inapotayo.

[Ladawan iti panid 7]

Dagidiay mapagungar ditoy daga agbalindanto nga iturayan ti Pagarian