Talaga Kadi a Mabalinyo nga Ayaten ti Dios?
“AWAN ti tao a makakita kaniak ket agbiag,” kuna ti Dios. (Exodo 33:20) Mainayon pay, sipud idi panawen ti Biblia awan ti pammaneknek iti asinoman a tao a naaddaan iti direkta a komunikasion kenkuana. Kasla kadi narigat—nga imposible pay ketdi—a patanoren ti nauneg a panagayat iti maysa a pulos a diyo pay nakita wenno nangngeg a direkta? Talaga kadi a posible ti maaddaan iti naayat a relasion iti Namarsua iti uniberso?
Rumbeng a di pagduaduaan a posible ti mangpatanor iti nabara a personal a relasion iti Dios. Iti Deuteronomio 6:5, mabasatayo a naibilin iti nasion ti Israel: “Sika ayatemto ni Jehova a Diosmo iti isu-amin a pusom ken iti isuamin a kararuam ken iti isuamin a kabaelam.” Pinasingkedan manen kamaudiananna ni Jesu-Kristo daytoy a linteg kadagiti pasurotna sa innayonna: “Daytoy ti kadakkelan ken umuna a bilin.” (Mateo 22:37, 38) Balakadannatayo kadi ti Biblia nga ayatentay ti Dios no saan a posible ti kasta a relasion?
Ngem namnamaen aya ni Jehova nga ayatentayo isuna gapu laeng ta ibilbilinna dayta? Saan. Pinarsua ti Dios ti immuna a pagassawaan nga addaan kapasidad a mangayat kenkuana. Saan a naipilit kada Adan ken Eva ti naayat a pannakirelasion iti Namarsua kadakuada. Imbes ketdi, inkabil ti Dios ida kadagiti kasayaatan a kasasaad a pakapatanoranda iti nauneg a panagayat kenkuana. Adda pagpilianda—umadanida iti Dios wenno umadayoda kenkuana.
Pinili da Adan ken Eva ti agrebelde. (Genesis 2:16, 17; 3:6, 7) Nupay kasta, addaan dagiti kaputotanda iti potensial a mangpatanor iti naayat a pannakirelasion iti Namarsua kadakuada.
Pannakipagna iti Pudno a Dios
Kas pagarigan, iti Biblia, madakdakamat ni Abraham kas “gayyem” ti Dios. (Santiago 2:23) Ngem saan laeng a ni Abraham ti kakaisuna a nangtagiragsak iti nasinged a relasion iti Dios. Dakamaten ti Biblia ti adu a sabsabali pay nga imperpekto a tattao a nangipakita iti napudno a panagayat ken Jehova ken “nakipagna iti pudno a Dios.”—Genesis 5:24; 6:9; Job 29:4; Salmo 25:14; Proverbio 3:32.
Saan a nainkasigudan nga adda panagayat ken panangipategda iti Dios dagiti adipen ti Dios idi ugma. Kasapulan a patanorenda dayta. Kasano? Babaen ti panangammoda kenkuana iti personal a naganna, a Jehova. (Exodo 3:13-15; 6:2, 3) Babaen ti panagbalinda a sipapanunot iti kaadda ken kina-Diosna. (Hebreo 11:6) Babaen ti naynay a panangmennamennada iti kinamanagayatna. (Salmo 63:6) Babaen ti panangikararagda kadagiti linaon ti panunotda iti Dios. (Salmo 39:12) Babaen ti panangammoda iti kinaimbagna. (Zacarias 9:17) Babaen ti panangpatanorda iti makagunggona a panagbuteng a mangparurod kenkuana.—Proverbio 16:6.
Makapagbalinkayo aya a gayyem ti Dios ken makipagna kenkuana? Pudno, saanyo a makita ti Dios wenno mangngeg ti timekna. Nupay kasta, aw-awisennakayo ni Jehova nga agbalin ‘a sangaili iti toldana,’ ti gayyemna. (Salmo 15:1-5) Gapuna, mabalinyo nga ayaten ti Dios. Ngem kasanoyo a mapatanor ti nasinged ken nadungngo a pannakirelasion kenkuana?