Determinado a Mangsurot iti Dalan ti Dios iti Biag
Nawadwad ti imburay dagiti “Dalan ti Dios iti Biag” a Kombension kadagidiay agtarigagay nga agserbi iti Dios! Dineskribir ti maysa a delegado ti kombension kas “nagsayaat a panawen ti panagsursuro, pammaregta, ken pannakalawlawag.”
KINUNA ti sabali a “nakaad-adu ti mabalin a tagiragsaken, utoben, panunoten.” Usigentay ita ti programa a mismo.
Jesu-Kristo—Ti Dalan, ti Kinapudno, ken ti Biag
Daytoy ti tema ti umuna nga aldaw ti kombension. (Juan 14:6) Inlawlawag ti umuna nga ispiker ti panggep ti panagtataripnongtayo iti kombension: tapno masursuruan pay maipapan iti kasayaatan a wagas ti panagbiag, ti nadiosan a wagas. Isursuro ni Jehova ti ilina no kasano ti magna kadagiti dalanna. Ar-aramidenna daytoy babaen ti Biblia, “ti matalek ken masirib nga adipen,” ken ti nasantuan nga espiritu. (Mateo 24:45-47; Lucas 4:1; 2 Timoteo 3:16) Anian a pribilehio ti agpaisuro iti Soberano ti uniberso!
Maitunos iti tema para iti dayta nga aldaw, ti panulbek a palawag ket “Pangsubbot ni Kristo—Dalan ti Dios iti Pannakaisalakan.” Iti panangsurot iti dalan ti Dios iti biag, nasken a bigbigentayo ti akem ni Jesu-Kristo iti panggep ni Jehova. Kinuna ti nagpalawag: “No awan ti daton a pangsubbot ni Jesu-Kristo, awan ti tao a makabalin nga umawat iti biag nga agnanayon manipud iti Dios, aniaman ti pammati wenno aramidenna.” Kalpasanna, inadawna ti Juan 3:16, a kunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” Ti panamati iti daton a pangsubbot ni Kristo kalikagumanna ti pananggun-odtayo iti umiso a pannakaammo iti kinapudno. Ramanenna met ti panangidedikar iti biagtayo ken Jehova, panangisimbolo iti daytoy babaen ti panagpabautisar iti danum, ken panagbiag a mayannurot iti ulidan nga impaay ni Jesu-Kristo.—1 Pedro 2:21.
Nangrugi ti sesion iti malem iti palawag a napauluan “Ti Dalan ti Ayat Pulos a Di Aggibus.” Maysa daytoy a bersikulo por bersikulo a pannakailawlawag ti makagutugot a panangiladawan ni Pablo iti ayat, a nailanad iti 1 Corinto 13:4-8. Napalagipan dagiti timmabuno a ti managsakripisio nga ayat ket maysa a pakailasinan ti Kristianidad ket napateg a paset iti panagdayaw nga anamongan ni Jehova ti panagayat iti Dios ken iti kaarruba.
Simmaruno ti nagkatlo-paset a simposium a napauluan “Nagannak—Itukityo ti Dalan ti Dios Kadagiti Annakyo.” Matulongan dagiti nagannak ti annakda nga agserbi iti Dios babaen ti panangipakitada iti nasayaat nga ulidan iti panagbasa ken panagadal iti Saona. Maitukitda ti kinapudno kadagiti annakda babaen ti regular a sangapamiliaan a panagadal, nga iyatadayda dayta kadagiti kasapulan ti pamilia. Napateg met a tulonganda dagiti annakda a makiraman kadagiti aktibidad iti kongregasion ken iti ministerio iti tay-ak. Nupay maysa a karit ti panangpadakkel kadagiti managbuteng-Dios nga annak iti daytoy nadangkes a lubong, ti panangaramid iti dayta mangyeg iti adu a gunggona.
Napauluan ti sumaganad a simposium iti “Pasukogkayo ken Jehova Maipaay iti Nadayaw a Pakausaran.” No kasano a sukogen ti maysa a dumadamili ti damili a basehas, kasta met a sukogen ti Dios dagidiay agtarigagay nga agserbi kenkuana. (Roma 9:20, 21) Ar-aramidenna daytoy babaen ti panangipaayna iti balakad iti Saona ken babaen ti organisasionna. Tulongannatayo ni Jehova a mangusar a naan-anay kadagiti abilidadtayo no madadaantayo nga agserbi, aprobetsarentayo dagiti gundaway, ken situtuloktayo nga agpaiturong kenkuana.
Simmaganad ti makapagagar a paset ti programa—“Serbisio iti Tay-ak ti Panagmisionero.” Iti intero a daga iti 148 a pagilian, 2,390 a Kristiano a ministro ti agserserbi kas misionero. Nasayaat ti ipakpakitada a pagwadan iti kinasungdo ken kinaregta ket ipatpategda unay ti pribilehioda nga agserbi kadagiti ganggannaet a tay-ak. Iti daytoy a paset ti programa kadagiti internasional a kombension, sinarita dagiti misionero dagiti karit ken naragsak a pagpagteng iti biag dagiti misionero.
“Adda Kadi Biag Kalpasan ti Ipapatay?” Dayta ti paulo ti maudi a palawag iti umuna nga aldaw. Rinibu a tawenen a maburburtiaan ti sangatauan iti daytoy a saludsod. Ut-utoben dayta dagiti tattao iti tunggal kagimongan. Nakaad-adu ti sungbat. Nagduduma dagitoy a kas kadagiti kustombre ken relihion dagidiay mangipapaay iti sungbat. Ngem nasken a maammuan dagiti tattao ti kinapudno.
Gapuna, inyanunsio ti nagpalawag ti pannakairuar ti de kolor a baro a 32-panidna a broshur a napauluan Ania ti Mapasamak Kadatayo No Mataytayo? Ilawlawag daytoy a broshur ti nagtaudan ti sursuro maipapan iti imortalidad ti kararua ken ipakitana no kasano a nagbalin a nakapatpateg dayta a pammati iti gistay amin a relihion iti lubong itatta. Iti nalawag ken makaguyugoy a wagas, sukimatenna ti kuna ti Biblia maipapan iti kararua, no apay a mataytayo, ken no ania ti mapasamak kadatayo no mataytayo. Ilawlawag met ti broshur no ania ti namnama dagiti natay ken dagiti sibibiag. Anian a bendision daytoy a publikasion kadagiti agbirbirok iti kinapudno iti uray sadinoman!
Annadanyo a Naimbag ti Pannagnayo
Anian a maikanatad daytoy a tema para iti maikadua nga aldaw ti kombension! (Efeso 5:15) Naipamaysa ti programa ti agsapa iti trabaho a panangasaba ken panangaramid kadagiti adalan. Kalpasan ti pannakausig ti inaldaw a teksto, nagtultuloy ti programa iti palawag a “Panangtulong Kadagiti Tattao a Magna iti Dalan nga Agturong iti Biag.” Tapno maitungpal daytoy naganat a trabaho, nasken a maaddaantayo iti positibo a panangmatmat, a bigbigentayo a maysa a pribilehio ken rebbengen ti panangiranud iti kinapudno kadagiti sabsabali. Idi umuna a siglo K.P., saan nga inkaskaso ti kaaduan a tattao ti Sao ti Dios. Nupay kasta, iti baet ti ibubusor, adda dagidiay ‘siuumiso a maikari iti agnanayon a biag ket nagbalinda a manamati.’ (Aramid 13:48, 50; 14:1-5) Kasta met laeng ti kasasaad ita. Nupay adu ti di umawat iti kinapudno ti Biblia, itultuloytay a biroken dagidiay mangipangag.—Mateo 10:11-13.
Sinalaysay ti simmaganad a palawag ti karit a panangidanon iti mensahe ti biag kadagiti sabsabali. Tangay narigrigaten a madanon dagiti tattao iti pagtaenganda, nasken a ganetgetan ken ipamuspusantayo nga idanon ti mensahe ti Pagarian kadagiti amin a tao aginggat’ mabalin. Iti adu a pagilian, nasayaat ti resulta ti panangasaba dagiti agibumbunannag iti naimbag a damag babaen ti telepono ken panangasaba kadagiti lugar ti negosio, iti kasta madanonda dagidiay narigat a makasarita iti sabali a wagas.
Ti palawag a napauluan “Panangisuro Kadagiti Adalan Maipapan iti Amin nga Imbilin ni Kristo” impamaysana ti atension iti kinapateg ti panagbalin a nasigo iti ministeriotayo. Rumang-ay ti abilidadtayo a mangisuro babaen ti panagsursuro kadagiti dadduma ken panangipakat kadagiti nagsayaat a masursurotayo kadagiti gimong ti kongregasion. No nalaingtayo a mangisuro, rumayray ti rag-o ken pannakapnektayo iti trabahotayo a panangtulong kadagiti tattao a mangammo iti kinapudno ti Biblia.
Nagpatingga ti sesion ti agsapa iti palawag maipanggep iti kaipapanan ti dedikasion ken bautismo. Ti maysa kadagiti punto nga inlawlawag ti ispiker ket no naan-anay nga agtalektayo iti Dios ken sipapasnek nga ikagumaantay nga aramiden ti pagayatanna, bendisionan ken tulongannatayo. Insurat ti masirib a tao: “Kadagiti amin a dalanmo . . . bigbigem [ti Dios], ket isu iturongnanto dagiti desdesmo.” (Proverbio 3:6) Ti naragsak a bautismo a mismo ket maysa a tampok ti kombension a mangipakpakita nga adu ti nangrugin a mangsurot iti dalan ti Dios iti biag.
Kalpasan ti pangngaldaw, nangrugi ti sesion ti malem iti palawag a “Panagserbi a Buyogen ti Namnama a Biag nga Awan Inggana.” Matungpalto ti panggep ti Dios a dagiti natulnog a tattao agserbidanto kenkuana iti agnanayon ditoy daga. Anian a mayanatup ngarud nga ipamaysatayo ti pampanunot, dagiti plano, ken namnamatayo iti panagserbi ken Jehova iti agnanayon! Nupay kayattayo a sipapanunottayo iti “aldaw ni Jehova,” nasken a laglagipentayo a ti kalattayo isu ti panagserbi iti agnanayon. (2 Pedro 3:12) Ti ditay pannakaammo iti eksakto a panawen a panangiwayat ni Jesus iti pammales ti Dios pagtalinaedennatayo a nasalukag ken ikkannatayo kadagiti gundaway a mangipaneknek a nadalus ti motibotayo nga agserserbi ken Jehova.
Sinukimat dagiti simmaganad a dua a palawag ti maika-4 a kapitulo ti surat ni Pablo kadagiti taga Efeso. Karaman kadagiti banag a nausig ti pannakaparaburtayo kadagiti “sagut a tattao,” lallaki a kualipikado iti naespirituan a dinutokan ti nasantuan nga espiritu. Balbalakadan ken idaldalandatayo dagitoy a panglakayen nga agpaay iti naespirituan a pagimbagantayo. Ti naipaltiing a surat ni Pablo idagdagadagna met kadagiti Kristiano nga ikawesda ti “baro a personalidad.” (Efeso 4:8, 24) Mairaman iti nadiosan a personalidad dagiti galad a kas iti pannakipagrikna, kinamanangngaasi, kinapakumbaba, kinaemma, mabayag a panagitured, ken ayat.—Colosas 3:12-14.
Ti panangannad iti pannagnatayo kaipapananna ti panagtalinaedtayo a di natulawan ti lubong—nga isu ti tema ti simmaganad a palawag. Nasken ti kinatimbeng iti panagpili iti paglinglingayan, sosial nga aktibidad, ken material a kalat. No iyaplikartayo ti balakad iti Santiago 1:27 nga agtalinaedtayo a di natulawan ti lubong, matagiragsaktayo ti nadalus a takder iti imatang ti Dios ken ti nasayaat a konsiensia. Agbalin met a makagunggona ti biagtayo ken maparaburantayo iti talna, naespirituan nga irarang-ay, ken kadagiti nagsasayaat a kakadua.
Kalpasanna, simmaruno ti nagkatlo-paset a simposium a napauluan “Agtutubo—Surotenyo ti Dalan ti Dios.” Tangay ammoda nga ay-ayaten ida ti Dios ken apresiarenna ti panagreggetda a mangitandudo iti nasin-aw a panagdayaw, nasken a sanayen dagiti agtutubo ti pannakabalinda nga agpanunot tapno makapagserbida a simamatalek kenkuana. Ti maysa a pamay-an tapno mapatanor ti pannakabalin nga agpanunot ket babaen ti inaldaw a panangbasa iti Sao ti Dios ken panangutob iti dayta. No aramidentayo daytoy, maammuantayo dagiti dalan ni Jehova. (Salmo 119:9-11) Mapatanor met ti pannakabalin nga agpanunot babaen ti panangawat iti nasimbeng a balakad dagiti nagannak, panglakayen, ken dagiti publikasion ti Sosiedad. No umiso ti panangaramat dagiti agtutubo iti pannakabalinda nga agpanunot, masarangetda ti pannakakumikom kadagiti material a sanikua, narugit a panagsasao, ken nalabes a panaglinglingay a kadawyan iti daytoy lubong a naisina iti Dios. No surotenda ti dalan ti Dios iti biag, agpada a matun-oy dagiti agtutubo ken nataengan ti pudno a balligi.
Ti maudi a palawag iti dayta nga aldaw ket “Ti Namarsua—Ti Personalidad ken Daldalanna.” Kalpasan ti panangipakitana a binilion a tattao ti di makaammo iti Namarsua, kinuna ti nagpalawag: “Ti napaypayso a kayulogan ti biag ket nainaig iti panangammo iti Namarsua, ti personal a Diostayo; panangbigbig iti personalidadna; ken panangsurot iti daldalanna. . . . Adda dagiti banag maipapan iti lubongtayo ken maipapan kadatayo a mabalinyo nga usaren iti panangtulong kadagiti tattao a mangakseptar iti Namarsua ken makasarak iti panggep a nainaig kenkuana.” Kalpasanna, sinalaysay ti nagpalawag ti ebidensia nga adda masirib ken naayat a Namarsua. Dimteng ti kangitingitan ti palawag iti pannakairuar ti baro a libro nga Is There a Creator Who Cares About You?
“Isu Daytoy ti Dalan. Magnakayo Kenkuana”
Daytoy ti tema ti maikatlo nga aldaw ti kombension. (Isaias 30:21) Nangrugi ti programa babaen ti makapagagar a simposium a buklen ti tallo a palawag, a naipamaysa iti sirmata ni Ezequiel maipapan iti templo. Dakkel ti kaipapanan daytoy a sirmata iti ili ti Dios kadagitoy nga aldaw, tangay nainaig dayta iti nasin-aw a panagdayaw iti tiempotayo. Ti tulbek ti panangtarus iti sirmata isu daytoy: Ti naindaklan a naespirituan a templo ni Jehova itakderanna ti urnosna iti nasin-aw a panagdayaw. Bayat ti pannakasalaysay dagiti paset ti sirmata, inutob dagiti agdengdengngeg ti aramidda kas panangsuporta iti trabaho dagiti naayat a manangaywan kadagiti napulotan a natda ken dagiti agbalinto a kameng ti klase pangulo.
Idi umal-aldaw, adda makapikapik a drama a naibatay iti Biblia. Naka-costume dagiti dramatista. Napauluan ti drama iti “Dakayo a Pampamilia—Iyugaliyo ti Inaldaw a Panagbasa iti Biblia!” Maipapan daytoy iti pammati ken tured dagiti tallo a Hebreo a nagkedked nga agruknoy iti balitok a ladawan a binangon ni Nabucodonosor nga ari ti Babilonia. Ti panggep ti drama ket tapno ipakita a ti Biblia saan laeng a maysa a libro ti nagkauna a historia no di ket pudno a makagunggona ti balakadna agpadpada kadagiti agtutubo ken nataengan kadagitoy a tiempo.
Kamalemanna, naiparang ti palawag publiko a “Ti Kakaisuna a Dalan nga Agturong iti Biag nga Agnanayon.” Kalpasan a sinimpuonna ti pannakatnag ti sangatauan iti basol ken ipapatay, ingngudo ti nagpalawag babaen kadagitoy a mamagpanunot a sasao: “Ti teksto ti Biblia a tema para iti daytoy nga aldaw ti kombension isu ti Isaias kapitulo 30, bersikulo 21, a kunana: ‘Dagiti lapayagmo makangngegdanto iti maysa a sao iti likudam, a kunana: “Isu daytoy ti dalan, magnakayo kenkuana,” inton agbaw-ingkayo iti makanawan, ken inton agbaw-ingkayo iti makatigid.’ Kasanotayo a mangngeg daytoy a timek? Babaen ti iyiimdengtayo iti Sao ti Dios, ti Nasantuan a Biblia, ken babaen ti panangsurottayo iti direksion nga ipapaay ti Naindaklan nga Instruktortayo, ni Jehova a Dios, baeten iti dayta ken ti Kristiano nga organisasionna iti moderno a panawen. Kinapudnona, ti panangaramidtayo iti daytoy ti kakaisuna a dalan nga agturong iti biag nga agnanayon.”
Kalpasan ti pannakagupgop ti artikulo ti Pagwanawanan a maadal iti daydi a lawas, naiparang ti maudi a palawag, a napauluan “Itultuloyyo ti Magna iti Dalan ni Jehova.” Narepaso dagiti kangrunaan a punto ti programa. Kalpasanna, indatag ti ispiker ti maysa a resolusion a mangyeb-ebkas iti determinasion nga agtultuloy nga agbiag a mayannurot iti dalan ti Dios.
Nagngudo ti resolusion kadagitoy a makagutugot a sasao: “Kombinsidokami a ti panagbiag a mayannurot kadagiti Nainkasuratan a prinsipio, balakad, ken patigmaan ti kasayaatan a dalan ti biag ita ken isaadna ti nasayaat a pundasion para iti masanguanan, tapno mapetpetanmi a sititibker ti pudpudno a biag. Kangrunaan iti amin, aramidenmi daytoy a resolusion agsipud ta ay-ayatenmi ni Jehova a Dios iti amin a puso, kararua, panunot, ken pigsami!” Pinatalgedan dagiti amin a timmabuno ti iyaanamongda babaen ti panangipukkawda iti wen!
[Kahon/Ladawan iti panid 8]
Is There a Creator Who Cares About You?
Naglaon ti baro a libro nga addaan iti kasta a paulo iti makapnek a pammaneknek ti kaadda ti Namarsua, ni Jehova, ken salaysayenna dagiti galadna. Nairanta dayta a nangnangruna para kadagidiay edukado kadagiti sekular a banag ngem saan a mamati iti Dios. Pabilgen met daytoy 192-panidna a libro ti pammati dagidiay datin a mamati iti Dios, a parayrayenna ti panangapresiarda iti personalidad ken kadagiti dalanna.
Saan nga ipasimudaag ti Is There a Creator Who Cares About You? a ti agbasa ket mamati iti Dios. Imbes ketdi, ilawlawagna no kasano a dagiti nabiit pay a takuat ti siensia ken kapanunotan paneknekanda ti kaadda ti Namarsua. Napauluan ti dadduma kadagiti kapitulona iti “What Can Add Meaning to Your Life?,” “How Did Our Universe Get Here?—The Controversy,” ken “How Unique You Are!” Usigen dagiti dadduma a kapitulo no apay a masiguradotayo a ti Biblia ket impaltiing ti Dios. Isalaysay met ti baro a libro ti pakabuklan ti Biblia, a mangipalgak iti personalidad ken kadagiti dalan ti Namarsua. Ilawlawag ti libro saan laeng a no apay nga impalubos ti Dios ti nakaro a panagsagaba no di pay ket no kasano a pagpatinggaennanto dayta iti agnanayon.
[Dagiti Ladawan iti panid 7]
Adu ti nabautisaran
[Dagiti Ladawan iti panid 7]
Inyanunsio ni A. D. Schroeder, kameng ti Bagi a Manarawidwid dagiti Saksi ni Jehova, ti pannakairuar ti baro a broshur
[Dagiti Ladawan iti panid 8, 9]
Makapikapik a drama a nangiparegta iti inaldaw a panagbasa iti Biblia