Siasino ni Jehova?

KINUNA ni Jehova iti maysa kadagiti matalek a managdaydayawna: “Awan ti tao a makakita kaniak ket agbiag.” (Exodo 33:20) “Ti Dios maysa nga Espiritu,” ket saan a makita dagiti tao babaen kadagiti pisikal a matada. (Juan 4:24) No kasano a makadangran kadagiti matatayo ti panangperreng iti init iti tengnga ti aldaw, kasta met a makadangran kadatayo a kitaen ti nakaskasdaaw a Pagtataudan ti enerhia a nangparsua saan laeng a ti makapurar nga inittayo no di pay ket ti di mabilang a sabsabali pay nga init iti uniberso.

Naimbag laengen ta ditay kasapulan a kitaen ti Dios tapno maammuan ti maipapan kenkuana. Agpadpada nga iyam-ammo ti Biblia Daydiay nangisagana iti dayta nakaskasdaaw a pakete, ti daga, para kadatayo ken ipalgakna ti personalidadna. Gapuna maiparbeng a sukimaten ti Biblia tapno maammuantayo ti maipapan iti Ama a nangted kadatayo iti biag ken nangipaay iti nagpintas a pagtaengan a pangtagiragsakan iti biag.

Kayulogan ti Naganna

Amin a nagan adda kaipapananda, nupay adu ti mabalin a saan a makaammo kadagitoy ita. Kas pagarigan, ti kadawyan a nagan iti Ingles a David ket nagtaud iti sao a Hebreo a kaipapananna “Ay-ayaten.” Ti nagan ti Namarsua, a Jehova, adda met kaipapananna. Ania dayta? Iti orihinal a pagsasao iti Biblia a Hebreo, ti nasantuan a nagan naisurat iti uppat a letra, YHWH, ket agparang iti agarup 7,000 a daras iti Hebreo a paset ti Biblia. Maawatan a ti nasantuan a nagan kaipapananna “Pagbalinenna.” Ipaspasimudaagna a ni Jehova sisisirib a pagbalinenna ti bagina iti aniaman a kasapulanna a pagbalinan tapno maibanag dagiti panggepna. Isu ti Namarsua, Ukom, Manangisalakan, Manangsustener iti Biag, ket ngarud matungpalna dagiti karina. Malaksid iti dayta, iti Hebreo, ti nagan a Jehova ket adda iti maysa a porma a mangipaspasimudaag iti panagtignay iti wagas a maitungpal. Wen, pagbalbalinen pay laeng ni Jehova ti bagina a manangitungpal kadagiti panggepna. Isu ket sibibiag a Dios!

Dagiti Kangrunaan a Galad ni Jehova

Iladawan ti Biblia ti Namarsua kas “Dios a manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno, manalimetmet iti kaasi a siaayat a maipaay kadagiti rinibribu, mamakawan iti kinadakes ken salungasing ken basol.” (Exodo 34:6, 7) Ti sao a “kinaimbag a siaayat” ket ipatarusna ti napnuan kaipapanan a sao a Hebreo. Ipasimudaagna ti kinamanangngaasi a siaayat a mainaig iti maysa a banag agingga a matungpal ti panggepna iti dayta a banag. Mabalin met a maipatarus a “nasungdo nga ayat.” Ti kinamanangngaasi ni Jehova siaayat a mainaig kadagiti parsuana ken itungpalna ti nakaskasdaaw a panggepna. Saanyo kadi nga ipateg ti kasta nga ayat manipud iti Daydiay nangted kadakayo iti biag?

Nabannayat ni Jehova nga agpungtot ken alisto a mangpakawan kadagiti basoltayo. Makaparag-o ti agbalin a nadekket iti kasta a persona. Ngem, dina kaipapanan a kondenarenna ti dakes nga aramid. Kinunana: “Siak, ni Jehova, ayatek ti kinahustisia, guraek ti panagtakaw agraman kinadangkes.” (Isaias 61:8) Kas Dios ti kinahustisia, saanna a panuynoyan iti agnanayon dagiti sipapakinakem a managbasol nga agtultuloy iti kinadangkesda. Gapuna, makasiguradotayo nga iti naituding a tiempona, ilintegto ni Jehova ti kinakillo iti lubong. Saanna a baybay-an dagiti mairurrurumen.

Saan a nalaka a pagtalinaeden ti naan-anay a kinatimbeng iti ayat ken kinahustisia. No maysaka a naganak, marigatanka kadi a mangikeddeng no kaano, kasano, ken agingga iti ania a korehirem dagiti annakmo no adda di umiso nga inaramidda? Masapul ti dakkel a kinasirib tapno matimbeng ti kinahustisia iti naayat a kinamanangngaasi. Naruay nga ipakpakita ni Jehova dayta a galad iti pannakilangenna kadagiti tao. (Roma 11:33-36) Wen, ti sirib ti Namarsua makita iti uray sadinoman, kas pagarigan kadagiti pagsidsiddaawan iti panamarsua a nanglikmut kadatayo.​—Salmo 104:24; Proverbio 3:19.

Nupay kasta, saan nga umdas ti kaadda ti sirib. Tapno maibanag ti pagayatanna, masapul nga addaan met ti Namarsua iti pannakabalin, ket ipalgak ti Biblia nga isu ket mannakabalin unay: “Itangadyo dagiti matayo idiay ngato, ket kitaenyo no asino ti namarsua kadagitoy, a babaen iti panangbilang Isu iruarna dagiti buybuyotda; isu inagananna ida amin; gapu iti kinadakkel unay ti kinamaingelna, ken agsipud ta napigsa iti pannakabalin, awan ti agkurang uray no maysa.” (Isaias 40:26) Gapu iti “kinadakkel unay ti kinamaingelna,” maaramid ni Jehova dagiti bambanag. Saannakay kadi nga iyasideg kenkuana ti kasta a galad?

Dios Dagiti Amin a Nasion

‘Ngem saan aya a ni Jehova ti Dios iti “Daan a Tulag,” ti Dios iti nagkauna nga Israel?’ mabalin a maisaludsodyo. Pudno nga impalgak ni Jehova ti bagina kadagiti Israelita. Kaskasdi, tangay isu ti namarsua iti immuna a pagassawaan, ni Jehova ti Dios a “nakautangan ti tunggal pamilia . . . iti daga iti naganna.” (Efeso 3:15) No mamatikayo a maitutop a raemenyo dagiti kapuonanyo, saan kadi a maiparbeng a dayawenyo Daydiay nangted ti biag iti immuna a tao, ti kapuonantayo amin, nga isu ti ramut ti amin a kaputotan nga adda ditoy daga ita?

Saan nga akikid ti panagpampanunot ti Namarsua iti sangatauan. Pudno, adda idi tiempo a naaddaan iti naisangsangayan a relasion iti nasion ti Israel. Nupay kasta, awatenna amin nga umawag iti naganna. Maysa a masirib nga ari iti Israel ti nagkararag ken Jehova: “Maipanggep iti ganggannaet, a saan a taga ilim nga Israel, no umayto manipud iti daga nga adayo a gapu iti naganmo . . . , denggem sadi langit, . . . ket aramidem ti mayannurot iti amin a dawaten kenka ti ganggannaet; tapno amin dagiti il-ili iti daga maammuanda ti naganmo.” (1 Ar-ari 8:41-43) Agingga iti daytoy nga aldaw, dagiti tao iti amin a nasion mabalinda nga ammuen ni Jehova ken maaddaan iti makagunggona a relasion kenkuana. Ngem kasanonakay nga apektaran dayta?

Dagiti Gunggona iti Panangammo ken Jehova

Kas panangsubli iti ilustrasion iti napalabas nga artikulo, no nakaawatkayo iti pakete a nagpintas ti pannakabungonna, natural laeng a kayatyo a maammuan no pagpaayanna ti sagut. Kasano koma nga usaren ken saluadan? Iti umasping a pamay-an, kayattayo a maammuan no ania ti adda iti isip ti Dios idi insaganana ti daga para kadatayo. Kuna kadatayo ti Biblia nga isu “pinarsuana a saan nga ongaong,” no di ket “binukelna tapno isu ti pagyanan,” awan sabali no di dagiti tao.​—Isaias 45:18.

Nupay kasta, saan a sinaluadan ti kaaduan a tao ti sagut ti Namarsua. Daddadaelenda ti daga, a pagladingitan unay ni Jehova. Ngem, maitunos iti kaipapanan ti naganna, determinado ni Jehova a mangtungpal iti orihinal a panggepna agpaay iti tao ken iti daga. (Salmo 115:16; Apocalipsis 11:18) Tarimnennanto ti daga sana ited kas tawid kadagidiay situtulok nga agbiag kas natulnog nga annakna.​—Mateo 5:5.

Deskribiren ti maudi a libro iti Biblia no anianto dagiti kasasaad no mapasamak dayta: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. . . . Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.” (Apocalipsis 21:3, 4) Awanton ti agsangit gapu iti liday wenno agleddaang gapu iti ipapatay ti ay-ayaten. Awanton ti dumawat iti tulong gapu iti kaawan-namnama wenno agsagaba iti ut-ot gapu kadagiti makapapatay a sakit. Uray “ni patay mapukawto.” (1 Corinto 15:26; Isaias 25:8; 33:24) Iladawan daytoy ti kita ti biag nga orihinal a tinarigagayan ni Jehova a tagiragsakentayo idi pinarsuana dagiti immuna a kapuonantayo.

Wen, makitayo ti kasta nga arig paraiso a kasasaad itan kadagiti managdaydayaw ni Jehova. Kunana kadakuada: “Siak, ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma.” (Isaias 48:17) Ni Jehova ket naasi nga Ama a mangisursuro kadatayo, nga annakna, iti kasayaatan a wagas ti panagbiag. Dagiti pagalagadanna kadagiti tao ket saan a di nainkalintegan ti kinaingetda, no di ket naayat a proteksion. Ti panangtungpal kadagitoy agbanag iti pudno a wayawaya ken ragsak, kas naisurat: “Ita ni Jehova isu ti Espiritu; ket no sadino ti yan ti espiritu ni Jehova, adda wayawaya.” (2 Corinto 3:17) Babaen ti panangsurot kadagiti pagalagadan a nailanad iti Biblia, dagidiay agpapaituray kenkuana tagtagiragsakendan ti talna ti panunot nga iti maysa nga aldaw agrairanto iti intero a lubong ti sangatauan.​—Filipos 4:7.

Nagimbag ketdin nga Ama ni Jehova! Kayatyo kadi ti makasursuro iti ad-adu pay maipapan iti Daydiay adda iti likudan ti amin a pagsidsiddaawan iti nakaparsuaan? Para kadagiti agtarigagay, dagiti gunggona ket di magatadan uray pay ita. Ket iti masanguanan, dagiti bendision awanto ti inggana.

[Ladawan iti panid 5]

Ti nagan ti Dios a naisurat iti uppat a Hebreo a letra ket makita kadagiti diding ti adu a daanen a simbaan