“Naimbag a Damag” Manipud iti Apocalipsis

“Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga.”​—APOCALIPSIS 14:6.

1. Nupay mamati dagiti Saksi ni Jehova iti pannakaipaltiing ti libro nga Apocalipsis, apay a saanda a maysa nga “apocaliptiko a sekta”?

MAISUPADI kadagiti pammabalaw maibusor kadakuada, dagiti Saksi ni Jehova ket saan a maysa nga “apocaliptiko a sekta” wenno “kulto nga agipadpadles iti didigra.” Nupay kasta, awatenda ti libro nga Apocalipsis kas paset ti naipaltiing a Sao ti Dios. Pudno, naglaon ti Apocalipsis kadagiti mensahe maipapan iti pannakaukom dagiti nadangkes. Ngem iti panangasabada iti publiko, ti makaparagsak a namnama a nailanad iti Biblia, agraman daydiay nailanad iti Apocalipsis, ti nangnangruna a nakaipamaysaan dagiti adipen ti Dios. Gapuna, saanda a mangnayon wenno mangikkat iti aniaman kadagiti naimpadtuan a sasao a masarakan iti dayta.​—Apocalipsis 22:18,19.

Manangiwaragawag iti Naimbag a Damag

2. Ania dagiti sumagmamano a kasuratan a masansan nga usaren dagiti Saksi ni Jehova iti trabahoda a panangasaba?

² Ti masansan a madakamat a Nainkasuratan a pakaibatayan ti publiko a ministerio dagiti Saksi ni Jehova ket dagiti sasao ni Jesus a: “Daytoy naimbag a damag ti pagarian mairakurakto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14, footnote) Ket ania “daytoy naimbag a damag ti pagarian”? Adu a Saksi ti sumungbat babaen ti panangadawda kadagiti bersikulo iti Apocalipsis kapitulo 20 ken 21 a nakailanadan ti maipapan iti Sangaribu a Tawen a Panagturay ni Kristo ken ti gobierno ti Pagarianna ken ti kagimongan ti tao, nga iti dayta “awanton” ti ipapatay, ladingit, ken rigat.​—Apocalipsis 20:6; 21:1, 4.

3. Ania a mision ti katupag ti panangaskasaba dagiti Saksi ni Jehova?

³ Kas manangiwaragawag kadagitoy a naimbag a damag, dagiti Saksi ni Jehova iti kinapudnona ket pannakangiwat ti maysa a simboliko a mensahero manipud langit a nailadawan met iti Apocalipsis ti misionna: “Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribo ken pagsasao ken ili.” (Apocalipsis 14:6) Ti “agnanayon a naimbag a damag” iramanna ti pakaammo a “ti pagarian [wenno, turay] ti lubong nagbalinen a pagarian ni Apotayo ken ni Kristona” ken dimtengen ti “naituding a tiempo” ni Jehova a ‘mangdadael kadagidiay mangdaddadael iti daga.’ (Apocalipsis 11:15, 17, 18) Saan kadi a pudno a naimbag a damag dayta?

No Ania ti Ipalgak Kadatayo ti Apocalipsis

4. (a) Aniada a napapateg a kinapudno ti nailanad iti kapitulo 1 ti Apocalipsis? (b) Ania ti masapul nga aramiden dagidiay mayat a magunggonaan iti naimbag a damag?

⁴ Ti umuna a kapitulo ti libro nga Apocalipsis iparangna ni Jehova kas “ti Alfa ken ti Omega, . . . Daydiay adda ita ken adda idi ken um-umay, ti Mannakabalin-amin.” Ket iparangna ni Jesu-Kristo nga Anak ti Dios kas “ti Matalek a Saksi,” “ti inauna manipud kadagiti natay,” ken “ti Agturay kadagiti ar-ari iti daga.” Dinakamatna met a ni Jesus ‘inay-ayatnatayo ken linuk-atannatayo manipud iti basbasoltayo babaen ti bukodna a dara.’ (Apocalipsis 1:5, 8) No kasta, iti rugina pay laeng, ibuksilan ti Apocalipsis dagiti pamunganayan a makaispal-biag a kinapudno. Saan a magunggonaan ‘dagidiay agnaed iti daga’ iti naimbag a damag a maipakaammo kadakuada malaksid no bigbigenda ti kinasoberano ni Jehova, maaddaanda iti pammati iti naiparukpok a dara ni Jesus, ken mamatida a pinagungar ni Jehova ket ni Kristo ti dinutokan ti Dios nga Agturay ita iti daga.​—Salmo 2:6-8.

5. Iti ania nga akem a nailadawan ni Kristo iti Apo kapitulo 2 ken 3 ti Apocalipsis?

⁵ Ti sumaruno a dua a kapitulo iladawanna ni Kristo Jesus kas naayat a nailangitan a Manangaywan kadagiti kongregasion dagiti adalanna ditoy daga. Ti lukot a naiturong iti pito a napili a kongregasion Kristiano idiay Asia Minor idi umuna a siglo K.P. ket naglaon iti pammaregta ken nainget a pammagbaga nga agaplikar pay laeng agingga ita. Dagiti mensahe a naiturong kadagiti kongregasion ket masansan a mangrugi iti sasao nga “Ammok dagiti aramidmo” wenno ‘Ammok ti rigatmo.’ (Apocalipsis 2:2, 9) Wen, ammo idi ni Kristo no ania a talaga ti mapaspasamak kadagiti kongregasion dagiti adalanna. Kinomendaranna dagiti dadduma gapu iti ayat, pammati, panagbannog iti ministerio, panagibtur, ken kinamatalekda iti nagan ken saona. Tinubngarna dagiti dadduma gapu ta impalubosda a bumaaw ti ayatda ken ni Jehova ken iti Anakna, wenno timmulokda iti seksual nga imoralidad, idolatria, wenno sektarianismo dagiti apostata.

6. Ti sirmata a nailanad iti Apo kapitulo 4 tulonganna dagiti tattao a mangtarus iti ania?

⁶ Naglaon ti Apo kapitulo 4 iti nakaskasdaaw a sirmata maipapan iti nailangitan a trono ni Jehova a Dios. Iparangna ti kinadayag ti kaadda ni Jehova ken ti urnos ti nailangitan a turay nga usarenna. Iti aglikmut ti kangrunaan a trono iti uniberso, adda dagiti trono a pagtugtugawan dagiti nakakorona nga agturay nga agdaydayaw ken Jehova, a kunkunada: “Maikarika, Jehova, a mismo a Diosmi, nga umawat ti dayag ken ti dayaw ken ti pannakabalin, agsipud ta pinarsuam dagiti isuamin a bambanag, ket gapu iti pagayatam napaaddada ken naparsuada.”​—Apocalipsis 4:11.

7. (a) Ania ti iyaw-awis ti anghel nga aramiden dagiti agnaed iti daga? (b) Ania ti napateg a paset ti trabahotayo a panangisuro?

⁷ Adda kadi kaipapanan daytoy kadagiti tao ita? Wen, adda. No kayatda ti agbiag iti sidong ti Milenio a Pagarian, masapul nga ipangagda ti iwarwaragawag ti “anghel a tumaytayab iti nagtangatangan”: “Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen.” (Apocalipsis 14:6,7) Ti maysa kadagiti kangrunaan a panggep ti trabaho dagiti Saksi ni Jehova a panangisuro iti Biblia isu ti panangtulong “kadagidiay agnaed iti daga” a mangammo ken agdayaw ken Jehova, mangbigbig nga isu ti Namarsua, ken situtulok nga agpasakup iti nalinteg a kinasoberanona.

Maikari a Dayawen ti Kordero

8. (a) Kasano a nailadawan ni Kristo iti Apo kapitulo 5 ken 6? (b) Ania ti masursuro iti daytoy a sirmata dagiti amin a mangipangag iti naimbag a damag?

⁸ Ti sumaruno a dua a kapitulo, 5 ken 6, iparangda ni Jesu-Kristo kas Kordero a maikari a manglukat iti lukot nga addaan pito a selio, iti kasta ipalgakda iti simboliko a sasao dagiti banag a mapaspasamak iti tiempotayo. (Idiligyo ti Juan 1:29.) Iti daytoy simboliko a Kordero, kuna dagiti timek sadi langit: “Maikarika a mangala iti lukot ken manglukat kadagiti seliona, agsipud ta napapatayka ket babaen ti daram ginatangmo dagiti tattao maipaay iti Dios manipud iti tunggal tribu ken pagsasao ken ili ken nasion, ket pinagbalinmo ida a kas pagarian ken papadi iti Diostayo, ket agturaydanto a kas ar-ari iti daga.” (Apocalipsis 5:9, 10) Isursuro daytoy a sirmata a maibatay iti naiparukpok a dara ni Kristo, adda dagiti tao a naggapu iti nadumaduma a puli a naayaban a makikadua kenkuana sadi langit ken ‘agturay a kas ar-ari iti daga.’ (Idiligyo ti Apocalipsis 1:5,6.) Naipalgak iti Apocalipsis ti limitado a bilangda.

9. Kasano a naiparang ni Kristo iti Apo kapitulo 6?

⁹ Iti daytoy met laeng a sirmata, naiparang met ni Kristo kas nakakorona a sisasakay iti puraw a kabalio, a rimmuar a “mangparmek ken tapno an-anayenna ti panagballigina.” Makaparagsak ta parmekennanto dagiti dakes a kasasaad nga isimbolo ti tallo a dadduma pay a kabaliero iti Apocalipsis, a ti napartak a panagpatarayda nangyeg iti gubat, bisin, ken ipapatay iti sangatauan nanipud iti nagpateg a tawen 1914. (Apocalipsis 6:1-8) Ti naisangsangayan nga akem ni Kristo, ti Kordero ti Dios, iti pannakaisalakan ti sangatauan ken iti pannakaibanag dagiti nagsayaat a panggep ni Jehova ket nagpateg a paset ti trabaho dagiti Saksi ni Jehova a panangisuro iti Biblia.

10. (a) Ania a napateg nga impormasion ti naipaay iti Apo kapitulo 7? (b) Ania ti kinuna ni Kristo maipapan kadagidiay pakaitedan ti Pagarian?

¹⁰ Pudno a naimbag a damag ti linaon ti Apo kapitulo 7. Iti laeng libro nga Apocalipsis ti pakabasaantayo iti bilang dagidiay inawagan ni Jesus a “bassit nga ipastoran” a pangtedan ti Ama ti Kordero iti Pagarian. (Lucas 12:32; 22:28-30) Sinelioan ni Jehova a Dios dagitoy babaen ti espirituna. (2 Corinto 1:21, 22) Pinasingkedan daytoy ni apostol Juan, a nakaitedan ti Apocalipsis: “Nangngegko ti bilang dagidiay naselioan, sangagasut uppat a pulo ket uppat a ribu.” (Apocalipsis 7:4) Patalgedan ti maysa a naud-udi a kapitulo a daytoy masnup a bilang ket isu ti dagup a bilang dagidiay ‘nagatang manipud iti sangatauan’ a makipagturay iti Kordero iti nailangitan a Bantay Sion. (Apocalipsis 14:1-4) Nupay nalibeg ken di makapnek ti panangilawlawag dagiti relihion ti Kakristianuan iti daytoy a bilang, kastoy ti makapainteres a kuna ti eskolar ti Biblia a ni E. W. Bullinger maipapan iti dayta: “Maysa dayta a simple a pannakayebkas ti kinapudno: maysa a masnup a bilang a maigidiat iti di masnup a bilang iti daytoy met laeng a kapitulo.”

11. (a) Aniada a naimbag a damag ti masarakan iti Apo kapitulo 7? (b) Ania ti mainanama dagiti kameng ti “dakkel a bunggoy”?

¹¹ Ania ti di masnup a bilang a tuktukoyen ni Bullinger? Iti Apo 7 bersikulo 9, insurat ni apostol Juan: “Kalpasan dagitoy a bambanag nakitak, ket, adtoy! maysa a dakkel a bunggoy, nga awan ti tao a makabael a mangbilang, manipud kadagiti isuamin a nasion ken kadagiti tribo ken kadagiti il-ili ken kadagiti pagsasao.” (Apocalipsis 7:9) Siasino ti mangbukel iti daytoy dakkel a bunggoy, ania ti agdama a takderda iti sanguanan ti Dios, ken ania ti agur-uray kadakuada iti masanguanan? Naimbag a damag para kadagiti agnaed iti daga ti sungbat ti Apocalipsis. Mabasatayo: “Dagitoy isuda dagidiay naggapu iti dakkel a rigat, ket linabaanda dagiti pagan-anayda ket pinapudawda ida iti dara ti Kordero.” Gapu iti pammatida iti naiparukpok a dara ni Kristo, masalaknibandanto kabayatan ti “dakkel a rigat.” ‘Idalanto ida [ni Kristo] kadagiti ubbog ti dandanum ti biag. Ket ti Dios punasennanto ti amin a lua kadagiti matada.’ (Apocalipsis 7:14-17) Wen, minilion a tattao nga agbibiag ita ti mabalin a mairaman iti di mabilang a bunggoy a makalasat inton agpatingga ti agdama a dakes a sistema ti bambanag. Kas iturayan ni Ari Jesu-Kristo kabayatan ti Milenio a Panagturayna, iturongnanto ida iti biag nga agnanayon ditoy daga. Saan kadi a naimbag a damag dayta?

“Dagiti Panangukomna Napudno ken Nalintegda”

12, 13. (a) Ania ti linaon ti Apo kapitulo 8 agingga iti 19? (b) Apay a di rumbeng a pagbutngan dagiti nasingpet panagpuspusona a tattao dagiti kasta a padto?

¹² Ti Apo kapitulo 8 agingga iti 19 ti kangrunaan a makagapu a maibilang ti Apocalipsis a maysa a libro nga agipadpadto kadagiti nakaam-amak a didigra. Naglaon dagitoy kadagiti agkakadagsen a mensahe ti panangukom (nga isimbolo ti pannakapuyot dagiti trumpeta, dagiti saplit, ken dagiti malukong ti pungtot ti Dios) maibusor iti nagduduma a paset ti sistema ti bambanag ni Satanas. Maibanagto dagitoy a panangukom, umuna maibusor iti palso a relihion (“Babilonia a Dakkel”), kalpasanna maibusor kadagiti rinuker a napolitikaan a sistema, nga isimbolo dagiti atap nga animal.​—Apocalipsis 13:1,2; 17:5-7, 15, 16.a

¹³ Iladawan dagitoy a kapitulo ti pannakadalus ti langit, babaen ti pannakaitapuak ni Satanas ken dagiti demoniona iti kaparanget ti daga. Daytoy laeng ti lohikal a makailawlawag iti awan kaaspingna a sangalubongan a riribuk manipud idi 1914. (Apocalipsis 12:7-12) Deskribirenda met, iti simboliko a sasao, ti pannakadadael ti dakes a sistema ni Satanas ditoy daga. (Apocalipsis 19:19-21) Rumbeng kadi a maklaat dagiti nasingpet panagpuspusona a tattao kadagita a makapikapik a pasamak? Saan, ta kabayatan ti panangukom ti Dios, agdir-into ti maysa a buyot sadi langit: “Idaydayawyo ni Jah! Ti pannakaisalakan ken ti dayag ken ti pannakabalin kukua ti Diostayo, agsipud ta dagiti panangukomna napudno ken nalintegda.”​—Apocalipsis 19:1,2.

14, 15. (a) Kasano a maibanag a sililinteg ti panagpatingga ti agdama a dakes a sistema? (b) Apay a daytoy a paset ti Apocalipsis ket rumbeng a pagrag-oan dagiti nasingpet panagpuspusona a tattao?

¹⁴ Saan a mangipasdek ni Jehova iti nalinteg a sistema ti bambanag a dina ikkaten ditoy daga dagidiay mangdaddadael iti dayta. (Apocalipsis 11:17, 18; 19:11-16; 20:1, 2) Nupay kasta, awan ti tao wenno napolitikaan nga estado nga addaan bileg wenno pannakabalin a mangibanag iti daytoy. Ni laeng Jehova ken ti dinutokanna nga Ari ken Ukom a ni Kristo Jesus ti makaaramid iti daytoy buyogen ti kinalinteg.​—2 Tesalonica 1:6-9.

¹⁵ Kas nabatad unay nga ipakita ti Apocalipsis, panggep ni Jehova a pagpatinggaen ti agdama a dakes a sistema. Rumbeng ngarud nga agrag-o dagiti lallaki ken babbai nga ‘agsasaibbek ken agsangsangit gapu kadagiti amin a kinarimon a maar-aramid.’ (Ezequiel 9:4) Daytoy koma ti mangipabigbig kadakuada iti kinaganat ti panangipangag iti iyaw-awis ti anghel a mangipakpakaammo iti naimbag a damag, a kinunana: “Agbutengkayo iti Dios . . . agsipud ta ti oras ti panangukomna dimtengen, ket ngarud agdaydayawkayo iti Daydiay nangaramid iti langit ken iti daga.” (Apocalipsis 14:7) Sapay koma ta dagiti kasta a tattao agdayaw ken agserbida ken ni Jehova a kaduada dagiti Saksina, “isuda a mangtungtungpal kadagiti bilin ti Dios ken addaan iti trabaho a panangsaksi ken Jesus.”​—Apocalipsis 12:17.

Ti Nadayag a Milenio a Panagturay

16. (a) Apay nga inwaksi dagiti relihion ti Kakristianuan ti namnama iti Milenio? (b) Apay a patien dagiti Saksi ni Jehova a masungbatanto ti modelo a kararag?

¹⁶ Naglaon ti Apo kapitulo 20 agingga iti 22 ti libro nga Apocalipsis iti Nainkasuratan a pakaibatayan ti namnama iti Milenio. Daytoy laeng ti paset ti Biblia nga aktual a nangdakamat iti sangaribu a tawen a mangiwaya iti agnanayon a kinaragsak sadi langit ken ditoy daga. Inwaksi dagiti relihion ti Kakristianuan ti namnama iti Milenio.Yantangay isursuro dagiti relihion a mapan dagiti nalinteg idiay langit ket dagiti nadangkes idiay impierno, awan ti isursuroda maipapan iti paraiso a daga. Awan kaipapananna iti kaaduan a kameng dagiti relihion ti Kakristianuan ti modelo a kararag a mangidawdawat a ‘maaramid koma ti pagayatan [ti Dios] ditoy daga a kas sadi langit.’ (Mateo 6:10, New International Version) Ngem saan a kasta kadagiti Saksi ni Jehova. Natibker ti pammatida a saan nga inaramid ni Jehova a Dios ti daga nga “ungaong,” no di ket tapno “pagyanan.” (Isaias 45:12, 18) No kasta, agkakaallot ti nagkauna a padto, ti modelo a kararag, ken ti namnama iti Milenio a nailanad iti Apocalipsis. Iti unos ti Sangaribu a Tawen a Panagturayna, siguraduento ni Kristo a maaramid ti pagayatan ni Jehova ditoy daga, kas met sadi langit.

17. Ania ti mangipakita a literal ti kaipapanan “ti sangaribu a tawen”?

¹⁷ Namin-innem a daras nga agparang ti termino a “sangaribu a tawen” iti umuna a pito a bersikulo ti Apocalipsis kapitulo 20. Nakakadkadlaw ta namimpat a naaramat dayta nga addaan iti definite article a “ti” (wenno “the” iti Ingles), a mangipakpakita a tuktukoyenna ti maysa a literal a milenio, saan a basta panawen a di masnup ti kapautna, kas kayat nga ipapati kadatayo dagiti adu a komentarista ti Kakristianuan. Anianto ti mapasamak kabayatan ti Milenio? Umuna, maparautanto ni Satanas iti unos dayta a panawen. (Apocalipsis 20:1-3; idiligyo ti Hebreo 2:14.) Anian a naimbag a damag dayta!

18. (a) Apay a maawagan ti Milenio nga “aldaw” ti panangukom? (b) Anianto ti mapasamak iti ngudo ti sangaribu a tawen?

¹⁸ Yantangay maited “ti pannakabalin a mangukom” kadagidiay ‘makipagturay [ken Kristo] kas ar-ari iti sangaribu a tawen,’ daytoy a panawen iti kinapudnona ket sangaribu a tawen nga “aldaw” ti panangukom. (Apocalipsis 20:4, 6; idiligyo ti Aramid 17:31; 2 Pedro 3:8.) Mapagungarto dagiti natay ket isuda, agraman dagiti nakalasat iti “dakkel a rigat,” maukomdanto a padapada sigun kadagiti aramid, wenno tigtignayda, iti dayta a panawen. (Apocalipsis 20:12, 13) Iti ngudo ti sangaribu a tawen, maruk-atanto iti apagbiit ni Satanas tapno maipasidong ti sangatauan iti maudi a pannubok, ket kalpasanna madadaelto nga agnanayon ni Satanas agraman dagiti demoniona ken amin a rebelde ditoy daga a sumurot kenkuana. (Apocalipsis 20:7-10) Maisurat ken dinto mapunas iti “libro ti biag” ti nagnagan dagiti tao a makapasa iti pannubok ket siraragsak nga agbiagdanto nga agnanayon, nga agserserbi ken agdaydayaw ken ni Jehova iti paraiso a daga.​—Apocalipsis 20:14, 15; Salmo 37:9,29; Isaias 66:22,23.

19. (a) Apay a masiguradotayo a matungpalto a di bumurong dagiti nakaskasdaaw a kari a nailanad iti libro nga Apocalipsis? (b) Ania ti mausig iti sumaganad nga artikulo?

¹⁹ Dagita ti naimbag a damag a linaon ti Apocalipsis. Saan nga ubbaw a kari a naggapu iti tao dagitoy. Insurat ni apostol Juan: “Daydiay situtugaw iti trono kinunana: ‘Adtoy! Pagbalbalinek a baro ti isuamin a bambanag.’ Kasta met, kunana: ‘Isuratmo, agsipud ta dagitoy a sasao matalek ken napudnoda.’” (Apocalipsis 21:5) Ania ti masapul nga aramidentayo tapno mairamantayo iti kaitungpalan dagitoy a naimbag a damag? Naglaon ti libro nga Apocalipsis iti nawadwad a balakad nga agpaay kadagidiay mayat a mangay-ayo iti Dios. Aglaplapusanan a ragsak ti itden kadatayo ita ken iti agnanayon ti panangsurot kadagita a balakad, kas ipakita ti sumaganad nga artikulo.

[Footnote]

Dagiti Punto a Marepaso

◻ Aniada a pamunganayan a kinapudno a masarakan iti Apocalipsis Apo kapitulo 4 agingga iti 6 ti mangbukel iti napateg a paset ti naimbag a damag?

◻ Aniada a naimbag a damag ti masarakan iti Apocalipsis Apo kapitulo 7?

◻ Apay a di rumbeng a pagbutngan dagiti nasingpet panagpuspusona a tattao dagiti mensahe ti panangukom a masarakan iti Apocalipsis?

◻ Kadagiti ania a pamay-an a ti Milenio ket “aldaw” ti panangukom?

[Ladawan iti panid 10]

Ti Ari a ni Jesu-Kristo ikkatennanto a mamimpinsan ditoy daga ti gubat, bisin, ken ipapatay