Nabuyogan iti Asi ti Panagturay ni Jehova

ITI intero a historia adu a tattao nga agtuturay ti mangar-aramat iti pannakabalin a dida ikabkabilangan ti panagsagaba dagiti iturayanda. Nupay kasta, nangipaay ni Jehova iti pakaidumaan babaen ti panangpilina iti maysa a nasion​—ti Israel​—ken inturayanna daytoy buyogen ti asi.

Idi a maad-adipen pay dagiti Israelita iti nagkauna nga Egipto, nangngeg ni Jehova dagiti ar-ararawda maipaay iti tulong. “Iti amin a ladingitda isu napaladingit. . . . Iti ayatna ken iti asina sinubbotna ida.” (Isaias 63:9) Inispal ni Jehova ti Israel, nga impaayanna ida iti namilagruan a taraon, ken inyegna ida iti daga a kukuada.

Ti kinaasi ni Jehova ad-adda pay a naipakita kadagiti linteg nga intedna iti daytoy a nasion. Binilinna dagiti Israelita a tratuenda a siaasi dagiti ulila, balo, ken ganggannaet nga umili. Di rumbeng a gundawayanda dagiti di makabael.

Kalikaguman ti Linteg a maipakita ti asi kadagidiay agkasapulan. Dagiti napanglaw mabalinda ti agadas kalpasan ti ani. Makanselar dagiti utang iti (maikapito a) tawen ti Sabbath. Amin a tinawid a daga a nailako masapul a maisubli iti (maika-50 a) tawen ti Jubileo. Ireport ti Ancient Israel​—Its Life and Institutions: “Iti Israel, talaga nga awan a pulos dagiti pannakaklase-klase iti kagimongan iti moderno nga anag.” “Idi un-unana nga aldaw a panagdappat, tinagiragsak ti amin nga Israelita ti padapada nga estandarte ti panagbiag.”​—Levitico 25:10; Deuteronomio 15:12-14; 24:17-22; 27:18.

Panangtulad iti Kinamanangngaasi ni Jehova

Natignay dagiti adipen ti Dios iti kinamanangngaasina. Kas pagarigan, iti intero a historia, dagiti dadduma a baro nga ari pinapatayda dagiti natda a kameng ti dati a naarian a dinastia. Ngem saan nga inaramid daytoy ti adipen ni Jehova a ni David. Kalpasan ti ipapatay ni Ari Saul, sinalakniban ni David ni Mifiboset, ti natda laengen idi nga apoko ken makipagtawid ken Saul. “Ti ari nakarikna iti asi ken Mifiboset nga anak ni Jonatan nga anak ni Saul.”​—2 Samuel 21:7, NW.

Awanen sabali pay a tao a nangtulad iti kinaasi ni Jehova a kas ti inaramid ni Jesus. Adu kadagiti milagrona ti maigapu iti nadiosan nga asi. Iti naminsan nagpakpakaasi kenkuana ti maysa nga agkukutel: “No koma laeng kayatmo, kabaelannak a dalusan.” Simnek ti asi ni Jesus ket sinagidna, a kunana: “Kayatko. Madalusanka koma.” (Marcos 1:40-42) Iti sabali pay a gundaway nakaad-adu a tattao ti simmurot ken Jesus. Kabayatan ti panagarimbangaw, impaayan ni Jesus ti atension ti dua a bulsek a lallaki a mangyik-ikkis: “‘Apo, maasianka kadakami, Anak ni David!’ . . . Idi simnek ti asina, sinagid ni Jesus dagiti matada, ket dagus nga immawatda ti panagkita.”​—Mateo 20:29-34.

Ti kaadu dagiti tattao dina pinabaaw ti pannakipagrikna ni Jesus kadagiti sabsabali. Gapu ta sumagmamano nga aldawen a dida nangan, naminsan kinunana: “Maasianak iti bunggoy.” Gapuna pinakanna ida iti namilagruan a pamay-an. (Marcos 8:1-8) Idi nagpasiar ni Jesus, saan laeng a nangisuro iti kaaduan no di ket naseknan kadagiti kasapulanda. (Mateo 9:35, 36) Kalpasan ti kasta a panagpasiar, saan a naaddaan ni Jesus ken dagiti adalanna iti tiempo a mangan man la koma. Kunaen kadatayo ti salaysay iti Biblia: “Gapuna napanda a nagbarangay iti maysa a langalang a lugar nga is-isuda. Ngem dagiti tattao nakitada ida a mapmapan ket adu ti nakaammo iti dayta, ket manipud kadagiti isuamin a siudad nagtatarayda sadiay a sangsangkamaysa ket nakagtengda nga immun-una ngem isuda. Ala ket, idi makadissaag, nakitana ti maysa a dakkel a bunggoy, ngem simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida kadagiti adu a bambanag.”​—Marcos 6:31-34.

Saan laeng a ti sakit ken kinapanglaw dagiti tattao ti nangtignay ken Jesus no di pay ket ti naespirituan a kasasaadda. Gunggundawayan ida dagiti liderda, gapuna ‘simnek ti asi ni Jesus kadakuada.’ Ti Griego a sao para iti ‘simnek ti asi’ kaipapananna “makarikna iti panagtarigagay ti bituka.” Pudno a manangngaasi ni Jesus!

Kinamanangngaasi iti Nadamsak a Lubong

Ari itan ni Jesu-Kristo iti nailangitan a Pagarian ni Jehova. Kas ti inaramidna iti nagkauna nga Israel, iturturayan ita ti Dios ti ilina buyogen ti asi. “Isuda kukuakto ida kuna ni Jehova dagiti buybuyot, kukuak met laeng, iti aldaw nga aramidekto, ket igagakto ida.”​—Malakias 3:17.

Dagidiay agtarigagay a makapasar iti kinamanangngaasi ni Jehova kasapulan a tuladenda dagiti wagasna. Pudno, agbibiagtayo iti lubong a dagiti tattao ad-adda nga interesadoda a mangsalimetmet iti estilo ti panagbiagda ngem iti panangtulong kadagidiay agkasapulan. Dagiti tattao a naturay masansan a kalikagumanda ti bukodda a pagimbagan nupay pagdaksan dayta dagiti trabahador ken parokiano. Iti 2 Timoteo 3:1-4, siuumiso nga iladladawan ti Biblia ti moral a kasasaad iti panawentayo nga isut’ makagapu no apay nga adu ti saan a makarikna iti asi.

Kaskasdi, nalabit makasaraktayo kadagiti gundaway a mangipakita iti asi. Mabalintay ngata ti mangitukon iti kasapulan a tulong iti kaarrubatayo? Adda kadi masakit a mabalintay a sarungkaran? Mabalintay kadi a liwliwaen dagidiay malmaldaang, maitunos iti balakad nga: “Agsaokayo iti makaliwliwa kadagiti malmaldaangan a kararua, saranayenyo dagiti nakapuy”?​—1 Tesalonica 5:14.

Matulongannatayo met ti kinamanangngaasi a mangliklik iti nadarasudos a tignay no agbiddut dagiti sabsabali. Naibaga kadatayo: “Maikkat koma kadakayo ti isuamin a makadangran a kinapait ken unget ken pungtot ken panagririaw ken nabassawang a panagsasao agraman ti isuamin a kinadakes. Ngem agbalinkayo a manangaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa a kas met iti Dios sibubulos a pinakawannakayo babaen ken Kristo.”​—Efeso 4:31, 32.

Tulongannatay ti kinamanangngaasi tapno maliklikan ti pagannayasan a mangabuso iti pannakabalin. Kuna ti Biblia: “Kawesanyo ti bagbagiyo kadagiti nadungngo a panagayat ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured.” (Colosas 3:12) Ti kinapakumbaba iti panagpampanunot tulongannatayo a makarikna iti sasaaden dagidiay iturturayantayo. Ti pannakipagrikna ramanenna ti kinapakumbaba ken kinanainkalintegan imbes a narigat nga ay-aywen. Saan koma a ti kinasigo ti rason tapno matmatantayo dagiti tattao a kas paset laeng ti maysa a makina. Kasta met, laglagipen dagiti naasi nga assawa a lallaki iti pamilia a dagiti assawada ket narasrasi a basehas. (1 Pedro 3:7) Ti panangut-utob iti kinamanangngaasi ni Jesus matulongannatayo a mangaramid amin iti daytoy.

Tangay naasian unay ni Jesus kadagiti tattao kabayatan ti ministeriona ditoy daga, makasiguradotayo a maysa itan a naasi nga Agturay, ken agtultuloyto a kasta. Kastoy ti kuna ti padto iti Salmo 72 maipapan kenkuana: “Isu mangukomto kadagiti napanglaw iti umili, isalakannanto dagiti annak ti nanumo; ket pispisangennanto ti mangidadanes. Addanto met panagturayna manipud baybay agingga iti baybay, ken manipud idiay karayan inggana kadagiti pungpungto ti daga. Mangaasinto kadagiti napanglaw ken makasapul, ket dagiti kararua dagiti makasapul isalakannanto.”​—Salmo 72:4, 8, 13.

Impadto ti Sao ti Dios: “Ukomennanto dagiti napanglaw a buyogan ti kinalinteg, ken mangipato a sililinteg a maipaay kadagiti napakumbaba ditoy daga. . . . Patayennanto dagiti managdakdakes.” Kalpasan ti panangiladawanna no kasano nga uray ti sumagmamano a naranggas, arig animal a tattao balbaliwandanto ti danada, itultuloy ti padto: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kas la kadagiti dandanum saknapanda ti baybay.” (Isaias 11:4-9) Aktual nga ikarkari daytoy a padto ti maysa nga intero-daga a kagimongan dagiti tattao a makaam-ammo ken Jehova ken mangtultulad iti kinamanangngaasina!