Dagiti Baro a Miembro ti Bagi a Manarawidwid
IDI Sabado, Oktubre 2, 1999, adda di ninamnama a nayanunsio iti ngudo ti Tinawen a Miting ti Watch Tower Bible and Tract Society of Pennsylvania. Dagiti 10,594 a timmabuno wenno dimngeg iti programa a naikonektar iti telepono naragsakanda a nakangngeg nga adda nainayon nga uppat a baro a miembro ti Bagi a Manarawidwid dagiti Saksi ni Jehova. Dagitoy baro a miembro, a bin-ig a napulotan a Kristiano, ket isu da Samuel F. Herd; M. Stephen Lett; Guy H. Pierce; ken David H. Splane.
• Nangrugi a nagpayunir ni Samuel Herd idi 1958, ket manipud 1965 agingga idi 1997, nagserbi a kas manangaywan ti sirkito ken distrito. Kalpasanna, nagbalinda ken Gloria nga asawana a miembro ti pamilia ti Bethel idiay Estados Unidos. Agserserbi ni Kabsat Herd iti Service Department. Nagserbi met idi a kas katulongan ti Service Committee.
• Nangrugi a nagpayunir ni Stephen Lett idi Disiembre 1966, ket manipud 1967 agingga idi 1971, nagserbi iti Bethel idiay Estados Unidos. Idi Oktubre 1971, inkallaysana ni Susan, ket nagbalinda nga special pioneer. Manipud 1979 agingga idi 1998, nagserbi a kas manangaywan ti sirkito. Manipud idi Abril 1998, nagbalinda ken Susan a miembro ti pamilia ti Bethel idiay Estados Unidos. Agserserbi iti Service Department ken nagbalin idi a katulongan ti Teaching Committee.
• Nagpamilia ni Guy Pierce ket kalpasanna inrugida ken baketna ti nagpayunir idi Abril 1982. Nagserbi a kas manangaywan ti sirkito manipud 1986 agingga idi 1997, idi nagbalinda ken ni Penny nga asawana a miembro ti pamilia ti Bethel idiay Estados Unidos. Nagserserbi idi ni Kabsat Pierce a kas katulongan ti Personnel Committee.
• Nangrugi a nagpayunir ni David Splane idi Setiembre 1963. Nagturpos iti maika-42 a klase ti Gilead ken nagmisionero idiay Senegal, Africa, sa nagserbi a kas manangaywan ti sirkito idiay Canada iti 19 a tawen. Sipud pay idi 1990 nga addada ken Linda nga asawana iti Bethel idiay Estados Unidos. Agtartrabaho ni Kabsat Splane iti Service ken Writing Department. Manipud idi 1998, nagbalinen a katulongan ti Writing Committee.
Malaksid kadagitoy uppat a baro a miembro, ti mangbukel itan iti Bagi a Manarawidwid ket isu da C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, ken D. Sydlik. Ikarkararagtay amin a sapay koma ta itultuloy ni Jehova a bendisionan ken pabilgen ti Bagi a Manarawidwid, nga immadun ti miembrona, bayat nga agtultuloy nga imatmatonanna dagiti aktibidad ti ili ti Dios iti intero a lubong ken agserserbi a maipaay iti naespirituan a pagimbaganda.