Panagbiag Para iti Agdama Wenno iti Agnanayon a Masanguanan?
“Naisalakantayo iti daytoy a namnama.”—ROMA 8:24.
1. Ania ti insuro dagiti Epicureo, ket kasano nga inapektaran ti kasta a pilosopia dagiti dadduma a Kristiano?
INSURAT ni apostol Pablo kadagiti Kristiano nga agnanaed sadi Corinto: “Kasano a ti sumagmamano kadakayo kunaenda nga awan ti panagungar dagiti natay?” (1 Corinto 15:12) Agparang a naimpluensiaan dagiti Kristiano idi umuna a siglo iti makasabidong a pilosopia ti Griego a pilosopo a ni Epicurus. Isu nga inturong ni Pablo ti atension iti sursuro dagiti Epicureo: “Mangan ken uminumtayo, ta inton bigat mataytayo.” (1 Corinto 15:32) Linais dagiti pasurot ti pilosopo ti aniaman a namnama maipanggep iti biag kalpasan ti ipapatay, ket patienda a ti nainlasagan a ragragsak ti kakaisuna wenno kangrunaan a banag iti biag. (Aramid 17:18, 32) Managimbubukod, negatibo, ken makadadael ti pilosopia dagiti Epicureo.
2. (a) Apay a nakapegpeggad ti panangilibak iti panagungar? (b) Kasano a pinabileg ni Pablo ti pammati dagiti Kristiano sadi Corinto?
2 Dakkel ti epekto daytoy a panangilibak iti panagungar. Inkalintegan ni Pablo: “Kinapudnona, no awan ti panagungar dagiti natay, uray ni Kristo di met napagungar. Ngem no ni Kristo di napagungar, ti panangaskasabami pudno nga ubbaw, ken ti pammatitayo ubbaw. . . . No iti daytoy laeng a biag a nanginanamatayo ken Kristo, kadagiti amin a tattao datayo ti nakakaasi unay.” (1 Corinto 15:13-19) Wen, no awan ti namnama iti agnanayon a masanguanan, “ubbaw” ti Kinakristiano. Awan koma ti mamaayna. Di ngad pakasdaawan a gapu iti impluensia daytoy a pinapagano a kapanunotan, agsusukot dagiti problema ti kongregasion sadi Corinto. (1 Corinto 1:11; 5:1; 6:1; 11:20-22) Gapuna, panggep ni Pablo a patibkeren ti pammatida iti panagungar. Babaen ti panangaramatna iti nainkalintegan a panagrasrason, panangadaw iti Kasuratan, ken ilustrasion, sibabatad a pinaneknekanna a saan a pinarparbo ti namnama iti panagungar no di ket agpayso a sigurado a mapasamakto. Maibatay iti daytoy, maidagadagna kadagiti kapammatianna: “Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.”—1 Corinto 15:20-58.
“Agtultuloykayo nga Agbantay”
3, 4. (a) Sigun ken Pedro, ania a napeggad a kababalin ti agari kadagiti dadduma iti maudi nga al-aldaw? (b) Ania ti nasken a laglagipentayo a kanayon?
3 Adu ita ti pesimistiko, nga agbibiag para laeng iti agdama. (Efeso 2:2) Impakpakauna dayta ni apostol Pedro. Dinakamatna “dagiti managuy-uyaw agraman ti panguy-uyawda . . . [a] kunkunada: ‘Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.’” (2 Pedro 3:3, 4) No umayon dagiti pudno a managdaydayaw iti kasta a panagpampanunot, posible nga agbalinda a “di aktibo wenno di nabunga.” (2 Pedro 1:8) Makaparagsak, saan a kasta ti kaaduan iti ili ti Dios ita.
4 Saan a dakes ti aginteres iti um-umay a panungpalan ti agdama a dakes a sistema. Lagipenyo ti panaginteres dagiti mismo nga apostol ni Jesus: “Apo, isublim kadi ti pagarian ti Israel iti daytoy a tiempo?” Insungbat ni Jesus: “Saan nga agpaay kadakayo ti panangammo kadagiti tiempo wenno pampanawen nga inkabil ti Ama iti bukodna a masakupan.” (Aramid 1:6, 7) Kasta met laeng ti kababagas ti imbagana idi idiay Bantay dagiti Olibo: “Dikay ammo no iti ania nga aldaw nga umay ti Apoyo. . . . Iti oras a dikay ipagarup nga isu dayta, ti Anak ti tao umay.” (Mateo 24:42, 44) Nasken a laglagipentay a kanayon dayta a balakad! Nalabit agduyos ti dadduma a mangikuna, ‘Aginanaak pay bassit ken agaliwaksay.’ Anian a biddut dayta! Panunotenyo da Santiago ken Juan, dagiti “Annak ti Gurruod.”—Marcos 3:17.
5, 6. Ania ti maadaltayo kada Santiago ken Juan?
5 Ammotayo a naregta unay nga apostol ni Santiago. (Lucas 9:51-55) Idi naipasdek ti kongregasion Kristiano, dakkel la ketdi nga annongen ti naipabaklay kenkuana. Ngem kabambannuagan pay la ni Santiago idi pinapapatay ni Herodes Agripa I. (Aramid 12:1-3) Ipapantay kadi a pinagbabawyan ni Santiago ti kinaregta ken kinapingetna iti ministerio idi makitana a di ninamnama nga aggibusen ti biagna? Saan a pulos! Sigurado a naragsakan a nangusar iti kinaagkabannuagna bayat ti ababa a panagbiagna iti panagserbi ken Jehova. Ita, awan kadatayo ti makaammo no kaano a kellaat nga aggibus ti biagtayo. (Eclesiastes 9:11; idiligyo ti Lucas 12:20, 21.) Isu a nalawag a nainsiriban nga agtalinaedtayo a naregta ken aktibo unay iti panagserbi ken Jehova. Iti kasta mataginayontayo ti naimbag a nagantayo iti imatangna ket agtultuloytayto nga agbiag iti agnanayon a masanguanan.—Eclesiastes 7:1.
6 Adda maadaltayo ken apostol Juan, a presente idi sipapasnek nga indagadag ni Jesus, “Agtultuloykayo nga agbantay.” (Mateo 25:13; Marcos 13:37; Lucas 21:34-36) Impapuso dayta ni Juan, a sigagagar a nagserbi iti adu a dekada. Kinapudnona, kadagiti amin nga apostol, agparang nga isu laengen idi ti natda. Idi lakay unayen ni Juan, pinagbabawyanna kadi ti matalek a panagserbina iti adu a dekada, a pinanunotna a di umiso wenno di natimbeng ti panangusarna iti biagna? Saan! Sigagagar pay la idi a kumitkita iti masanguanan. Idi kinuna ni napagungar a Jesus, “Wen; umayak a sidadaras,” dagus nga insungbat ni Juan, “Amen! Umayka, Apo Jesus.” (Apocalipsis 22:20) Nabatad a saan a nagbiag ni Juan para iti agdama, a nagtarigagay iti nabannayat ken nanam-ay a ‘normal a panagbiag.’ Determinado nga agtultuloy nga agserbi a buyogen ti amin a biag ken pigsana, uray kaano nga umay ti Apo. Datayo ngay?
Dagiti Pakaibatayan ti Panamati iti Biag nga Agnanayon
7. (a) Kasano a ti namnama a biag nga agnanayon ‘naikari kasakbayan dagiti nabayagen a tiempo’? (b) Kasano a linawlawagan ni Jesus ti namnama a biag nga agnanayon?
7 Agtalekkayo a ti namnama a biag nga agnanayon ket saan nga arapaap wenno pantasia a pinarbo ti tao. Kas kuna ti Tito 1:2, naibatay ti nadiosan a debosiontayo iti “namnama iti agnanayon a biag a ti Dios, a dina mabalin ti agulbod, inkarina kasakbayan dagiti nabayagen a tiempo.” Orihinal a panggep ti Dios nga agbiag nga agnanayon dagiti amin a natulnog a tattao. (Genesis 1:28) Awan, uray ti iyaalsa da Adan ken Eva, ti makakeltay iti daytoy a panggep. Kas nailanad iti Genesis 3:15, dagus a nangikari ti Dios iti “bin-i” a mangpukawto iti amin a rigat a sagsagabaen ti sangatauan. Idi dimteng ti “bin-i” wenno Mesias a ni Jesus, maysa kadagiti kangrunaan a sursurona ti namnama a biag nga agnanayon. (Juan 3:16; 6:47, 51; 10:28; 17:3) Babaen ti panangidatonna iti perpekto a biagna kas subbot, nagun-od ni Kristo ti legal a kalintegan a mangiparabur iti biag nga agnanayon iti sangatauan. (Mateo 20:28) Agbiag nga agnanayon idiay langit ti dadduma kadagiti adalanna, nga agdagup iti 144,000. (Apocalipsis 14:1-4) No kasta, adda dagiti sigud a mortal a tattao nga “agkawes iti kinaawan ipapatay”!—1 Corinto 15:53.
8. (a) Ania ti “kinaawan ipapatay,” ket apay nga itden dayta ni Jehova kadagiti 144,000? (b) Ania a namnama ti intuyang ni Jesus kadagiti “sabsabali a karnero”?
8 Saan a basta pulos a di matay ti kayat a sawen ti “kinaawan ipapatay.” Ramanenna ti “pannakabalin ti di madadael a biag.” (Hebreo 7:16; idiligyo ti Apocalipsis 20:6.) Ngem, ania ti maibanag ti Dios iti panangtedna iti kasta a nakaskasdaaw a sagut? Lagipenyo ti karit ni Satanas nga awan kadagiti parsua ti Dios ti mapagtalkan. (Job 1:9-11; 2:4, 5) Babaen ti panangtedna iti imortalidad kadagiti 144,000, ipakpakita ti Dios ti naan-anay a panagtalekna iti daytoy a grupo a naisangsangayan a nangsungbat iti karit ni Satanas. Ngem dagiti ngay dadduma iti sangatauan? Kinuna ni Jesus kadagiti immuna a kameng daytoy “bassit nga ipastoran” nga agtawid iti Pagarian nga “agtugaw[danto] kadagiti trono tapno ukomen[da] dagiti sangapulo ket dua a tribo ti Israel.” (Lucas 12:32; 22:30) Ipasimudaag daytoy a dagiti dadduma agbiagdanto nga agnanayon ditoy daga kas iturayan ti Pagarianna. Nupay saan a maparaburan iti imortalidad dagitoy a “sabsabali a karnero,” awatendanto ti “agnanayon a biag.” (Juan 10:16; Mateo 25:46) No kasta, biag nga agnanayon ti namnama dagiti amin a Kristiano. Saan dayta a pantasia no di ket sipapasnek nga inkari ti “Dios a dina mabalin ti agulbod,” ken binayadanna babaen ti napateg a dara ni Jesus.—Tito 1:2.
Mabayag Pay?
9, 10. Ania ti nalawag a mangipakita nga asidegtayon iti panungpalan?
9 Impakpakauna ni apostol Pablo a “dagiti napeggad a tiempo a narigat a pakilangenan” ipasimudaagna a di mailibak nga addatayon iti “maudi nga al-aldaw.” Bayat a kumarkaro ti kinaawan ayat, kinaagum, panangparagsak iti bagi, ken kinadakes ti kagimongan ti tao iti aglawlawtayo, ditay kadi mabigbig nga umad-adanin ti aldaw a panangukom ni Jehova iti daytoy dakes a sistema ti lubong? Bayat a lumanlanlan ti kinaranggas ken guranggura, saan kadi a makitkitatayon iti aglawlawtayo ti kaitungpalan ti kanayonan a sasao ni Pablo: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay”? (2 Timoteo 3:1-5, 13) Mabalin a siinanama nga ipukkaw dagiti dadduma ti “Talna ken talged,” ngem agpukawto amin a namnama iti talna, ta “giddato nga umayto kadakuada ti kellaat a pannakadadael kas iti ut-ot ti panagrigat nga umay iti maysa a masikog a babai; ket didanto pulos makalisi.” Saantay nga agar-arikap iti sipnget no maipanggep iti kaipapanan ti panawentayo. Ngarud, “agtalinaedtayo koma a siririing ket sipupuottayo.”—1 Tesalonica 5:1-6.
10 Maysa pay, ipakita ti Biblia a ti maudi nga al-aldaw ket ‘ababa a periodo ti tiempo.’ (Apocalipsis 12:12; idiligyo ti 17:10.) Nalawag a naglabasen ti kaaduan iti dayta “ababa a periodo.” Kas pagarigan, siuumiso a deskribiren ti padto ni Daniel ti panagbinnusor “ti ari ti amianan” ken “ti ari ti abagatan” a nakadanon agingga iti daytoy a siglo. (Daniel 11:5, 6) Ti laengen saan pay a natungpal isu ti maudi nga iraraut ti “ari ti amianan,” a nadeskribir iti Daniel 11:44, 45.—Kitaenyo ti Pagwanawanan a Hulio 1, 1987, ken Nobiembre 1, 1993, para iti pannakasalaysay daytoy a padto.
11. (a) Kasano kasaknap a matungtungpal ti Mateo 24:14? (b) Ania ti ipasimudaag dagiti sao ni Jesus a nailanad iti Mateo 10:23?
11 Impadto met ni Jesus a “daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14) Itungtungpal ita dagiti Saksi ni Jehova ti trabahoda iti 233 a daga, isla, ken teritoria. Pudno, adda pay laeng dagiti teritoria a saan pay a naas-asak, ket nalabit iti tiempo nga inkeddeng ni Jehova, maluktanto ti ruangan ti gundaway. (1 Corinto 16:9) Kaskasdi, mamagpanunot dagiti sao ni Jesus a nailanad iti Mateo 10:23: “Dikayto pulos maileppas ti sirkito dagiti siudad ti Israel agingga a dumteng ti Anak ti tao.” Nupay sigurado a maiwaragawagto iti intero a daga ti naimbag a damag, saantay a personal a maidanon iti amin a paset ti daga ti mensahe ti Pagarian sakbay a “dumteng” ni Jesus kas Manangpapatay.
12. (a) Ania a ‘panangselio’ ti natukoy iti Apocalipsis 7:3? (b) Ania ti ipasimudaag ti bumasbassit a bilang dagiti napulotan ditoy daga?
12 Usigenyo ti teksto iti Apocalipsis 7:1, 3, nga agkuna a dagiti “uppat nga angin” a pangdadael matengtengngelda ‘agingga a malpas a maselioan dagiti adipen ti Diostayo kadagiti mugingda.’ Saan a ti umuna a panangselio ti tuktukoyen daytoy, a maaramid iti panangawat dagidiay paset ti 144,000 iti nailangitan nga ayab. (Efeso 1:13) Ti tuktukoyenna isu ti pinal a panangselio, inton nalawag a maipabigbigda kas nasubok ken matalek nga “ad-adipen ti Diostayo.” Nagbassiten ti bilang dagiti pudno a napulotan nga annak ti Dios nga adda pay la ditoy daga. Mainayon pay, nabatad a kuna ti Biblia a “mapaababa” ti umuna a paset ti dakkel a rigat “maigapu kadagiti napili.” (Mateo 24:21, 22) Lallakay ken babbaket unayen ti kaaduan kadagidiay agkunkuna a napulotan. Maminsan pay, saan kadi nga ipamatmat daytoy nga asidegen ti panungpalan?
Matalek a Bantay
13, 14. Ania ti rebbengen ti klase bantay?
13 Kabayatanna, nasayaat no agpaidalantayo iti ‘matalek nga adipen.’ (Mateo 24:45) Iti nasurok a sangagasut a tawenen, simamatalek nga agserserbi ti moderno-aldaw nga “adipen” kas “bantay.” (Ezequiel 3:17-21, NW) Inlawlawag ti Pagwanawanan a Hulio 1, 1984: “Palpaliiwen daytoy a bantay no kasanot’ pannakaaramid dagiti bambanag ditoy daga kas kaitungpalan ti padto ti Biblia, mamakpakdaar maipapan iti um-umayen a ‘dakkel a rigat a nanipud idi punganay agingga ita awan pay kasta a napasamak’ ken ipabpablaakna ti ‘naimbag a damag maipapan iti banag a nasaysayaat.’”—Mateo 24:21; Isaias 52:7.
14 Laglagipenyo: Rebbengen ti maysa a bantay nga ipukkaw ti “makitana.” (Isaias 21:6-8) Idi tiempo ti Biblia, mangpakdaar ti maysa a bantay uray no nakaad-adayo pay ken saan unay a mailasin ti posible a pangta. (2 Ar-ari 9:17, 18) Sigurado nga adda idi dagiti biddut a pakdaar. Ngem ti naimbag a bantay saan a bumdeng a mangpakdaar iti amakna a mabainan. No mapupuoranen ti balayyo, ania ti mariknayo no saan a simmangpet dagiti bombero gapu ta impagarupda a false alarm dayta? Namnamaentayo nga agresponde a dagus dagita a lallaki iti aniaman a pagilasinan ti peggad! Umasping iti dayta, namakdaar ti klase bantay kadagiti kasasaad nga agparang a kasapulan a mangpakdaarda.
15, 16. (a) Apay nga adda dagiti panagbalbaliw a naaramid iti pannakaawattayo iti padto? (b) Ania ti maadaltayo kadagiti matalek nga adipen ti Dios nga addaan idi iti di umiso a pannakaawat iti dadduma a padto?
15 Nupay kasta, iti panaglabas ti panawen, lumawlawag ti pannakaawattayo iti padto. Ipakita ti historia a manmano, no mapasamak man, a naan-anay a maawatan dagiti nadibinuan a padto sakbay ti pannakatungpalda. Imbaga ti Dios ken Abram ti eksakto a kapaut ti panagnaed ti bin-ina kas “ganggannaet iti daga a saanda a kukua,” iti las-ud ti 400 a tawen. (Genesis 15:13) Nupay kasta, nasapa a nagpresenta ni Moises kas manangisalakan.—Aramid 7:23-30.
16 Usigenyo met dagiti Mesianiko a padto. No an-anagen, nakalawlawag a naipadto ti ipapatay ken panagungar ti Mesias. (Isaias 53:8-10) Kaskasdi, saan a naawatan daytoy dagiti mismo nga adalan ni Jesus. (Mateo 16:21-23) Saanda a naamiris a matungpalto ti Daniel 7:13, 14 iti masanguanan a pa·rou·siʹa, wenno “kaadda” ni Kristo. (Mateo 24:3) Isu nga agarup 2,000 a tawen a nasaksakbay ti pattapattada idi sinaludsodda ken Jesus: “Apo, isublim kadi ti pagarian ti Israel iti daytoy a tiempo?” (Aramid 1:6) Uray idi sititibker a naipasdeken ti kongregasion Kristiano, adda latta dagiti di umiso a kapanunotan ken bambanag a ninamnamada a saan a napasamak. (2 Tesalonica 2:1, 2) Nupay saan nga umiso no dadduma ti kapanunotan ti sumagmamano, di mailibak a binendisionan ni Jehova ti trabaho dagidiay a manamati idi umuna a siglo!
17. Ania koma ti panangmatmattayo kadagiti panagbalbaliw iti pannakaawattayo iti Kasuratan?
17 Iti kaaldawantayo, adda dagiti tiempo a nasken met a lawlawagen ti klase bantay ti panangmatmatna. Ngem adda kadi agduadua no bembendisionan ni Jehova ti ‘matalek nga adipen’? Maysa pay, no iti pakabuklan, saan kadi a babassit laeng ti kaaduan kadagiti naaramid a panagbalbaliw? Saan a nagbalbaliw ti pamunganayan a pannakaawattayo iti Biblia. Natibtibker ita ti pammatitayo nga agbibiagtayon iti maudi nga al-aldaw!
Panagbiag Para iti Agnanayon a Masanguanan
18. Apay a ditay koma agbiag para laeng iti agdama?
18 Mabalin a kuna ti lubong, ‘Mangan ken uminumtayo, ta inton bigat, mataytayo,’ ngem saan koma a kasta ti kababalintayo. Apay nga agbannogkayo a manggun-od kadagiti pakaragsakan iti biag ita idinto ta mabalinyo ti agbiag iti agnanayon a masanguanan? Saan nga arapaap, saan a pantasia, dayta a namnama, imortal man a biag idiay langit wenno biag nga agnanayon ditoy daga. Agpayso dayta, ta inkari ti Dios a “dina mabalin ti agulbod.” (Tito 1:2) Aglaplapusanan ti pammaneknek nga asidegen a matungpal ti namnamatayo! “Ti tiempo a nabati ket napaababa.”—1 Corinto 7:29.
19, 20. (a) Kasano ti panangmatmat ni Jehova iti panagsakripisiotayo maipuon iti Pagarian? (b) Apay a nasken nga agbiagtayo a sipapanunot iti agnanayon?
19 Pudno, napapaut ti panagtalinaed daytoy a sistema ngem ti impagarup dagiti adu. Ibaga pay ket ngatan ti sumagmamano a no ammoda la koma daytoy idi, saanda koman a nagsakripisio. Ngem ditay koma pagbabawyan dayta. Total, napateg a paset ti panagbalin a Kristiano ti panagsakripisio. Dagiti Kristiano ‘paglikudanda ti bagida.’ (Mateo 16:24) Pulos a ditay koma panunoten nga ubbaw ti panagreggettayo a mangay-ayo iti Dios. Inkari ni Jesus: “Awan asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno dagiti talon a maigapu kaniak ken maigapu iti naimbag a damag a dinto umawat iti maminsangagasut ita . . . ket iti um-umay a sistema ti bambanag agnanayon a biag.” (Marcos 10:29, 30) Sangaribu a tawen manipud ita, anianto ti pateg ti trabaho, balay, wenno depositoyo iti banko? Ngem, ti panagsakripisioyo a maipuon ken Jehova ket saan nga ubbaw iti maysa a milion a tawen manipud ita—maysa a bilion a tawen manipud ita! “Ta saan a nakillo ti Dios tapno lipatenna ti aramidyo.”—Hebreo 6:10.
20 Ngarud, agbiagtayo a sipapanunot iti agnanayon, a kumitatayo, “saan a kadagiti bambanag a makita, no di ket kadagiti bambanag a di makita. Ta dagiti bambanag a makita temporarioda, ngem dagiti bambanag a di makita agnanayonda.” (2 Corinto 4:18) Insurat ni propeta Habacuc: “Ti sirmata agpaay pay laeng iti nadutokan a panawen, ken agsiglat a tumurong iti pannakatungpal, ket saanto nga agulbod: nupay no agtaktak, isu urayem; ta pudno nga umayto, a dinto agbayag.” (Habacuc 2:3) Kasano a ti ‘pananguray’ iti panungpalan apektaranna ti panangannongtayo kadagiti personal a rebbengentayo ken iti pamilia? Salaysayen ti sumaganad nga artikulotayo dagitoy a banag.
Dagiti Punto a Marepaso
◻ Kasano a naapektaran ti sumagmamano ita iti kasla pannakaitantan ti panungpalan daytoy a sistema ti bambanag?
◻ Ania ti pakaibatayan ti namnamatayo a biag nga agnanayon?
◻ Kasanotay koma a matmatan ti panagsakripisiotayo maipuon iti Pagarian?
[Ladawan iti panid 15]
Masapul a mairingpas ti sangalubongan a trabaho a panangasaba sakbay nga umay ti panungpalan