Mabalinyo ti Rumang-ay iti Naespirituan

MABALIN a narigat a mailasin ti pudno a kinapateg. Kasta ti kasasaad dagiti diamante. Nupay agrimat ti napasileng a diamante, saan unay nga agrimat ti nagubal a diamante. Nupay kasta, sigurado nga adda napintas a saniata iti uneg ti nagubal a diamante.

Adu a wagas ti pakayaspingan dagiti Kristiano kadagiti nagubal a diamante. Nupay mabayag pay ti panagbalintayo a perpekto, adda nalmeng a sagudaytayo a napateg ken Jehova. Kas kadagiti diamante, addaantay amin iti bukod a naisalsalumina a kalidad. Ket kabaelantay amin ti rumang-ay pay iti naespirituan no naimpusuan a tarigagayantay dayta. Mabalin a gugoran ti personalidadtayo, tapno lalo nga agrimatda agpaay a pakaidayawan ni Jehova.​—1 Corinto 10:31.

Kalpasan a matabas ken mapasileng, maimontar ti diamante a mamagminar iti kinarimatna. Kaaspingna, mabalin nga usarennatay ni Jehova iti nadumaduma a kasasaad, wenno annongen, no ‘ikawes[tayo] ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.’​—Efeso 4:20-24.

Mabalin a saan a nalaka ti rumang-ay iti naespirituan, a kas iti di panagrimat ti nagubal a diamante a kas iti saniata. Nalabit nasken nga iwaksitayo ti sumagmamano a nabayagen a pagkapuyantayo, a baliwantayo ti kababalintayo no akseptarentayo ti pagrebbengan, wenno pagreggetantay pay ketdi ti rumang-ay iti naespirituan. Ngem kabaelantay ti rumang-ay no talaga a kayattayo, agsipud ta maipaayannatayo ni Jehova a Dios iti “pannakabalin a nalablabes ngem ti gagangay.”​—2 Corinto 4:7; Filipos 4:13.

Pabpabilgen ni Jehova Dagiti Adipenna

Ti panangtabas kadagiti diamante kalikagumanna ti panagtalek a bunga ti umiso a pannakaammo, ta apaman a natabasen ti paset ti nagubal a diamante, kadawyanna a mapukawen dayta. Ti nangina a material​—no dadduma aginggat’ 50 a porsiento ti di pay natabas a bato​—ket kasapulan a matabas tapno mapataud ti matarigagayan a sukog. Kasapulantay met ti panagtalek a bunga ti umiso a pannakaammo tapno masukog ti personalidadtayo ken rumang-aytayo iti naespirituan. Nangnangruna a masapul nga agtalektayo a pabilgennatayo ni Jehova.

Ngem nalabit mariknatayo a ditay kabaelan, wenno panunotentayo a ditay kabaelanen ti rumang-ay pay. Idi un-unana, sagpaminsan a kasta met ti narikna dagiti matalek nga adipen ti Dios. (Exodo 3:11, 12; 1 Ar-ari 19:1-4) Idi imbaon ni Dios nga agbalin a “mammadto kadagiti nasnasion,” kinuna ni Jeremias: “Adtoy, saanko nga ammo ti agsao; ta ubingak.” (Jeremias 1:5, 6) Ngem iti laksid ti panagalumiimna, nagbalin ni Jeremias a natured a mammadto a nangiwaragawag kadagiti nabileg a mensahe iti nasukir nga umili. Kasano a naaramidanna daytoy? Nasursurona ti nagpannuray ken ni Jehova. Insurat ni Jeremias idi agangay: “Nagasat ti tao nga agkammatalek ken Jehova, ket ti talgedna ni met laeng Jehova.”​—Jeremias 17:7; 20:11.

Ita, pabpabilgen met laeng ni Jehova dagidiay agtalek kenkuana. Ni Edward,a ama ti uppat nga annak, a nabannayat idi ti irarang-ayna iti naespirituan, napaneknekanna nga agpayso daytoy. Ilawlawagna: “Maysaak a Saksi ni Jehova iti siam a tawenen, ngem kasla diak rumangrang-ay iti naespirituan. Ti problemak ket saanak unay a magagaran ken awan panagtalekko. Kalpasan ti iyaakarko idiay España, naitimpuyogak iti bassit a kongregasion a maymaysa ti panglakayen ken maymaysa ti ministerial nga adipenna. Tangay adda pakasapulan, kiniddaw ti panglakayen nga isaganak ti adu a paset. Agnernerbiosak idi damo a panagpalawag ken panagpasetko iti gimong. Ngem, nasursurok ti agpannuray ken Jehova. Kanayon a kinomendarannak ti panglakayen ken nangted kadagiti nataktika a singasing a pakaparang-ayak.

“Maigiddato iti dayta, pinarang-ayko ti panagserbik iti tay-ak ken pinasayaatko ti panangidaulok iti pamiliak iti naespirituan. Nagbanaganna, lallalo nga immuneg ti panangapresiarmi a sangapamiliaan iti kinapudno, ket nariknak ti ad-adda a pannakapnek. Maysaak itan a ministerial nga adipen, ket ikagkagumaak a patanoren dagiti kalidad ti maysa a Kristiano a manangaywan.”

“Ikkatenyo ti Daan a Personalidad”

Kas iti naamiris ni Edward, ti naespirituan nga irarang-ay kalikagumanna ti panagtalek ken ni Jehova. Napateg met ti panangparang-ay iti arig-Kristo a “baro a personalidad.” Kasano a maaramidan daytoy? Ti umuna nga addang ket ‘ikkaten’ dagidiay ugali a paset ti daan a personalidad. (Colosas 3:9, 10) Kas iti kinaimperpekto, a kaasping dagiti di kasapulan a mineral a rumbeng a maikkat iti nagubal a diamante tapno agbalin a narimat a saniata, kasta met a rumbeng a maikkat dagiti kababalin “a kukua ti lubong” tapno agminar ti baro a personalidadtayo.​—Galacia 4:3.

Ti panagkitakit a mangawat iti responsabilidad gapu iti amak nga adunto unay ti maipakalikagum kadatayo ti maysa kadagita a kababalin. Wen, ti responsabilidad kaipapananna ti trabaho, ngem makapnek a trabaho dayta. (Idiligyo ti Aramid 20:35.) Binigbig ni Pablo a ti nadiosan a debosion kalikagumanna nga ‘agtrabahotayo a sipipinget ken umagawatayo.’ Kinunana nga aramidentayo dayta a siraragsak, “agsipud ta insadagtayo ti namnamatayo iti sibibiag a Dios,” daydiay pulos a di makalipat iti trabaho nga aramidentayo kadagiti padatay a Kristiano ken iti sabsabali.​—1 Timoteo 4:9, 10; Hebreo 6:10.

Adda “narasi a paset” ti dadduma a diamante a rimsua idi timmaudda ket kasapulanda ti naannad a panangtaming. Babaen iti tulong ti instrumento a maawagan polariscope, nupay kasta, makita ti mangpaspasileng ti narasi a paset ken matabasna a sibaballigi ti bato. Nalabit adda narasi a paset ti kinataotayo, wenno pakapilawan ti personalidadtayo, gapu iti nalikudantayo wenno nakas-ang a kapadasan. Ania ti maaramidantayo? Umuna, masapul a bigbigentayo ti parikut ket ikagumaantay a parmeken dayta. Iyebkastayo koma dagiti dagensentayo ken ni Jehova babaen iti kararag, ken mabalintay met a kiddawen ti naespirituan a tulong ti maysa a Kristiano a panglakayen.​—Salmo 55:22; Santiago 5:14, 15.

Naapektaran ni Nicholas iti kasta a makin-uneg a kinarasi. “Alkoholiko ni tatangko, ket nakaro ti sinagabami nga agkabsat kenkuana,” ilawlawagna. “Idi nagsardengak nga ageskuela, nagsoldadoak, ngem ti kinaingarko ti pakaisarsarakak idi agangay. Imbaluddak dagiti opisial iti armada gapu iti panaglakok iti droga, ket idi naminsan, pimmanawak a di nagpakpakada. Kamaudiananna, nagikkatak a soldado, ngem kaskasdi a naisarsarakak. Nupay nariribuk idi ti biagko gapu iti panagabusok iti droga ken sobra a panaginumko, adda interesko iti Biblia ken kayatko nga adda koma direksion ti biagko. Idi agangay, naam-ammok dagiti Saksi ni Jehova, binalbaliwak ti estilo ti panagbiagko, ket inawatko ti kinapudno.

“Nupay kasta, adu a tawen ti naglabas sakbay a binigbigko nga adda pakapilawan ti personalidadko. Karurodko unay ti agpasakup ken umingarak iti aniaman a maibalakadda kaniak. Nupay kayatko ti agpaaramat a naan-anay ken Jehova, daytoy a pagkapuyan ti nanglapped kaniak. Kamaudiananna, babaen ti tulong ti dua a mannakaawat a panglakayen, binigbigko ti problemak ket rinugiak nga inyaplikar dagiti naayat a Nainkasuratan a balakadda. Nupay medio marurodak pay laeng sagpaminsan, makontrolkon ti kinaingarko. Agyamanak unay iti naanus a pannakilangen ni Jehova kaniak ken ti naayat a tulong dagiti panglakayen. Gapu iti naespirituan nga irarang-ayko, nabiit pay a nadutokanak kas ministerial nga adipen.”

Kas iti natakuatan ni Nicholas, saan a nalaka a balbaliwan dagiti nakairuaman a kababalin. Mabalin a sarsarangtentayo ti umasping a karit. Nalabit arsagidtay unay. Mabalin nga adda im-impentayo a sakit ti nakem, wenno ipangpangrunatayo unay iti panagwaywayas. Gapuna, mabalin a limitado ti Nakristianuan nga irarang-aytayo. Kasta met ti mapasaran dagiti mangpaspasileng iti diamante kadagiti bato nga aw-awaganda iti naat. Kinaagpaysuanna, dagitoy ket dua a bato a narunaw a napagmaymaysa kabayatan ti pannakabukel ti diamante. Pagbanaganna, dua nga aggidiat a padron ti itatanor dagiti naats a mangparigat unay iti panangtabas sigun iti binggas. Iti kasasaadtayo, maamiristayo a makidangdangadang ti “binggas” ti sigagagar nga espiritu a maibusor iti “binggas” ti imperpekto a lasagtayo. (Mateo 26:41; Galacia 5:17) No dadduma, mabalin nga agannayastayo a sumukon a mamimpinsan iti pannakidangadang, nga irasontayo nga awan aniamanna dagiti pakapilawan ti personalidadtayo. ‘Total,’ maikunatayo, ‘ay-ayatendak latta ti pamiliak ken gagayyemko.’

No pagserbiantayo dagiti kakabsattayo ken idaydayawtayo ti nailangitan nga Amatayo, nupay kasta, masapul a ‘mapabarotayo koma iti puersa a mangtigtignay iti panunottayo’ babaen ti panangisuottayo iti baro a personalidad. Makagunggona ti panagregget, kas mapaneknekan ni Nicholas ken dagiti adu a sabsabali pay. Ammo ti mangpaspasileng iti diamante a ti maysa a pakapilawan madadaelna ti intero a diamante. Umasping iti dayta, no baybay-antayo ti nakapuy a paset ti personalidadtayo, madadaeltayo ti naespirituan a langatayo. Dakdakes pay, ti nakaro a pagkapuyan mangituggod iti pannakarba ti espiritualidadtayo.​—Proverbio 8:33.

Kas iti “Apuy” nga Adda Kadatayo

Tarigagayan ti mangpaspasileng iti diamante a taginayonen ti kinadeggang iti uneg ti diamante. Maaramid daytoy babaen ti panangyurnos kadagiti parupa tapno mapataudda ti nagduduma a maris. Iti uneg ti diamante, agsisinnublat nga aganninaw ti napnuan maris a lawag, a mangpataud iti kinadeggang a mangparimat iti diamante. Umasping iti dayta, mabalin nga agtignay ti espiritu ti Dios a kas “apuy” kadatayo.​—1 Tesalonica 5:19; Aramid 18:25; Roma 12:11.

Ngem kasanon no maamiristayo a nasken a rumegtatayo iti naespirituan? Kasano a maaramidan daytoy? Masapul a ‘panunoten[tayo] dagiti dalantayo.’ (Salmo 119:59, 60) Ramanen daytoy ti panangilasintayo kadagiti banag a mangpabannayat kadatayo iti naespirituan ket kalpasanna ikeddengtayo no ania dagiti nateokratikuan nga aramid a rumbeng nga ad-adda a regtaantayo. Mapaunegtayo ti naespirituan nga apresasiontayo babaen iti regular a panagadal ken napasnek a panagkararag. (Salmo 119:18, 32; 143:1, 5, 8, 10) Maysa pay, no makikaduatayo kadagidiay naregta iti pammati, lalo a bumileg ti determinasiontayo nga agserbi ken ni Jehova a sireregta.​—Tito 2:14.

Binigbig ni Louise, maysa nga agtutubo a Kristiano a babai: “Planok idin ti agbalin a regular pioneer dua a tawen sakbay ti aktual a panagpalistak kas payunir, wenno amin-tiempo a manangiwaragawag iti Pagarian. Awan idi ti tubeng, ngem nanam-ay ti rutinak, ken diak pinagreggetan a parang-ayen dayta. Idi kuan, di napakpakadaan a pimmusay ni tatangko. Naamirisko no kasano kaababa ti biag ken diak us-usaren a naimbag ti biagko. Isu a binalbaliwak ti naespirituan a panangmatmatko, pinarang-ayko ti serbisiok, ket nagbalinak a regular pioneer. Ti nangnangruna a nakatulong iti daytoy a banag ket dagiti naespirituan a kakabsatko a kanayon a nangsuporta kadagiti urnos iti tay-ak ti serbisio ken regular a nakikuyog kaniak iti ministerio. Nasursurok a mairanudtayo dagiti prinsipio ken kalattayo kadagiti kakaduatayo agpaay man a pagimbagan wenno pagdaksan.”

Pannakapatadem a kas iti Landok

Dagiti diamante ti katangkenan a substansia a natural ti itataudda iti daga. Gapuna, masapul a diamante ti pangtabas iti maysa met la a diamante. Mabalin nga ipalagip daytoy kadagiti agad-adal iti Biblia ti proverbio a kunana: “Babaen ti landok, mapatadem met laeng ti landok. Kasta met a ti tao patademenna ti langa ti sabali.” (Proverbio 27:17) Kasano ti ‘pannakapatadem’ ti rupa ti maysa a tao? Mabalin nga agballigi ti maysa a tao a mangpatadem iti panunot ken espiritualidad ti sabali, no kasano a mausar ti maysa a landok a pangpatadem iti maysa met laeng a metal. Kas pagarigan, no malmaldaangtayo gapu iti pannakaupay, makapabileg ti pammaregta ti maysa a tao. Rumagsak ti naliday a langatayo, ket mapakiredtayo a rumegta manen. (Proverbio 13:12) Nangnangruna a mangpatadem kadatayo dagiti panglakayen iti kongregasion babaen ti panangipaayda kadagiti Nainkasuratan a pammaregta ken balakad nga agpaay a pagrang-ayantayo. Sursurotenda ti prinsipio a kinuna idi ni Solomon: “Ikkam iti pannursuro ti masirib a tao, ket masmasiribto pay: isurom ti sililinteg a tao, ket dumegdegto iti pannakasursuro.”​—Proverbio 9:9.

Siempre, ti naespirituan a pannakasanay kalikagumanna ti tiempo. Nasurok a sangapulo a tawen nga inranud ni apostol Pablo ken ni Timoteo ti kapadasan ken wagas ti panangisurona. (1 Corinto 4:17; 1 Timoteo 4:6, 16) Ti napaut a panangsanay ni Moises ken ni Josue iti nasurok nga 40 a tawen ket nakagunggonaan ti nasion nga Israel iti naunday a panawen. (Josue 1:1, 2; 24:29, 31) Nakikadua ni Eliseo ken ni mammadto nga Elias iti nalabit 6 a tawen, nga immawat iti nagsayaat a pannakaisagana iti mismo a ministeriona a nagpaut iti agarup 60 a tawen. (1 Ar-ari 19:21; 2 Ar-ari 3:11) Babaen iti naynay ken naanus a panangsanayda, masurot dagiti panglakayen ti ulidan da Pablo, Moises, ken Elias.

Ti panangted iti komendasion ket napateg a paset iti panangsanay. Dagiti napasnek nga ebkas ti apresasion kadagiti nagsayaat a nagapuanan wenno nadayaw nga aramid ti mabalin a pakatignayan dagiti sabsabali a tarigagayanda ti agserbi iti Dios nga ad-adda a naan-anay. Ti komendasion patanorenna ti panagtalek nga inton agangay, ket pakaparegtaan a mangparmek kadagiti pagkapuyan. (Idiligyo ti 1 Corinto 11:2.) Ti kinaokupado iti trabaho a panangikasaba iti Pagarian ken dadduma pay a trabaho iti kongregasion ti agbalin met a pakaparegtaan a rumang-ay iti kinapudno. (Aramid 18:5) No ikkan dagiti panglakayen dagiti kakabsat a lallaki kadagiti responsabilidad sigun iti naespirituan nga irarang-ayda, daytoy ti mangted kadagitoy a lallaki iti umdas a kapadasan ken mangpabileg iti tarigagayda nga agtultuloy a rumang-ay iti naespirituan.​—Filipos 1:8, 9.

Naimbag a Rason iti Naespirituan nga Irarang-ay

Maibilang a napateg dagiti diamante. Pudno met dayta kadagidiay kamengen ti sangalubongan a pamilia dagiti agdaydayaw ken ni Jehova. Kinapudnona, ti Dios a mismo awaganna ida a “matarigagayan,” wenno “napateg,” a bambanag iti amin a nasnasion. (Haggeo 2:7, footnote) Itay napan a tawen, 375,923 ti nabautisaran kas Saksi ni Jehova. Tapno mailugaran daytoy nga irarang-ay, kasapulan ‘a mapadakkel ti disso ti tolda.’ Babaen iti irarang-ay iti naespirituan​—ken babaen iti panangragpat kadagiti Nakristianuan a pribilehio iti panagserbi​—posible ti makiraman iti daytoy a panangpalawa.​—Isaias 54:2; 60:22.

Saan a kas iti adu a napateg a diamante a maidulin kadagiti kaha de yero ken manmano a makita, ti naespirituan a kinapategtayo mabalin nga agrimat a silalawag. Ket bayat a regular a pasayaaten ken iparangarangtayo dagiti Nakristianuan a kalidadtayo, maitan-oktayo ni Jehova a Dios. Pinaregta ni Jesus dagiti pasurotna: “Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.” (Mateo 5:16) Sigurado a daytat’ mangted kadatayo iti naimbag a rason a rumang-ay iti naespirituan.

[Footnote]