‘Ginatangda ti Kinapudno!’

“GATANGEM ti pudno, ken dika lakuen.” (Proverbio 23:23) Kasta ti pammatigmaan ti masirib a tao a ni Solomon. Nupay maikuna daytoy maipapan iti kinapudno iti pangkaaduan, nangnangruna a kasta no maipapan iti kinapudno a masarakan iti Sao ti Dios, ti Biblia. Ti kasta a kinapudno mangiturong iti biag nga agnanayon! (Juan 17:3, 17) Ngem, imutektekanyo ta adda katupag a gatad ti pananggun-od iti kasta a kinapudno. Kasapulan a sitatallugod ti maysa a ‘manggatang’ iti dayta, kayatna a sawen, isakripisio wenno tallikudan ti maysa a banag tapno magun-od dayta. (Idiligyo ti Mateo 13:45, 46.) Iti pangkaaduan, saan a situtulok dagiti tattao a mangaramid iti dayta. Ngem iti adu a pagilian, umad-adu dagiti natured nga indibidual a gumatgatang iti kinapudno iti Biblia​—masansan nga adda kasukatna a dakkel a personal a gatad.

Alaentay a pagarigan dagiti Saksi ni Jehova iti pagilian a Ghana iti Makinlaud nga Africa. Idi Hunio 1989, adda nasurok a 34,000 nga indibidual iti dayta a pagilian a nangawat iti kinapudno iti Biblia ken siaaktibo a mangiranranud iti dayta iti sabsabali. Kalpasanna naaramid ti legal a panangipawil iti trabaho a panangasaba iti publiko. Nupay kasta, dagiti nasingpet-panagpuspusona a tattao intultuloyda a ‘gatangen ti kinapudno’​—iti laksid dagiti legal a lapped. Nagpatingga ti panangipawil idi Oktubre 31, 1991, ket idi ngalay ti 1995, tallo ket kagudua a tawen laeng kalpasan a naikkat dagidiay a restriksion, ti bilang dagiti aktibo a Saksi ni Jehova idiay Ghana nakagteng iti 46,104! Ket iti daytoy a tawen addan nasurok a 52,800.

Ania ti nangguyugoy kadagiti tattao iti kinapudno ti Sao ti Dios? Aniada a panagsakripisio ti nasken idi nga aramiden ti dadduma tapno ‘magatangda ti kinapudno’? Kas sungbat, usigentayo ti kapadasan ti tallo a Kristiano a taga Ghana.

Naawisda Kadagiti Sursuro iti Biblia

Usigentay nga umuna ti maysa a babai nga agtawen iti nasurok a 20. Maysa a pastor ti amana, ngem kinaykayatna a panawan ti relihion ni amana. Ti makagapu? Ti ayatna iti kinapudno.

Naminsan, inlawlawagna: “Masansan nga umay iti balaymi dagiti Saksi no sumarungkarda iti binalaybalay. Kalpasan ti sumagmamano a pannakisarsaritak kadakuada, nautobko a naibatay iti Biblia ti isursuroda. Nangibangonak iti saludsod kadagiti tema kas iti Trinidad, umap-apuy nga impierno, imortalidad ti kararua, ken nangnangruna maipapan iti panangpaimbag babaen ti pammati. Natibker ti pammatik a dagitoy a doktrina ket nagtaud iti Biblia. Ngem tinulongandak dagiti Saksi a mangtarus a saan gayam a kasta.”​—Maipapan iti panangmatmat ti Biblia iti kakasta a tema, pangngaasiyo ta kitaenyo ti Marcos 13:32; Roma 6:23; Aramid 10:40; ken 1 Corinto 13:8-10.

Kinuna pay ti balasang: “Kaskasdi, nakaro ti ibubusor ti pamiliak, nangnangruna ni tatang. Impagarupna a nayaw-awanak. Nupay kasta, ammok a ti maad-adalko kadagiti Saksi ni Jehova isu ti kinapudno. Inkagumaak nga ipakita ken ni tatang dagitoy a banag manipud iti Biblia, ngem dina kayat ti dumngeg. Kinapudnona, kimmaro ti ibubusorna.

“Nupay kasta, saanak a naupay. Ammok a ti laeng pudno a pannakaammo ti mangiturong iti biag nga agnanayon iti Paraiso, ket determinadoak a mangsalimetmet iti dayta. Idi nadamag dagiti Saksi iti lugarmi dagiti parikut a sangsanguek, siaayat a sinaranaydak, a pinaregtadak ken impaayandak kadagiti kasapulak. Daytoy ti timmulong kaniak a mangtarus iti kinapateg ti sasao ni Jesus a masarakan iti Juan 13:35: ‘Iti daytoy maammuan ti isuamin a dakayo dagiti adalak, no addaankayo iti ayat iti maysa ken maysa.’ Timmibker ti pammatik a dagiti Saksi ni Jehova ti mangal-alagad iti pudno a relihion. Idi agangay, idi nakita dagiti dadakkelko nga adda nasayaat a namalbaliwan ti biagko, naragsakanda iti nakitada, ket nagbalbaliw ti panangtratoda kaniak​—ket indawat ni tatang kadagiti Saksi nga iyadalanda iti Biblia ni manongko!”

Panangsierto iti Kinapudno

Ti ‘pananggatang iti kinapudno’ ket maysa met a karit iti sumagmamano nga agtutubo a pinadakkel dagiti nagannak a Saksi. Adda pagannayasan ti dadduma nga agtutubo a mangyaleng-aleng iti kinapudno iti Biblia. No dida ipapuso ti kakasta a kinapudno, agbalin a nakapuy, narabaw ti pammatida. (Idiligyo ti Mateo 13:20, 21.) Ni Nathaniel, maysa a lalaki a taga Ghana, a nasuroken a 30 ti tawenna, insalaysayna no kasanona a ‘ginatang ti kinapudno’ idi agtutubo pay laeng.

“Sinursuruandak iti Biblia dagiti nagannak kaniak sipud pay idi maladagaak,” malagipna. “Bayat a dimmakkelak, kinaduak ida iti trabaho a panangasaba, ngem diak talaga naikeddeng ti agbalin a Saksi. Idi agangay, nautobko a kasapulan a sukimatek a mismo dagiti bambanag.

“Umuna, kasapulan a makombinsirak a ti Biblia, saan a ti aniaman a sabali a sagrado a libro ti relihion, ket Sao ti Dios. Babaen ti personal a panagadal, naammuak a daytoy laeng ti sagrado a libro a naglaon iti nagadu a nalawag a padto a natungpal a siuumiso. Naammuak met a ti Biblia naglaon iti adu a nasientipikuan a kinapudno​—kas pagarigan, ti daga ‘nakabitin iti awan.’ (Job 26:7) Naisurat dagitoy a sasao rinibu a tawen sakbay a naammuan dagiti sientista ti maipapan iti solar system-tayo. Ti laeng Dios ti makabalin a mangpaltiing kadagiti tao a mangisurat iti kakasta a banag!a

“Kalpasanna, kayatko a maammuan no ania a narelihiosuan nga organisasion ti mangisursuro ken mangan-annurot kadagiti kinapudno a maisursuro iti Biblia. Isursuro ti kaaduan a relihion ti maipapan iti umap-apuy nga impierno, Trinidad, ken di matay a kararua. Ngem di nainkalintegan kaniak dagitoy a doktrina. Inkalintegak: Saan kadi a nadangkes ti ama a mangikabil iti ima ti anakna iti agburburek a danum kas dusa? Kasano, no kasta, a maikabil ti Dios ti ayat dagiti annakna iti umap-apuy nga impierno sana baybay-an ida nga agsagaba? Nupay kasta, maitunos ti isursuro dagiti Saksi ni Jehova kadagiti teksto iti Biblia kas ti Roma 6:23, a kunana: ‘Ti supapak ti basol isu ti ipapatay’​—saan nga umap-apuy nga impierno. Nainkalintegan daytoy kaniak.

“Nakitak met a kalikaguman dagiti Saksi ni Jehova nga amin a miembro agbiagda maitunos kadagiti pagalagadan iti Biblia ket ilaksidda ti amin nga agbasol a di agbabawi. Gapu amin kadagitoy, nakunak nga adda kadagiti Saksi ni Jehova ti kinapudno, ket inkeddengko ti agbalin a maysa kadakuada. Nagreggetak tapno makakualipikar a mabautisaran kas maysa a Saksi.”​—1 Corinto 5:11-13.

Ti kapadasan ni Nathaniel ket nasayaat a pagarigan nga uray dagiti agtutubo a pinadakkel dagiti Kristiano a nagannak kasapulan a ‘gatangenda ti kinapudno.’ Saanda koma laeng a basta tumabtabuno kadagiti gimong iti kongregasion. Kas kadagiti nagkauna a taga Berea, masapul a ‘siaannad a sukimatenda ti Kasuratan iti inaldaw no agpayso dagitoy a bambanag.’ (Aramid 17:11) Kalikaguman daytoy ti panawen ken panagregget, ngem mabalin a mangibunga iti natibker a pammati ken panagtalek.​—Idiligyo ti Efeso 3:17-19.

Naupay iti Ulbod a Relihion

Maysa a lalaki a taga Ghana nga agnagan Godwin ti ag-70 idi pinanawanna ti Simbaan a Presbiteriano ken maysa a Masonic Lodge. “Addada banag a mapaspasamak iti simbaan a diak magustuan,” kuna ni Godwin. “Kas pagarigan, nakaro ti panaggiginnura, ket agtultuloy pay laeng dayta. No dadduma kasapulan nga umay dagiti polis tapno maadda ti talna ken urnos! Iti panagkunak saan a maiparbeng daytoy kadagiti pasurot ni Kristo. Kalpasanna adda saanmi a nagkinnaawatan iti padak a Presbiteriano. Dinengngeg ti husgado ti kaso ket inkeddengna a nagbasol daydi a lalaki. Nupay kasta, ti ministro iti simbaan awanan hustisia a dimmasig iti daytoy a lalaki ken inkagumaannak a babalawen iti imatang ti intero a kongregasion! Imbagak kenkuana ti kapanunotak ket rimmuarakon iti simbaan​—a din pulos nagsubsubli.

“Naglabas ti sumagmamano a panawen, ket simmarungkar dagiti Saksi ni Jehova iti pagtaengak. Idi damo, dimngegak laeng ta diak mapagkedkedan dagiti tattao nga agsasao maipapan iti Dios. Ngem nangrugi a madlawko nga uray Presbiterianoak iti adu a dekada, adu ti diak ammo maipapan iti Biblia. Kas pagarigan, diak pulos ammo idi nga ipapaay ti Biblia ti namnama a biag nga agnanayon iti Paraiso ditoy daga.b Ket idi rinugiak ti tumabuno kadagiti gimong dagiti Saksi ni Jehova, magustuak unay ti ugali, ken nangnangruna ti panagkawkawes ken panaglanglanga dagiti agtutubo kadakuada. Dagitoy dagiti tattao a talaga nga agbibiag maitunos kadagiti pagalagadan iti Biblia!”

Kaskasdi, ti ‘pananggatang iti kinapudno’ kinalikagumanna ti panangaramidna iti sumagmamano a narigat a panagbalbaliw iti biagna. Kuna ni Godwin: “Dati a kamengak ti Masonic Lodge. Ket nupay pagaammo daytoy kas nainkakabsatan a gunglo a mangipaay iti tulong kadagiti miembrona, inannurotko dagiti ritual a pakairamanan ti panangusar kadagiti bangabanga ken tulang ken panangawag kadagiti espiritu. Maipagarup a dagitoy nga espiritu tulonganda dagidiay makiuman kadakuada a rumang-ay iti naespirituan.

“Iti panagad-adalko naamirisko a karimon ni Jehova a Dios ti aniaman a pannakairaman iti espiritismo gapu ta maipasidongna ti maysa iti impluensia ni Satanas ken dagiti nadangkes nga espiritu a puersana.c Agtultuloyak ngata kas miembro ti Masonic Lodge agraman ti amin a kinadatdatlagna, wenno umikkatak tapno maay-ayo ni Jehova? Pinilik ti naud-udi. Dinadaelko amin nga alikamek kas Mason, uray ti kawes nga us-usarek kadagiti miting ti Lodge. Napasarak ti kinapudno ti kari ni Jesus idi kinunana, ‘Ti kinapudno wayawayaannakayo’! (Juan 8:32) Ita siraragsakak a mangiranranud iti sabsabali kadagiti banag a nasursurok iti sabsabali. Awan aniaman a pagbabawyak.”

Rinibribu a nasingpet-panagpuspusona a tattao ti nangaramid met iti dadakkel a panagsakripisio tapno ‘magatangda ti kinapudno.’ Kas kadagiti tallo a Kristiano a nasalaysay ditoy, saanda a pagbabawyan ti panagbalbaliwda. Ti kinapudno iti Biblia ti nangted kadakuada iti “nasayaat a pamuon maipaay iti masanguanan, tapno mapetpetanda a sititibker ti pudpudno a biag.” (1 Timoteo 6:19) Maikutanyo met iti agnanayon dayta a “pudpudno a biag” ken ti amin a kakuyogna a bendision no ‘gatangenyo ti kinapudno.’

[Dagiti Footnote]

[Ladawan iti panid 9]

Nathaniel

[Ladawan iti panid 9]

Godwin