Pagragsakan Dagiti Kristiano ti Agserbi

“Ad-adu ti kinaragsak iti panangted ngem iti panangawat.”​—ARAMID 20:35.

1. Ania a di umiso a kababalin ti gagangay ita, ket apay a pagdaksan dayta?

KADAGITI maudi a dekada ti 1900, masansan a mangngegan ti sasao nga addaan iti anag a “siak pay.” Ipamatmat dagita a balikas ti kinamanagimbubukod ken kinaagum, kinaawan pannakaseknan kadagiti sabsabali. Masiguradotayo nga iti tawen 2000, adda pay latta ti kasta a kababalin. Mamin-ano a mangngeganyo dagiti saludsod nga, “Ania ngay ti maaramidan dayta para kaniak?” wenno, “Ania ngay ti maganabko iti dayta?” Saan a mangyeg iti ragsak ti kasta a panagimbubukod. Dayta ti mismo a kasungani ti prinsipio a dinakamat ni Jesus: “Ad-adu ti kinaragsak iti panangted ngem iti panangawat.”​—Aramid 20:35.

2. Kasano a mangyeg ragsak ti panangted?

² Pudno kadi a naragragsak ti mangted ngem ti umawat? Wen. Panunotenyo ni Jehova a Dios. Isu ti “ubbog ti biag.” (Salmo 36:9) Ipapaayna ti amin a kasapulantayo tapno naragsak ken adda serbi ti panagbiagtayo. Kinapudnona, isu ti Gubuayan ti “tunggal naimbag a sagut ken tunggal naan-anay a rangkap.” (Santiago 1:17) Kanayon a mangmangted ni Jehova, “ti naragsak a Dios.” (1 Timoteo 1:11) Ay-ayatenna dagiti tattao a pinarsuana. Naparabur unay kadakuada. (Juan 3:16) Panunotenyo met ti uneg ti pamilia. No maysaka nga ama wenno ina, ammom no kasano kaadu a sakripisio, no kasano kaadu a panangted, ti kasapulan iti panangpadakkel iti anak. Ket iti adu a tawen, saan nga ammo ti ubing dagiti sakripisio nga ar-aramidem. Laglag-anenna amin dagita. Kaskasdi, maragsakanka a makakita iti panagrang-ay ti anakmo gapu iti awanan imut a panangtedmo. Apay? Agsipud ta ay-ayatem.

3. Apay a makaparagsak ti agserbi ken ni Jehova ken kadagiti kapammatiantayo?

³ Umasping iti dayta, kadawyan iti pudno a panagdayaw ti panangted a naibatay iti ayat. Yantangay ay-ayatentayo ni Jehova ken dagiti kapammatiantayo, maragsakantay nga agserbi ken mangipaay iti bagbagitayo kadakuada. (Mateo 22:37-39) Saan unay a naragsak ti asinoman nga agdaydayaw nga addaan agimbubukod a motibo. Ngem talaga a naragsak dagidiay di agimbubukod nga agserbi, nga ad-adda a maseknan iti maitedda ngem iti namnamaenda nga awaten. Nabatad daytoy no usigentayo ti pannakaaramat iti Kasuratan dagiti sao iti Biblia a nainaig iti panagdayawtayo. Pagsasaritaantayo ti tallo kadagitoy a sao iti daytoy nga artikulo ken iti sumaganad.

Ti Publiko a Panagserbi ni Jesus

4. Ania a kita ti “publiko a panagserbi” ti maar-aramid iti Kakristianuan?

⁴ Iti orihinal a Griego, ti maysa a napateg a sao a nainaig iti panagdayaw ket lei·tour·giʹa, a naipatarus a “publiko a panagserbi” iti New World Translation. Iti Kakristianuan, ti lei·tour·giʹa ti nagtaudan ti sao a “liturhia.”a Nupay kasta, saan a pudpudno a makagunggona a publiko a panagserbi dagiti pormal a liturhia ti Kakristianuan.

5, 6. (a) Ania a publiko a panagserbi ti maar-aramid idi idiay Israel, ket ania dagiti pagimbaganna? (b) Ania a nasaysayaat nga amang a publiko a panagserbi ti simmukat iti daydiay maar-aramid idi idiay Israel, ken apay?

⁵ Iti panangdakamatna iti papadi ti Israel, inaramat ni apostol Pablo ti Griego a sao a nainaig iti lei·tour·giʹa. Kinunana: “Tunggal padi agsaad iti lugarna iti inaldaw-aldaw tapno mangipaay iti publiko a panagserbi [maysa a porma ti lei·tour·giʹa] ken tapno idatonna a masansan dagiti isu met laeng a sakripisio.” (Hebreo 10:11) Nagpateg ti publiko a panagserbi nga ar-aramiden idi dagiti papadi a Levita idiay Israel. Isuda ti nangisuro iti Linteg ti Dios ken nangidatag kadagiti sakripisio a pangabbong kadagiti basol ti umili. (2 Cronicas 15:3; Malakias 2:7) Idi tinungpal dagiti papadi ken umili ti Linteg ni Jehova, kas nasion adda ti panggapuanda nga agrag-o.​—Deuteronomio 16:15.

⁶ Ti publiko a panagserbi iti sidong ti Linteg ket pudno a maysa a pribilehio kadagiti papadi ti Israel, ngem awanen ti mamaay ti panagserbida idi nailaksid ti Israel gapu ta saanda a nagtalinaed a matalek. (Mateo 21:43) Adda nasaysayaat nga amang nga inyurnos ni Jehova​—ti publiko a panagserbi ni Jesus, ti naindaklan a Nangato a Padi. Maipapan kenkuana, mabasatayo: “Gapu iti panagtultuloyna a sibibiag iti agnanayon adda kinapadina nga awanan kadagiti asinoman a kasuno. Gapuna kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.”​—Hebreo 7:24, 25.

7. Apay a mangyeg kadagiti naisangsangayan a bendision ti publiko a panagserbi ni Jesus?

⁷ Agnanayon nga agtalinaed ni Jesus kas padi, nga awanan kadagiti kasuno. Isu laeng ngarud ti makaisalakan a naan-anay kadagiti tattao. Ar-aramidenna dayta awan kaaspingna a publiko a panagserbi, saan nga iti aramid-tao a templo, no di ket iti antitipiko a templo, ti naindaklan nga urnos ni Jehova iti panagdayaw a nangrugi idi 29 K.P. Agserserbi itan ni Jesus iti Kasasantuan a paset dayta a templo, idiay langit. Isu ket “maysa a publiko nga adipen [lei·tour·gosʹ] ti nasantuan a disso ken ti pudno a tolda, nga imbangon ni Jehova, ket saan a ti tao.” (Hebreo 8:2; 9:11, 12) Nupay natan-ok ti saad ni Jesus, kaskasdi nga isu ket “maysa a publiko nga adipen.” Us-usarenna ti nabileg nga autoridadna tapno mangted, saan a tapno umawat. Ket pagrag-oanna ti kasta a panangted. Paset dayta ti “rag-o a naikabil iti sanguananna” ken dayta ti nangpabileg kenkuana nga agibtur iti unos ti panagbiagna ditoy daga.​—Hebreo 12:2.

8. Kasano nga inaramid ni Jesus ti publiko a panagserbi a simmukat iti Linteg ti tulag?

⁸ Adda maysa pay a paset ti publiko a panagserbi ni Jesus. Insurat ni Pablo: “Nagun-odan ni Jesus ti ad-adda a nakasaysayaat a publiko a panagserbi, iti kasta isu met ti manangibabaet iti maitupag a nasaysayaat a tulag, a legal a naipasdek kadagiti nasaysayaat a karkari.” (Hebreo 8:6) Imbabaet ni Moises ti tulag a nakaibatayan ti relasion ti Israel ken Jehova. (Exodo 19:4, 5) Imbabaet ni Jesus ti baro a tulag, a babaen iti dayta naipasngay ti maysa a baro a nasion, “ti Israel ti Dios,” a buklen dagiti napulotan iti espiritu a Kristiano a naggapu iti adu a nasion. (Galacia 6:16; Hebreo 8:8, 13; Apocalipsis 5:9, 10) Anian a nagsayaat dayta a publiko a panagserbi! Anian a ragsaktayo ta naam-ammotayo ni Jesus, maysa a publiko nga adipen, a babaen kenkuana makapagdayawtayo ken Jehova iti makaay-ayo a wagas!​—Juan 14:6.

Mangipapaay Met Dagiti Kristiano iti Publiko a Panagserbi

9, 10. Aniada a publiko a panagserbi ti ar-aramiden dagiti Kristiano?

⁹ Awan ti tao a makaipaay iti publiko a panagserbi a kas katan-ok ti panagserbi ni Jesus. Ngem apaman a maawat dagiti napulotan a Kristiano ti gunggonada idiay langit, maisaadda iti sibay ni Jesus ket makiramanda iti publiko a panagserbina kas ar-ari ken papadi. (Apocalipsis 20:6; 22:1-5) Nupay kasta, mangipapaay dagiti Kristiano ditoy daga iti publiko a panagserbi, ket pagragsakanda unay nga aramiden dayta. Kas pagarigan, idi nagkurang ti taraon idiay Palestina, insangpet ni apostol Pablo dagiti donasion nga inted dagiti kakabsat idiay Europa a kas tulong kadagiti agrigrigat a Judio a Kristiano idiay Judea. Maysa dayta a publiko a panagserbi. (Roma 15:27; 2 Corinto 9:12) Iti kaaldawantayo, maragsakan dagiti Kristiano nga agserbi iti umasping a pamay-an, a tumulong a dagus kadagiti kakabsatda nga agsagsagaba gapu iti rigat, natural a didigra, ken dadduma pay a kalamidad.​—Proverbio 14:21.

¹⁰ Dinakamat ni Pablo ti sabali pay a publiko a panagserbi idi insuratna: “Uray pay no maiparparukpokak a kasla daton nga inumen iti rabaw ti sakripisio ken publiko a panagserbi a nangiturongan kadakayo ti pammati, maragsakanak ken makipagrag-oak kadakayo amin.” (Filipos 2:17) Ti panagbannog ni Pablo maipuon kadagiti taga Filipos ket maysa a publiko a panagserbi a naipaay buyogen ti ayat ken kinaanep. Maar-aramid met ita ti umasping a publiko a panagserbi, nangruna iti biang dagiti napulotan a Kristiano, nga agserserbi kas “matalek ken masirib nga adipen,” a mangipapaay iti naespirituan a taraon iti umiso a tiempo. (Mateo 24:45-47) Maysa pay, kas grupo, dagitoy ti mangbukel iti “nasantuan a kinapadi,” a natudingan a ‘mangidaton kadagiti naespirituan a sakripisio a maawat iti Dios baeten ken Jesu-Kristo’ ken ‘mangideklara a sisasaknap iti kinatan-ok daydiay nangayab [kadakuada] manipud iti kinasipnget nga agturong iti nakaskasdaaw a lawagna.’ (1 Pedro 2:5, 9) Kas ken Pablo, pagrag-oanda dagita a pribilehio bayat nga ‘iparparukpokda ti bagbagida’ tapno matungpalda dagiti annongenda. Ken kabinnuligda dagiti kakaduada a “sabsabali a karnero” a mangipakaammo iti sangatauan iti maipapan ken ni Jehova ken kadagiti panggepna.b (Juan 10:16; Mateo 24:14) Anian a naindaklan ken makaparagsak dayta a publiko a panagserbi!​—Salmo 107:21, 22.

Panangipaay iti Sagrado a Panagserbi

11. Kasano a nangipaay ni propetisa Ana iti nasayaat nga ulidan para iti amin a Kristiano?

¹¹ Ti maysa pay a Griego a sao a nainaig iti panagdayawtayo ket la·treiʹa, a naipatarus a “sagrado a panagserbi” iti New World Translation. Ti sagrado a panagserbi ket adda pakainaiganna iti panagdayaw. Kas pagarigan, nadeskribir ti 84 ti tawenna a balo ken propetisa a ni Ana a “saan a pulos limmanglangan idiay templo, a mangipapaay iti sagrado a panagserbi [Griego a sao a nainaig iti la·treiʹa] iti rabii ken aldaw buyogen dagiti panagayunar ken ar-araraw.” (Lucas 2:36, 37) Awan sarday a nagdaydayaw ni Ana ken Jehova. Maysa ni Ana a nasayaat nga ulidan para kadatayo amin​—agtutubo ken nataengan, lallaki ken babbai. Kas ken Ana a sipapasnek a nagkararag ken ni Jehova ken regular a nagdaydayaw idiay templo, ti sagrado a panagserbitayo iramanna ti panagkararag ken pannakigimong.​—Roma 12:12; Hebreo 10:24, 25.

12. Ania ti maysa a napateg a paset ti sagrado a panagserbitayo, ket kasano a maysa met daytoy a publiko a panagserbi?

¹² Dinakamat ni apostol Pablo ti maysa a napateg a paset ti sagrado a panagserbitayo idi insuratna: “Ti Dios, a pangipaayak iti sagrado a panagserbi buyogen ti espirituk mainaig iti naimbag a damag maipapan iti Anakna, isu ti saksik no kasano nga awan ressatna a dakamatenkayo a kankanayon iti karkararagko.” (Roma 1:9) Wen, ti panangikasaba iti naimbag a damag ket saan laeng a publiko a panagserbi kadagidiay dumngeg iti dayta no di pay ket panagdayaw ken ni Jehova a Dios. Mangipangag man dagiti tattao wenno saan, ti trabaho a panangasaba ket sagrado a panagserbi ken Jehova. Mangyeg kadatayo iti dakkel a rag-o ti panangisarsaritatayo kadagiti dadduma iti maipapan iti agkakaimbag a galad ken nakaay-ayat a panggep ti patpatgentayo a nailangitan nga Ama.​—Salmo 71:23.

Sadino ti Pangipaayantayo iti Sagrado a Panagserbi?

13. Ania ti namnama dagidiay mangipapaay iti sagrado a panagserbi iti makin-uneg a paraangan ti naespirituan a templo ni Jehova, ket siasino dagiti makipagrag-o kadakuada?

¹³ Insurat ni Pablo kadagiti napulotan a Kristiano: “Yantangay awatentayo ti maysa a pagarian a di mabalin a gunggonen, itultuloytayo koma ti maaddaan iti di kaikarian a kinamanangaasi, a babaen iti dayta mangipaaytayo iti sagrado a panagserbi a makaay-ayo iti Dios buyogen ti nadiosan a buteng ken panagamak.” (Hebreo 12:28) Buyogen ti natalged a namnamada a makipagtawid iti Pagarian, di maisin ti pammati dagiti napulotan bayat nga agdaydayawda iti Kangatuan. Isuda laeng ti makaipaay kenkuana iti sagrado a panagserbi iti Nasantuan a siled ken makin-uneg a paraangan ti naespirituan a templo ni Jehova, ken sigagagar a namnamaenda ti agserbi a kadua ni Jesus iti Kasasantuan, idiay langit a mismo. Makipagrag-o kadakuada dagiti kakaduada, ti klase sabsabali a karnero, gapu iti naisangsangayan a namnamada.​—Hebreo 6:19, 20; 10:19-22.

14. Kasano a mabenepisiaran ti dakkel a bunggoy iti publiko a panagserbi ni Jesus?

¹⁴ Ngem komusta ngay ti sabsabali a karnero? Kas nasirmata ni apostol Juan, dakkel a bunggoy kadakuada ti nagparangen kadagitoy maudi nga al-aldaw, ken “linabaanda dagiti pagan-anayda ket pinapudawda ida iti dara ti Kordero.” (Apocalipsis 7:14) Kayat a sawen daytoy a, kas kadagiti napulotan a padada a managdaydayaw, ipakpakitada ti pammati iti publiko a panagserbi ni Jesus, ti panangidatonna iti perpekto a natauan a biagna maipaay iti sangatauan. Mabenepisiaran met dagiti sabsabali a karnero iti publiko a panagserbi ni Jesus agsipud ta ‘salsalimetmetanda ti tulag [ni Jehova].’ (Isaias 56:6) Pudno, saanda a karaman iti baro a tulag, ngem salsalimetmetanda dayta babaen ti panangtungpalda kadagiti linteg a nainaig iti dayta ken pannakitunosda kadagiti urnos a naaramid babaen iti dayta. Makitimtimpuyogda iti Israel ti Dios, nga agkakapanganda iti maymaysa a naespirituan a lamisaan ken makibimbinnulig kadagiti miembrona, nga idaydayawda ti Dios iti publiko ken mangipapaay kadagiti naespirituan a daton a makaay-ayo kenkuana.​—Hebreo 13:15.

15. Sadino ti pangipapaayan ti dakkel a bunggoy iti sagrado a panagserbi, ket kasano nga apektaran ida daytoy a bendision?

¹⁵ Iti kasta, nailadawan ti dakkel a bunggoy a ‘sitatakder iti sanguanan ti trono ken iti sanguanan ti Kordero, a sikakawesda kadagiti puraw a pagan-anay.’ Maysa pay, “addada iti sanguanan ti trono ti Dios; ket mangipapaayda ti sagrado a panagserbi kenkuana iti aldaw ken rabii idiay templona; ket Daydiay situtugaw iti trono isalukobnanto kadakuada ti toldana.” (Apocalipsis 7:9, 15) Idiay Israel, nagdaydayaw dagiti proselita iti makinruar a paraangan ti templo ni Solomon. Iti umasping a pamay-an, agdaydayaw ti dakkel a bunggoy ken Jehova iti makinruar a paraangan ti naespirituan a templona. Pagrag-oanda ti agserbi iti dayta a disso. (Salmo 122:1) Uray inton naawaten ti maudi kadagiti napulotan a kakaduada ti tawidna sadi langit, agtultuloy a mangipaayda iti sagrado a panagserbi ken Jehova kas tattaona.​—Apocalipsis 21:3.

Di Makaay-ayo a Sagrado a Panagserbi

16. Aniada a ballaag ti naipaay maipapan iti sagrado a panagserbi?

¹⁶ Idi kaaldawan ti nagkauna nga Israel, nasken a maitunos kadagiti linteg ni Jehova ti sagrado a panagserbi. (Exodo 30:9; Levitico 10:1, 2) Kasta met ita, adda dagiti masapul a tungpalen tapno makaay-ayo ken Jehova ti sagrado a panagserbitayo. Dayta ti gapuna nga insurat ni Pablo kadagiti taga Colosas: “Dikam namingga a mangikarkararag kadakayo ken agdawdawat tapno mapnokayo koma iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnakayo a maikari ken Jehova maipaay iti panggep a panangay-ayo a naan-anay kenkuana bayat nga agtultuloykayo nga agbunga iti tunggal naimbag nga aramid ket rumang-aykayo iti umiso a pannakaammo iti Dios.” (Colosas 1:9, 10) Saan a datayo ti mangikeddeng iti umiso a wagas ti panagdayaw iti Dios. Nasken ti umiso a pannakaammo iti Kasuratan, naespirituan a pannakaawat, ken nadiosan a sirib. Ta no saan a kasta, mabalin a dakes ti pagbanagan dagiti bambanag.

17. (a) Kasano a naballikug ti sagrado a panagserbi idi kaaldawan ni Moises? (b) Kasano a ti sagrado a panagserbi ket mabalin a di umiso ti pakaituronganna ita?

¹⁷ Laglagipenyo dagiti Israelita idi kaaldawan ni Moises. Mabasatayo: “Timmallikud ti Dios ket inyawatna ida tapno mangipaayda iti sagrado a panagserbi iti buyot ti langit.” (Aramid 7:42) Nakita dagidi nga Israelita ti adu a nakaskasdaaw nga inaramid ni Jehova maipaay kadakuada. Ngem nagdayawda kadagiti sabali a didios idi impagarupda a pagimbaganda dayta. Saanda a nasungdo, idinto ta nasken ti kinasungdo tapno makaay-ayo iti Dios ti sagrado a panagserbitayo. (Salmo 18:25) Pudno, manmano ita ti tumallikud ken Jehova tapno agdaydayaw kadagiti bituen wenno iti balitok a sinan-urbon ti baka, ngem adda dadduma pay a kita ti idolatria. Namallaag ni Jesus maipapan iti panagserbi iti “Kinabaknang,” ket inawagan ni Pablo nga idolatria ti kinaagum. (Mateo 6:24; Colosas 3:5) Itantan-ok ni Satanas ti bagina kas dios. (2 Corinto 4:4) Gagangay dagita a kita ti idolatria ket palab-og dagitoy. Panunotenyo, kas pagarigan, ti maysa a tao nga agkunkuna a pasurot ni Jesus ngem ti agpayso a kalatna iti biag isu ti panagpabaknang wenno ti agpayso a pagtalkanna ket ti bagina ken dagiti bukodna a kapanunotan. Siasino a talaga ti pagserserbianna? Adda kadi nakaidumaanna kadagiti Judio idi kaaldawan ni Isaias a nagsapata iti nagan ni Jehova ngem dagiti narugit nga idolo ti imbagada a makin-gapuanan kadagiti naindaklan nga aramidna?​—Isaias 48:1, 5.

18. Kasano a di umiso ti pannakaannurot ti sagrado a panagserbi iti napalabas ken iti kaaldawantayo?

¹⁸ Namallaag pay ni Jesus: “Um-umayen ti oras inton tunggal maysa a mangpapatay kadakayo pagarupennanto a nakaipaay iti sagrado a panagserbi iti Dios.” (Juan 16:2) Ni Saulo, a nagbalin a ni apostol Pablo, awan duadua nga impagarupna nga agserserbi iti Dios idi ‘inanamonganna ti pannakapapatay ni Esteban’ ken ‘nangyesngaw iti pamutbuteng ken panangpapatay a maibusor kadagiti adalan ti Apo.’ (Aramid 8:1; 9:1 ) Iti tiempotayo, ibagbaga met ti dadduma kadagiti mangpappapatay kadagiti saanda a katribuan nga agdaydayawda iti Dios. Adu a tattao ti agkunkuna nga agdaydayaw iti Dios, ngem iti kinapudnona naiturong ti panagdayawda kadagiti dios a nasionalismo, tribalismo, kinabaknang, bukod a bagi, wenno iti sabali pay a didiosen.

19. (a) Kasano ti panangmatmattayo iti sagrado a panagserbitayo? (b) Ania a sagrado a panagserbi ti mangyeg kadatayo iti rag-o?

¹⁹ Kinuna ni Jesus: “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.” (Mateo 4:10) Kasasaona idi ni Satanas, ngem anian a nagpateg nga ipangagtayo amin ti imbagana! Natan-ok ken nadayaw a pribilehio ti sagrado a panagserbi iti Soberano nga Apo ti uniberso. Ket ania ti makunatayo maipapan iti publiko a panagserbi a nainaig iti panagdayawtayo? Ti panangaramid iti daytoy nga agpaay iti pagimbagan dagiti padatayo a tattao ket naragsak a trabaho a mangyeg iti dakkel a rag-o. (Salmo 41:1, 2; 59:16) Kaskasdi, masagraptay laeng ti napaypayso a ragsak no naimpusuan ken umiso ti wagas ti panagserbitayo. Siasino dagiti pudno nga agdaydayaw iti Dios iti umiso a pamay-an? Siasino dagiti mangipapaay iti sagrado a panagserbi a makaay-ayo ken Jehova? Masungbatantayo dagita a saludsod no usigentayo ti maikatlo a sao iti Biblia a nainaig iti panagdayawtayo. Usigentayo dayta iti sumaganad nga artikulo.

[Footnotes]

Kasanoyo a Sungbatan?

• Ania a naindaklan a publiko a panagserbi ti inaramid ni Jesus?

• Aniada a publiko a panagserbi ti ar-aramiden dagiti Kristiano?

• Ania ti Nakristianuan a sagrado a panagserbi, ket sadino a maar-aramid dayta?

• Ania ti nasken a gun-odentayo tapno makaay-ayo iti Dios ti sagrado a panagserbitayo?

[Ladawan iti panid 10]

Pagrag-oan unay dagiti nagannak ti mangted

[Dagiti Ladawan iti panid 12, 13]

Mangipapaay dagiti Kristiano iti publiko a panagserbi no tulonganda dagiti sabsabali ken no iwaragawagda ti naimbag a damag

[Ladawan iti panid 14]

Kasapulantayo ti umiso a pannakaammo ken pannakaawat tapno masigurado a makaay-ayo iti Dios ti sagrado a panagserbitayo