Dagiti Saludsod Manipud Kadagiti Agbasbasa

Adda dagiti Saksi ni Jehova a natukonan iti trabaho a mainaig kadagiti narelihiosuan a pasdek wenno sanikua. Ania ti Nainkasuratan a panangmatmat iti kasta a trabaho?

Mabalin a mapasanguan iti kastoy nga isyu dagiti Kristiano a sipapasnek a mayat a mangyaplikar iti 1 Timoteo 5:8 a mangipagpaganetget iti kinapateg ti panangipaay iti material a kasapulan ti sangakabbalayan. Nupay rebbeng nga iyaplikar dagiti Kristiano dayta a balakad, saan nga ikalintegan daytoy ti panangawat iti aniaman ken amin a kita ti sekular a trabaho. Nasken a sensitibo dagiti Kristiano iti dadduma pay a mangipasimudaag iti pagayatan ti Dios. Kas pagarigan, ti tarigagay ti maysa a lalaki a mangsuporta iti pamiliana dina ikalintegan ti panangsalungasing iti kuna ti Biblia maipapan iti imoralidad wenno pammapatay. (Idiligyo ti Genesis 39:4-9; Isaias 2:4; Juan 17:14, 16.) Nasken met nga agtignay dagiti Kristiano a maitunos iti bilin a rummuarda iti Babilonia a Dakkel, ti sangalubongan nga imperio ti palso a relihion.​—Apocalipsis 18:4, 5.

Iti aglikmut ti lubong, adu a kasasaad a mainaig iti trabaho ti pakaipasanguan dagiti adipen ti Dios. Saan a nainsiriban ken awan pannakabalinmi a mangibinsabinsa iti amin a posibilidad ken mangaramid kadagiti paglintegan. (2 Corinto 1:24) Ngem dakamatentayo ti sumagmamano a banag a nasken nga usigen dagiti Kristiano iti panangaramid kadagiti personal a desision maipapan iti trabaho. Nadakamat bassit dagitoy a banag iti Pagwanawanan nga Enero 15, 1983, iti maysa nga artikulo maipapan iti no kasano a magunggonaantayo iti inted-Dios a konsiensiatayo. Iti kahon, adda dua a kangrunaan a saludsod, sa nailista dagiti dadduma pay a makatulong a banag.

Ti umuna a kangrunaan a saludsod isu daytoy: Kondenaren kadi ti Biblia dayta a sekular a trabaho? Maipapan iti daytoy, kinuna ti Pagwanawanan a kondenaren ti Biblia ti panagtakaw, di umiso a panagusar iti dara, ken idolatria. Nasken nga idian ti maysa a Kristiano ti sekular a trabaho a direkta a mangitantandudo kadagiti aramid a di anamongan ti Dios, kas kadagidiay kadakdakamat.

Ti maikadua a saludsod isu daytoy: Ti kadi panangaramid iti daytoy a trabaho ikalam-itna ti maysa iti makondenar nga aramid? Nalawag a naikalam-it iti di nainkasuratan nga aramid ti tao nga agtartrabaho iti maysa a pagsugalan, klinika a pagaborsionan, wenno iti balay ti prostitusion. Uray no para dalus laeng iti suelo wenno para sungbat iti telepono ti inaldaw a trabahona sadiay, tumultulong latta iti aramid a kondenaren ti Sao ti Dios.

Adu dagiti Kristiano a natulongan a mangaramid iti personal a desision maipapan iti panggedan babaen laeng ti panangtingitingda kadagita a saludsod.

Kas pagarigan, manipud kadagita a dua a saludsod, maawatan ti maysa no apay a ti pudno a managdaydayaw ket di mabalin a direkta nga agtrabaho iti maysa a palso a narelihiosuan nga organisasion, wenno agtrabaho para iti maysa a simbaan wenno iti uneg ti simbaan a mismo. Iti Apocalipsis 18:4, adda a naibilin: “Rummuarkayo kenkuana, tattaok, no dikay kayat ti makiraman kenkuana kadagiti basolna.” Makiramraman ti maysa a tao kadagiti aramid ken basol ti Babilonia a Dakkel no isu ket maysa a regular nga empleado ti relihion a mangisursuro iti palso a panagdayaw. Hardinero man, janitor, para tarimaan, wenno accountant, agserbi ti trabahona a mangitandudo iti panagdayaw a maikontra iti pudno a relihion. Maysa pay, no makita dagiti tattao daytoy nga empleado a mangpappapintas iti simbaan, mangtartarimaan iti dayta, wenno mangar-aramid kadagiti narelihiosuan a gannuat daytoy, nainkalintegan laeng nga ipagarupda nga isu ket nainaig iti dayta a relihion.

Ngem ti ngay maysa a saan a regular nga empleado ti simbaan wenno narelihiosuan nga organisasion? Nalabit bigla a maayaban a mangtarimaan laeng iti nadadael a tubo ti danum iti basement ti simbaan. Naiduma kadi dayta iti pannakikontratana, kas iti panangatep wenno panangbobida iti simbaan?

Maminsan pay, adu a nagduduma a kasasaad ti mabalin a mapanunottayo. No kasta, repasuentayo ti lima a kanayonan a banag a dinakamat ti Pagwanawanan:

1. Maysa laeng aya a natauan a serbisio ti trabaho a di maisalungasing iti Kasuratan? Alaentay a pagarigan ti kartero. Ti panangitulodna iti surat dina kaipapanan nga itantandudona ti makondenar nga aramid no ti pasdek iti lugar a pangitulodanna ket maysa a simbaan wenno klinika a pagaborsionan. Ti Dios ti mangipapaay iti silnag ti init a manglawag kadagiti tawa ti amin a pasdek, a pakairamanan ti maysa a simbaan wenno ti kasta a klinika. (Aramid 14:16,17) Nalabit panunoten ti maysa a Kristiano a kartero a ti inaldaw nga ar-aramidenna ket natauan a serbisio nga agpaay iti amin. Maikuna met ti kasta maipapan iti maysa a Kristiano nga agresponde iti emerhensia​—kas no maayaban ti maysa a tubero a mangpasardeng iti layus iti simbaan wenno no maayaban ti maysa nga agtartrabaho iti ambulansia a mangasikaso iti maysa a tao a natalimudaw bayat a makimismisa. Nalabit ibilangna laeng daytoy a di napakpakadaan nga itutulong.

2. Aginggat’ sadino a ti maysa ket addaan autoridad iti maar-aramid? Saan la ketdi nga umanamong ti maysa a Kristiano a makinkukua iti tiendaan nga agorder ken aglako kadagiti idolo, anting-anting, sigarilio, wenno longganisa a nalaokan iti dara. Kas makinkukua, kontroladona dagiti bambanag. Nalabit durogan dagiti tattao nga aglako iti sigarilio wenno kadagiti idolo tapno makaganansia, ngem isu ket agtignay a maitunos iti Nainkasuratan a pammatina. Iti sabali a bangir, mabalin a matudingan ti maysa a Kristiano nga empleado iti dakkel a tiendaan nga agtrabaho iti cash register, mangdalus iti suelo, wenno mangurnos iti rekord. Dina maikeddeng no aniada a produkto ti maorder ken mailako, uray pay no dina anamongan ti sumagmamano kadagitoy, kas iti sigarilio wenno bambanag a para kadagiti narelihiosuan nga okasion.a (Idiligyo ti Lucas 7:8; 17:7, 8.) Mainaig daytoy iti sumaganad a punto.

3. Agingga iti ania a nairaman ti maysa? Subliantayo ti maipapan iti tiendaan. Nalabit sagpaminsan laeng a makaiggem iti sigarilio wenno kadagiti narelihiosuan a banag ti maysa nga empleado a natudingan nga agtrabaho iti cash register wenno mangiplastar kadagita a banag iti estante; bassit laeng dayta a paset ti pakabuklan ti trabahona. Ngem anian a naiduma ti empleado iti dayta met la a tiendaan nga agtartrabaho iti counter ti sigarilio! Inaldaw a naipamaysa amin a trabahona iti banag a maisalungasing kadagiti Nakristianuan a pannursuro. (2 Corinto 7:1) Ipakita daytoy no apay nga iti panagdesision maipapan iti trabaho, masapul a tingitingen no agingga iti ania a mairaman ti maysa wenno ania ti saklawen ti trabaho.

4. Paggapuan ti sueldo wenno sadino ti pakaaramidan ti trabaho? Usigenyo ti dua a kasasaad. Tapno sumayaat ti pakasarsaritaanna iti publiko, mangtangdan ti maysa a klinika a pagaborsionan iti tao a mangdalus kadagiti kalsada iti sangakaarrubaan. Aggapu ti tangdanna iti klinika a pagaborsionan, ngem saan nga agtartrabaho dita, ken awan ti makakita kenkuana iti klinika iti agmalem. Imbes ketdi, makitada nga agar-aramid iti pangpubliko a trabaho a saan a maisalungasing iti Kasuratan, uray asino ti mangtangdan kenkuana. Ita idiligtayo ti sumaganad a kasasaad. Iti nasion a legal ti prostitusion, suelduan ti public health service ti maysa a nars nga agtrabaho kadagiti brothel (balay ti prostitusion), a mangsukimat iti salun-at tapno malapdan ti ad-adda a panagsaknap dagiti sakit a maala iti sekso. Nupay aggapu ti sueldona iti public health service, isu ket agtartrabaho kadagiti balay ti prostitusion, a mamagbalin iti imoralidad a nataltalged, ad-adda a maawat. Iyilustrar dagitoy a pagarigan no apay a nasken nga ikonsiderar ti paggapuan ti sueldo ken ti lugar a pagtrabahuan.

5. Ania ti epekto ti panangaramid iti dayta a trabaho; dangranna kadi ti konsiensiana wenno itibkolna dagiti sabsabali? Nasken nga ikonsiderar ti konsiensia, ti mismo a konsiensiatayo ken ti konsiensia dagiti sabsabali. Uray no agparang nga anamongan ti kaaduan a Kristiano ti maysa a trabaho (agraman ti lugar ken ti paggapuan ti sueldo), mabalin a maburibor ti konsiensia ti maysa nga indibidual iti dayta a trabaho. Kinuna ni apostol Pablo, a nangipaay iti nasayaat nga ulidan: “Agtalekkami nga adda napudno a konsiensiami, yantangay kayatmi ti agbiag a mapagtalkan iti isuamin a bambanag.” (Hebreo 13:18) Rumbeng a liklikantayo ti trabaho a mangriribuk kadatayo; ngem, ditay met koma babalawen dagiti sabsabali a naiduma ti konsiensiada. Iti kasumbangirna, mabalin nga ikeddeng ti maysa a Kristiano a saan a maisalungasing iti Biblia ti trabahona, ngem mabigbigna a makariribuk unay dayta kadagiti adu iti kongregasion ken iti komunidad. Inyanninaw ni Pablo ti umiso a kababalin kadagitoy a sasaona: “Saankami a pulos mangmangted ti aniaman a pakaigapuan ti pannakaitibkol, tapno ti ministeriomi saan koma a masarakan nga addaan biddut; no di ket iti tunggal pamay-an irekomendami ti bagbagimi kas ministro ti Dios.”​—2 Corinto 6: 3,4.

Ita subliantayo ti kangrunaan a saludsod maipapan iti panagtrabaho iti simbaan, kas iti panangiplastar kadagiti baro a tawa, panangdalus kadagiti alpombra, wenno panangtarimaan iti urno. Kasano a mainaig dagiti punto a nadakamat iti ngato?

Laglagipenyo ti maipapan iti autoridad. Ti kadi Kristiano ti makinkukua wenno manedyer a makaikeddeng no ipalubosna ti kasta a trabaho iti simbaan? Kayat kadi ti maysa a Kristiano nga addaan iti dayta nga autoridad ti makiraman iti Babilonia a Dakkel babaen ti panangkiddaw iti dayta a trabaho wenno pannakikontrata a tumulong iti maysa a relihion a mangitandudo iti palso a panagdayaw? Maipada kadi dayta iti panaglako kadagiti sigarilio wenno idolo iti mismo a tiendaanna?​—2 Corinto 6:14-16.

No ti Kristiano ket maysa nga empleado nga awanan autoridad a mangikeddeng no ania a trabaho ti awatenna, rebbeng nga ikonsiderarna dagiti dadduma pay a banag, kas ti pagtrabahuan ken ti masaklaw ti pannakainaigna iti dayta a trabaho. Makiddaw laeng aya ti empleado a mangitulod wenno mangiplastar kadagiti baro a tugaw para iti maysa nga okasion wenno mangipaay iti natauan a serbisio, kas iti panangpatay ti bombero iti apuy iti simbaan sakbay nga agramaram dayta? Iti kapanunotan ti adu, naiduma daytoy iti empleado ti maysa a negosio nga adu nga aldaw a mangpimpinta iti simbaan wenno regular nga agharhardin tapno pumintas dayta. No regular wenno mabayag ti panagtrabahona sadiay, mabalin nga ad-adda nga ipagarup dagiti adu a naikalam-it dayta a Kristiano iti relihion a kunana a saanna nga itantandudo, ket mabalin a maitibkolda.​—Mateo 13:41; 18:6, 7.

Nadakamatmi ti sumagmamano a napateg a banag a nasken nga usigen no maipapan iti panggedan. Naidatag dagitoy iti konteksto ti espesipiko a saludsod mainaig iti palso a relihion. Ngem, mabalin met nga ikonsiderar dagitoy mainaig iti dadduma pay a kita ti panggedan. Iti tunggal kaso, nasken a tingitingen dagitoy a buyogen ti kararag, nga ikonsiderar dagiti espesipiko​—ken nalabit naisangsangayan​—nga aspeto ti adda a kasasaad. Adun a napasnek a Kristiano ti natulongan dagiti banag a naidatag iti ngato a nangaramid kadagiti desision a mayannurot iti konsiensiada ken mangyanninaw iti tarigagayda a magna a sililinteg iti imatang ni Jehova.​—Proverbio 3:5,6; Isaias 2:3; Hebreo 12:12-14.

[Footnote]