Tungpalen ni Jehova Dagiti Karina Kadagiti Matalek
“Matalek ti nagkari.”—HEBREO 10:23.
1, 2. Apay a naan-anay a makapagtalektayo kadagiti kari ni Jehova?
KALIKAGUMAN ni Jehova a dagiti adipenna patanoren ken salimetmetanda ti natibker a pammati kenkuana ken kadagiti karina. Buyogen ti kasta a pammati, naan-anay a makapagtalektayo nga aramiden ni Jehova ti inkarina nga aramiden. Kuna ti naipaltiing a Saona: “Ni Jehova dagiti buybuyot insapatana, a kunana, Pudno unay, a kas iti panangpanunotko, kastanto ti maaramid; ken kas iti pinanggepko, kasta ti mataginayonto.”—Isaias 14:24.
2 Ti sasao a, “ni Jehova dagiti buybuyot insapatana,” ipakitana a sipapasnek nga insapatana a tungpalenna dagiti karina. Dayta ti gapuna a maikuna ti Saona: “Agtalekka ken ni Jehova iti amin a pusom, ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.” (Proverbio 3:5, 6) No agtalektayo ken ni Jehova ken agpaidalantayo iti siribna, sigurado nga agturong dagiti desdestayo iti biag nga agnanayon, ta ti sirib ti Dios ket “kayo ti biag kadagiti kumpet iti dayta.”—Proverbio 3:18; Juan 17:3.
Pudno a Pammati Idi Ugma
3. Kasano nga impakita ni Noe ti pammatina ken Jehova?
3 Ti rekord maipapan iti pannakilangen ni Jehova kadagidiay addaan pudno a pammati paneknekanna nga isu ket mapangnamnamaan. Kas pagarigan, nasurok nga 4,400 a tawenen ti napalabas, imbaga ti Dios ken ni Noe a ti lubong idi kaaldawanna ket dadaelen ti sangalubongan a Layus. Binilinna ni Noe a mangbangon iti dakkel a daong a pakaisalakanan dagiti tao ken animal. Ania ti inaramid ni Noe? Kunaen kadatayo ti Hebreo 11:7: “Babaen iti pammati, kalpasan a naipaayan iti nadibinuan a pakdaar maipapan kadagiti bambanag a di pay nakita, impakita ni Noe ti nadiosan a buteng ket imbangonna ti maysa a daong a pakaisalakanan ti sangakabbalayanna.” Apay a namati ni Noe iti banag a di pay pulos napasamak, banag a “di pay nakita”? Agsipud ta ammona maibatay kadagiti napalabas a pannakilangen ti Dios iti sangatauan a matungpal amin nga ibaga ti Dios. Isu a nagtalek ni Noe a mapasamak met ti Layus.—Genesis 6:9-22.
4, 5. Apay a naan-anay a nagtalek ni Abraham ken Jehova?
4 Maysa met ni Abraham a pagwadan iti pudno a pammati. Agarup 3,900 a tawenen ti napalabas, imbaga ti Dios kenkuana nga idatonna ni Isaac, ti bugbugtong nga anakda ken Sara nga asawana. (Genesis 22:1-10) Ania ti inaramid ni Abraham? Kuna ti Hebreo 11:17: “Babaen iti pammati, idi isu nasubok, ni Abraham kaslanan indaton ni Isaac.” Nupay kasta, sakbay a naladaw ti amin, ti anghel ni Jehova inatipana ni Abraham. (Genesis 22:11, 12) Kaskasdi, apay a situtulok ni Abraham a nangaramid iti kasta a banag? Agsipud ta, kas kuna ti Hebreo 11:19, “pinanunotna a kabaelan ti Dios a pagungaren [ni Isaac] uray pay manipud kadagiti natay.” Ngem kasano a makapagtalek ni Abraham iti panagungar idinto ta awan pay a pulos ti nakitana a nagungar ken awan pay kasta a napasamak idi kasakbayanna?
5 Laglagipenyo, 89 ti tawen ni Sara idi inkari ti Dios a maaddaanto iti anak. Nalabesen iti tawen a panaganak ni Sara—natayen ti aanakanna, no ar-arigen. (Genesis 18:9-14) Pinagungar ti Dios ti aanakan ni Sara, ket impasngayna ni Isaac. (Genesis 21:1-3) Ammo ni Abraham a tangay pinagungar ti Dios ti natay nga aanakan ni Sara, kabaelanna met ngarud a pagungaren ni Isaac no kasapulan. Maipapan ken Abraham, kuna ti Roma 4:20, 21: “Gapu iti kari ti Dios isu di nagpangpangadua iti kinakurang ti pammati, no di ket bimmileg babaen ti pammatina, a nangipapaay iti dayag iti Dios ken naan-anay a nakombinsir a no ania ti inkarina kabaelanna met nga aramiden.”
6. Kasano nga inyebkas ni Josue ti panagtalekna ken Jehova?
6 Nasurok a 3,400 a tawenen ti napalabas idi a nasurok a sangagasut ti tawen ni Josue ken kalpasan a napaneknekanna iti unos ti panagbiagna a talaga a mapagtalkan ti Dios, impaayna daytoy a pakaigapuan ti panagtalekna: “Ammuenyo iti amin a pusoyo ken amin a kararuayo, nga awan ti uray maysa a nagkurang kadagiti amin a naimbag a ni Jehova a Diosyo insaona a maipanggep kadakayo; isuda amin natungpalda kadakayo, awan ti nagkurang kadakuada nga uray maysa.”—Josue 23:14.
7, 8. Ania a makaispal a tignay ti inaramid dagiti matalek a Kristiano idi umuna a siglo, ken apay?
7 Agarup 1,900 a tawenen ti napalabas, adu a napakumbaba a tattao ti nangipakita iti pudno a pammati. Nabigbigda manipud iti kaitungpalan ti padto iti Biblia a ni Jesus ti Mesias ket inawatda dagiti sursurona. Tangay adda nalagda a pangibatayanda kadagiti pasamak ken iti Hebreo a Kasuratan, namatida kadagiti insuro ni Jesus. Isu nga idi kinuna ni Jesus nga ukomento ti Dios ti Judea ken ti Jerusalem gapu iti kinagulibda, namatida kenkuana. Ket idi imbagana kadakuada no ania ti rumbeng nga aramidenda tapno maisalakanda, inaramidda dayta.
8 Kinuna ni Jesus kadagidi manamati a no ti Jerusalem ket napalawlawan kadagiti buyot, rumbeng a pumanawdan. Rinaut dagiti buyot a Romano ti Jerusalem idi tawen 66 K.P. Ngem kalpasanna pimmanaw dagiti Romano nga awan gapgapuna. Dayta ti pagilasinan tapno panawanen dagiti Kristiano ti siudad, ta kinuna ni Jesus: “Inton makitayo ti Jerusalem a nalikmut kadagiti nagpakarso a buybuyot, iti kasta ammuenyo a ti pannakalangalangna immasidegen. Ket dagidiay adda idiay Judea rugianda koma ti agkamang kadagiti bambantay, ket dagidiay adda iti tengngana pumanawda koma, ket dagidiay adda kadagiti aw-away saanda koma a sumrek kenkuana.” (Lucas 21:20, 21) Dagidiay addaan pudno a pammati pinanawanda ti Jerusalem ken ti aglawlawna ket nagkamangda iti natalged a disso.
Dagiti Pagbanagan ti Kinaawan Pammati
9, 10. (a) Kasano nga impakita dagiti panguluen ti relihion ti kinaawan pammatida ken Jesus? (b) Ania ti nagbanagan dayta a kinaawan pammati?
9 Ania ti inaramid dagidiay awanan iti pudno a pammati? Saanda a pimmanaw idi adda gundawayda. Impagarupda a maisalakan ida dagiti panguluenda. Ngem, dagidiay a panguluen ken dagiti pasurotda nakitada met ti ebidensia ti kina-Mesias ni Jesus. Apay ngarud a dida pinati dagiti imbagbagana? Gapu ta dakes ti panagpuspusoda. Naibutaktak daytoy a nasaksakbay idi nakitada dagiti adu nga ordinario a tattao nga immaribungbong ken Jesus kalpasan ti panangpagungarna ken Lazaro. Kuna ti Juan 11:47, 48: “Dagiti panguluen a papadi ken dagiti Fariseo inurnongda a sangsangkamaysa ti Sanhedrin [ti nangato a korte dagiti Judio] ket rinugianda a kunaen: ‘Ania ti aramidentayo, agsipud ta daytoy a tao [ni Jesus] agaramid kadagiti adu a pagilasinan? No isu baybay-antayo a kastoy, maaddaandanto amin iti pammati kenkuana, ket dagiti Romano umaydanto ket ikkatendanto nga agpadpada ti lugartayo ken ti nasiontayo.’” Kuna ti Ju 11 bersikulo 53: “Gapuna manipuden iti dayta nga aldaw nagnunumuanda ti mangpapatay kenkuana.”
10 Anian a nakaskasdaaw a milagro ti inaramid ni Jesus—pinagungarna ni Lazaro! Ngem dagiti panguluen ti relihion kayatda a mapapatay ni Jesus gapu iti dayta nga inaramidna. Naibutaktak pay ti nakaro a kinadakesda idi a “dagiti panguluen a papadi . . . nagnunumuanda a papatayen met ni Lazaro, agsipud ta maigapu kenkuana adu kadagiti Judio ti napan sadiay ket naaddaanda iti pammati ken Jesus.” (Juan 12:10, 11) Kalkalpas laeng idi a napagungar ni Lazaro, ket kayat dagidi a papadi a makita a matay manen! Saanda a maseknan iti pagayatan ti Dios wenno iti pagimbagan dagiti tattao. Managimbubukodanda, a dagiti laeng saad ken pakagunggonaanda ti pakaseknanda. “Inayatda ti dayag dagiti tattao nga ad-adda pay ngem iti dayag ti Dios.” (Juan 12:43) Ngem inkaroda ti kinaawan pammatida. Idi tawen 70 K.P., nagsubli dagiti buyot ti Roma ket dinadaelda ti lugarda ken ti nasionda, ken adu ti napapatay kadakuada.
Maiparparangarang ti Pammati iti Tiempotayo
11. Idi rugrugi daytoy a siglo, kasano a naiparangarang ti pudno a pammati?
11 Iti daytoy a siglo, adu met dagiti lallaki ken babbai nga addaan pudno a pammati. Kas pagarigan, idi rugrugi ti dekada 1900, segseggaan ti kaaduan a tattao ti natalna, narang-ay a masanguanan. Maigiddato iti dayta, dagidiay addaan pammati ken Jehova iwarwaragawagda nga asideg idin a sumrek ti sangatauan iti kakaruan pay laeng a panawen ti riribuk. Dayta ti naipadto iti Sao ti Dios iti Mateo kapitulo 24, 2 Timoteo kapitulo 3, ken iti dadduma pay [a teksto]. Pudno a napasamak ti imbaga dagidi a tattao nga addaan pammati, nangrugi idi 1914 iti Gubat Sangalubongan I. Talaga a simrek idin ti lubong iti naipadto a “maudi nga al-aldaw” a buyogen “dagiti napeggad a tiempo a narigat a pakilangenan.” (2 Timoteo 3:1) Apay a dagiti adipen ni Jehova ammoda ti kinapudno maipapan kadagiti kasasaad idi ti lubong idinto ta saan nga ammo dagiti dadduma? Agsipud ta, kas ken Josue, adda pammatida nga awan ti sao ni Jehova a di matungpal.
12. Iti agdama, ania a kari ni Jehova ti naan-anay a talken dagiti adipenna?
12 Iti agdama, iti intero a lubong agarup innem a milion ti bilang dagiti adipen ni Jehova nga addaan panagtalek kenkuana. Ammoda, kas paneknekan ti kaitungpalan ti naimpadtuan a sao ti Dios, a din agbayag gibusanna daytoy naranggas, imoral a sistema dagiti bambanag. Isu nga agtalekda nga asidegen ti tiempo a pannakakitada iti kaitungpalan ti 1 Juan 2:17, a kunana: “Ti lubong aglabas ken kasta met ti tarigagayna, ngem ti mangaramid iti pagayatan ti Dios agtalinaed iti agnanayon.” Naan-anay nga agtalek dagiti adipenna a tungpalento ni Jehova daytoy a kari.
13. Kasano kapasnek a makapagtalekkayo ken Jehova?
13 Kasano kapasnek a makapagtalekkayo ken Jehova? Mabalinyo nga ipusta ti biagyo maigapu kenkuana! Uray pay mapukawyo ti biagyo ita gapu iti panagserbiyo kenkuana, ikkannakayto iti biag a nasaysayaat nga amang babaen ti panagungar. Ipanamnama ni Jesus kadatayo: “Um-umayen ti oras nga amin dagidiay adda kadagiti pakalaglagipan a tanem [kayatna a sawen, iti lagip ti Dios] mangngegdanto ti timekna ket rummuardanto.” (Juan 5:28, 29) Adda kadi am-ammoyo a doktor, politiko, sientista, negosiante, wenno uray asino a tao a makaaramid iti dayta? Ti napalabas a rekordda ipakitana a saanda a kabaelan. Kabaelan ni Jehova, ket aramidennanto!
Nakaskasdaaw a Masanguanan Para Kadagiti Matalek
14. Ania a nakaskasdaaw a masanguanan ti inkari ti Sao ti Dios kadagiti matalek?
14 Impasimudaag ni Jesus a di bumurong nga umay ti baro a lubong iti sidong ti nailangitan a Pagarian ti Dios, a kunana: “Naragsak dagiti naalumamay ti kaririknada, yantangay tawidendanto ti daga.” (Mateo 5:5) Dayta ti mangpasingked iti kari ti Dios a masarakan iti Salmo 37:29: “Ti sililinteg tawidennanto ti daga, ket agtaengto kenkuana nga agnanayon.” Ket sakbay la unay ti ipapatay ni Jesus idi inyebkas ti maysa a managdakdakes ti pammatina kenkuana, kinuna ni Jesus iti dayta a lalaki: “Makikaduakanto kaniak idiay Paraiso.” (Lucas 23:43) Wen, kas Ari ti Pagarian ti Dios, siguraduento ni Jesus a mapagungar daytoy a lalaki ditoy daga nga addaan gundaway nga agbiag nga agnanayon iti dayta a Paraiso. Iti kaaldawantayo, dagidiay addaan pammati iti Pagarian ni Jehova mainanamada met ti agbiag iti Paraiso inton “[ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:4.
15, 16. Apay a nakataltalnanto ti biag iti baro a lubong?
15 Sirmataentayo dayta a baro a lubong. Darepdepenyo nga agbibiagtayon iti dayta. Dagus a makitatayo iti uray sadinoman dagiti nararagsak a tattao nga agnanaed a sangsangkamaysa iti naan-anay a talna. Sagsagrapenda dagiti kasasaad a kas kadagidiay nailadawan iti Isaias 14:7: “Ti isuamin a daga aginana, ket natalna: tumpuarda nga agkankanta.” Apay? Ti maysa a makagapu, paliiwenyo ta awan kandado ti ruruangan dagiti balay. Saan a kasapulan dagitoy, ta awan ti krimen wenno kinaranggas. Kas kinuna ti Sao ti Dios: “Agtugawdanto tunggal maysa a tao iti sirok ti kayona nga ubas ken iti sirok ti kayona nga higos; ket awanto ti mangpabuteng kadakuada.”—Mikias 4:4.
16 Awan metten ti gubat, ta iti daytoy baro a lubong, maiparit ti gubat. Amin nga igam napagbalindanton nga instrumento ti talna. Iti naan-anay a pamay-an, natungpalen ti Isaias 2:4: “Pandayendanto dagiti kamkampilanda a pagbalinen a dingding ti arado, ket dagiti pikpikada pandayendanto a kumkumpay; ti maysa a nasion saannanto nga itag-ay ti kampilan a maibusor iti nasion, ket didanto met adalenen ti pannakigubat uray kaano.” Ngem dayta ti ninamnamatayo! Apay? Agsipud ta adu nga agnaed iti baro a lubong ti nakasursuro a mangaramid iti dayta bayat ti panagserbida iti Dios iti daan a lubong.
17. Anianto ti kasasaad ti biag iti sidong ti Pagarian ti Dios?
17 Mapaliiwyo met nga awan ti kinapanglaw. Awan ti agnanaed iti narugit a kalapaw wenno nakakawes iti rutayrutay wenno awanan pagtaengan. Addaan ti amin iti komportable a pagtaengan ken nasayaat pannakaaywanna a sanikua nga addaan kadagiti nakaay-ayat a kaykayo ken sabsabong. (Isaias 35:1, 2; 65:21, 22; Ezequiel 34:27) Ken awan ti bisin agsipud ta tinungpalen ti Dios ti karina a nawadwadto ti taraon nga agpaay iti amin: “Addanto kinaruay ti bukel iti daga iti tapaw dagiti bambantay.” (Salmo 72:16) Kinapudnona, iti panangimaton ti Pagarian ti Dios, agsaknap iti intero a daga ti nadayag a paraiso, kas pinanggep ti Dios idiay Eden.—Genesis 2:8.
18. Iti baro a lubong, aniada a banag ti saanton a mamagpeggad kadagiti tattao?
18 Masdaawkayo met iti kinasalibukag ti tunggal maysa. Perpekto ngaminen ti bagi ken isipda. Awanen ti sakit, ut-ot, wenno ipapatay. Awan ti naka-wheelchair wenno nakaidda idiay ospital. Agnanayon nga awanen amin dagita. (Isaias 33:24; 35:5, 6) Awan kadagiti animal ti napeggad, ta nagbalindan a naamo babaen ti pannakabalin ti Dios!—Isaias 11:6-8; 65:25; Ezequiel 34:25.
19. Apay a ‘nakaay-ayatto’ ti tunggal aldaw iti baro a lubong?
19 Anian a nakaskasdaaw a sibilisasion ti buklen dagiti matalek nga agnaed iti daytoy baro a lubong! Ti pigsa ken laingda ken ti kinabaknang ti daga mausarda iti makagunggona a pamay-an, saan nga iti makadangran; iti panagtitinnulong, saan a panagsisinnalisal. Ket amin a masabetyo mapiaryo agsipud ta, kas inkari ti Dios, amin ket “tattao a sinursuruan ni Jehova.” (Isaias 54:13, NW) Tangay dagiti linteg ti Dios ti mangituray iti amin a tao, ti daga “mapnonto iti pannakaammo ken ni Jehova, a kasla dagiti dandanum saknapanda ti baybay.” (Isaias 11:9) Pudno unay, kas kinuna ti Salmo 37:11 (NW), ‘nakaay-ayatto’ ti tunggal aldaw iti daytoy baro a lubong.
Naipanamnama ti Naragsak a Masanguanan
20. Ania ti masapul nga aramidentayo tapno matagiragsaktayo ti natalna a masanguanan?
20 Ania ti masapul nga aramidentayo tapno addatayto iti dayta a naragsak a masanguanan? Kunaen kadatayo ti Isaias 55:6: “Sapulenyo ni Jehova ita ta masarakan pay; umawagkayo kenkuana ita ta asideg pay.” Ket bayat a sapulentayo, ti kababalintayo ket kas koma iti nadeskribir iti Salmo 143:10: “Isuronak a mangtungpal ita nakemmo, ta sika ti Diosko.” Dagidiay mangaramid iti daytoy makapagnada nga awan pakapilawanna iti imatang ni Jehova kadagitoy maudi nga al-aldaw ken makainanamada iti nasayaat a masanguanan. “Mingmingam ti napnuan-imbag a tao, ket matmatam ti nalinteg; ta addanto nanam-ay a tungpal a maipaay iti tao ti kappia. Ngem no maipapan kadagiti managlabsing, madadaeldanto a matalipupos: ti tungpal dagiti nadangkes magessatto.”—Salmo 37:37, 38.
21, 22. Ania ti bukbuklen itan ti Dios, ket kasanoda a masansanay?
21 Ay-ayaban itan ni Jehova manipud iti amin a nasion dagidiay mayat a mangaramid iti pagayatanna. Bukbuklenna ida a kas pundasion daytoy baro a naindagaan a kagimongan, kas naipadto iti Biblia: “Kadagiti maud-udi nga al-aldaw [ti panawen a pagbibiagantayon] . . . adu dagiti inilin-ili a mapanto ken agkuna, Umaykayo, ket sumang-attayo iti bantay ni Jehova [ti natan-ok a pudno a panagdayaw kenkuana] . . . Isuronatayonto kadagiti dalanna, ket magnatayonto kadagiti danana.”—Isaias 2:2, 3.
22 Iti Apocalipsis 7:9, nadeskribir dagitoy kas “dakkel a bunggoy . . . manipud kadagiti isuamin a nasion ken kadagiti tribo ken kadagiti il-ili ken kadagiti pagsasao.” Kuna ti Apo 7 bersikulo 14: “Dagitoy isuda dagidiay naggapu iti dakkel a rigat,” a makalasat iti panungpalan ti agdama a sistema. Daytoy a pundasion ti baro a lubong ket agdagup itan iti agarup innem a milion, a tinawen nga adu dagiti kabbaro a tumiptipon iti dayta. Amin dagitoy a matalek nga adipen ni Jehova ket masansanaydan nga agbiag iti baro a lubongna. Masursuruanda kadagiti naespirituan ken dadduma pay a paglaingan a kasapulan tapno agbalin a paraiso daytoy daga. Ken naan-anay nga agtalekda a pumudnonto ti Paraiso agsipud ta “matalek ti nagkari.”—Hebreo 10:23.
Dagiti Punto a Marepaso
◻ Ania ti nagbanagan ti kinaawan pammati idi umuna a siglo?
◻ Kasano kapasnek a dagiti adipen ti Dios makapagtalekda kenkuana?
◻ Ania a masanguanan ti agur-uray kadagiti matalek?
◻ Ania ti masapul nga aramidentayo tapno sigurado a masagraptayo ti naragsak a masanguanan iti baro a lubong ti Dios?
[Ladawan iti panid 18]
Bukbuklen itan ni Jehova ti pundasion ti baro a naindagaan a kagimongan