Kinaawan Panagpapada​—Inranta Aya ti Dios?

Ti sungbat iti maysa a sao ket saan. Kitaentayo no apay.

INRANTA ti Dios nga amin a tattao addaanda iti agpapada a gundaway a mangsagrap iti biag ken kinaragsak. Maipapan iti pannakaparsua ti tao, mabasatayo: “Ti Dios kinunana, Aramidentayo koma ti tao iti ladawantayo, kas kaaspingtayo: ket iturayanda koma dagiti ik-ikan ti taaw, ken dagiti tumatayab kadagiti langit ken dagiti an-animal, ken ti amin a daga, ken dagiti amin nga agkarkarayam nga aguy-uyas iti rabaw ti daga.” Idi nalpasen a namarsua ditoy daga, “ti Dios nakitana amin nga inaramidna, ket adtoy, nasayaatda unay.”​—Genesis 1:26, 31.

Maikuna aya ti Dios a “nasayaat unay” ti nakalkaldaang a kinaawan panagpapada ita? Nikaanoman, ta “ti Dios ket ayat.” (1 Juan 4:8) Naikuna nga “awan idaddadumana a tao” ken “naan-anay ti aramidna, ta amin a dalanna kinalinteg: maysa a Dios ti kinamatalek ket awanan damka, isu awan pagkuranganna ken nalinteg.” (Deuteronomio 10:17; 32:4; idiligyo ti Job 34:19.) Ket ni apostol Pedro kinunana: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34,35.

Yantangay naayat, awan idumdumana, saan a nakillo, awanan damka, ken nalinteg ti Dios, kasano koma a mangparsua kadagiti tattao nga addaan naikasigudan a panagduduma no maipapan iti kalinteganda a mangsagrap iti kinaragsak? Maisupadi iti personalidadna ti panangipalubos iti panangidumduma kadagiti tattao ken panangipasidong kadakuada iti maysa a sistema nga awanan panagpapada. Inrantana a ‘mayanakda [amin] a nawaya ken addaan agpapada a dignidad ken kalintegan.’ Nupay kasta, nalawag a saan a kasta ti kasasaad ita. Apay a saan?

Ti Ramut ti Kinaawan Panagpapada

Ti banag a pinarsua ti Dios dagiti tattao nga agpapada dina kayat a sawen nga inrantana nga agpapadada amin iti tunggal banag. Mabalin nga agduduma dagiti saguday, paginteresan, ken personalidadda. Mabalin nga agduduma met ti saad wenno ti rukod ti autoridadda. Kas pagarigan, saan nga agpada ti lalaki ken babai iti amin a banag, no di ket pinarsua ti Dios ti babai kas “komplemento” ti lalaki. (Genesis 2:18) Nabatad nga agduma dagiti nagannak ken annak no maipapan iti autoridad. Nupay kasta, iti baet dagitoy a pagdudumaan, aminda​—lallaki, babbai, ken ubbing​—ket nairanta a sagrapenda kas inted-Dios a kalintegan ti agpapada a gundaway tapno agbalinda a naragsak. Agpapada ti dignidad ken takderda iti imatang ti Dios.

Umasping iti dayta, dagiti espiritu nga annak ti Dios, a naparsua kasakbayan dagiti tattao, naikkanda iti agduduma nga annongen ken rebbengen. (Genesis 3:24; 16:7-11; Isaias 6:6; Judas 9) Nupay kasta, iti las-ud ti naited kadakuada, mabalinda amin a sagrapen a padapada dagiti probision ti Dios a maipaay iti biag ken kinaragsak. Iti kasta, mayanninawda ti kinaawan panangidumduma ti Dios iti naisangsangayan a wagas.

Ngem nakalkaldaang ta saan a napnek ti maysa nga espiritu a parsua iti awan idumdumana nga urnos ti Dios. Tinarigagayanna ti ad-adu pay ngem ti inted ti Dios kenkuana, a kinalikagumanna ti nangatngato, natantan-ok a saad. Tinarakenna daytoy di umiso a tarigagay, ket pinagbalinna ti bagina a karibal ni Jehova a, kas Namarsua isu ti nainkalintegan a mangituray iti isuamin. Idi agangay, daytoy a rebelioso nga espiritu nga anak ti Dios sinulisogna dagiti tattao nga agkalikagum iti Dios iti ad-adu pay ngem iti intedna kadakuada. (Genesis 3:1-6; idiligyo ti Isaias 14:12-14.) No kasta, ti probision ni Jehova para kadagiti tattao tapno masagrapda ti biag ken kinaragsak ket agparang a saanen a natimbeng. Daytoy nga espiritu a rebelde, a naawagan iti Apocalipsis 20:2 kas “ti Diablo ken Satanas,” ti nagbalin a nadangkes a manangisungsong iti kinaawan panagpapada kadagiti tattao.

Agbaliwto Kadi ti Kasasaad?

Ti sungbat iti maysa a sao ket wen! Ngem siasino ti makaipaay kadagiti matarigagayan a panagbalbaliw? Iti panaglabas dagiti siglo, inkagumaan dagiti panguluen a tao nga aramiden dayta, a dagiti dadduma awan duadua a napasnekda. Saanda a nagballigi a naan-anay, isut’ gapuna nga ipagarup ti adu a tattao a saan a realistiko ti mangnamnama a marisutto ti parikut maipapan iti kinaawan panagpapada dagiti tattao. Nupay kasta, nailanad ti panangmatmat ti Dios iti Isaias 55:10, 11: “Kas ti tudo ken ti niebe bumabada nga aggapu iti langit, ket saanda nga agsubli idiay no di ket sibuganda ti daga, ken pagtubuenna ken pagbuselenna, ken pangtedenna iti bukel kadagiti agmulmula ken tinapay iti mangan; kastanto met ti saok a rummuar iti ngiwatko: isu dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”

Anian a makaliwliwa a maammuan nga imbaga ni Jehova a Dios a tungpalennanto ti orihinal a panggepna nga ipaayanna dagiti amin a tattao iti agpapada a gundaway iti biag ken kinaragsak! Kas Dios ti kinapudno, inobligarna ti bagina a tungpalennanto ti inkarina. Makaparagsak ta madadaan ken adda pannakabalinna a mangaramid iti dayta. Kasanona nga aramiden daytoy?

Ti sungbat isu ti Pagarian nga insuro ni Jesu-Kristo kadagiti amin a pasurotna nga ikararagda: “Amami nga adda iti langlangit, . . . Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:9,10) Wen, ti Pagarian ti Dios ti usaren ni Jehova a ‘mangburak ken mangibus amin kadagitoy a pagpagarian [nga adda ita], ket isu agtalinaedto iti agnanayon.’​—Daniel 2:44.

Iti sidong ti turay ti nailangitan a Pagarian, addanto baro a kagimongan dagiti tattao. Maipapan iti daytoy, insurat ni apostol Juan iti maudi a libro ti Biblia nga Apocalipsis: “Nakitak ti maysa a baro a langit ken maysa a baro a daga; ta ti immuna a langit ken ti immuna a daga naglabasdan.” (Apocalipsis 21:1) Awanton amin dagiti nalaad a langa ti kinaawan panagpapada​—kinapanglaw, panagsakit, kinaawan adal, panangidumduma, ken dadduma pay a sagsagabaen dagiti tattao.a

Iti nasurok a maysa a siglon, ipakpakaammo dagiti Saksi ni Jehova kadagiti tattao ti maipapan iti dayta a Pagarian. (Mateo 24:14) Babaen kadagiti publikasion ken personal a tulong, ikagkagumaanda a tulongan dagiti tattao a gumun-od iti pannakaammo maipapan iti panggep ti Dios a nailanad iti Biblia. Nupay kasta, ti sangalubongan a trabahoda a panangisuro saanna laeng nga impaayan dagiti tattao iti namnama nga agbiag nga addaan panagpapada ken kinaragsak iti masanguanan no di pay ket tumultulong uray itan a manglapped iti panangdidigra ti kinaawan panagpapada. Kitaentayo no kasano.

[Footnote]

[Blurb iti panid 5]

Inranta ti Dios nga amin a tattao addaanda iti agpapada a gundaway a mangsagrap iti biag ken kinaragsak