Adipen Dagiti Tao Wenno Adipen ti Dios?

“DAGITI Saksi ni Jehova uray kaskasano rumbeng a maapresiarda.” Kastoy ti kuna ti libro nga Aleman a Seher, Grübler, Enthusiasten (Dagiti Managsirmata, Managpanunot, Naanep). Nupay medio kritiko kadagiti Saksi, inamin ti nadakamat a libro: “Iti pangkaaduan, agbibiagda nga awan pakatulawanna ken kalalainganna. Nagagaget ken napasnekda iti trabahoda, natalnada nga umili ken napudno nga agbayad iti buis. Likliklikanda ti aglablabes a panagpabaknang. . . . Maipagpannakkel unay ti disiplina kadagiti kombensionda. Pumada ti espiritu ti kinamanagsakripisioda iti uray aniaman a sabsabali pay a narelihiosuan a grupo; no maipanggep iti ministerio lab-awanda ti amin a sabsabali pay. Ngem ti mangitan-ok kadakuada iti amin a sabsabali pay a Kristiano a simbaan ken grupo iti panawentayo ket ti di pulos maisin a determinasion ti kaaduan kadakuada a mangiwaragawag kadagiti doktrinada iti sidong ti amin a kasasaad ken iti laksid ti amin a peggad.”a

Iti laksid ti kasta a positibo a kapanunotan, adda dagiti mangpadpadas a mangidatag iti naiduma unay a panangmatmat kadagiti Saksi ni Jehova. Iti kaaduan a pagilian iti intero a lubong, sipapanayag nga ar-aramiden dagiti Saksi ti narelihiosuan a serbisioda iti adun a dekada nga awan mangsingsinga. Minilion a tattao ti makaam-ammo kadakuada, mangraraem kadakuada, ken umanamong nga adda karbenganda a mangalagad iti relihionda. Apay, ngarud, nga adda panagduadua maipapan iti kinasiasino dagiti Saksi ni Jehova?

Nalabit ti maysa a makagapu iti panagduadua ket iti napalabas, addada sabsabali pay a narelihiosuan a grupo a nairaman iti panangabuso kadagiti ubbing, ragup a panagpakamatay, ken iyaatake dagiti terorista. Siempre, dagiti dakes nga aramid a kas kadagitoy ket mapaspasamak iti uray sadinoman, saan laeng a kadagiti relihioso. Nupay kasta, no maipanggep iti relihion, adu a tao ti nagbalin a managduadua, a dadduma gumurada pay ketdi.

Dagiti Peggad iti Panangsurot Kadagiti Tao

Ti maysa a “sekta” ket nadepinar kas “maysa a grupo a mangitantandudo iti naisalsalumina a doktrina wenno iti maysa a lider.” Iti umasping a pamay-an, dagidiay karaman iti maysa a “kulto” addaanda iti “napasnek a debosion iti maysa a tao, ideya, wenno banag.” Kinapudnona, dagiti miembro ti aniaman a relihioso a grupo a sipapasnek a sumursurot kadagiti natauan a lider ken kadagiti kapanunotanda, agpegpeggadda nga agbalin nga adipen dagiti tao. Ti natibker a relasion a naipamaysa iti lider makaituggod iti makadangran a panagdepende iti emosional ken espiritual. Mabalin a kumaro ti peggad no ti maysa a tao napadakkel iti sektarian a sangakabbalayan manipud pay kinaubingna.

Dagidiay addaan iti kakasta a pakaseknan maipapan iti relihion kasapulanda ti mapagtalkan nga impormasion. Nalabit adda nagkuna kadagiti dadduma a karaman dagiti Saksi ni Jehova iti maysa a narelihiosuan nga organisasion a mangadipen kadagiti miembrona, addaan iti naturay a panangkontrol kadakuada, aglablabes a mangkeddeng iti wayawayada, ken agparangda a di makitunos iti intero a kagimongan.

Ammo dagiti Saksi ni Jehova a di nainkalintegan dagitoy a pakaseknan. Gapuna, awisendakayo nga agsukimat a mismo. Kalpasan ti naannad a panangusig, mangaramidkayo iti bukodyo a konklusion. Dagiti kadi Saksi ket adipen ti Dios, a kas kunada, wenno iti kinapudnona adipen dagiti tao? Aniat’ pagtaudan ti pigsada? Ti dua nga artikulo iti panid 12-23 mangipaay iti makapnek a sungbat kadagitoy a saludsod.

[Footnote]