‘Napategak Ngata iti Dios?’

‘NAPATEGAK ngata? Maseknan ngata ti Dios?’ Kasta ti mabasa a paulo ti maysa nga artikulo nga agparang iti Christianity Today. “Dakkel a paset ti karerak kas maysa a mannurat ti agliklikmut iti parikut ti ut-ot,” kuna ni Philip Yancey, ti autor ti artikulo. “Agsublisubliak iti isu met laeng a salsaludsod, nga arignat’ ar-arikapek ti maysa a nabayagen a sugat a di aglunlunit. Makadamagak kadagiti managbasa iti librok, ket dagiti makatuok nga estoriada pasingkedanna dagiti panagduaduak.”

Nalabit pinampanunotyo metten ti maipapan iti panaginteres ti Dios iti biagyo. A, mabalin a kabesadoyon ti Juan 3:16, a mangibagbaga a “ti Dios inayatna ti lubong iti kasta unay isu nga intedna ti bugbugtong nga Anakna.” Wenno mabalin a nabasayon ti Mateo 20:28, nga agkunkuna nga immay ni Jesus “tapno itedna ti kararuana a subbot a kasukat dagiti adu.” Kaskasdi mabalin a maisaludsodyo, ‘Kitkitaennak ngata ti Dios? Maseknan ngata kaniak kas maysa nga indibidual?’ Adda nasayaat a pamatian nga isut’ maseknan, kas ti makitatayo.