Felipe​—Naregta nga Ebanghelisador

NAGLAON ti Kasuratan iti adu a pakasaritaan dagiti lallaki ken babbai nga addaan mapagwadan a pammati. Usigentayo ni Felipe, maysa a Kristiano a misionero idi umuna a siglo. Saan nga apostol, ngem epektibo a nausar a nangisaknap iti mensahe ti Pagarian. Kinapudnona, nagdindinamag ni Felipe kas “ti managebanghelio.” (Aramid 21:8) Apay a naawagan ni Felipe iti kasta? Ken ania ti maadaltayo kenkuana?

Nagparang ni Felipe iti rekord ti Biblia kalpasan unay ti Pentecostes 33 K.P. Madama idi nga agtatanabutob dagiti Judio a Griego ti pagsasaoda maibusor kadagiti Judio a Hebreo ti pagsasaoda, a kunada a di mawarwarasan dagiti kakaduada a balo iti inaldaw a rasion a taraon. Tapno marisut dayta, nangdutok dagiti apostol iti “pito a napaneknekan a lallaki.” Maysa ni Felipe kadagiti napili.​—Aramid 6:1-6.

Dagitoy a pito a lallaki ket “napaneknekan.” Kuna ti patarus ni James Moffatt nga addaanda “iti nasayaat a reputasion.” Wen, agdindinamagda idin kas naespirituan a lallaki nga addaan iti nasimbeng a panagpampanunot idi a nadutokanda. Kasta met kadagiti agserserbi ita kas Kristiano a manangaywan. Saan a dinadarasudos a madutokanda. (1 Timoteo 5:22) Masapul nga addaanda “iti nasayaat a pammaneknek manipud kadagiti tattao iti ruar,” ken pagaammo koma ida dagiti padada a Kristiano kas rasonable ken addaan nasimbeng a panunot.​—1 Timoteo 3:2,3,7; Filipos 4:5.

Nabatad, intungpal a naimbag ni Felipe ti annongenna idiay Jerusalem. Di nagbayag, nupay kasta, nagsasaruno ti nakas-ang a panangidadanes a nakaigapuan ti pannakawarawara dagiti pasurot ni Kristo. Kas kadagiti dadduma, pinanawan ni Felipe ti siudad, ngem saan a nagpatingga ti ministeriona. Di nagbayag, okupadon a nangaskasaba iti maysa a baro a teritoria​—idiay Samaria.​—Aramid 8:1-5.

Pananglukat Kadagiti Baro a Teritoria

Impakpakauna ni Jesus a mangasabanto dagiti adalanna “agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Iti panangasabana sadi Samaria, nakiraman ni Felipe iti pannakatungpal dagita a sasao. Kadawyan a dagiti Judio um-umsienda idi dagiti Samaritano. Ngem saan nga inukom ni Felipe dagitoy a tattao, ket nagunggonaan ti dina panangidumduma. Kinapudnona, adu a Samaritano ti nabautisaran, agraman ti maysa a dati a managsalamangka nga agnagan Simon.​—Aramid 8:6-13.

Idi agangay, inturong ti anghel ni Jehova ni Felipe iti desierto a dalan a namagsilpo iti Jerusalem ken Gaza. Nakita ni Felipe ti maysa a karuahe a sadiay nakalugan ti maysa nga opisial nga Etiope a sipipigsa a mangbasbasa iti padto ni Isaias. Nagtaray nga immasibay ni Felipe iti karuahe ket nangrugi a nakipatang. Nupay maysa ti Etiope a proselita nga addaan pannakaammo iti Dios ken iti Kasuratan, sipapakumbaba nga inaminna a kasapulanna ti panangiwanwan tapno matarusanna ti basbasaenna. Ngarud, inawisna ni Felipe a lumugan iti karuahe ket makikatugaw kenkuana. Kalpasan a nakasabaan ti Etiope, dimtengda iti lugar nga adda danum. “Ania ti makalapped kaniak a mabautisaran?” inyimtuod ti Etiope. Isut’ dagdagus a binautisaran ni Felipe, ket sirarag-o ti Etiope a nagtuloy iti dalanna. Nalabit, inrakurak daytoy baro nga adalan ti naimbag a damag iti pagilianna.​—Aramid 8:26-39.

Ania ti maadaltayo manipud ministerio ni Felipe kadagiti Samaritano ken iti opisial nga Etiope? Ditay koma pulos ipapan a dagiti tattao a sabali ti nasionalidad, rasa, wenno sosial a takderda ket di aginteres iti naimbag a damag. Imbes ketdi, iwaragawagtayo ti mensahe ti Pagarian iti “amin a kita ti tattao.” (1 Corinto 9:19-23) No madadaantayo a mangasaba iti amin, mabalinnatay nga aramaten ni Jehova iti trabaho a ‘panangaramid kadagiti adalan iti amin a nasnasion’ sakbay nga umay ti panungpalan daytoy dakes a sistema.​—Mateo 28:19, 20.

Dagiti Kanayonan a Pribilehio ni Felipe

Kalpasan ti panangasabana iti opisial nga Etiope, nangasaba ni Felipe idiay Asdod, “ket limmasat iti teritoria ket intultuloyna nga ideklara ti naimbag a damag kadagiti amin a siudad agingga a nakadanon idiay Cesarea.” (Aramid 8:40) Idi umuna a siglo, adu ti umili a Gentil kadagitoy dua a siudad. Idi agpaamianan nga agturong iti Cesarea, nalabit nangasaba ni Felipe kadagiti prominente a lugar dagiti Judio a kas iti Lidda ken Joppe. Nalabit dayta ti gapuna nga idi agangay adda dagiti adalan a masarakan kadagitoy a lugar.​—Aramid 9:32-43.

Sa la nadakawat ni Felipe iti maudi a gundaway kalpasan ti 20 a tawen. Iti ngudo ti maikatlo a panagdaliasatna kas misionero, dimteng ni Pablo iti Ptolemais. “Iti sumaganad nga aldaw,” kuna ni Lucas a kadua ni Pablo, “nagluaskami ket dimtengkami idiay Cesarea, ket simrekkami iti balay ni Felipe a managebanghelio.” Ngem ita, addaanen ni Felipe iti “uppat nga annak a babbai, a birhen, nga agipadpadto.”​—Aramid 21:8,9.

Agparang a nagnaed ni Felipe sadi Cesarea. Ngem adda pay la kenkuana ti espiritu ti kinamisionerona, yantangay isu ket inawagan ni Lucas kas “ti managebanghelio.” Masansan nga ipamatmat daytoy nga ebkas ti maysa a pumanaw iti pagtaenganna tapno ikasabana ti naimbag a damag kadagiti di pay nakasabaan a rehion. Ipasimudaag ti kinamammadto dagiti uppat a babbalasang ni Felipe a tinuladda ti ulidan ti naregta nga amada.

Rumbeng a laglagipen dagiti agdama a Kristiano a nagannak a dagiti annakda ti kangrunaan nga adalanda. Uray ibbatan dagiti kasta a nagannak dagiti teokratiko a pribilehioda gapu kadagiti responsabilidad iti pamiliada, makapagtalinaedda a kas ken Felipe a napudno nga ad-adipen ti Dios ken mapagulidanan a nagannak.​—Efeso 6:4.

Ti ibibisita ni Pablo ken dagiti kakaduana ti nangted iti nasayaat a gundaway iti pamilia ni Felipe a mangipakita iti kinamanagpadagus. Panunotenyo laengen ti panagpipinnaregtada! Iti daytoy nga okasion ti nalabit nakadamagan ni Lucas kadagiti detalye maipapan kadagiti aktibidad ni Felipe, a nairaman kamaudiananna iti Aramid kapitulo 6 ken 8.

Inaramat ni Jehova a Dios iti kasta unay ni Felipe a nangyadelantar iti interes ti Pagarian. Ti kinaregta ni Felipe ti nakatulong kenkuana a nangisaknap iti naimbag a damag kadagiti baro a teritoria ken nangparayray iti nasayaat a naespirituan a kasasaad iti uneg ti pagtaenganna. Kayatyo met kadi a tagiragsaken dagiti umasping a pribilehio ken gunggona? Ikagumaanyo ngarud a tuladen dagiti galad nga impakita ni Felipe nga ebanghelisador.