Pananglapped iti Panangdidigra ti Kinaawan Panagpapada
Iti saanen a mabayag, iyegto ti Namarsua ti panagpapada nga il-iliwen dagiti tattao. Agingga iti dayta a tiempo, adda dagiti mabalintay nga aramiden tapno malapdan uray kaskasano ti panangdidigra ti kinaawan panagpapada a mangapektar kadatayo ken kadagiti pamiliatayo. Kas kinuna ni Nelson Mandela, dati a presidente ti South Africa, “ti pakaidumaan ti maysa a tao iti sabali isu ti no ania ti aramidentayo iti adda kadatayo, saan a no ania ti naited kadatayo.”
PASINGKEDAN ti historia ti sasaona. Adu dagiti lallaki ken babbai a bassit la ti naited kadakuada idi nayanakda ngem, babaen ti panangusarda iti adda kadakuada, naragpatda ti balligi a mangiduma kadakuada kadagiti kataebda a nalabit mas naparaburan. Iti kasumbangirna, adda dagiti tattao a nagsayaat ti kasasaadda manipud pannakayanakda ngem di umiso ti panangusarda iti adda kadakuada ken saanda nga inaramid ti amin a kabaelanda.
Usarenyo a Naimbag ti Adda Kadakayo!
Maseknan unay dagiti Saksi ni Jehova a tumulong kadagiti tattao a mangammo kadagiti panggep ti Dios babaen ti panagadal iti Biblia. Nupay kasta, mabigbigda a tapno mabenepisiaranda a naan-anay iti impormasion a masarakan iti Biblia, masapul nga ammo dagiti tattao ti agbasa ken agsurat. Gapu iti dayta, pinullo a ribu a tattao ti natulonganen dagiti Saksi ni Jehova nga agbasa ken agsurat, a pakairamanan ti 23,000 a tattao (iti ngalay ti dekada 1990) iti laeng maysa a pagilian ti Makinlaud nga Africa. Maipapan iti naisangsangayan a serbisio nga ipapaay dagiti Saksi ni Jehova iti kagimongan, kinuna ti San Francisco Examiner: “Maibilangyo ida a mapagwadan nga umili. Sipapasnek nga agbaybayadda iti buis, ay-aywananda dagiti masakit, isursuroda dagiti tattao nga agbasa ken agsurat.”
Maysa pay, babaen ti progresibo a kurso iti panagpalawag iti publiko, ginasut a ribu a tattaon ti sinanay dagiti Saksi ni Jehova nga agbalin a kualipikado a pumapalawag, a nalaingdan nga agdiskurso iti publiko. Karaman kadagitoy a rinibu dagiti dadduma nga addaan idi kadagiti nakaro a parikut iti panagsao. Alaentay a pagarigan ti maysa a lalaki a taga South Africa, a nangisurat iti kastoy: “Nakaro unay ti panagbeddalko ket nagbalinak a managbabain unay. Masansan idi nga agpannurayak kadagiti dadduma nga agsao para kaniak. . . . Idi nagpalistaak iti Teokratiko nga Eskuelaan ti Panagministro ken natudinganak nga agbasa iti Biblia iti sango ti bassit a grupo . . . , nakaro ti panagbeddalko nga uray la saanko a nairingpas ti pasetko iti naituding nga oras. Kalpasan ti gimong, siaayat nga inikkannak ti [manangaywan ti eskuelaan] iti praktikal a balakad. Insingasingna nga agsanayak nga agbasa iti napigsa a sisiak. Inaramidko dayta iti inaldaw, a nagbasbasaak iti napigsa manipud iti Bibliak ken iti magasin a Pagwanawanan.” Nasayaat ti irarang-ay daytoy a lalaki ket ita agpalpalawagen iti sango ti ginasut, rinibu pay ketdi, a tattao.
Panangtagiragsak iti Panagpapada Kadagiti Kakabsat
No maipapan iti edukasion, pannakaaywan ti salun-at, ken kasasaad iti biag ken iti kagimongan, dakkel ti nagdudumaan ti sirkumstansia dagiti Saksi ni Jehova. Iyanninaw laeng dagitoy a pagdudumaan dagiti imperpekto a kasasaad iti lubong a pagbibiaganda. Ngem no maidilig kadagiti dadduma a narelihiosuan a grupo, gistay awanen a pulos kadakuada ti panangidumduma a maigapu iti puli ken kasasaad iti kagimongan ken iti biag.
Naibanagda daytoy babaen ti panangaramidda iti amin a kabaelanda a mangannurot kadagiti maad-adalda iti Biblia. Ipappapusoda dagiti prinsipio ti Biblia kas iti: “Ni Jehova saan a kumita a kas iti ikikita ti tao; ta ti tao kitaenna iti akinruar a panagparang, ngem ni Jehova kitaenna ti puso.” (1 Samuel 16:7) “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) “Dikay subadan ti dakes iti dakes iti asinoman. Mangipaaykayo kadagiti nasayaat a bambanag iti imatang ti isuamin a tattao. No mabalin, sigun iti panagpannurayna kadakayo, makikappiakayo iti isuamin a tattao.”—Roma 12:17, 18; kitaenyo met ti 1 Timoteo 6:17-19; Santiago 2:5, 9.
Gapu ta sipapasnek a sursurotenda dagiti prinsipio ti Biblia a mangitantandudo iti panagkaykaysa, saan nga ipalubos dagiti Saksi ni Jehova ti aniaman a panangidumduma iti nagbabaetanda gapu iti panagduduma ti puli, wenno kasasaad iti kagimongan wenno iti biag. Kas pagarigan, awan pakainaigan dagitoy iti panangikeddeng no siasino ti maikkan kadagiti pribilehio iti kongregasion Kristiano. Dagiti rebbengen, kas iti panangisuro ken panangaywan, ket maited a maibatay laeng kadagiti naespirituan a kualipikasion.—1 Timoteo 3:1-13; Tito 1:5-9.
Para kadagidiay biktima ti kinaawan panagpapada iti mangidumduma a lubong, anian a makapabang-ar no tratuen ida dagiti sabsabali a kas kakabsat nga addaan agpapada a takder iti imatang ti Namarsua kadakuada! Mapaneknekan daytoy ni Martina. Kalpasan a pinanawan ti amana ti pamiliana, dimmakkel ni Martina iti napanglaw a pagtaengan iti denna ti inana. Masansan idi a di maikabkabilangan, kurang ti panagtalekna iti bagina, ken marigatan a makilangen kadagiti sabsabali. Nagangayanna, saan metten a maseknan kadagiti dadduma. Nupay kasta, nagbalbaliw ti kasasaad idi inrugina ti nakipagadal iti Biblia ken nagbalin a maysa kadagiti Saksi ni Jehova. Kunana: “Nasken pay laeng a parmekek ti negatibo a panagpampanunotko, ngem ad-adda a kabaelak itan a sanguen ti parikutko. Addan panagraemko iti bagik, ken nataltalgeden ti nakemko nga agsao. Pinagbalinnak ti kinapudno a responsable. Ammok itan nga ipatpategnak ni Jehova ken adda serbin ti biagko.”
Kas maysa nga internasional a grupo dagiti Kristiano, dagiti Saksi ni Jehova iti nasurok a 230 a pagilian tagtagiragsakenda ti panagpapada a talaga a naisangsangayan iti lubong ita. Adda kadi sabali a relihion a makaikuna iti kasta ken makapaneknek iti dayta babaen ti aramid?
Siempre, realistiko dagiti Saksi ni Jehova. Sibubulos a bigbigenda a gapu ta dimmakkelda iti imperpekto a kasasaad, saanda a maikkat nga interamente ti kinaawan panagpapada kadagiti tattao kas iti inkagumaan nga aramiden dagiti dadduma iti unos dagiti siglo—ngem napaayda. Nupay kasta, maragsakanda ta iti nagbabaetanda, adun ti naaramidanda a manglapped iti daytoy makapapatay a didigra. Ket buyogen ti nabileg a pammati iti kari ti Dios, segseggaanda ti nalinteg a baro a lubong nga awanton iti agnanayon ti kinaawan panagpapada.
Wen, iti saanen a mabayag amin dagiti natulnog a tattao agpapadadanto manen “iti dignidad ken kalintegan” nga inranta idi ti Namarsua a tagiragsakenda. Anian a nagimnas a panunoten! Ket iti dayta a tiempo, pumudnonto dayta!
[Ladawan iti panid 7]
Parparmeken dagiti Saksi ni Jehova ti kinakuneng babaen ti panangisuroda kadagiti pinullo a ribu a tattao nga agbasa ken agsurat
[Ladawan iti panid 8]
Makatulong ti kinapudno iti Biblia a mangiwaksi iti panangidumduma gapu iti puli, kasasaad iti kagimongan ken iti biag