Kasapulantayo ti Organisasion ni Jehova

ADDA kadi nangngegyon nga agkuna, “Mamatiak iti Dios ngem saanak a mamati iti organisado a relihion”? Ti kakasta a panangmatmat ket masansan nga iyebkas dagiti dati a napasnek a mannakimisa a naupay gapu ta saan a maipaay ti relihionda dagiti naespirituan a kasapulanda. Nupay naupayda kadagiti kaaduan a narelihiosuan nga organisasion, adu ti mangipetteng a kayatda latta a dayawen ti Dios. Nupay kasta, patienda a nasaysayaat ti agdayaw iti Dios iti bukodda a wagas imbes nga aramidenda dayta a naitimpuyog iti maysa a relihion wenno dadduma pay nga organisasion.

Ania ti kuna ti Biblia? Kayat kadi ti Dios a dagiti Kristiano maitimpuyogda iti maysa nga organisasion?

Nagunggonaan Dagiti Nagkauna a Kristiano Gapu ta Organisadoda

Idi Pentecostes 33 K.P., imparukpok ni Jehova ti nasantuan nga espirituna, saan nga iti sumagmamano a naiputputong a manamati, no di ket iti grupo dagiti lallaki ken babbai a nagtitipon “iti maymaysa a lugar,” iti maysa a makin-ngato a siled iti siudad ti Jerusalem. (Aramid 2:1) Iti daydi a tiempo, nabuangay ti kongregasion Kristiano, a nagbalin nga internasional nga organisasion. Pudno a bendision daytoy kadagidiay nagkauna nga adalan. Apay? Ti maysa a rason ket naikkanda iti napateg nga annongen​—ti panangikasaba iti naimbag a damag ti Pagarian ti Dios kamaudiananna “iti isuamin a mapagnaedan a daga.” (Mateo 24:14) Iti kongregasion, makasursuro dagiti kakomkomberte kadagiti natenneb a kapammatianda no kasano nga itungpal ti trabaho a panangasaba.

Di nagbayag, nagsaknap ti mensahe ti Pagarian agingga kadagiti lugar nga adayo iti Jerusalem. Iti nagbaetan ti 62 ken 64 K.P., insurat ni apostol Pedro ti umuna a suratna kadagiti Kristiano a “naiwarawara [idi] idiay Ponto, Galacia, Capadocia, Asia, ken Bitinia.” Masarakan amin dagitoy a lugar iti agdama a Turkey. (1 Pedro 1:1) Addada pay idi manamati idiay Palestina, Libano, Siria, Chipre, Grecia, Creta, ken Italia. Kas insurat ni Pablo kadagiti taga Colosas idi 60-61 K.P., ti naimbag a damag “naikaskasaba [idin] kadagiti isuamin a parsua nga adda iti baba ti langit.”​—Colosas 1:23.

Ti maikadua a pagimbagan ti pannakitimpuyog iti maysa nga organisasion isu ti panagpipinnaregta idi dagiti Kristiano. Iti pannakitimpuyog iti kongregasion, makangngeg dagiti Kristiano kadagiti makagutugot a palawag, adalenda ti Sagrado a Kasuratan a sangsangkamaysa, agririnnanudda kadagiti makapabileg-pammati a kapadasan, ken agkararagda a kadua dagiti kapammatianda. (1 Corinto, kapitulo 14) Ket dagiti nataengan a lallaki “ipastoran[da] ti arban ti Dios.”​—1 Pedro 5:2.

Kas kameng ti kongregasion, nakapagiinnammo met dagiti Kristiano ket kas resultana, nagiinnayatda. Imbes a babantot ti pannakitimpuyogda iti kongregasion, dayta ketdi ti nangpabileg ken nangpakired kadagiti nagkauna a Kristiano.​—Aramid 2:42; 14:27; 1 Corinto 14:26; Colosas 4:15, 16.

Ti sabali pay a rason a kasapulan idi ti nagkaykaysa a sangalubongan a kongregasion, wenno organisasion, ket tapno maitandudo ti panagkaykaysa. Nasursuro dagiti Kristiano ti ‘agsao a sangsangkatunos.’ (1 Corinto 1:10) Napateg idi daytoy. Nagduduma ti edukasional ken sosial a nalikudan dagiti miembro ti kongregasion. Sabasabali ti pagsasaoda, ken napatak dagiti nagdudumaanda iti personalidad. (Aramid 2:1-11) Adda dagiti gundaway a naggidiat ti opinionda. Ngem, natulongan dagiti Kristiano a mangrisut iti kasta a di panagtutunos iti uneg ti kongregasion.​—Aramid 15:1, 2; Filipos 4:2, 3.

Dagiti serioso a parikut a saan a masolbar dagiti lokal a panglakayen ti nayuman kadagiti nataengan nga agdaldaliasat a manangaywan, kas ken Pablo. Nayamang iti sentro a bagi a manarawidwid nga adda sadi Jerusalem dagiti napateg a bambanag maipapan iti doktrina. Dagiti apostol ni Jesu-Kristo ti damo a nangbukel iti bagi a manarawidwid, ngem idi agangay, nanayonan daytoy kadagiti lallakay iti kongregasion idiay Jerusalem. Binigbig ti tunggal kongregasion ti inted-Dios nga autoridad ti bagi a manarawidwid ken dagiti pannakabagina a mangorganisar iti ministerio, mangdutok iti lallaki kadagiti takem ti serbisio, ken mangngeddeng kadagiti banag mainaig iti doktrina. No marisut idi ti bagi a manarawidwid ti maysa a problema, inakseptar dagiti kongregasion ti pangngeddeng ket “nagrag-oda gapu iti pammaregta.”​—Aramid 15:1, 2, 28, 30, 31.

Wen, adda organisasion nga inusar ni Jehova idi umuna a siglo. Ket ita met ngay?

Kasapulantayo Ita ti Organisasion

Kas kadagiti katupagda idi umuna a siglo, dagiti Saksi ni Jehova ita a panawen napasnekda iti annongenda a mangikasaba iti naimbag a damag ti Pagarian. Ti maysa a pamay-an a maibanagda daytoy a trabaho isu ti panangiwaras kadagiti Biblia ken kadagiti katulongan nga agadal iti Biblia, nga agkasapulan iti organisasion.

Dagiti Nakristianuan a publikasion nasken a siaannad a maisagana, mausig ti kinaumisona, maimaldit, sa maipatulod kadagiti kongregasion. Masapul met a sidadaan dagiti Kristiano a mangipan kadagiti literatura kadagidiay mayat nga agbasa iti dayta. Nakadanonen ti mensahe ti Pagarian kadagiti minilion a tattao iti kastoy a wagas. Ikagkagumaan dagiti manangiwaragawag ti Pagarian nga itungpal ti trabahoda a panangasaba iti naurnos a pamay-an, a siguraduenda nga awan paset ti teritoria a maasak a naynay idinto ta ti dadduma a paset ket mabaybay-an. Agkasapulan amin daytoy iti organisasion.

Yantangay “ti Dios saan a mangidumduma,” masapul a maipatarus ti Biblia ken dagiti literatura ti Biblia. (Aramid 10:34) Iti agdama, magun-odan daytoy a magasin iti 132 a pagsasao, ken maipabpablaak ti Agriingkayo! a kaduana iti 83 a pagsasao. Agkalikagum dayta kadagiti nagsayaat-pannakaorganisarna a grupo dagiti manangipatarus iti intero a lubong.

Maparparegta dagiti kameng ti kongregasion no tumabunoda kadagiti Nakristianuan a gimong ken asamblea. Dumngegda sadiay kadagiti makagutugot a palawag manipud Biblia, adalenda ti Kasuratan a sangsangkamaysa, agririnnanudda kadagiti makaparegta a kapadasan, ken agkararagda a kadua dagiti kapammatianda. Ket kas kadagiti kakabsatda idi umuna a siglo, tagtagiragsakenda dagiti makapabileg-pammati nga ibibisita dagiti naayat nga agdaldaliasat a manangaywan. Gapuna, dagiti Kristiano itatta agbalinda a “maymaysa nga arban, maymaysa a pastor.”​—Juan 10:16.

Siempre, saan a perpekto dagiti Saksi ni Jehova a kas kadagiti nagkauna a katupagda. Kaskasdi, ikagumaanda ti agtrabaho a sangsangkamaysa. Kas bungana, maitungtungpal ti trabaho a panangikasaba ti Pagarian iti intero a daga.​—Aramid 15:36-40; Efeso 4:13.

[Ladawan iti panid 31]

Dagiti Kristiano itatta agbalinda a “maymaysa nga arban, maymaysa a pastor”